よこがお (Yokogao / L’infirmière)

Ichiko a labour evel klañvdiourez. Emañ o vont da zimeziñ a-benn nebeud. Tremen a ra mat an traoù gant ar familh a sikour, e diavaez he eurioù labour e sikour ar merc’hed da bleustriñ o arnodennoù zoken. Un deiz eo skrapet ar verc’h yaouankañ. An den en deus skrapet anezhi a zo niz Ichiko, adalek ar mare-se e vo distrujet buhez Ichiko.
A bep eil e vez gwelet buhez Ichiko da vare an darvoud ha kalz war-lerc’h, komprenet e vez buan neuze he deus ranket cheñch buhez. Penaos eo erruet d’ar poent-se a erru dousik-dousik avat. Souezhus-kenañ e seblant Ichiko, troet da sodez pe dost goude bezañ kollet he buhez a oa ken plaen. Mokoto he deus plijet kalz din, un dudenn a cheñch er filmoù japanat, he darempred gant Ichiko am befe bet c’hoant gwelet muioc’h er film. Ne respont ket ar film d’ar goulennoù met diskouez a ra splann pegen spontus e c’hall ar mediaoù bezañ. N’eo ket kenkoulz Au revoir l’été evidon met kalz gwelloc’h eget Harmonium bepred !

Film sevenet gant FUKADA Kōji. Japan ha Frañs, 2019, 1e51.

Ce sera moi

Skye a zo 16 vloaz. Un Amerikanez a-orin korean eo. Plijout a ra ar c’hK-pop dezhi, kanañ ha dañsal. E Los Angeles emañ o chom hag un degouezh a-feson a zo : un abadenn eus Korea ar Su evit kavout “talantoù” nevez e diavaez ar vro a vo er Stadoù-Unanet. Sur eo he deus barregezhioù. Pezh a zo eo tev Skye. He mamm a zo kriz ganti ha bed ar skinwel a vo ivez.
Ur romant koant-kenañ eo Ce sera moi. Dezrevellet eo gant kalz a fent, gant elfennoù dispar evit ur gomedienn romantel. Estreget-se eo evel-just, peogwir e lak ar gaoz ivez war darempredoù etre mamm ha merc’h, skeudenn an dud tev, pouez ar gevredigezh, diforc’hioù sevenadur, ar rouedadoù sokial…
Mesket eo mat an holl elfennoù-se hag un dudi a galite uhel eo Ce sera moi. Ur blijadur e pep keñver !

Romant skrivet gant Lyla Lee. Embannet e galleg gant Hachette, d’ar 26 a viz Eost 2020.

Succession – bloavezh 1

Alies am eus klevet tud oc’h aliañ Succession hag o lavar pegen spontus e oa tudennoù ar stirad.
Logan Roy a zo e penn ur “impalaeriezh mediaoù” er Stadoù-Unanet : kazetennoù, chadennoù skinwel, parkoù dudi, sinema… Devezh e deiz-ha-bloaz e ranke embann e oa e vab Kendall o vont da gemer penn an traoù met n’eo ket an dra-se tamm ebet a c’hoarvez. Etre e ziviz ha e yec’hed eo sabatuet an holl : petra zo da gompren ha penaos merañ ma n’eo ket gouest da gemer e bost labour en-dro? Kregiñ a ra neuze ar brezel diabarzh : itrikoù, cheñch postoù labour, levezoniñ ar marc’hadoù, prenañ ha gwerzhañ lodennoù eus an embregerezh… Luziet an traoù !
Poltred ur familh pinvidik-mor, gant levezon bras spontus, a glask kaout beli e bed ar politikerezh ouzhpenn…
An holl izili o deus c’hoant galloud, an holl zo prest da dreitouriñ ar re all ha koulskoude, e seblant memestra kaout karantez en tu-bennak aze…
Kregiñ a ra “dousik” an traoù me gav, poltred tud pinvidik ha galloudus, heugus. Tamm-ha-tamm e teu an istorioù strategiezh war wel, ha kudennoù all (dramm pe me oar me). Ur stirad gant tudennoù tort ha plijus da heuliañ.
Da venegiñ ouzhpenn : ur stirad HBO gant nebeut-tre a rev eo!

Stirad krouet gant Jesse Armstrong. Stadoù-Unanet Amerika. Bloavezh 10 rann tro 55 munut, skignet gant HBO adalek miz Even 2018.

Never Rarely Sometimes Always

17 vloaz eo Autumn. Ur plac’h yaouank trist ha digenvez eo ha n’em sant lakaet a-gostez gant he familh ha goapaet gant al liseidi all. Kompren a ra eo dougerez ha ne fell ket dezhi bezañ mamm evit poent. E Pennsylvania ne vo ket posupl dezhi diforc’hañ. Mont a ra neuze gant he c’henitervez Skylar betek New York. Dav eo dezho en em zibab er gêr vras, gant nebeut a arc’hant, lec’h ebet da lojañ, souezhadennoù an emgavioù a bep seurt evit Autumn.
Ur film start eo. A lak war-wel pegen luziet eo an traoù ha pegen digenvez e c’hall bezañ un diforc’hañ evit ur plac’h yaouank er Stadoù-Unanet. Eüruzamant emañ Skylar ganti. Brav eo an darempred etre an div blac’h.
Un tamm hir am eus kavet ar film avat ha yen en ur stumm. N’eo ket souezhus dre ret evit seurt dodenn.

Film sevenet gant Eliza Hittman. Stadoù-Unanet Amerika ha Rouantelezh-Unanet, 2020, 1e41.

Nous étions les ennemis

Kontañ a ra Nous étions les ennemis istor familh George Takei, an aktour, ha dreist-holl e vugaleaj p’eo bet kaset e familh en ur c’hamp bac’h evit Amerikaned a orin eus Japan goude Pearl Harbor.
Diskouez a ra sell ur bugel na gomprene ket dre ret pegen spontus e oa pezh a c’hoarveze met ivez sell un den bras war e dud, kalz war-lerc’h. Pa oa krennard e oa kounnaret George ha ne gomprene ket penaos o doa gallet kement a dud asantiñ bezañ gwallgaset evel-se. Dedennus eo e darempred gant e dad, ar c’hoant bezañ mouezh ar re all a voe ivez evit tud heñvelreviad da c’houde. Nebeut a draoù a ouien diwar-benn an darvoudoù-se ha displeget int en un doare simpl, efedus ha fromus ivez gant an dibab dezrevell ken personel.

Istor gant George Takei, Steve Scott ha Justin Eisinger, tresadennoù gant Harmony Becker. Embannet e galleg gant Futuropolis, d’ar 27 a viz Mae 2020.

Sound of Metal

Lou ha Ruben a vev en o c’harr, war an hentoù da son e abadennoù a bep seurt gant o strollad Blackgammon.
Kregiñ a ra Ruben da goll ar c’hleved e-kerzh an droiad, ha buan. Krediñ a ra e c’hallo kenderc’hel da son met Lou a glask kavout sikour dezhañ. Degemeret eo Ruben en ur gumuniezh tud vouzar, kalzik anezho o deus ivez kudennoù sujidigezh (d’an alkool, d’an dramm…) evel Ruben. Pell eus Lou hag e vuhez e vo dav dezhañ boaziañ d’ur vuhez nevez, degemer e vo bouzar, deskiñ ur bern traoù, cheñch e sell war ar bed.
Kregiñ a ra ar film o tisplegañ eo istitlet ar film evit an dud vouzar ha pounner-glev. Gwir eo eo ral gwelet er sinema filmoù istitlet dre ziouer. Ul labour ramzel a zo bet graet war ar son, evit klevet (evit ar re a c’hall) an diforc’h etre pezh a glev “ar bed” ha pezh a glev Ruben, tamm-ha-tamm. Lodennoù fromusañ ar film evidon a zo liammet gant ar sonioù-se hag ar santad digenvez bras a c’hall Ruben kaout, kollet pa n’hall ket eskemm gant ar re vouzar pe kollet e kreiz trouzioù ar bed… Dedennus-kenañ eo emdroadur Ruben ha sell ar gumuniezh e lec’h ma vev : evito n’eo ket bezañ bouzar un namm da vezañ pareet. Met dav e vo da Ruben deskiñ an dra-se drezañ e-unan…
Riz Ahmed a zo un aktour a blij kalz din abaoe pell ha dispar eo e labour er film, a ziskouez splann ar c’hounnar, an dristidigezh hag holl fromoù Ruben.
Ur film dedennus ha brav.

Film sevenet gant Darius Marder. Stadoù-Unanet Amerika, 2019, 2e.

Promising Young Woman

Kazi 30 vloaz eo Cassie. Labourat a ra hep kalz entan en ur c’hafedi. Bevañ a ra c’hoazh e ti he zud.
Ur wech ar sizhun e ya d’un toull-noz bennak hag e ra van bezañ mezv-dall. Bep sizhun ez eus ur paotr a glask “sikour” anezhi ha profitañ outi dreist-holl…
Cassie a oa barrek er skol-veur medisinerezh. Betek na c’hoarvezfe un darvoud spontus : he mignonez Nina a voe gwallet gant ur strollad studierien. Ne c’hoarvezas netra met dibosupl e oa d’an div blac’h kenderc’hel gant o studioù.
Buhez Cassie abaoe marv Nina a zo klask dial neuze.
Ur film dial eo Promising Young Woman. Un neuz “Instagram” a zo gant kalz lodennoù/skeudennoù, sonerezh pop e-leizh, un aergelc’h deuet brav. Kalz prantadoù diaes a zo avat, kalz tudennoù a ra dibaboù dipitus ha koulskoude gwirheñvel-tre. Start eo da zegemer evel-just, pegen boutin eo doareoù an dud da “respont”.
Carey Mulligan a zo bamus a-walc’h e perzh Cassie, diseblant dirak pep tra pe dost, mouchet pep tra, nerzh he buhez kaset davet an dial. N’eo ket ur film plijus neuze, lakaat a raio diaes ur bern tud. Ha souezhus a-walc’h eo fin ar film, en deus lakaet ac’hanon da soñjal “n’eo ket posupl” ha goude-se e oa ar film ur gomedienn zu a-benn ar fin. Petra ‘oa pal gwirion ar film? Start gouzout. Un doare efedus a-walc’h da lakaat ar gaoz war penaos e vez an dud dirak darvoudoù “yaouankiz”.

Film sevenet gant Emerald Fennell. Rouantelezh-Unanet ha Stadoù-Unanet Amerika, 2020, 1e51.

La saveur du printemps

Abaoe pell e felle din lenn La saveur du printemps. Plijet bras e oan gant ar golo hag aliet e oa bet gant kalzik tud.
Ur c’hrennard e fin e studioù lise eo Ari. Sikour a ra kalz e dud, perc’henn war un ti vara war vord ar mor. Fellout a rafe d’ar paotr yaouank mont kuit da studial er gêr vras, met start eo an traoù evit e familh e-keñver arc’hant. Ur strollad sonerezh en deus gant e vignoned hag an hunvre kenlojañ ganto ‘benn bloaz. Krediñ a ra e tiskoulmo e gudennoù ma kav un deskard pe un implijad nevez da gemer e blas en ti-vara. Hector an hini eo met ne vo ket ken simpl an traoù!
Plijus eo aergelc’h La saveur du printemps gant an dibab bikromiezh glas da skouer. Plijout a ra kalz din stil tresadennoù Savanna Ganucheau. N’a ket don-tre an traoù en istor a-benn ar fin, pe en tudennoù met koantik eo, ur blijadur da lenn dindan an heol !

Istor gant Kevin Panetta ha tresadennoù gant Savanna Ganucheau. Embannet e galleg e ti Jungle, d’an 11 a viz Even 2020.

Creed

N’am eus james gwelet filmoù Rocky. Koulskoude e felle din gwelet Creed. Evel-just n’hallin ket kompren an holl daveoù (ha c’hoazh, evel kalzik filmoù “kult” e anavezer skeudennoù heverk ar film, skalieroù ar savadur, tout se).
Adonis Johnson a zo ur paotrig feuls. N’en deus ket anavezet e dad ha marvet eo e vamm abred. En toull-bac’h evit ar vugale emañ. Gwreg e dad a zeu da ginnig dezhañ bevañ ganti : ar c’hampion box Apollo Creed e oa.
Ur vuhez didrabas en deus Adonis bremañ, deskadurezh, arc’hant… Koulskoude e plij dezhañ mont da Vec’hiko e-pad an dibenn-sizhun da n’em ganañ. Divizout a ra kuitaat Los Angeles evit mont da Philadelphia ha klask mont war roudoù e dad ha bezañ boksour eñ ivez.
Kavout a ran eo deuet mat ar film : prantadoù frammet evel ur film sport a zere, tammoù fromus, arouezioù anat met efedus (stourm ouzh ar c’hleñved ha stourm ouzh un enebour e sport). Prantadoù brav a zo, prantadoù leun a virvilh. Plijet en deus din ar film !

Film sevenet gant Ryan Coogler. Stadoù-Unanet Amerika, 2015, 2e13.

Intelligences artificielles – Miroirs de nos vies

E-kerzh un abadenn doare The Voice e kemer perzh unan bennak souezhus : un naouegezh artifisiel anvet Yurie. Adalek ar mare-se e komz ar mediaoù diwar-benn-se hag e klask an holl kompren penaos e tesk un naoegezh artifisiel, penaos e c’hall dont da vezañ gouennelour da skouer pe traoù a seurt-se. Mesket eo neuze an istor etre ar faltazi, tudennoù an ijinourien o deus krouet Yurie ha displegadennoù gwirion. Ul levr bannoù-treset evit kompren petra eo an naouegezh artifisiel eo dre un istor aes a-walc’h da veizañ. Ken aes, ken e lak lodennoù zo eus an istor da soñjal e rannoù a-bezh eus ar stirad Black Mirror da skouer… Evel-just e vez lakaet ar gaoz war an dleoniezh, an efed war an ekonomiezh hag al labour, perzhioù mat ha fall. Lodennoù zo a seblanto nec’hus neuze ha reoù all leun a spi. N’ouzon ket re petra soñjal e gwirionez met dedennus eo al levr evit kompren un tamm gwelloc’h. Savet mat eo.

Istor gant Fibre Tigre hag Arnold Zéphir ha tresadennoù gant Héloïse Chochois. Embannet gant Delcourt, d’ar 6 a viz Meurzh 2019.