Archive for the Degemer Category

Etienne

Posted in Levrioù with tags , , , on Gouere 7, 2020 by geekezig

Ur mennozh mat eo kinnig romantoù “aes da lenn” evit sikour an dud o teskiñ pe a grog da lenn e brezhoneg. Islinennañ ar c’hemmadurioù, merkañ ar gerioù benel gant ur steredenn ha kalz geriaoueg displeget, setu an dibaboù bet graet gant ti-embann Keit Vimp Bev evit an dastumad resis-se. Evit an dud n’o deus ket ezhomm anezho n’eo ket ur gwall afer me gav, goude un nebeut linennoù ne welen ket anezho ken, kudenn ebet evit lenn en un doare eeun neuze.

Galvet e vez Mael dre fazi, abalamour d’un treuz-kompren. Ur c’houblad a glask war-lerc’h o mab, torret an darempred etrezo pell zo. Emañ ar vaouez war he zalaroù ha fellout a rafe dezhi gwelet he mab ur wech c’hoazh. Gwreg Mael an hini a vez tapet en enklask a-benn ar fin.
Hegaset on bet gant an tech implij troiennoù gallek da vat “dorn glas”, “roet am eus ma 06”, unan bep pajenn pe dost.
Un tamm re verr e oa an istor d’am meno, mankout a rae un tamm danvez ha darvoudoù etre bezañ bet kavet darempred Laurie hag ar c’hlozadur met plijus eo bet lenn an istor hag ur mennozh mat e seblant din an dastumad “aes da lenn”-se.

Romant skrivet gant Yann-Fañch Jacq. Embannet gant Keit Vimp Bev d’an 12 a viz Kerzu 2018.

Tickled

Posted in Filmoù with tags , , , , on Gouere 6, 2020 by geekezig

Un teulfilm iskis eo Tickled. Kregiñ a ra abalamour e oa souezhet ur c’helaouenner eus Zeland-Nevez gant krogadoù “sport” gant paotred o vezañ hilliget er Stadoù-Unanet. En ur glask hiroc’h e resev kemennadennoù drouk, leun a gasoni. Perak ta? Daoust ha traoù kuzh a zo a-dreñv d’ar c’henstrivadegoù-se ? Sed aze pezh a glasko ar c’helaouenner gouzout.
Un enklask dic’hortoz bras eo neuze hag ur film na gomz ket kement-se eus ur “fetich” (buan-ha-buan e vez graet) met kentoc’h diwar-benn un den pinvidik (galloudus neuze) trenket ha sorc’hennet. Souezhus-kenañ!

Teulfilm sevenet gant David Farrier ha Dylan Reeve. Zeland-Nevez, 2016, 1e32. (skignet gant Netflix e Frañs)

Our Summer Holiday

Posted in Levrioù bannoù-treset with tags , , , , , , on Even 14, 2020 by geekezig

Ur manga fromus eo Our Summer Holiday, leun a varzhoniezh hag a velkoni. An haroz a vev gant e vamm. Plijout a ra kalz ar velldroad dezhañ met ar gourdoner nevez a zo re start ha koll a ra tamm-ha-tamm ar blijadur da c’hoari. P’eo dav dezhañ mont d’ur staj e-pad ar vakañsoù e ra van mont met e gwirionez e tremeno ar sizhun gant ur vignonez eus e glasad a vev hec’h unan gant he breur bihan. Pesketaer eo he zad ha ne vez ket aze alies. Ur vuhez den deuet a zo ganti dija, ret eo dezhi ober prenadennoù ha diwall mat rak an dispignoù. Ur prantad brav a dremenfont asambles o zri.
Ur sell kriz eo war ar gevredigezh e bro Japan, tud en ur saviad sokial dister. E gwirionez am eus soñjet e film KORE-EDA Hirokazu Une affaire de famille meur a wech en ur lenn ar manga. An div oberenn a guzulian deoc’h lenn ha gwelet.Istor ha tresadennoù gant OZAKI Kaori. Embannet e galleg e ti Delcourt/Tonkam, d’ar 7 a viz Even 2017.

Tully

Posted in Filmoù with tags , , , on Even 11, 2020 by geekezig

Pa c’han trede bugel Marlo e soñj dezhi e teuio a-benn da verañ pep tra met he breur a ginnig dezhi paeañ un diwallerez a zeu diouzh an noz, evit ma c’hallfe hi kousket. Divizout a ra Marlo profitañ eus ar prof-se. Buan e teu da vezañ aesoc’h he buhez a-drugarez da d/Tully, muioc’h a basianted he deus gant he bugale, dont a ra a-benn da verañ an traoù en ti, er skol…
N’eo ket fentus Tully, nag ur film “feel-good” evel ma lake ar bruderezh da grediñ. Ur film a ziskouez en un doare gwir a-walc’h pegen digenvez e c’hall ur vamm en em santout, pegent diseblant a c’hall hec’h endro bezañ. Santet e vez mat pegen poanius eo korf Charlize Theron, pegen skuizh eo Marlo gant an disterañ tra, ha pegent ordinal e rank bezañ. Souezhus eo e seblantfe ken ral ur poltred a-seurt-se…

Film sevenet gant Jason Reitman. Stadoù-Unanet Amerika, 2018, 1e36.

Aspirine 1

Posted in Levrioù bannoù-treset with tags , , on Even 8, 2020 by geekezig

N’ouzon ket perak e kendalc’hin da grediñ start e plijo din labour Joann Sfar un deiz bennak. Lennet am boa e deizlevr diwar-benn festival Cannes gant ar soñj-se hag Aspirine ar wech-mañ. Aspirine a zo 17 vloaz, abaoe 300 vloaz. Ur sunerez-wad krennardez da viken. Leun a gounnar, erru fae gant ur morad a draoù, bepred o lazhañ tud diabeg.
N’on ket sot gant tresadennoù Joann Sfar (abaoe ma bugaleaj gant Petit vampire), n’on ket bet plijet gant an tudennoù kennebeut. Un tammig fent a zo met kavout a ran re foutouilhek an istor, a chom diwar c’horre ha hep kalz a ijin. Ma. N’on ket sur e klaskin en-dro gant e labour…Istor ha tresadennoù gant Joann Sfar. Embannet gant Rue de sèvres d’ar 6 a viz Even 2018.

Green Book

Posted in Filmoù with tags , , , , , , , on Even 1, 2020 by geekezig

Green Book a zo savet diwar ur gwir istor. Film kentañ Peter Farrelly e unan eo, hep e vreur Bobby.
Ur film dudius eo, a dremen evel un tenn.
E New York e 1962, emañ Frank Vallelonga o klask labour evit un daou viz bennak, peogwir e vo serret ar voest noz e lec’h ma labour da gustum. Kinniget ‘vez dezhañ bezañ blenier un arzour e-pad e droiad : Don Shirley. Ur soner piano meur eo, un den du eo ivez, neuze ez eus lec’hioù difennet dezhañ e stadoù Su ar Stadoù-Unanet. Dav ‘vo da Frank lenn ar “green book” (un doare levr hentañ a lâre peseurt lec’hioù a oa aotreet d’an dud du) evit gouzout pelec’h kas ar soner.
A-hed an hentoù e komzo an daou zen asambles, disheñvel-mik int. Ur rekipe klasel neuze, peogwir e levezono an daou zen an eil egile, hag e vo nebeutoc’h a rakvarnioù ganto e fin ar gont.
Souezhet on bet e yafe oscar ar gwellañ film gant Green Book peogwir n’eo ket ur meurdez kennebeut met plijadur ‘m eus bet o sellet ouzh ar film ha kuzuliañ a ran anezhañ a galon laouen.

Film sevenet gant Peter Farrelly. Stadoù-Unanet Amerika, 2018, 2e10.

L’atelier des sorciers 1

Posted in Levrioù bannoù-treset with tags , , , on Mae 31, 2020 by geekezig

Perak ‘ta on bet chomet ken pell hep lenn ar manga-mañ? N’ouzon ket! Brav eston eo L’atelier des sorciers. Un drugar eo sellet ouzh an tresadennoù.
Ur plac’hig bamet rak an hudouriezh eo Coco. N’eo ket ganet gant galloudoù avat setu n’hallo ket bezañ sorserez james. Un deiz bennak e teu ur sorser betek stal he mamm, arvalien o deus ezhomm sikour ha kinnig a ra reiñ an dorn dezho. Goulenn a ra en ober dre guzh avat ha Coco a rank diwall ne teufe den. Re gurius eo ar plac’hig a sellout a ra ouzh ar sorser. Kompren a ra neuze eo liammet an hudouriezh gant an tresañ, diouzh an noz e klask tresañ traoù bet gwelet ganti en ul levr, met treuzfurmiñ a ra he mamm en un delwenn maen. Divizout a ra ar sorser deskiñ dezhi an hudouriezh ha hi a fell dezhi deskiñ evit sikour he mamm. Eil lodenn ar manga a dremeno e ti ar sorser, e lec’h ma ‘z eus merc’hed all, deskardezed dija.
Darempredoù gant ar merc’hed all, abegoù iskis ar sorser da sikour anezhi, a bep seurt traoù a vo da zizoloiñ ouzhpenn bed dedennus-kenañ an hudouriezh. Ur manga dedennus, dudius, brav. Buan, dav din lenn al levrennoù all!Istor ha tresadennoù gant SHIRAHAMA Kamome. Embannet e galleg e ti Pika, d’ar 7 a viz Meurzh 2018.

Sleepless in Seattle

Posted in Filmoù with tags , , , , on Mae 26, 2020 by geekezig

Titl ar film a anavezen met ne ouien ket peseurt doare film a oa na netra. Sleepless in Seattle a zo ur gomedienn romantel eus deroù ar bloavezhioù 90, gant Tom Hanks ha Meg Ryan. You’ve got Mail a blij kalz din setu perak ket?
Sam a zo o paouez koll e wreg. Diloj a ra gant e vab Jonah da Seattle. Eus he zu, Annie a zo war-var dimeziñ gant Walter met nec’het eo gant an diouer a “hudouriezh” en he c’houblad. Klevout a ra Sam er radio da vare Nedeleg, o komz diwar-benn e gañv. Jonah a fellfe dezhañ e rafe e dad anaoudegezh gant ur plac’h, setu perak en doa pellgomzet ar bugel d’ar radio. Ur sapre berzh en deus graet Sam an noz-se ha resev a ra ur bern lizhiri, en o-zouez hini Annie, a grog da vezañ sorc’hennet gantañ.
Lakaet on bet diaes gant istor ar film peogwir ne ra ket anaoudegezh an div dudenn james. A-benn ar fin eo ur film stalker penn-da-benn. ‘Meus aon eo koant peogwir eo ur plac’h a glask war lerc’h ar paotr. Daoust da se eo moutik (dreist-holl a-drugarez da dudenn Jonah) met re duet war ar blanedenn, an tonkadur, hudouriezh digomprenus ar garantez. Romantel da vat met poanius un tamm. N’on ket evit krediñ e c’hallfe an istor karantez-se padout goude ar film 😀
Ma, n’eo ket displijus kennebeut, fent a zo met dipitet on bet, dreist-holl o soñjal e You’ve Got Mail. Evel-se-mañ!

Film sevenet gant Nora Ephron. Stadoù-Unanet Amerika, 1993, 1e45.

Miss Sloane

Posted in Filmoù with tags , , , on Mae 3, 2020 by geekezig

Ne oan ket bet dedennet a-walc’h evit mont da welet Miss Sloane er sinema.
Ur film diwar-benn ur plac’h a labour e metoù al lobioù, er Stadoù-Unanet eo. Ur plac’h speredek ha yen, a seblant bezañ dedennet gant gounit emgannoù ha n’eo ket kement-se gant reizh pe direizh eo ar pezh a ra. Souezhet bras eo an holl tro-dro dezhi avat pa tiskouez pas kaout c’hoant sikour lobi an armoù a glask tallañ ouzh ul lezenn o c’houlenn muioc’h a reolennoù tro-dro da werzh an armoù. Mont a ra neuze da labourat gant ur strollad bihan ha gant kalz nebeutoc’h a skiant-prenet.
Adalek deroù ar film e oar ar seller-ez eo trenket an traoù eviti peogwir ez eus ur prosez ha testenioù a enep dezhi. Ar prosez a vo gwelet a bep eil gant displegadennoù diwar-benn an “emgann” tro-dro da lezenn an armoù. Un doare fin da frammañ an traoù evit kaout souezhadennoù e fin ar film. Klasel-tre ar rekipe met efedus bepred. En tu hont da se, Jessica Chastain a zo bamus ha dedennus ‘m eus kavet taolenn ar metoù-se (politikel/lobi), gant poltredoù a bep seurt, tud dedennet gant an doare da c’hounit, ar c’hoari, met ivez reoù gant gwir kredennoù.

Film sevenet gant John Madden, Frañs & Stadoù-Unanet Amerika, 2016, 2e07.

Un couteau dans le cœur

Posted in Filmoù with tags , , , , , on Meurzh 28, 2020 by geekezig

Kuzuliet e oa bet din Un couteau dans le cœur gant ur mignon. Ne ouien ket nag eus petra oa kaoz na mann ebet, dianav e oa ar film din.
E fin ar bloavezhioù 70 e Pariz e vez muntret paotred a gemer perzh e filmoù Anne Parèze, produourez filmoù erotek heñvelreviad. Ar polis ne seblant ket kavout mallus an enklask setu e klasko Anne gouzout hiroc’h ha kompren perak eo he embregerezh a vez taget.
Ur film souezhus eo, en enor da filmoù an giallo (doare filmoù italian, meskaj film polis, film erotek ha film spont). An elfennoù-se a vez kavet e film Yann Gonzalez, gwir eo.
Un tamm lakaet diaes e oa, rak evidon e oa war ar vevenn, un nanar kazi. Mennozhioù film arnod a zo, met traoù a ra cheap kentoc’h eget e gwirionez dibabet me gav (an hunvreoù evel skeudennoù negativel da skouer). Re dort en deus seblantet din an istor ha n’on ket bet bamet kement-se gant Vanessa Paradis e-barzh. D’am meno n’on ket gouest da welet perzhioù mat ar film-se, setu ne guzulfen da zen, estreget marteze ar re a blij kalz dezho filmoù an giallo hag o do moarvat an daveoù evit kompren Un couteau dans le cœur.

Film sevenet gant Yann Gonzalez. Frañs, Suis ha Mec’hiko, 2018, 1e42.

%d bloggers like this: