Setu echu 2016 ha c’hoant ganin da gomz diwar-benn Soubenn ar Geek. Ouzhpenn c’hwec’h vloaz eo ar blog-mañ bremañ. Daoust din bezañ bevet ur bloavezh sioul pe dost (beaj bras ebet, ezhomm ebet da glask labour pe cheñchamant bras ebet e keñver labour ha lec’h bevañ, estreget un dilojadeg) eo bet ar bloaz rouesañ e keñver skrivañ pennadoù. Koulskoude ‘m eus bet lennet, sellet, c’hoariet kement hag ar bloavezhioù all.
Anzav a ran on bet diskaret ha n’eo ket marteze gant ur postel dizanv am boa resevet e miz Ebrel. Me oar a-walc’h eo arabat reiñ re a bouez da seurt traoù. Pezh a zo, n’eus ket kalz traoù all a lak ac’hanon da soñjal e servij ma blog d’un dra bennak, setu on techet da grediñ er pezh a oa bet lâret er postel-se, evit lodennoù zo. Sur on n’eo ket mat ma live brezhoneg (met se a ouien a-walc’h dija ha kendrec’het on e c’hall pep hini mont da lec’h all ma kav ken spontus-se ma yezh, pe kas evezhiadennoù/posteloù madelezhus evit sikour ac’hanon da wellaat). Techoù fall a zo ganin, ur bern, levezonet on dre ret gant ar galleg pe ar saozneg, pep lec’h tro deomp. Piv n’eo ket? Deskiñ a ran ha klask a ran chom hep ober ar fazioù bet lâret din jentil en dro met plegoù fall a chom bepred ha n’on ket en un endro brezhoneger em buhez pemdez ken. Pe ket e memes stumm da vihanañ. Sur on e cheñch an dra-se un dra bennak.
Ma. N’on ket paouezet da lenn, da sellet ha da c’hoari neuze met an niver a vrouilhedoù pennadoù em blog a zo kresket ha kresket hep na gavfen kalz youl evit sevel anezho e gwirionez. Klasket ‘m eus mirout un nozvezh ar sizhun evit skrivañ pennadoù pe c’hoazh skrivañ ma fennadoù DIOUZHTU (an diskoulm kazi gwellañ evidon-me) met skuishoc’h-skuishañ e oan bepred hag an dale bet tapet na deuen ket a-benn da adtapout james.
Un deiz bennak e lâris da Dornoz «c’hoant ‘m eus da c’hoari da d/Tomb Raider met ret eo din skrivañ pennadoù evit SaG» hag e respontas din «ma vir ar blog ac’hanout da ober ar pezh a fell dit ober n’eo ket mat» (tamm-pe-damm). Ur sapre flac’had e voe evidon rak re wir e oa. ‘M eus aon eo kollet ganin ar blijadur da skrivañ evit SaG. Ul lodenn eus ar blijadur hepken rak da vareoù zo e fell din ober memestra hag e ran, laouen. Met daoust ha ret eo din skrivañ diwar-benn pep tra? N’eo ket. Klask a ran aozañ gwelloc’h ma amzer met n’on ket deuet a-benn evit c’hoazh. Klask a ran ivez mont war-raok gant raktresoù krouiñ all am eus war ar stern abaoe pell, ur romant hag ur c’hoari video (testenn hañ). N’an ket kalz war-raok kennebeut.
Un dra all a zo, un emdroadur a vez kavet er bed a-bezh, emdroadur ar rouedad dre vras : sklaer eo n’a ket an dud kement da lenn blogoù ken met ne fell ket din sevel ur chadenn Youtube evit reiñ ma alioù. Seblantout a ra din bezañ ul labour kalz startoc’h (ouzhpenn skrivañ e vo ret filmañ ha frammañ!) ha ne fell ket din en ober. Ne fell ket din prenañ dafar, n’eo ket ma fal. Ne fell ket din diskouez ma fenn, klask sonerezh ha pep tra a c’hall bezañ gortozet eus ur chadenn YouTube kronikennoù sevenadurel. Ma fal a oa skrivañ reoliek diwar-benn ar produoù sevenadurel a vevezan.
An diouer a evezhiadennoù a zo digalonekaus ivez, un tammig. Lakaat a ra da soñjal n’eus den ebet o lenn. N’eo ket dre ret ur gudenn, me kennebeut ne laoskan ket evezhiadennoù goude pep pennad a lennan war blogoù all. Pezh a zo e kavan start gwelet ‘m eus muioc’h a spam eget a evezhiadennoù ha dreist-holl gwelet kemennoù pozitivel, kalonekaus (blaz «motivational» ganto) er spam-se. Gouelet ‘m eus dourek abalamour d’ur brezhoneger, ur gwir den en doa kollet kalz amzer da lârat din pebezh den euzhus e oan, soñjal a ran bemdez pe dost er gerioù-se, o soñjal devezhioù zo ne servij da vann ebet skrivañ e brezhoneg diwar-benn produoù sevenadurel, n’eo nemet ur c’holl amzer peogwir n’eus brezhoneger all ebet dedennet gant seurt traoù met mousc’hoarzhin a ran reoliek peogwir on entanet gant frazennoù madelezhus robotoù rusian pe amerikan… Trugarez robotoù ar bed da reiñ kalon din, ar vrezhonegerien ha gwir lennerien ne reont ket avat. Daoust ha skrivañ a ran evit robotoù na gomzont ket brezhoneg? Ne gav ket din… 😦
Ma fal nevez a zo kenderc’hel da skrivañ reoliek met hep n’em santout ken kablus ma ne ran ket. Gant ar spi e vo tud c’hoazh evit ma lenn ur wech an amzer, hag evit reiñ o ali da vareoù all, kuit din da soñjal e komzan ma unan evel ar c’hozh follez ma ‘z on, moarvat.
Ra vo seder ha brav 2017 evidoc’h ha leun a levrioù, filmoù, levrioù bannoù-treset, c’hoarioù video, stiradoù da zizoloiñ!
Komzomp e brezhoneg diwar-benn an danvezioù a garomp, daoust da bep tra!