Intelligences artificielles – Miroirs de nos vies

E-kerzh un abadenn doare The Voice e kemer perzh unan bennak souezhus : un naouegezh artifisiel anvet Yurie. Adalek ar mare-se e komz ar mediaoù diwar-benn-se hag e klask an holl kompren penaos e tesk un naoegezh artifisiel, penaos e c’hall dont da vezañ gouennelour da skouer pe traoù a seurt-se. Mesket eo neuze an istor etre ar faltazi, tudennoù an ijinourien o deus krouet Yurie ha displegadennoù gwirion. Ul levr bannoù-treset evit kompren petra eo an naouegezh artifisiel eo dre un istor aes a-walc’h da veizañ. Ken aes, ken e lak lodennoù zo eus an istor da soñjal e rannoù a-bezh eus ar stirad Black Mirror da skouer… Evel-just e vez lakaet ar gaoz war an dleoniezh, an efed war an ekonomiezh hag al labour, perzhioù mat ha fall. Lodennoù zo a seblanto nec’hus neuze ha reoù all leun a spi. N’ouzon ket re petra soñjal e gwirionez met dedennus eo al levr evit kompren un tamm gwelloc’h. Savet mat eo.

Istor gant Fibre Tigre hag Arnold Zéphir ha tresadennoù gant Héloïse Chochois. Embannet gant Delcourt, d’ar 6 a viz Meurzh 2019.

Magnificent Ms. Marvel 1

M’ho peus soñj mat e plije kalz din Ms. Marvel met n’am eus ket lennet pep tra. Laouen bras e oan oc’h adkavout Kamala Khan evit ar rummad nevez-mañ. Diverret eo en un doare efedus an traoù bet c’hoarvezet er “run” a-raok (evit an traoù ne ouien ket e oa kentoc’h “hañ perak n’am eus ket lennet pep tra? Dav ‘vo din en ober!”). Kregiñ a ra an traoù amañ pa lavar kerent Kamala dezhi int dipitet bras ganti hag he buhez gourharozez. Pezh a zo e teu boudoù tre-oabl da dagañ ar gêr. Ha goude-se he c’herent! Kaset int o zri war ur blanedenn all e lec’h m’eo gwelet Kamala evel “an hini dibabet” a saveteo anezho. Degemeret eo evel ur briñsez a-raok kompren e oa skoemp un tamm an traoù aze ivez…
Fent, emgannoù, fromoù gant he familh ha mignoned, pep aozenn eus rekipe Ms. Marvel a zo aze c’hoazh hag un teuzar eo bepred! Na laouen on!

Istor gant Saladin Ahmed ha tresadennoù gant Kinkyu Jung. Embannet e galleg gant Panini Comics, d’ar 27 a viz Du 2019.

Carbone & Silicium

Soñj ‘m eus bezañ bet gwelet pajennoù eus Carbone & Silicium en Utopiales, pa oa Mathieu Bablet o labourat war ar raktres. Brav eston e oant, evel-boaz.
Kregiñ a ra mat al levr d’am meno : e San Francisco emañ Noriko hag ur strollad skiantourien o labourat war un naoegezh artifisiel evit sevel robotoù neuz tud ganto da labourat e ti ar re gozh da skouer, labouret ez eus bet kalz war ar fromoù da skouer. Carbone ha Silicium eo an daou gentañ, un darempred ispisial a vo etrezo ha Noriko, dreist-holl Carbone. An embregerezh a ro arc’hant d’ar raktres a lak da 15 vloaz padelezh pep robot. Ma, evel-se e tro ar bed.
Carbone ha Silicium a zesk kant ha mil tra diwar-benn ar bed ha fellout a ra dezho beajiñ. E kerzh ur veaj e bro Indez e tivizo Silicium tec’hout kuit, laoskel a raio Carbone war e lerc’h, gloazet eo, ez fizikel hag e don he c’hreiz.
Goude 15 vloaz e tivizo Noriko laoskel Carbone da cheñch korf evit ma chomfe bev. Peurrest al levr a dremeno evel-se neuze : Carbone o cheñch korf bep 15 vloaz hag un darempred ki ha kazh gant Silicium. Fellout a ra dezhañ gwelet ar bed a-bezh, ne chom james e memes lec’h pa fell da gCarbone un doare ti.
Lodenn gentañ al levr am eus kavet mat-tre ha fromus, dedennus-kenañ an doare kevezerezh etre Carbone ha bugale Noriko da skouer. An eil lodenn am eus kavet arabadusoc’h, tremen a ra an amzer gant klichedoù a bep seurt eus an istorioù skiantoù-faltazi. Brav eston an tresadennoù evel-just met goullo a-walc’h ar preder hag ar c’homzoù. Dipitus un tamm.

Istor ha tresadennoù gant Mathieu Bablet. Embannet gant Ankama, d’an 28 a viz Eost 2020.

Selfie

Ur film “sketchoù” eo Selfie. Skignet e oa bet en Utopiales en a-raok met ne oan ket bet o welet anezhañ.
Un doare Black Mirror gall e seblante bezañ met kalz skañvoc’h eo an ton d’am meno.
5 istor a zo : hini ur familh a ra videoioù YouTube tro-dro d’ar mab yaouankañ klañv gant ur c’hrign-bev. Adalek ar mare ma pare ar bugel e krogont da goll sellerien hag ar bruderezh hag all…
Hini ur gelennerez c’halleg a zizolo Twitter. En ur skrivañ traoù drouk en un doare dizanv d’ur c’homedian a ra berzh bras e krog un darempred gantañ…
Ur paotr yaouank lent a glask un doare da vont e darempred gant ur genseurtez he deus piket e galon. Evit-se e klask pignet e notenn war un arload kejañ.
Istor un den a heul kuzulioù prenañ an “treol” en un doare kazi relijiel.
Hag un eured war un enezenn hep rouedad e lec’h ma krog tout an dud da vezañ nec’het gant un doare tec’h roadennoù prevez.
Traoù heñvel-tre neuze ouzh Black Mirror pe c’hoazh Assassination Nation evit an hini diwezhañ met an ton a chom skañv-kenañ me gav. C’hoarzhet ‘m eus meur a wech. Tudennoù zo a vez gwelet en istorioù all met hep liamm resis ebet etre an istorioù. Kavet am eus kempouez ar filmoù hep diforc’hioù seveniñ pe ton re vras (soñjal a ran e filmoù sketch all gant traoù disheñvel mat evel ar film spagnol Relatos salvajes, n’em boa ket merzet zoken e oa sevenet gant tud disheñvel. Ur film plijus neuze a lak da c’hoarzhin kentoc’h eget prederiañ pe kaout aon/nec’hamant.

Film sevenet gant Thomas Bidegain (Vlog), Marc Fitoussi (Le Troll), Tristan Aurouet (2,6/5), Cyril Gelblat (Recommandé pour vous) ha Vianney Lebasque (Smileaks). Frañs, 2019, 1e37.

Vivarium

Fellout a rae din gwelet Vivarium met ar film a oa bet diskouezet war ar skrammoù bras just a-raok ar prantad kraouiañ siwazh.
Gemma ha Tom a glask war-lerc’h un ti da brenañ. Mont a reont asambles betek un ajañs a ginnig dezho mont diouzhtu da weladenniñ un ti war un dachenn lodennet. Souezhus-kenañ eo den an ajañs ha heñvel poch eo pep ti. D’ur mare bennak e tifoup kuit den an ajañs ha ne gavont tu ebet da vont kuit eus an dachenn lodennet. Diwezhatoc’h e vo kaset dezho ur c’hased gant ur babig e-barzh, ret eo dezho sevel ar bugel a-benn bezañ dieubet.
Ur mennozh dedennus a zo gant ar film. Siwazh eo bet dibabet diskouez traoù un tamm hep penn na lost ha nec’hus e plas c’hoari da skouer war santimantoù an tudennoù (santet e vez da skouer Tom o kregiñ da gavout hegasus techoù Gemma met n’a ket gwall bell an istor-se). Un tamm hir ha luziet evit nebeut a dra a-benn ar fin. Ur mennozh mat kaset da benn en un doare kamm, pe neuze e vefe bet ret ober ur film-berr. Domaj eo rak ur santad “film festival” plijus a zo gant Vivarium.

Film sevenet gant Lorcan Finnegan. Iwerzhon, Danmark ha Belgia, 2019, 1e37.

Bolchoï Arena 2

Sac’het eo Marje e Bolchoï Arena. Nec’het eo, dizesper. He c’haredig hag he mignoned a glask sikour anezhi er bed gwirion hag e Bolchoï Arena. E keit-se e vez dizoloet traoù iskis o c’hoarvezout e Bolchoï Arena tro-dro da embregerezhioù a seblant re c’hlan…
Plijus-tre eo Bolchoï Arena bepred. N’eo ket ken souezhus/sebezus eget na oa al levrenn gentañ ha luziet ‘m eus kavet un tamm ar penn-kentañ met kaset eo mat war-raok ha treset ken mat c’hoazh, hast ‘m eus lenn an trede levrenn!
Istor gant Boulet ha tresadennoù gant Aseyn. Embannet gant Delcourt d’an 22 a viz Genver 2020.

Gemini Man

Ur film birvilh klasel eo Gemini Man. N’eo ket dedennus bras. Un istor klon o klask e bersonelezh/ un ezel eus ar CIA klasket war e lerc’h gant e implijidi bet… N’eus netra nevez me gav.
Tu dedennusañ ar film a zo evel-just Will Smith “kozh” ha “yaouank” o c’hoari asambles. Da zigentañ on bet disouezhet fall peogwir e oa tammoù birvilh hag e seblante anat ne oa ket un den a c’hoari perzh Junior enno. Tamm-ha-tamm, da vareoù all eus ar film (marteze gant gouleier disheñvel pe skeulioù talennoù disheñvel) on bet tapet da vat, ne welen ket mui na efedoù ispisial na motion capture na netra. Bamus a-walc’h neuze, domaj eo ne vefe ket bet kempouez a-hed ar film.
Mod all ne oa netra dreist-ordinal. Dudius eo. Ha c’hoazh.

Film sevenet gant Ang Lee. Stadoù-Unanet Amerika, 2019, 1e57.

Noô 1

Ne ouien ket zoken e oa tennet Noô diwar oberenn Stefan Wul pa oan kroget da lenn. Souezhus eo an doare da gontañ al levr bannoù-treset, tremen a ra buan an traoù hag an amzer hep kalz displegadennoù. Anzav a ran n’am eus ket heuliet kalz-tra, perak e oa Jouve o stourm, perak e oa Brice o stourm dre guzh ouzh Jouve. N’eo ket gwall sklaer an darempredoù hag an endro politikel/kevredigezhel. Marteze e oa dija evel-se el levr? Met hir ‘m eus kavet padal eo berr tout peogwir ne gomprenen ket pezh a c’hoarveze ha pegen pouezus e oa pe get. N’in ket pelloc’h gant an istor-se ‘m eus aon.Istor gant Laurent Genefort ha tresadennoù gant Alexis Sentenac, diwar romant Stefan Wul. Embannet gant Glénat, d’an 21 a viz Eost 2019.

A Shaun the Sheep Movie : Farmageddon

E-kichen ti-feurm Mossy Bottom e erru ul lestr tre-oabl. Ur boud a ziskenn eus al lestr hag ur servij kuzh a zeu da enklask. E keit-se e erru ur bern touristed, dedennet gant an dud tre-oabl ha perc’henn an ti-feurm a fell dezhañ profitañ eus an dra-se evit gounit arc’hant. Shaun eus e du, a glasko sikour ar boud a glask adkavout e dud…
Ur film leun a zaveoù da filmoù klasel ar skiant-faltazi eo Farmageddon (E.T. the Extra-Terrestrial, 2001: A Space Odyssey, Close Encounters of the Third Kind, Signs, stirad The X-Files…). Fentus-tre eo al lodenn-se evit ar re vras. Ur film hep kaoz eo mod all, pezh a zo aes evit ar vugale vihanañ. Un istor mignoniezh ha distreiñ d’ar gêr eo mod all gant un toullad skoilhoù, war skouer E.T. Fentus ha dudius eo, daoust din kavout n’eo ket gwellañ film ar studio Aardman.

Film sevenet gant Richard Phelan ha Will Becher. Rouantelezh-Unanet ha Frañs, 2019, 1e27.

El hoyo

Ur film faltazi spagnol eo El hoyo, gant un neuz Cube dezhañ. Adalek ar penn-kentañ e kaven e vefe bet an doare film mat evit priz sinema an Utopiales.
Goreng a ziviz kemer perzh en un taol-arnod aozet gant ar Velestradurezh e-pad 6 miz, en eskemm d’un diplom. Dihuniñ a ra bac’het gant un den. Un toull a zo e kreiz al leur hag al lein. Ur savenn a dremen dre pep estaj gant boued. Tamm-ha-tamm ez eus nebeutoc’h nebeutañ a voued evel-just. Bep miz e cheñchont estaj ha n’ouzont ket pet estaj a zo en holl.
Klask aozañ an traoù evit rannañ ar boued, sikour pe get tud an estajoù all, sikour pe get an den a zo toullbac’het gant pep hini, a bep seurt a c’hoarvezo, ha pep tra a cheñcho ivez hervez e peseurt estaj emaint evel-just.
Dedennus am boa kavet ar film, diwar-benn psikologiezh an dud evel-just ha peseurt abegoù a lak pep hini da zibab bezañ emgar kentoc’h eget brokus. Daoust ha mat eo reiñ boued d’an holl dre ar feulster? Prantadoù feuls-tre a zo er film ha rukunus a-walc’h. Ur film efedus eo bepred ha dedennus evit ar preder. Ne ro respont ebet e gwirionez, n’eus haroz ebet. Ur film fin eo, gant nebeut a dra eo plijus an disoc’h me gav.

Film sevenet gant Galder Gaztelu-Urrutia. Bro Spagn, 2019, 1e34.