Archive for the C'hoarioù video Category

Yûrei Station

Posted in C'hoarioù video with tags , , on Eost 23, 2017 by geekezig

Ur c’hoari bihan tout eo Yûrei Station. Eeun-kenañ eo ha berr-tre (20 munut ‘m eus me lakaet).
War vourzh un tren e krog an traoù. Dizoloet ‘vez kemennadennoù souezhus hag an harozez a zo o klask kavout ur respont bennak.
Ur c’hoari bet savet gant Atelier Sentô eo hag an tresadennoù ‘zo bet graet e korf 2 devezh stal-labour gant 25 lisead eus Naoned e miz Meurzh 2017.
Santet e vez ul levezon eus istorioù tasmantoù japanat. Daoust d’an doare eeun da vont war-raok (klikañ hepken, un nebeut “luziadelloù” simpl-tre) on bet souezhet meur a-wech ha nec’het un tamm gant an aergelc’h. Peadra da dremen ur prantadig a-feson ma plij seurt aergelc’h deoc’h en tu-hont d’ar raktres dedennus.

C’hoari point-and-click evit ur c’hoarier, diorroet hag embannet gant Atelier Sentô. Da bellgargañ hepken war Windows, Mac ha Linux, digoust, abaoe ar 6 a viz Mae 2017 : https://ateliersento.itch.io/yurei-station

Advertisements

A Normal Lost Phone

Posted in C'hoarioù video with tags , , , , on Genver 28, 2017 by geekezig

anlpdegemerUr c’hoari bihan eo A Normal Lost Phone. N’eo ket ker kennebeut : 2,99€. Ur raktres bet ganet en ur game jam evel alies ha deuet da vezañ klokoc’h neuze er stumm-mañ. Div eur pe dost ‘m eus bet ezhomm evit echuiñ ar c’hoari (lennet pep tra ha klasket an trofeoù ouzhpenn) met div eur a-feson int bet evidon. Ul “luziadell” bennak a zo bet un tamm startoc’h evit ar re all met pep tra a zo anat a-walc’h pa glasker mat, n’eo ket ar c’hoari sañset da vezañ diaes d’am meno.
Petra ‘zo kaoz neuze? Kavet ho peus ur pellgomzer. N’eo ket sparlet. Deoc’h da gavout petra ‘zo c’hoarvezet neuze. Da gentañ e c’haller gwelet ar gerigelloù hepken, ur wech kavet kod ar wifi e c’haller gwelet ar posteloù ivez, ur forom hag all. Un toullad traoù (ul lodenn eus ar forom, un arload evit kejañ gant tud hag all) a zo sparlet gant gerioù kuzh a vo ret kavout evit mont war-raok.anlppellgomzanlpgerigellouDedennus-kenañ eo an doare da c’hoari (ha c’hoazh, me oa o c’hoari war ma urzhiataer, n’ijinan ket pegen plijus e rank bezañ war ur pellgomzer!) ha liesseurt daoust d’ur mennozh “simpl”. Gwirheñvel eo (sonerezh a zo er pellgomz, skeudennoù hag all) ha kaset mat da benn. Ne vez ket komprenet pep tra diouzhtu, traoù zo o deus ur blaz nevez ur wech komprenet traoù all hag all. Temoù start a zo meneget er c’hoari avat.
Brav eo ar c’hoari ouzhpenn, plijus ar sonerezh, ur gwir aergelc’h a zo da A Normal Lost Phone en tu-hont d’ur mennozh mat. Ar prantad “forom” a zo dedennus-kenañ hag a c’hallo kelaouiñ pe marteze sikour tud a glask titouroù diwar-benn an treuzidentelezh da skouer. N’en deus ket nerzh Gone Home marteze met e guzuliañ a ran, digudenn, dreist-holl d’ar priz-se! Ur video vihan “c’hoariomp da” a blijfe deoc’h? 🙂

C’hoari testenn evit ur c’hoarier-ez diorroet gant Accidental Queens. Da c’hoari gant Windows, Mac, Android hag iOS, abaoe ar 26 a viz Genver 2017.

Heavy Rain

Posted in C'hoarioù video with tags , , , on Even 25, 2016 by geekezig

Heavy-Rain_tE-kerzh diskouezadeg ar mirdi Art Ludique (bet meneget dija e pennad Soldats Inconnus) e oa un toullad taolennoù a blije spontus din ha bep tro e oant o tont eus memes c’hoari : Heavy Rain. Ur c’hoari a oa ganin abaoe pell peogwir e oa gwerzhet gant al letrin p’am boa prenet ar PS3. Fellout a rae din c’hoari un deiz bennak met ne oan ket mennet, levezonet marteze gant ar farsadennoù diwar-benn David Cage (krouer ar c’hoari) ha da begen kozh eo ar c’hoari bremañ.
N’am eus ket bet ezhomm kalz amzer evit echuiñ Heavy Rain. Pep brasañ ar c’hoari am eus graet en un abardaevezh pe dost.
Reiñ a rin ma ali diouzhtu kuit deoc’h da vont pelloc’h ma ne fell ket deoc’h gouzout hiroc’h : tapet on bet gant Heavy Rain evel ma c’haller bezañ tapet dirak ur film polis a live etre er skinwel. Fellout a rae din gouzout hiroc’h, tudennoù zo o deus plijet din ha traoù all o deus hegaset ac’hanon spontus. Lonket eo bet ganin avat, en un doare klañvidik kazi. An aergelc’h er gêr gronnet gant ar glav (awenet gant Philadelphia war a seblant) hag ar sonerezh savet gant Normand Corbeil o deus sikouret da vat d’am soñj. Laouen on da vezañ bet betek penn ar c’hoari-mañ. N’hallan ket lârat eo ur c’hoari fall peogwir on bet tapet da vat. N’hallan ket lârat eo ur c’hoari mat peogwir ez eus ur bern techoù torr-penn hag an istor n’eo ket dispar ouzhpenn-se! Arabat eo disoñjal memestra e oa un doare dispac’h (abalamour d’ar motion capture bet implijet, ar pezh a greñva santad ar film bevaat, gant teknologiezh ur meziant anvet The Capture) d’ar mare m’eo deuet er-maez, gwirheñvel ha brav-tre e oa. Un dispac’h a oa ivez peogwir ne oa game over ebet : ma tremene fall an traoù evit un dudenn e kendalc’h an istor! Peadra da vezañ gwall enkrezet neuze! Anzav a ran e choman dedennet gant c’hoarioù David Cage daoust da bep tra ^^
Setu, neuze :
Heavy Rain a zo ur “film ma c’haller kemer perzh ennañ” ma fell deoc’h. Un istor a zo ha traoùigoù d’ober ur wech an amzer, e stumm QTE (Quick Time Event) dreist-holl ha point ‘n’ click un tamm da vareoù all. Dibaboù zo d’ober da vareoù zo a c’hallo kaout disoc’hoù disheñvel (tudennoù zo a c’hall mervel da skouer) ar steuñvenn a c’hall cheñch kalzik met elfennoù eus an istor a chomo ar memes re evel-just. Ur ben traoù SPONTUS a c’hall c’hoarvezout (am eus dizoloet en ur skrivañ ar pennad-mañ) gant dibaboù zo pe en ur c’hwitout QTE zo avat ha laouen on da vezañ chomet hep gwelet an traoù-se rak moarvat em befe kavet-se null ha feulz hag heugus evit netra. MA!heavy_raingpEthan Mars a zo chomet stroñset abaoe marv e vab, diskaret gant un oto. Treiñ a raio fall an traoù pa vo skrapet e vab all, Shawn (war ar skeudenn a-us) gant an Origami Killer, ul liesvuntrer a skrap paotredigoù hag a zilez anezho dezho da vezañ beuzet pa ra glav-bil.
Ethan Mars a vo c’hoariet evel-just, Madison Paige, ur gelaouennerez, Scott Shelby, un enklasker prevez hag un enklasker eus an FBI anvet Norman Jayden. Pep hini gant (h)e (f/)bersonelezh ha gant elfennoù ispisial ouzhpenn evit paotr an FBI a-drugarez d’e lunedoù ARI (prantadoù enklask o deus plijet kalz din ^^).heavyrainjaydenScott Shelby an hini en deus plijet din ar muiañ mod all, poliser-bet, kudennoù gant an alkool, ur vuhez start a ijiner.
Evel traoù o deus seblantet torr-penn din e oa an tech da lakaat traoù “mature” (met diezhomm) evel merc’hed en noazh. Ne lak ket an istor da vont war-raok na netra. Ur mennozh all a oa ivez gant David Cage a oa lakaat ar c’hoarier-ez da vezañ chalet gant ur prantad diwiskañ dre heg evit tudenn Madison. Ha me lâr deoc’h ne oan ket en ma aez…
Hegasus ‘m eus kavet ar QTE ivez, e gwirionez em eus spi e paouezfe seurt traoù er c’hoarioù video, re dorr-penn int >< N’on ket n’em dennet re fall koulskoude met ne blij ket se din tamm ebet.
An embannadur “Move Edition” a zo ganin met n’am eus ket ar Playstation move setu ‘m eus c’hoariet gant an dornell. Mennozhioù zo a zo mat-tre evit ar c’h/QTE hag an traoù d’ober avat rak ar jestr d’ober gant an dornell a zo heñvel ouzh an hini graet e gwir (evit digeriñ un nor da skouer).
Rann nemeti Heavy Rain Chronicles a zo gant an embannadur-mañ ivez. Sañset e oa da vezañ rannoù da bellgargañ ouzhpenn o tiskouez un tamm istor kent pep tudenn. The Taxidermist a zo hini Madison Paige. N’eo ket hir, echuet e vez en ur c’hard eur bennak gant un diskoulm. Pemp diskoulm a zo met n’on ket bet kalonek a-walc’h evit adkregiñ, ne zegase ket kalz tra evidon, komprenet ‘vez eo Madison prest d’ober traoù dañjerus evit kavout ur scoop… Pezh a c’haller kompren dija gant ar c’hoari diazez.
Diskoulm an istor a zo dister a-walc’h ha chomet on un tamm “Of? Setu tout?” un doare page turner e doare ur c’hoari eo Heavy Rain a-benn ar fin ^^

C’hoari evit 1 c’hoarier-ez, diorroet gant Quantic Dream hag embannet gant Sony Computer Entertainment. Stumm pladenn pe niverel evit Playstation 3 abaoe ar 24 a viz C’hwevrer 2010 ha Playstation 4 abaoe ar 1añ a viz Meurzh 2016. PEGI 18

Coming Out Simulator 2014

Posted in C'hoarioù video with tags , , on Mae 22, 2016 by geekezig

costitlUr c’hoari bihan en-linenn eo Coming Out Simulator 2014. Ur c’hoari en domani foran eo ivez! Kavet e vez amañ. Krouet e oa bet e kerzh ur “game jam” e miz Even 2014 a-raok bezañ ur c’hoari klok buan goude. E gwirionez n’em boa ket bet klevet komz eus ar c’hoari-se a-raok lenn rentañ-kont ur gaozeadenn a zo bet e levraoueg Václav Havel e Pariz, hag am eus c’hwitet siwazh.
Krouer ar c’hoari a ginnig deomp kemer e blas e kerzh an devezh e lec’h ma n’eus ranket anzav d’e dud e oa heñvelreviad. Nick, ouzhpenn bezañ krouer ar c’hoari, a zo un dudenn eus ar c’hoari, en digoradur hag er c’hlozadur e tispleg un tamm petra ‘vo ar c’hoari ha petra ‘zo c’hoarvezet (pe get). Goude-se e vo un heuliad kaozeadennoù, gant mignon Nick, gant e vamm hag e gerent. Estreget lenn ha dibab respontoù d’ar c’haozeadennoù n’eus netra d’ober. Ret eo diwall rak mont a ra buan a-walc’h an destenn (evel ma vefe lennet pep tra e giz gerigelloù war ur skramm poellgomzer) neuze eo ret lenn prim, n’eo ket bet anat da vareoù zo evidon. coming-outMod all n’eus netra da c’hounez pe da goll, nemet traoù da zibab, dreist-holl e tal tad ha mamm an dudenn. Prantadoù start-tre a zo bet evidon met kavet ‘m eus efedus. Da vat e oan o soñjal “met petra foeltr?” dirak dibaboù zo ha c’hoant am boa da dec’hout (evel ma ranke Nick kaout c’hoant d’ober). Ar pezh a sikour da ijinañ penaos e c’hall seurt prantad bezañ bevet gant unan bennak resis.
Evel-just e c’haller c’hoari da glask dibaboù all da welet met n’en deus ket seblantet dav din, displeget eo en un doare klok er fin ar pezh a zo c’hoarvezet da Nick ha traoù zo a c’hoarveze, forzh petra a zibabfe ar c’hoarier-ez lârat ‘m eus aon.
Ur c’hoari kentelius hag a sikour da gaout empatiezh eo neuze. M’ho peus 20 munut da “goll” hag oc’h gouest da lenn saozneg, kit dezhi, digoust eo!

C’hoari diorroet hag embannet gant Nicky Case. Da c’hoari en-linenn war merdeerioù web pe da bellgargañ, abaoe an 30 a viz Even 2014.

Soldats Inconnus : Mémoires de la Grande Guerre

Posted in C'hoarioù video with tags , , on Mae 9, 2016 by geekezig

soldats-inconnus-memoires-de-la-grande-guerrePrenet em boa Soldats Inconnus pell zo met ne oan ket aet gwall bell, n’ouzon ket perak. Goude bezañ bet d’an diskouezadeg “L’art dans le jeu vidéo, l’inspiration française” e mirdi Art Ludique e miz Genver, en deus fellet din adstagañ gant ar c’hoari.
Ur c’hoari gant un neuz levr bannoù-treset eo un tamm, diorroet gant UbiArt Framework memes lusker c’hoari ha Child of Light da skouer (met n’eus doare ebet deoc’h da c’houzout peogwir n’am eus savet pennad ebet diwar-benn ar c’hoari-se ! è_é).
Tremen a ra darvoudoù ar c’hoari e-pad ar brezel bed kentañ. Heuliet e vez a bep eil Emile, Freddie, Karl hag Anna.
Un dibab tudennoù a bep seurt : un Alaman, ur Gall kozh, un Amerikan, ur Velgiadez. Pep hini en deus barregezhioù, met dre vras e vezont c’hoariet holl e memes stumm.
Ur film bihan diverrañ a zo a-raok pep chabistr evit lec’hiañ an darvoudoù (e keñver mare kement ha lec’h resis, keñveriet gant emgannoù bras pe darvoudoù resis ar brezel). Ur wech lañset an traoù ne vo kaozeadenn ebet ken, tresadennoù-trouzioù hepken evel evit diskouez an doare ma c’hall an dud kompren an eil re ar re all hep komz memes yezh.soldats-inconnus-1Pe vefe war an dachenn emgann pe en ul lec’h siouloc’h (ur gêriadenn da skouer) e vo ret dre vras ober un tamm enklask evit kavout hag eskemm traoù betek kaout an dra on eus ezhomm evit mont war-raok (e stumm ur point ‘n’ click neuze). N’eus netra diaes spontus met ken kas e c’haller kaout sikour gant titouroù (a vez dibabet diskoachañ pe get).
Prantadoù QTE (Quick Time Event) a zo gant Anna pa ra war-dro tud klañv ha prantadoù redadeg ivez gant an taksi.soldats_inconnus_annasoldats-inconnus-taxi Daou pe dri vare “enebour meur” a zo ivez. Liesseurt a-walc’h an doareoù da c’hoari neuze met randonus e c’hallont dont da vezañ goude ur mare rak n’eus nemet an endro o cheñch a-benn ar fin.
Un dudenn all a zo ouzhpenn, Walt, ur c’hi, a sikour kalz ac’hanomp (ne vo ket bepred gant memes tudenn).
E pep lec’h ez eus teñzorioù bihan da zastum (evit un trofe) ha testennoù evit displegañ splannoc’h emgannoù pe elfennoù eus ar brezel-se. Traoù kentelius-tre a zo !Soldats-inconnus-archive Fin en deus seblantet din an dibab na vefe ket re vanikean an traoù : Alamaned drouk a zo met reoù jentil a zo ivez ha memestra eus tud ar C’hallaoued. Fromet-tre on bet gant ar fin ha daoust din bezañ chomet sac’het gwechoù zo n’eo ket ur c’hoari start, na hir. Sonerezh brav-tre a zo ouzhpenn (feson Yann Tiersen un tamm) ha kavout a ran dispar an aergelc’h hag an neuz bann-treset bet dibabet. Plijet on bet gant Soldats Inconnus neuze a zo ur c’hoari ral e keñver arz keit hag e keñver prantad Istor dibabet.

Diorroet gant Ubisoft Montpellier, embannet gant Ubisoft. C’hoari evit 1 c’hoarier-ez, da bellgargañ hepken, abaoe ar 25 a viz Even 2014 evit Windows, Ps3, PS4, Xbox 360, Xbox One, iPad, iPhone hag Android. PEGI 12

Emily is away

Posted in C'hoarioù video with tags , , , , , on Genver 26, 2016 by geekezig

emily-degemerEmily is away a zo ur c’hoari berr ha digoust da bellgargañ. Ur c’hoari-testenn eo, diazezet war kaozeadennoù etre daou den war un asez MSN etre 2002 ha 2006. Posupl eo dibab ur skeudenn profil (a glot gant traoù diouzh ar c’hiz ar bloavezhioù-se) goude ez eus ur gaozeadenn etre ar c’hoari-ez hag Emily, ur vignonez.emily-skeudenn Iskis a-walc’h eo an alioù diwar-benn ar c’hoari rak ur bern tud a wel Emily is Away evel un “dating sim” kentoc’h eget ur visual novel : ret eo kendrec’hiñ Emily omp an den gwellañ eviti. Me oa kentoc’h gant ar soñj e oa ur vignonez ha neuze e klasken frealziñ anezhi. Un hanter-eur bennak a zo ezhomm evit c’hoari : ur wech lañset ar gaozeadenn eo ret dibab etre tri dibab da respont d’he c’houlennoù hep gallout bizskrivañ traoù. emily-kaozeadennDa vareoù zo e vo “reizhet” ar frazennoù zoken, a-raok kas anezho (ret eo ober van bizskrivañ memestra evit ma teufe an destenn war-wel war ar skramm!). Ar chabistr diwezhañ a zo un tamm torr-penn peogwir e vezer bac’het (kazi pep dibab a zo “reizhet” ha ne talvez ket memestra ken tamm ebet). Kavet ‘m eus fentus ar mennozh, an tu Windows XP hag an daveoù a glot ganin da vat. Prantadoù kaozeadennoù zo a zo gwirheñvel meurbet (ul lodenn en deus spontet ac’hanon kazi peogwir on sur bezañ bet ar gaozeadenn-se gant unan bennak) ha dre vras, evit unan bennak a oa o kregiñ gant al lise e 2002 ez eus un dra bennak…
Koulskoude on direnket gant an tu “friendzone” a zo gant ar c’hoari (Emily ne vo james laouen, forzh petra a vo dibabet, klask war he lerc’h pe get) dreist-holl ma vez gwelet evel un dating-sim ha gant an nebeut a frankiz a zo gant ar c’hoarier-ez. Ur prantad fentus ‘m eus tremenet neuze ha n’eus ket tu da glemm re peogwir eo digoust! Ma fell deoc’h ober un tamm tro e bro ar melkoni n’eo ket fall, mod all ez eus c’hoarioù dedennusoc’h, sur!

C’hoari evit 1 c’hoarier-ez da bellgargañ hepken war Windows ha Mac. Diorroet hag embannet gant Kyle Seeley, d’an 20 a viz Du 2015.

Life is Strange

Posted in C'hoarioù video with tags , , , , , , , , , , , on Genver 24, 2016 by geekezig

life-is-strange-titleE-kerzh peseurt darvoud em boa klevet komz eus Life is Strange evit ar wech kentañ? N’am eus ket soñj ken met soñj mat ‘m eus eus ar santad ‘m eus bet o sellet ouzh ar bomm-bruderezh, eus ar frazenn “Gone Home meets The Walking Dead… wih time travel”.  A! Aha! Ahaha! “Shut up and take my money” evel ma vez lâret.

Koulskoude n’on ket bet o prenañ pe o rakprenañ ar c’hoari diouzhtu-diouzhtu. Gortozet ‘m eus an eil rann evit en ober. Ne c’hoazh distaol ebet na netra met poent e oa. Ha setu me lañset neuze…
Life is Strange a zo ur c’hoari a rannoù, e doare reoù telltale games un tamm. Ur c’hoari doare point ‘n’ click eo (traoù da zastum, tud da atersiñ). Kregiñ a ra ar c’hoari gant ur gwallhunvre. Max a zo en ur gorventenn kichen tour-tan Arcadia Bay. Dihuniñ a ra en he c’hentel diwar-benn ar skeudenniñ, e Blackwell Academy. Buan goude e vo test eus ur muntr. Aze e verzo Max e c’hall mont en-dro en amzer (un nebeut) a-benn cheñch un darvoud. Eeun a-walc’h eo steuñvenn ar c’hoari, ret eo dastum titouroù, mont da lec’h-mañ lec’h, klask un dra hag adober goude bezañ distroet en-dro en amzer evit dont a-benn… Evit sikour ac’hanomp ez eus deizlevr Max hag he fellgomzer hezoug (gant gerigelloù a vez kaset dezhi gant tud all).LiS-deizlevrLiS-hezoug C’hoariet e vez gant al logodenn (evit an oberoù) hag an touchennoù evit mont war-raok. Un tamm start ‘m eus kavet boaziañ d’an doare da c’hoari-se (a seblant klasel koulskoude!) rak ret eo ruzañ davet an ober a fell deomp ober, ouzhpenn klikañ. Er penn-kentañ ne teuen a-benn d’ober netra! Kustumañ a vez graet met n’am eus ket kavet anat. Start ‘oa ivez a-wechoù lakaat evezh Max (ha neuze an dibab oberoù) war an dra a felle din.LiS-gameplay Da vareoù zo ez eus dibaboù d’ober. E-kerzh ar c’hoari e vo lâret splann :  ma ne tistroomp ket da cheñch e chomo an diviz-se hag en do efedoù da c’houde.LiS-consequences Un dra a c’haller ober ivez met n’eo ket rediet a zo tapout skeudennoù da vareoù ha lec’hioù resis er c’hoari. Ar skeudennoù (dre vras, ket ar re-mañ) do ur perz a-bouez en istor.LiS-skeudennouAr rann gentañ a zo bet ur gwir bam evidon. Pa tañs Chloe war he gwele eo eo bet piket ma c’halon. Ha ne oan ket evit chom hep gouelañ e-kerzh tout ar c’hlozadur.
Evel e c’hoarioù telltale games ez eus stadegoù e fin ar c’hoari. Reoù an divizoù bras ha reoù all, n’int ket ken a-bouez. (Diwallit! SPOILERS RANN 2)LiS-stadegouDivizet ‘m eus ober ur c’hoariadenn “from” gant ma divizoù hep soñjal pe dost, hervez ma santad ha ma c’halon ha ket ar poell pe ar strategiezh. Hag un eil c’hoariadenn evit klask traoù all (a-wechoù ar c’hontrol-mik just “da welet” hag a-wechoù ur seurt meskaj iskis rak ne oan ket evit ober un diviz all e gwirionez pe o klask sevel ur seurt strategiezh). An eil c’hoariadenn a servije din ivez da gavout an holl luc’hskeudennoù ouzhpenn.
An eil rann a zo bet un doare taol-arnod da welet ma oa ur gwir efed gant ma divizoù. Un tamm dipitet on bet gant dilez ar galloud un tamm, hag hegaset ivez gant un dra a zo bet kalz kaoz diwar e-benn. Ket dre ret evit an abegoù meneget (tud zo a zo bet jenet gant an diouer a drigger warning peogwir ez eus kaoz splann eus emlazh) met evit an doare da c’hoari ar prantad-se. Ne oa ket liammet gant dibaboù graet a-raok met an doare da zibab ar gaozeadenn (traoù dilogik a-grenn ‘zo c’hoarvezet evidon).  Un tamm dipitet on bet neuze gant ar rann-mañ. Ur sapre diforc’h a oa erru etre ma div c’hoariadenn. Ret eo din ouzhpennañ diwar-benn an trigger warning eo bet fin skipailh Dontnod ha Square Enix evit kinnig adalek an darvoud-se, chomlec’hioù davet kevredigezhioù da sikour an dud da gomz diwar-benn temoù start evel-se. Ur respont a galite me gav, zoken ma vefe bet mat soñjal en-se a-raok ar c’hlemmoù.
En ur c’hoari gant an trede rann on bet dinervet kalz rak ranket ‘m eus digreskiñ SPONTUS kalite ar skeudenn evit gallout c’hoari (chomet on stanket en ul lec’h hep gallout ober netra ha se oa an abeg war a seblant). Meur a wech ‘m eus bet ar santimant ne oa ket posupl mont dreist darvoudoù zo, muioc’h eget er rannoù all. Daoust din bezañ laouen kaout da implij muioc’h galloud an amzer eget en eil em eus santet e oa un hent splann gant an istor ha traoù zo ne oa ket posupl mont en tu hont dezho. Prantadoù brav a zo (er poull <3) hag ar fin a oa dic’hortoz da vat (daoust din bezañ ijinet e c’hallfe echuiñ evelse).Lis-poull E-pad ma eil c’hoariadenn em eus merzet un dra e deizlevr Max hag en deus souezhet ac’hanon : e-pad an div rann gentañ e seblante Max pas kompren e oa Chloe amourouz ouzh Rachel pe c’hoazh e oa Warren o klask war he lerc’h (ar pezh a lakae ac’hanon da soñjal e oa Max anreviat). Un tamm droch e seblante a-wechoù zoken. Aze e seblant a benn ar fin kompren un tamm darempred Chloe ha Rachel, ouzhpenn anzav sklaer e c’hallfe un istor karantez diwan etre Max ha Chloe (ANAT ABAOE AR RANN GENTAÑ). Aze ivez e seblant bezañ bet un doare prantad gortoz un tamm da welet penaos e oa degemeret pep darempred a c’hallfe bezañ gant ar c’hoarier-ien/ezed. Souezhus ‘m eus kavet rak splann eo e oant chouket adalek ar penn-kentañ en ur skrivañ an istor neuze perak ket e deizlevr Max? Ur c’hevrin.LiS-deizlevr-2Ma! Ar pevare rann a ginnig klozañ fin an trede rann gant un dibab ‘m eus kavet un tamm re feuls (aha, ne oan ket en soñj e c’hallfe bezañ gwashoc’h goude), met peadra din da gregiñ en ur ouelañ dourek, sur. Goude-se ez eus ur sapre enklask a-hed ar rann, n’on ket deuet a-benn da baouez zoken ket tapet e oan. Marteze e vefe bet mat kavout ur c’hempouez etre ar gaozeadenn “sparlet” en amzer gant Kate (en eil rann) hag ar gaozeadenn gant Franck a c’haller adkregiñ n’ouzon ket pet gwech (pezh ‘m eus graet hag e oan erru un tamm skuizh) amañ. C’hoazh un dra a zo bet cheñchet goude evezhiadennoù ar c’hoarier-ien/ezed? Ar rann a zo blaz point ‘n’ click da vat, gant un tamm Veronica Mars (hag un dave da Sliders) ouzhpenn. Tud zo o deus kavet torr-penn war a seblant met me ‘m eus kavet dispar rak muioc’h a draoù a c’hoarveze eget en div rann a-raok. Ouzhpenn kenderc’hel gant ar santad plijus am boa bet en trede rann diwar-benn an darempredoù (“I know” a respont Max da g/Chloe pa lâr hi “he’s so in love with you” diwar-benn Warren pe c’hoazh Chloe a lâr e oa splann karantez etre hi ha Rachel da Franck), em eus kavet e oa un aergelc’h plijus-tre gant a bep seurt lec’hioù (ar gouel ‘benn ar fin!, an aod, un doare loch nec’hus…). Traoù zo a vez diskoulmet neuze. Fin ar rann n’eo ket fromus evel ar re all (met prantadoù gwall fromus a zo meur a wech er rann) met kentoc’h hegasus kenañ peogwir e santen un tamm ar pezh a oa o vont da c’hoarvezout hag e oan kentoc’h dinervet! Ur sapre cliffhanger a zo aze ha ma, start eo bet gortoz ar pempvet rann, me lâr deoc’h.
Evit ar pempvet rann ‘m eus graet un dra n’am boa ket graet james araok : kemer un devezh vakañsoù evit c’hoari. E ya. N’hallen ket gortoz ha n’hallen ket kemer ar riskl na vefe freuzet an traoù din gant tud all war ar rouedad. Ne oa diskoulm all ebet.
Ar pempvet rann a zo disheñvel-tre eus ar re all, en ur stumm, peogwir e kinnig mont-ha-dont ha mont-ha-dont dizehan, gwelet penaos e vefe bet an traoù en ur ziskoulmañ an enklask adalek penn-kentañ ar sizhun, met ivez efedoù fall galloud Max. Ul lodenn vras eus ar rann a zo ur gwallhunvre eus an euzhusañ (war a bep seurt temoù disheñvel). Tapet on bet penn-da-benn en aergelc’h-se, spontet ha hoalet war un dro.Lis-5gwallhunvre Betek ma echufe ar c’hoari, gant AN dibab. Ne lârin ket petra eo amañ evel-just. Just ez eo splann e oa ur gwir fin (etre an daou). Me ‘m eus dibabet ar fin all da gentañ (ar from, c’hwi oar) hag ar c’hlozadur ‘zo nul da vat, dilogik, hep from (padal e c’hoarvez traoù start). Digomprenus. Echuet ‘m eus ar c’hoari o vezañ un tamm souezhet met o soñjal em boa graet an dibab mat. Evel-just on bet o c’hoari en dro diouzhtu goude evit klask traoù all ha cheñch fin. Pezh a zo e oa dibaboù er c’hoariadenn a vire ouzhin da welet AR FIN gwirion (ret eo bet din dibab an dra all gant ar c’hoariadenn gentañ evit gwelet ar fin-se). Fromus-tre eo aze, labouret kalz, kalz hiroc’h ar film-klozañ… Anat eo ar fin gwirion. Met n’eo ket MA hini. An dibab a zo d’ober a zo meneget meur a wech gant Max evel ar gwashañ tra posupl ha ne oan ket evit krediñ neuze e vefe se er fin.
Un tamm dipitet on bet gant ar fin neuze, pe kentoc’h gant an diforc’h pouez a zo bet roet d’un dibab ha d’egile.
Koulskoude, n’hallan ket nac’h eo bet Life is Strange ur c’hoari a-bouez kenañ evidon e 2015. Kalz amzer ‘m eus tremenet o c’hoari peogwir e plije din an doare da c’hoari met ivez abalamour d’an aergelc’h (film amerikan dizalc’h, war vord ar mor, er skol-veur), ar sonerezh, mouezhioù an dud (Ashly Burch o vezañ d’am meno unan eus an abegoù omp holl e karantez gant Chloe), pinvidigezh ar bed (gant an deizlevr hag ur bern munudoù dastumet pep lec’h), met ivez pinvidigezh an eiltudennoù a zo evit ar re bouezusañ, bepred luzietoc’h eget ar pezh a ijiner da gentañ, an temoù lakaet ar gaoz warno, en un doare soutil pe get, en un doare splann pe get. Life is Strange a zo ur c’hoari a-bouez evidon. Gant sioù sur met heverk eus nerzh ar c’hoarier-ien/ezed hag al levezon e c’hallont kaout war ar c’hoari (pa vez a dammoù evelse).  Ur c’hoari gant ur bersonelezh, ur c’hoari fromus-tre, brav-kenañ alies.Lis-2-trenSpi ‘m eus n’on ket bet re dorr-penn da lenn. Kompren a rit marteze perak e oa ken start din komz diwar-benn ar c’hoari-se a zo bet “ma c’hoari” eus 2015. Bremañ ‘m eus resevet ma skouerenn eus ar c’hoari “boest” (gant ur bladenn hag ul levr) e c’hallin bremañ distaliañ ar c’hoari eus ma urzhiataer, met sur on e rin se gant un tamm keuz, daoust da bep tra.

C’hoari evit ur c’hoarier-ez, diorroet gant Dontnod Entertainment hag embannet gant Square Enix. Da bellgargañ war Windows, PS3, PS4, Xbox 360 hag Xbox One. Rann gentañ bet embannet d’an 30 a viz Genver 2015, pempvet rann bet embannet d’an 21 a viz Here 2015. Ur bladenn a c’haller prenañ ivez evit memes letrinoù abaoe an 20 a viz Genver 2016.

%d bloggers like this: