Dielloù evit skiant-faltazi

Infinity 8 – 1 : Romance et macchabées

Posted in Levrioù bannoù-treset with tags , , , on Even 4, 2017 by geekezig

Ur rummad levrioù bannoù-treset savet gant Lewis Trondheim eo Infinity 8. Ur steuñv a zo d’ar rummad a-bezh ha pep levrenn a zo savet gant tud disheñvel. Zep ha Dominique Bertail evit Romances et macchabées, al levrenn gentañ.
Lañset eo an traoù : war vourzh an Infinity 8, ar c’habiten a c’hall distreiñ en amzer 8 gwech 8 eur. Ret e vo da 8 implijad eus al lestr enklask war ar pezh a vir anezho da genderc’hel sioul gant o beaj.
Mennozh diazez ar stirad a blij kalz din met n’on ket bet entanet gant an istor-mañ, siwazh. Re bounner ar fent evidon ‘m eus aon. Dudius ‘oa memestra met spi ‘m eus e kavin muioc’h a blijadur en istorioù all.Istor gant Lewis Trondheim ha Zep, tresadennoù gant Dominique Bertail. Embannet gant Rue de Sèvres d’ar 25 a viz Genver 2017.

Les Olympiades truquées

Posted in Levrioù with tags , , , , , on Mae 31, 2017 by geekezig

Ul levr skiant-faltazi eo Les Olympiades truquées. Tremen a ra an istor e Frañs, diwezhatoc’h en XXI vet kantved. Div blac’h a vo heuliet a-hed ar romant : Maël a zo klon gwreg ur skiantour, bet desavet gantañ neuze, evel ur verc’h met evit bezañ e wreg. Un darempred skoemp a zo etrezo neuze evel-just, ha Sphyrène a zo hi e-touez gwellañ neuierezed Frañs hag o prientiñ evit ar c’hoarioù olimpek a vo a-benn nebeut.
Ur bed leun a dramm eo hini les Olympiades truquées, evit gwellaat korf mab-den hag ar sportourien a live uhel, ur bed gant nebeut a verc’hed o c’henel neuze o deus tapet ur seurt gallout (ur gwaller a vo spazhet da skouer) met kalz tud ganet evel paotred a zo e gwirionez merc’hed treuzjener… Ur bern traoù a zo e levr Joëlle Wintrebert me gav. Re marteze.
Start ‘m eus kavet heuliañ pep tra, dreist-holl pa oa tudennoù all estreget an div blac’h (skiantourien hag all). Mennozhioù dedennus-kenañ a zo me gav met reoù zo n’eont ket pell-tre (Maël a seblant dilezel penn-da-benn personelezh he “skouer” padal e ouier he deus eñvorennoù dezhi). Kalz prantadoù rev a zo, kalz anezho a zo skoemp, gwalloù a vil-vern a zo ivez. Ul levr start eo neuze.
E lennet am eus evit klub lenn “Une chambre à nous” ha kalz tud n’int ket aet betek ar penn. Ar pezh a zo domaj peogwir ez eus traoù dedennus o c’hoarvezout en eil lodenn (an neuierezed o kompren e vezont drammet, Maël er strollad a brient ur gwalldaol). Bamus a-walc’h eo soñjal e oa bet skrivet stumm kentañ al levr e deroù ar bloavezhioù 80 (adstummet eo bet meur a wech, troc’het, adskrivet a-raok kavout e stumm fin e 1998 gant embannadur Bélial) gant ar skrivagnerez. Arabat disoñjal an dra-mañ ivez rak ma seblant traoù zo iskis (tudenn breur Sphyrène a zo e gwirionez ur plac’h treuzjener), n’eus ket keit-se zo e oa souezhus lakaat ar gaoz war-se, anat eo ne oa ket ken soutil komz eus seurt dodenn 40 vloaz zo.
Ul levr na guzuilhfen ket eo avat, un tamm start ‘m eus kavet e lenn ha ne oa ket plijus kement-se, din me.

Romant skrivet gant Joëlle Wintrebert. Embannet gant J’ai lu, e miz Du 2000.

Les trois fantômes de Tesla 1

Posted in Levrioù bannoù-treset with tags , , , , on C'hwevrer 28, 2017 by geekezig

trois-fantomes-teslaGolo Les trois fantômes de Tesla en doa plijet din. A-wechoù, n’eus ezhomm mann all ebet evit kaout c’hoant da lenn un oberenn, neketa ?
E fin 1941, e New York, e tremen darvoudoù an istor. Ur paotrig hag e vamm, nevez erruet, a vo heuliet. Ar Stadoù-Unanet ne gemeront ket perzh c’hoazh en eil brezel bed met stignet eo an traoù evel-just. Un doare ukroniezh eo an istor neuze, savet war kevezerezh Tesla hag Edison. N’eo ket klok an istor evel-just met peadra a zo da ijinañ e vo savet armoù, robotoù ha me oar ivez eus tu Japan.
Brav ‘m eus kavet an tresadennoù met un tamm iskis al lusk, ne oan ket tapet kement-se en istor. Un diouer a bersonelezh gant an haroz marteze ? Santet e vez un tamm levezon Alex Alice (a zo trugarekaet gant an oberourien) met hep an nerzh… Da welet penaos e troio an istor!fantomesteslaIstor ha livioù gant Marazano, tresadennoù gant Guilhem. Embannet gant Le Lombard, d’ar 26 a viz Eost 2016.

Arrival

Posted in Filmoù with tags , , , , , , on Kerzu 6, 2016 by geekezig

arrivalE festival an Utopiales am eus bet tro da welet Arrival, d’al Lun 31 a viz Here, pezh a oa a-raok ar gelaouennerien zoken war a seblant! Poent din skrivañ diwar-benn ar film-se neuze peogwir e vo war ar skrammoù bras a-benn warc’hoazh… 😀
Ur film diwar-benn an darempred kentañ gant boudoù tre-oabl eo Arrival. Daouzek lestr estren a zo erru d’un deiz d’egile e meur a lec’h er bed. Louise Banks a zo yezhoniourez ha brudet evit he zroidigezhioù, goulennet e vez diganti gant an arme amerikan klask jubenniñ ar pezh a lâr ar boudoù ha kavout perak int deuet.
Dedennus ‘m eus kavet gwelet an darvoudoù dre tu ar yezhoù, an eskemm, an deskiñ. Dizoloiñ ha studial un doare da eskemm (ha da soñjal) nevez, pe c’hoazh eskemm gant ar broioù all diwar-benn kement-mañ. N’eo ket dre ret ar pezh vez lakaet en a-raok da gustum e seurt filmoù. Gwirheñvel a-walc’h en deus seblantet din penaos e tro an traoù. Un twist a zo d’ur mare bennak met n’ouzon ket perak resis n’on ket bet souezhet tamm-ebet, ar fin n’en deus ket displijet din daoust da se. Daoust ha levezonet on bet gant an doare da sellout ouzh ar film (leun-chouk ar sal ha tost-tre eus ar skramm, war ar c’hostez da vat)? Marteze ‘walc’h rak da gustum e vefen bet fromet gant ar c’hlozadur d’am soñj…
Ur film savet mat, brav e skeudennoù ha plijus e aktourien eo Arrival met siwazh evitañ e lak da soñjal kement e Interstellar e pep keñver ken n’on ket bet gouest d’e gavout mat penn-da-benn. Marteze e vefe dav din e welet en-dro pe paouez da vont da welet filmoù skiant-faltazi, piv ‘oar… ? 😀
(Soñj ‘m eus e oan bet displijet a-walc’h gant Prisoners ivez neuze marteze eo liammet gant doare da seveniñ Denis Villeneuve… Nag a deoriennoù!)

Film sevenet gant Denis Villeneuve, diwar un danevell gant Ted Chiang. Stadoù-Unanet Amerika, (war skrammoù bras Frañs gant an titl Premier Contact adalek ar 7 a viz Kerzu) 2016, 2e07.

Midnight Special

Posted in Filmoù with tags , , , , on Here 10, 2016 by geekezig

midnight_specialBlaz ur film skiant-faltazi eus ar bloavezhioù 80 a zo gant Midnight Special un tamm. Ne vez ket displeget pep tra d’ar seller-ez, plas a zo evit ijin pep hini me gav. Alton, ur paotrig a oa o vevañ en un doare sektenn, a zo diskleriet evel bezañ bet skrapet gant e dad, Roy. Galloudoù a zo gant ar paotrig-se hag ar sektenn a oa bet savet tro-dro dezhañ ha d’ar pezh a gleve, titouroù kuzh dastumet gant ar gouarnamant, da skouer. Ret e vo da Roy kuzhat gant e vab ha klask mont betek ul lec’h emgav resis. Etre ar poliserien, ar servijoù kuzh hag izili ar sektenn ne vo ket aes dezho treuziñ harzoù ar stad…
Al lodenn gentañ a zo savet mat-kenañ me gav, marteze n’eo ket ken koulz an eil lodenn met efedus eo betek ar penn ha plijus-tre ‘m eus kavet tudenn Kirsten Dunst, ral gwelet anezhi en ur perzh a-seurt-se. Evel-just e chom un toullad traoù direspont e fin ar film met evidon ne seblant ket grevus, tapet on bet gant lusk hag aergelc’h Midnight Special ha ral a-walc’h eo me gav kavout seurt santad gant filmoù skiant-faltazi nevez.

Film sevenet gant Jeff Nichols. Stadoù-Unanet Amerika, 2016, 1e51.

Udora

Posted in Levrioù with tags , , , , on Gouere 3, 2016 by geekezig

golo_udoraUr romant « diskiant faltazi » (kavet mat !) eo Udora pe afer an ed-du. Ur romant fentus-tre gant neuz ur “buddy-levr” fliked. Savet eo a chabistroù berr, lennet e vezont buan, lusket-tre an enklask, an dec’hadenn… Ijinañ a raen mat an endro pa oan o lenn, levezonet marteze gant filmoù brudet evel Star Wars. Evidon e rafe ur film skiant-faltazi a-feson!
Plijet on bet gant ar gerioù bet ijinet gant Paskal an Intañv : « skeuden », « robotud »…
A-wechoù e seblante din personelezhioù Bob ha Mike meskañ met marteze e oa abalamour d’am evezh kentoc’h eget traoù all. Jennifer he deus plijet kalz din avat ^^
Dic’hortoz ‘m eus kavet lenn seurt romant e brezhoneg, laouen vefen o kaout muioc’h a seurt-se, gant ijinadennoù geriaoueg ha fent ha birvilh forzh pegement.

Romant bet skrivet gant Paskal an Intañv. Embannet gant Al Liamm d’ar 16 a viz Du 2015. Aet eo 1añ priz al levr faltazi e Prizioù dazont ar brezhoneg (Frañs 3 & Ofis publik ar brezhoneg) gantañ.

The Infinite Loop – 1

Posted in Levrioù bannoù-treset with tags , , , , , on Mae 9, 2016 by geekezig

infiniteloopgKlevet em boa krouerien The Infinite Loop en un abadenn 101% ha dedennet oan bet gant o raktres. Ur c’houblad gall eo a sav al levr bannoù-treset-mañ. Embannadur kentañ al levr a zo bet arc’hantaouet a-stroll dre lec’hienn Ulule. Da c’houde eo bet embannet en un doare klaseloc’h ha miziek gant an embanner IDW er Stadoù-Unanet araok distreiñ da Frañs e ti Glénat ! Ur veaj iskis, neketa ?
Teddy a labour evit reizhañ an direizhderioù a vez kavet e kerzh an Istor, tremen a ra hec’h amzer o veajiñ en amzer neuze. Un deiz bennak e kav un direizhder dibar : stumm ur plac’h zo dezhañ ! Souezhet eo ha n’eo ket gouest da ziverkañ anezhañ (pe anezhi ^^). Ret e vo dezho tec’hout ha Teddy, a gave dezhi e oa ar garantez ur si, a grogo da gaout ur sell nevez war an traoù…
Berr a-walc’h eo al levr kentañ-mañ met dudius eo bet e lenn. An tresadennoù a zo un neuz plijus dezho, ur c’hostez giz-kozh pop un tamm me gav. Un tamm goullo e seblantont a-wechoù (moarvat he deus poan an dresourez gant an tro-war-droioù) met mod all on bet plijet gant he stil, disheñvel eus pezh a vez da gustum er c’homics. Un toullad traoù ouzhpenn a zo e fin al levr, ur pennad diwar-benn istor al levrioù bannoù-treset LGBT skrivet gant The Lesbian Geek hag ivez ur pennad da zisplegañ un tamm penaos e kenlabour Elsa Charretier ha Pierrick Colinet, dedennus.infiniteloopdIstor gant Pierrick Colinet ha tresadennoù gant Elsa Charretier. Embannet e galleg gant Glénat, en dastumad Comics, d’ar 26 a viz Eost 2015.

%d bloggers like this: