Archive for the Stiradoù, webstiradoù ha skinwel Category

Girls bloavezh 5

Posted in Stiradoù, webstiradoù ha skinwel with tags , , , , , , , , , , on Ebrel 13, 2017 by geekezig

Resevet eo bet pempvet bloavezh Girls el levraoueg ha soñjet ‘m eus “sell ‘ta! Petra ‘zo c’hoarvezet gant an tudennoù-se?!”
Plijadur ‘m eus bet gant lodenn gentañ ar bloavezh, dreist-holl gant ar pezh a c’hoarveze gant Shoshanna, e bro Japan.
Ur rann a-bezh a zo tro-dro da Varnie, a zo un dudenn a zisplij d’ur bern tud ha koulskoude e kavan eo an hini gwirheñvelañ (pe ez eus traoù a gavan ouzhin enni?) : “Panic at Central Park” a zo deuet brav-tre. Goude-se avat n’on ket bet plijet kement gant fin ar bloavezh, abalamour marteze da zarempred Jessa hag Adam pe d’an nebeut a Shoshanna a vez gwelet. Piv ‘oar!
Nebeutoc’h a draoù dedennus a zo dre vras er bloavezh avat (n’eus ket kaoz ken eus politikerezh gant tudenn Ray na kement-se eus krouiñ ha skrivañ, gant Hannah ha Marnie). An holl a zo o labourat pe gant studioù, darempredoù stabil tamm-pe-damm, n’eus ket kalz tra nevez… Estreget Shoshanna hag ar pezh a vev pell vro hag an doare m’eo rannet etre ar c’hoant da zistreiñ hag an ezhomm da dec’hout ‘m eus kavet kreñv-tre. Ar peurrest ne oa ken met adlavarout traoù a oa bet lavaret dija, siwazh. Ma, ne chom ket kalz a rannoù ken, tost echu ar stirad a-bezh neuze e klaskin mont betek ar penn memestra. Diwezhatoc’h!
Ur wech ouzhpenn e oa plijus sellet ouzh ar “featurette” evit pep rann a zo war an DVD hag un toullad tammoù bet tennet.

Stirad bet krouet gant Lena Dunham. Bloavezh gant 10 rann tro 26 munut, bet skignet evit ar wech kentañ war HBO etre an 21 a viz C’hwevrer hag ar 17 a viz Ebrel 2016.

Girls – bloavezh 4

Posted in Stiradoù, webstiradoù ha skinwel with tags , , , , , , , , , , on Mae 5, 2016 by geekezig

girlsseason-4Setu, sellet am boa ouzh pevare bloavezh Girls a-benn ar fin! Sapre cheñchamant a zo da gaout peogwir e kuita Hannah New York evit mont da studial en Iowa! Div rann gentañ ar bloavezh a zo bet start-tre evidon, lakaet diaez e oan ha ne blije netra din, e gwirionez (merzet am boa e oant sevenet gant Lena Dunham hec’h unan ha n’ouzon ket ma c’hall bezañ un abeg). Tamm-ha-tamm eo gwellaet an traoù evidon a-drugarez da dudennoù nevez (Mimie-Rose, Fran) pe c’hoazh d’ar rann a dremen penn-da-benn er ranndi ma teu pep hini d'(h)e dro mignoned ha mignonezed Hannah da welet anezhi. Soshanna a glask labour, Jessa n’ouzer ket mat, Marnie a glask displegañ da z/Desi e fell dezhi kaout un darempred ofisiel… Prantadoù dedennus-tre a zo tro dro d’ar c’hrouiñ (ha d’ar skrivañ dreist-holl) peogwir e tiviz Hannah dilezel he studioù (war ar skrivañ faltazi) goude bezañ bet barnet gant he c’hamaladed. Ar preder-se n’eus plijet kalz din. Fentus em boa kavet ivez gwelet anezhi o kelenn hag o klask bezañ mignonez gant krennardezed. Ray a grog gant un hent nevez, ar politikerezh lec’hel, ar pezh a gavan ur mennozh mat evitañ. Prantadoù brav a zo, ganedigezh nizez Adam da skouer. Ur wech ouzhpenn em boa kavet e oa dilezet Marnie. Met cheñchamant bras a vez santet o tont. Penaos ‘ta e vo ar pempvet bloavezh?
Evel boaz war an DVD e vez kavet ur “featurette” evit pep rann, ar pezh a zo plijus bepred evit kompren petra felle da Lena Dunham kontañ pe lakaat war-wel.

Stirad bet krouet gant Lena Dunham. Bloavezh gant 10 rann tro 26 munut, bet skignet evit ar wech kentañ war HBO etre an 11 a viz Genver hag an 22 a viz Meurzh 2015.

Les apprentis sorciers du climat

Posted in Stiradoù, webstiradoù ha skinwel with tags , , , on Genver 11, 2016 by geekezig

apprentisKuzuliet eo bet din an teulfilm-mañ gant ma breur. Un teulfilm dedennus eo diwar-benn an doareoù n’eus mab-den da glask un diskoulm teknel d’ar cheñchamantoù hin, en ur klask mestroniañ pe kaout levezon war an natur : ar geo-ijinouriezh. Dedennus-tre ‘m eus kavet gouzout penaos ez eus bet taolioù-arnod e-pad ul lodenn vat eus an XXvet kantved (goude an eil brezel bed) gant armeoù ha gouarnamantoù ur bern broioù, a-wechoù gant ar pal tagañ broioù all. E lodenn ziwezhañ an teulfilm e vez komprenet perak e c’hallfe seurt binvioù bezañ arc’hantaouet (er Stadoù-Unanet da skouer e vefe aesoc’h lakaat Republikaned ha Demokrated a-du war se eget war un doare da ezteurel nebeutoc’h a CO2…) met ivez an efedoù war hir dermen a vefe KALZ gwashoc’h eget laoskel an hin da dommañ evel m’emañ oc’h ober hirie an deiz. Istorourien, prederourien, kelaouennerien, skiantourien hag all a vez klevet. Un teulfilm skrijus met dedennus-tre.

Teulfilm sevenet gant Pierre Oscar Lévy. Frañs, 2014, 1e24. Bet skignet war Arte d’ar 24 a viz Du 2015.

Sense8

Posted in Stiradoù, webstiradoù ha skinwel with tags , on Kerzu 27, 2015 by geekezig

Sense8Tro ‘m eus bet da zizoloiñ div rann gentañ Sense8 war ur skramm bras e kerzh an netflix fest e Pariz. Un doare plijus neuze, daoust d’ar santad iskis dizoloiñ ur stirad gant tud all er sal, a c’hoarzh pe a ra trouz da vareoù dic’hortoz evidon (pok Lito hag e vignon). Ur pennad (ur miz pe dost) ‘m eus gortozet evit sellet ouzh an heuliad, n’ouzon ket perak. Marteze peogwir n’eo ket Sense8 ur stirad gant cliffhanger e fin ar rannoù kement se. N’em boa ket santet an ezhomm da vont da sellet groñs, diouzhtu. Met buan a-walc’h on aet evit sellet ouzh 12 rann ar bloaz kentañ memestra.
Ma, petra gont Sense8 ? Istor 8 den, un tamm pep lec’h er bed, gant buhezioù disheñvel a “zihun”, liammet etrezo bremañ. Pep hini a zalc’h e bersonelezh met gallout a reont “beajiñ” betek unan all eus ar strollad, komz asambles, ha tamm-ha-tamm gouzout ar pezh a oar ar re all (ober, pe komz da skouer). Kalz fent a zo gant se er penn-kentañ, boaziañ d’an traoù souezhus a zegas da bep hini. Goude-se ez eus ivez un istor tro-dro da “Angelica”, ar plac’h he deus dihunet anezho. Tud a glask war o lerc’h, a glask ober drouk dezho ha ne vez ket komprenet mat perak. Un doare enklask neuze. Pep hini eus e du a ranko ivez tallañ ouzh kudennoù pemdeziek. N’on ket bet kendrec’het tamm ebet gant an tu “enklask” ha skiant-faltazi a zo gant Sense8 evit ar mare. Met plijet on bet gant an tudennoù liesseurt, ar c’henskoazell, an eskemmoù a zo etrezo. An holl a gavan dedennus en o doare, en o saviad. Ral eo gwelet kement a dud disheñvel lakaet en a-raok. Un draig ‘m eus kavet torr-penn (ha droch zoken da vareoù zo) a zo ar fed e vefe PEP TRA e saozneg. Ya ya, zoken e lec’hioù ma rankfe an dud komz swahili, koreaneg, hindi pe c’hoazh alamaneg pe islandeg. Ur vezh un tamm pa grog tudennoù ‘zo da lârat ur ger en ur yezh all (Will o komz koreaneg da skouer pe Wolfgang o komz hindi) padal n’eo ket bet klevet Sun pe Kala o komz er yezhoù-se james! Lu un tamm, padal e seblant ar c’hoant bezañ gwirheñvel ken splann war tachennoù all (filmet eo bet e pep bro resis da skouer!). Evel ‘barzh Something Must Break avat e c’haller lârat gourc’hemennoù evit bezañ dibabet un aktourez treuzjener evit c’hoari ur plac’h treuzjener.
Ma plijus ‘m eus kavet ar stirad, gant prantadoù fromus-tre zoken (4 Non Blondes, mirdi Mec’hiko, ganedigezh an 8) ha dedennet e vin o welet an eil bloavezh a zisplego muioc’h a draoù moarvat (ar seurt servij a glask tapout an dud evelto hag all).

Stirad krouet gant Lana hag Andy Wachowski ha J. Michael Straczynski. Stadoù-Unanet Amerika, 12 rann 50 munut skignet war Netflix adalek ar 5 a viz Even 2015.

Girls – bloavezh 3

Posted in Stiradoù, webstiradoù ha skinwel with tags , , , , , , , , on Du 2, 2015 by geekezig

Girls-Season-3Adam hag Anna a vev asambles goude istorioù fin an eil bloavezh. Seblantout a ra tremen mat an traoù er ranndi. Marnie zo bet dilezet gant Charlie, Shoshanna a ra un tamm forzh petra ha Jessa a zo en ul lec’h a-ratozh evit pareañ he c’hudennoù dramm.
Setu penaos e krog an traoù.
Un toullad traoù a-feson a zo bet er bloavezh-mañ me gav : labour Hannah e GQ da skouer, an istorioù tro-dro d’ar marv (dreist-holl hini mamm-gozh Hannah). Un tamm dipitet on gant emdroadur Marnie, daoust din kavout bepred eo tudenn gwirheñvelañ ar stirad. Shoshannah ‘zo bet dilezet un tamm ha Jessa hegasus pa veze gwelet. Dizoloet hon eus c’hoar Adam ivez. A bep seurt traoù a zo bet neuze er stirad, traoù dipitus ivez evel-just met ur bloavezh a galite eo me gav a live gant an eil digudenn.

Stirad bet krouet gant Lena Dunham. Bloavezh gant 12 rann tro 30 munut, bet skignet evit ar wech kentañ war HBO etre an 12 a viz Genver hag an 23 a viz Meurzh 2014.

Glee – bloavezh 4

Posted in Stiradoù, webstiradoù ha skinwel with tags , , , , , , , , , on Here 20, 2015 by geekezig

glee4A-greiz-holl ez eus deuet ar c’hoant din gouzout petra ‘oa deuet da vezañ tudennoù Glee. Setu me kroget en-dro gant ar stirad. Rachel ha Kurt a vez heuliet ingal e New York hag ar re all e McKinley High, evel gwechall. Ar bloaz-mañ e vo kaoz eus kudennoù boued/skeudenn, eus disleksiezh pe c’hoazh eus identelezh jener gant Unique.
Evidon-me ne oa ket dav heuliañ Rachel ha Kurt ken (ur seurt santad Ugly Betty c’hwitet a oa un tamm evidon, gant e labour e Vogue.com) estreget evit cameo Kate Hudson ha Sarah Jessica Parker marteze. Tudennoù nevez a zo el lise gant bepred un tamm memes neuz : tud paour o klask bezañ degemeret, un cheerleader drouk, ur plac’h gant a gar daou baotr ha me oar. Tro-dro da rannoù Nedeleg (un tamm a-raok kreiz ar bloavezh) em eus kavet e oa plijus-tre ar rannoù met diskennet eo en-dro ma evezh goude ur mare. Traoù zo a zo deuet brav met dre vras em eus kavet ar prantadoù kan/dañs a live izeloc’h ha n’em boa ket kement a blijadur o sellet eget a-raok. Marteze on erru re gozh?

Stirad bet krouet gant Ryan Murphy, Brad Falchuk hag Ian Brennan. Stadoù-Unanet. Bloavezh gant 22 rann 42 munut. Bet skignet evit ar wech kentañ war ar chadenn Fox etre an 12 a viz Gwengolo 2012 hag an 9 a viz Mae 2013.

Girls – bloavezh 2

Posted in Stiradoù, webstiradoù ha skinwel with tags , , , , , , , , on Here 5, 2015 by geekezig

girlss2.jpgPa ‘m eus gwelet e oa eil bloavezh Girls el levraoueg n’on ket bet pell o kemer, nag o sellet! Traoù nevez a dremen evel-just. Un tamm dipitet on gant tudenn Jessa hag an nebeut a vez gwelet Shoshanna. Mod all ez eus bepred re a Hannah ha Marnie an hini eo a blij din ar muiañ. Marteze e vez gwelet muioc’h ar baotred ivez (Ray, Charlie, Adam hag Elijah) pezh n’eo ket displijus. Fin ar bloavezh gant kudennoù bras anken Hannah a zo un tamm dedennusoc’h eget ar penn-kentañ. Plijus eo bepred an doare featurette a zo evit pep rann e lec’h ma tispleg Lena Dunham un tamm pal pep hini. Kenderc’hel a rin gant ar stirad gant plijadur!

Stirad bet krouet gant Lena Dunham. Bloavezh 10 rann tro 30 munutenn bet skignet gant HBO etre an 13 a viz Genver hag ar  17 a viz Meurzh 2013 .

%d bloggers like this: