Dielloù evit arz

Paterson

Posted in Filmoù with tags , , , , on Gouere 10, 2018 by geekezig

Paterson a zo blenier karr-boutin e kêr Paterson, New Jersey. Emañ o vevañ gant Laura, e vignonez ha Marvin, ur c’hi bihan. Ar film a ziskouez ur sizhun a-bezh gant boazioù ar c’houblad, an dud a wel Paterson bemdez hag all. Plijet on bet gant ar c’haozeadennoù klevet gantañ er c’harr-boutin, an eil-tudennoù en davarn, evel ur stirad heuliet e gwir. Ar pep gwellañ evidon a oa div lodenn resis : pa gomz Paterson gant ur plac’hig a skriv barzhonegoù ha pa teu ur japanat da gomz gantañ er fin. Ur film diwar-benn barzhoniezh eo Paterson, Paterson a skriv barzhonegoù a-raok e labour, e-pad e ehan hag all. E gwirionez ez eus kalz traoù o deus plijet din er film-se met hegaset on bet spontus gant tudenn Laura hag an darempred a zo etre hi ha Paterson. Lakaet e oan diaes gant kinkladur an ti (aozet gant Laura). Kompren a ran neuze e c’hallfe plijout ha displijout da dud all, me zo bet re jenet gant traoù zo evit profitañ e gwirionez eus al lodennoù o deus plijet din spontus. Marteze ur film berroc’h a vefe bet gwelloc’h? Pe ur film berr zoken gant ar gaozeadenn etre Paterson hag ar japanat hepken? Piv ‘oar!

Film sevenet gant Jim Jarmusch. Stadoù-Unanet Amerika, Alamagn ha Frañs, 2016, 1e58.

Advertisements

Woman In Gold

Posted in Filmoù with tags , , , , , , , , , , on Genver 31, 2018 by geekezig

Ne ouien ket tamm ebet diwar-benn petra oa kaoz e Woman in Gold. Kontañ a ra istor ar prosez a zo bet etre Maria Altmann ha kêr Vienna tro-dro da daolennoù livet gant Klimt bet laeret d’he familh gant an nazied. Un istor digredus a-walc’h peogwir e oa peadra da baouez gant ar prosez buan ken digalonekaus ma oa. Ar film a ziskouez an darempred etre Maria hag un alvokad yaouank, mab bihan d’ar sonaozour Arnold Schoenberg, en deus roet nerzh dezho da vont betek ar penn.
E-pad ar film e vo gwelet ivez eñvorennoù yaouankiz Maria, a-raok an eil brezel bed, ur wech aloubet kêr Vienna gant an nazied ha pa deus ranket tec’hout.
Kalz plijadur ‘m eus bet o sellet ouzh ar film, a-drugarez d’an aktourien dreist-holl. Un doare teneridigezh a zo evit an tudennoù, sur.
Start eo avat kompren perak n’en deus ket fellet da virdi ar Belvedere kaout emglev (ken sur e oant da c’hounit?) e plas laoskel an taolennoù da vont. Na trist eo soñjal e ranker bremañ mont da New York da welet poltred Adele Bloch-Bauer, heverkañ skouer eus arz Klimt. War memes tro, daoust hag eñ n’eus ket galloudusoc’h arouez evit diskouez ar ranngalon eo bet evit ar Yuzevien o deus ranket tec’hout o bro a-benn chom bev (evit ar re o deus gallet chom bev)…
Setu neuze ar pezh a zo er film-se, kontet en un doare efedus me gav.

Film sevenet gant Simon Curtis. Rouantelezh-Unanet, Stadoù-Unanet Amerika, Alamagn & Aostria, 2015, 1e49.

The Danish Girl

Posted in Filmoù with tags , , , , , , , , on Du 15, 2016 by geekezig

the_danish_girlThe Danish Girl a ginnig deomp gouzout  hiroc’h diwar-benn Einar Wegener, deuet da vezañ Lili Elbe, ar plac’h treuzjener (oberataet, rak mod all ne gav ket din e vefe bet an hini gentañ ^^) gentañ. E Danmark e deroù an XXvet kantved e vo gwelet al livour yaouank hag e wreg o tegemer tamm-ha-tamm n’eo Einar nemet ur perzh c’hoariet gant Lili evit kavout ur plas er gevredigezh. Lipet eo ar skeudennoù, klasel red ha stumm an darvoudoù, ur film “istorel” a galite hep na vefe un taol-dreist. Dedennus e oa gwelet pegen digor a spered e oa endro Lili ha bed al livourien en Europa d’ar mare-se (bevet o deus e Pariz e-pad ur pennad). Alicia Vikander (a c’hoari Gerda, gwreg Einar) he deus plijet kalz din er film. Laouen e vefen o lenn deizlevr Lili (gwelet e vez o skrivañ anezhañ er film) hag a zo bet diazez ar romant en deus awenet ar film-mañ.
Domaj eo evel-just e vefe bet c’hoariet perzh ur plac’h treuzjener gant ur paotr, n’on ket sur e vefe prest bed ar sinema c’hoazh d’ober strivoù war an dachenn-se… Gwelet e vo. Mat e kav din lakaat ar gaoz war-se memestra.

Film sevenet gant Tom Hooper. Stadoù-Unanet Amerika, Rouantelezh-Unanet hag Alamagn, 2015, 2e.

Tebori 2

Posted in Levrioù bannoù-treset with tags , , , , , , on Here 4, 2016 by geekezig

tebori-tome-2P’am boa gwelet golo Tebori 2 e-touez an traoù nevez resevet el levraoueg, ne oan ket bet pell o c’holoiñ anezhañ hag o kas anezhañ d’ar gêr, me lâr deoc’h!
En eil levrenn-se e vez dizoloet muioc’h a draoù diwar-benn Otsuya, an “dastumerez tatou”, ar pezh a zo un dra vat! Kenderc’hel a ra an istor “sioul” (un toullad darvoudoù spontus a zo memestra!) hag evel kalz levrennoù “kreiz” e seblant bezañ un doare da staliañ klozadur an istor. Kempouez eo bepred, brav an tresadennoù ha plijus an istor, spi ‘m eus ne vin ket dipitet gant ar fin. Gwelet e vo! Buan marplij!tebori2diIstor gant Robledo ha tresadennoù gant Toledano. Embannet e galleg gant Dargaud, d’an 2 a viz Gwengolo 2016.

Tebori 1

Posted in Levrioù bannoù-treset with tags , , , , , on Gouere 20, 2016 by geekezig

tebori-t-1Yoshi a zo bet tapet gant ar polis pa oa o treuziñ straedoù Nagoya gant e gang war mirc’hi-tan. A-benn cheñch buhez e vez kaset da zeskiñ ober tatouerezh e ti ur mestr kozh. Barrekoc’h-barrekañ e teu da vezañ. Ober a ra war-dro ur stal “klasel” (gant binvioù mod kornog kentoc’h) pa ra e mestr kozh war-dro arvalien a-live uhel gant teknik hengounel an tebori japanat. Ret e vo da Yoshi kemer e lerc’h buanoc’h eget na grede dezhañ avat ha kompren a ra (a-benn ar fin !) e rae e vestr war-dro yakuza. Reolennoù ur bed resis a vo ret dezhañ deskiñ war ar prim neuze. Mod all, en davarn e lec’h m’eo boaz Yoshi da vont gant e vignoned e ra anaoudegezh gant ur plac’h yaouank, a “zastum” tatou ar seizh mestr bras. Mankout a ra unan dezhi hepken…
Ur sapre meskaj sevenadurel japanat eo Tebori gant an tatouerezh, ar gangoù mirc’hi-tan, ar yakuza… ha koulskoude ne seblant ket “too much”. Plijus-tre eo an tresadennoù hag ur sapre cliffhanger a zo e fin al levrenn. Laouen-tre e vin o c’houzout hiroc’h el levrenn o tont, sañset e vo klok an istor e teir lodenn. Ur geriaoueg a zo er fin evit ar gerioù japanat pe heverk eus bed an tatouerezh ha tresadennoù prientiñ, pezh a gavan bepred plijus da welet. Unan eus levrennoù digeriñ dedennusañ ar bloaz evidon-me, evit ar mare.tebori_p_4Istor gant Robledo ha tresadennoù gant Toledano. Embannet e galleg gant Dargaud, d’an 19 a viz C’hwevrer 2016.

Big Eyes

Posted in Filmoù with tags , , , on Mae 9, 2016 by geekezig

bigeyesN’omp ket boaz ken da welet ur film savet gant Tim Burton hep Johnny Depp ha Helena Bonham Carter. Anzav a ran koulskoude e klot aergelc’h Big Eyes gant ul lodenn eus filmoù ar sevener, neuz Edward Scissorhands d’an endro da vareoù zo da skouer. Kontañ a ra Big Eyes istor Margaret , arzourez he stil heverk a zimez gant Walter Keane. Hemañ a lâr eo eñ a liv an taolennoù bet savet gant Margaret a-benn gwerzhañ anezho ha setu int tapet en ur gaou divent pa grog an taolennoù d’ober berzh bras.
Splujet on digudenn en istor-se, n’anavezen ket tamm ebet. Diskouez a ra en un doare taer a-walc’h liammoù etre mediaoù hag arzourien, bed an arz, nerzh an dud o deus prederiet en doare da werzhañ arz… Fin ar film, gant ar prosez, n’am eus ket kavet kenkoulz marteze. Plijet on bet gant kanaouennoù Lana Del Rey a ziskouez mat hiraezh ha santad dic’halloudegezh ur vaouez evel Margaret er bloavezhioù 50 ha 60. Domaj eo, me gav, e vefe chomet istudennoù zo a-gostez (merc’h Margaret, he mignonez Dee-Ann) met kavout a ran e klot mat istor ar film gant ul lodenn eus bed Tim Burton.
N’emañ ket e-touez e filmoù brasañ evidon-me met vad a ra gwelet anezhañ o kinnig traoù disheñvel ur wech an amzer!

Film sevenet gant Tim Burton. Stadoù-Unanet Amerika, 2014, 1e46.

L’île Louvre

Posted in Levrioù bannoù-treset with tags , , on C'hwevrer 29, 2016 by geekezig

ilelouvreC’hwi oar bremañ pegent sot on gant levrioù Florent Chavouet. Lennet am eus L’île Louvre gant plijadur neuze. Karget eo bet Florent Chavouet da dresañ an dud a zeu da weladenniñ mirdi al Louvre. Un doare istor a zo met n’eo ket dedennus-tre me gav. Ar pep pouezusañ ha deuet brav a zo an traoùigoù bet klevet gant ar gwarded, digant ar weladennerien hag all. C’hoarzhet ‘m eus meur a wech (en tren e oan ouzhpenn!). Ur bern traoù a zo da sellet war tresadennoù an arzour evel boaz ha brav-tre eo an disoc’h. Domaj eo e vefe ken gwan an tu “istor” (na dalveze ket ar boan zoken evidon-me) ha ken berr rak c’hoant am befe bet da lenn muioc’h c’hoazh a draoù fentus diwar-benn ar mirdi! Ul levr plijus-kenañ eo memestra.louvre

Istor ha tresadennoù gant Florent Chavouet. Embannet gant Futuropolis ha Louvre éditions d’ar 5 a viz Du 2015.

%d bloggers like this: