Dielloù evit dramm

Les Olympiades truquées

Posted in Levrioù with tags , , , , , on Mae 31, 2017 by geekezig

Ul levr skiant-faltazi eo Les Olympiades truquées. Tremen a ra an istor e Frañs, diwezhatoc’h en XXI vet kantved. Div blac’h a vo heuliet a-hed ar romant : Maël a zo klon gwreg ur skiantour, bet desavet gantañ neuze, evel ur verc’h met evit bezañ e wreg. Un darempred skoemp a zo etrezo neuze evel-just, ha Sphyrène a zo hi e-touez gwellañ neuierezed Frañs hag o prientiñ evit ar c’hoarioù olimpek a vo a-benn nebeut.
Ur bed leun a dramm eo hini les Olympiades truquées, evit gwellaat korf mab-den hag ar sportourien a live uhel, ur bed gant nebeut a verc’hed o c’henel neuze o deus tapet ur seurt gallout (ur gwaller a vo spazhet da skouer) met kalz tud ganet evel paotred a zo e gwirionez merc’hed treuzjener… Ur bern traoù a zo e levr Joëlle Wintrebert me gav. Re marteze.
Start ‘m eus kavet heuliañ pep tra, dreist-holl pa oa tudennoù all estreget an div blac’h (skiantourien hag all). Mennozhioù dedennus-kenañ a zo me gav met reoù zo n’eont ket pell-tre (Maël a seblant dilezel penn-da-benn personelezh he “skouer” padal e ouier he deus eñvorennoù dezhi). Kalz prantadoù rev a zo, kalz anezho a zo skoemp, gwalloù a vil-vern a zo ivez. Ul levr start eo neuze.
E lennet am eus evit klub lenn “Une chambre à nous” ha kalz tud n’int ket aet betek ar penn. Ar pezh a zo domaj peogwir ez eus traoù dedennus o c’hoarvezout en eil lodenn (an neuierezed o kompren e vezont drammet, Maël er strollad a brient ur gwalldaol). Bamus a-walc’h eo soñjal e oa bet skrivet stumm kentañ al levr e deroù ar bloavezhioù 80 (adstummet eo bet meur a wech, troc’het, adskrivet a-raok kavout e stumm fin e 1998 gant embannadur Bélial) gant ar skrivagnerez. Arabat disoñjal an dra-mañ ivez rak ma seblant traoù zo iskis (tudenn breur Sphyrène a zo e gwirionez ur plac’h treuzjener), n’eus ket keit-se zo e oa souezhus lakaat ar gaoz war-se, anat eo ne oa ket ken soutil komz eus seurt dodenn 40 vloaz zo.
Ul levr na guzuilhfen ket eo avat, un tamm start ‘m eus kavet e lenn ha ne oa ket plijus kement-se, din me.

Romant skrivet gant Joëlle Wintrebert. Embannet gant J’ai lu, e miz Du 2000.

Advertisements

Life is Strange

Posted in C'hoarioù video with tags , , , , , , , , , , , on Genver 24, 2016 by geekezig

life-is-strange-titleE-kerzh peseurt darvoud em boa klevet komz eus Life is Strange evit ar wech kentañ? N’am eus ket soñj ken met soñj mat ‘m eus eus ar santad ‘m eus bet o sellet ouzh ar bomm-bruderezh, eus ar frazenn “Gone Home meets The Walking Dead… wih time travel”.  A! Aha! Ahaha! “Shut up and take my money” evel ma vez lâret.

Koulskoude n’on ket bet o prenañ pe o rakprenañ ar c’hoari diouzhtu-diouzhtu. Gortozet ‘m eus an eil rann evit en ober. Ne c’hoazh distaol ebet na netra met poent e oa. Ha setu me lañset neuze…
Life is Strange a zo ur c’hoari a rannoù, e doare reoù telltale games un tamm. Ur c’hoari doare point ‘n’ click eo (traoù da zastum, tud da atersiñ). Kregiñ a ra ar c’hoari gant ur gwallhunvre. Max a zo en ur gorventenn kichen tour-tan Arcadia Bay. Dihuniñ a ra en he c’hentel diwar-benn ar skeudenniñ, e Blackwell Academy. Buan goude e vo test eus ur muntr. Aze e verzo Max e c’hall mont en-dro en amzer (un nebeut) a-benn cheñch un darvoud. Eeun a-walc’h eo steuñvenn ar c’hoari, ret eo dastum titouroù, mont da lec’h-mañ lec’h, klask un dra hag adober goude bezañ distroet en-dro en amzer evit dont a-benn… Evit sikour ac’hanomp ez eus deizlevr Max hag he fellgomzer hezoug (gant gerigelloù a vez kaset dezhi gant tud all).LiS-deizlevrLiS-hezoug C’hoariet e vez gant al logodenn (evit an oberoù) hag an touchennoù evit mont war-raok. Un tamm start ‘m eus kavet boaziañ d’an doare da c’hoari-se (a seblant klasel koulskoude!) rak ret eo ruzañ davet an ober a fell deomp ober, ouzhpenn klikañ. Er penn-kentañ ne teuen a-benn d’ober netra! Kustumañ a vez graet met n’am eus ket kavet anat. Start ‘oa ivez a-wechoù lakaat evezh Max (ha neuze an dibab oberoù) war an dra a felle din.LiS-gameplay Da vareoù zo ez eus dibaboù d’ober. E-kerzh ar c’hoari e vo lâret splann :  ma ne tistroomp ket da cheñch e chomo an diviz-se hag en do efedoù da c’houde.LiS-consequences Un dra a c’haller ober ivez met n’eo ket rediet a zo tapout skeudennoù da vareoù ha lec’hioù resis er c’hoari. Ar skeudennoù (dre vras, ket ar re-mañ) do ur perz a-bouez en istor.LiS-skeudennouAr rann gentañ a zo bet ur gwir bam evidon. Pa tañs Chloe war he gwele eo eo bet piket ma c’halon. Ha ne oan ket evit chom hep gouelañ e-kerzh tout ar c’hlozadur.
Evel e c’hoarioù telltale games ez eus stadegoù e fin ar c’hoari. Reoù an divizoù bras ha reoù all, n’int ket ken a-bouez. (Diwallit! SPOILERS RANN 2)LiS-stadegouDivizet ‘m eus ober ur c’hoariadenn “from” gant ma divizoù hep soñjal pe dost, hervez ma santad ha ma c’halon ha ket ar poell pe ar strategiezh. Hag un eil c’hoariadenn evit klask traoù all (a-wechoù ar c’hontrol-mik just “da welet” hag a-wechoù ur seurt meskaj iskis rak ne oan ket evit ober un diviz all e gwirionez pe o klask sevel ur seurt strategiezh). An eil c’hoariadenn a servije din ivez da gavout an holl luc’hskeudennoù ouzhpenn.
An eil rann a zo bet un doare taol-arnod da welet ma oa ur gwir efed gant ma divizoù. Un tamm dipitet on bet gant dilez ar galloud un tamm, hag hegaset ivez gant un dra a zo bet kalz kaoz diwar e-benn. Ket dre ret evit an abegoù meneget (tud zo a zo bet jenet gant an diouer a drigger warning peogwir ez eus kaoz splann eus emlazh) met evit an doare da c’hoari ar prantad-se. Ne oa ket liammet gant dibaboù graet a-raok met an doare da zibab ar gaozeadenn (traoù dilogik a-grenn ‘zo c’hoarvezet evidon).  Un tamm dipitet on bet neuze gant ar rann-mañ. Ur sapre diforc’h a oa erru etre ma div c’hoariadenn. Ret eo din ouzhpennañ diwar-benn an trigger warning eo bet fin skipailh Dontnod ha Square Enix evit kinnig adalek an darvoud-se, chomlec’hioù davet kevredigezhioù da sikour an dud da gomz diwar-benn temoù start evel-se. Ur respont a galite me gav, zoken ma vefe bet mat soñjal en-se a-raok ar c’hlemmoù.
En ur c’hoari gant an trede rann on bet dinervet kalz rak ranket ‘m eus digreskiñ SPONTUS kalite ar skeudenn evit gallout c’hoari (chomet on stanket en ul lec’h hep gallout ober netra ha se oa an abeg war a seblant). Meur a wech ‘m eus bet ar santimant ne oa ket posupl mont dreist darvoudoù zo, muioc’h eget er rannoù all. Daoust din bezañ laouen kaout da implij muioc’h galloud an amzer eget en eil em eus santet e oa un hent splann gant an istor ha traoù zo ne oa ket posupl mont en tu hont dezho. Prantadoù brav a zo (er poull <3) hag ar fin a oa dic’hortoz da vat (daoust din bezañ ijinet e c’hallfe echuiñ evelse).Lis-poull E-pad ma eil c’hoariadenn em eus merzet un dra e deizlevr Max hag en deus souezhet ac’hanon : e-pad an div rann gentañ e seblante Max pas kompren e oa Chloe amourouz ouzh Rachel pe c’hoazh e oa Warren o klask war he lerc’h (ar pezh a lakae ac’hanon da soñjal e oa Max anreviat). Un tamm droch e seblante a-wechoù zoken. Aze e seblant a benn ar fin kompren un tamm darempred Chloe ha Rachel, ouzhpenn anzav sklaer e c’hallfe un istor karantez diwan etre Max ha Chloe (ANAT ABAOE AR RANN GENTAÑ). Aze ivez e seblant bezañ bet un doare prantad gortoz un tamm da welet penaos e oa degemeret pep darempred a c’hallfe bezañ gant ar c’hoarier-ien/ezed. Souezhus ‘m eus kavet rak splann eo e oant chouket adalek ar penn-kentañ en ur skrivañ an istor neuze perak ket e deizlevr Max? Ur c’hevrin.LiS-deizlevr-2Ma! Ar pevare rann a ginnig klozañ fin an trede rann gant un dibab ‘m eus kavet un tamm re feuls (aha, ne oan ket en soñj e c’hallfe bezañ gwashoc’h goude), met peadra din da gregiñ en ur ouelañ dourek, sur. Goude-se ez eus ur sapre enklask a-hed ar rann, n’on ket deuet a-benn da baouez zoken ket tapet e oan. Marteze e vefe bet mat kavout ur c’hempouez etre ar gaozeadenn “sparlet” en amzer gant Kate (en eil rann) hag ar gaozeadenn gant Franck a c’haller adkregiñ n’ouzon ket pet gwech (pezh ‘m eus graet hag e oan erru un tamm skuizh) amañ. C’hoazh un dra a zo bet cheñchet goude evezhiadennoù ar c’hoarier-ien/ezed? Ar rann a zo blaz point ‘n’ click da vat, gant un tamm Veronica Mars (hag un dave da Sliders) ouzhpenn. Tud zo o deus kavet torr-penn war a seblant met me ‘m eus kavet dispar rak muioc’h a draoù a c’hoarveze eget en div rann a-raok. Ouzhpenn kenderc’hel gant ar santad plijus am boa bet en trede rann diwar-benn an darempredoù (“I know” a respont Max da g/Chloe pa lâr hi “he’s so in love with you” diwar-benn Warren pe c’hoazh Chloe a lâr e oa splann karantez etre hi ha Rachel da Franck), em eus kavet e oa un aergelc’h plijus-tre gant a bep seurt lec’hioù (ar gouel ‘benn ar fin!, an aod, un doare loch nec’hus…). Traoù zo a vez diskoulmet neuze. Fin ar rann n’eo ket fromus evel ar re all (met prantadoù gwall fromus a zo meur a wech er rann) met kentoc’h hegasus kenañ peogwir e santen un tamm ar pezh a oa o vont da c’hoarvezout hag e oan kentoc’h dinervet! Ur sapre cliffhanger a zo aze ha ma, start eo bet gortoz ar pempvet rann, me lâr deoc’h.
Evit ar pempvet rann ‘m eus graet un dra n’am boa ket graet james araok : kemer un devezh vakañsoù evit c’hoari. E ya. N’hallen ket gortoz ha n’hallen ket kemer ar riskl na vefe freuzet an traoù din gant tud all war ar rouedad. Ne oa diskoulm all ebet.
Ar pempvet rann a zo disheñvel-tre eus ar re all, en ur stumm, peogwir e kinnig mont-ha-dont ha mont-ha-dont dizehan, gwelet penaos e vefe bet an traoù en ur ziskoulmañ an enklask adalek penn-kentañ ar sizhun, met ivez efedoù fall galloud Max. Ul lodenn vras eus ar rann a zo ur gwallhunvre eus an euzhusañ (war a bep seurt temoù disheñvel). Tapet on bet penn-da-benn en aergelc’h-se, spontet ha hoalet war un dro.Lis-5gwallhunvre Betek ma echufe ar c’hoari, gant AN dibab. Ne lârin ket petra eo amañ evel-just. Just ez eo splann e oa ur gwir fin (etre an daou). Me ‘m eus dibabet ar fin all da gentañ (ar from, c’hwi oar) hag ar c’hlozadur ‘zo nul da vat, dilogik, hep from (padal e c’hoarvez traoù start). Digomprenus. Echuet ‘m eus ar c’hoari o vezañ un tamm souezhet met o soñjal em boa graet an dibab mat. Evel-just on bet o c’hoari en dro diouzhtu goude evit klask traoù all ha cheñch fin. Pezh a zo e oa dibaboù er c’hoariadenn a vire ouzhin da welet AR FIN gwirion (ret eo bet din dibab an dra all gant ar c’hoariadenn gentañ evit gwelet ar fin-se). Fromus-tre eo aze, labouret kalz, kalz hiroc’h ar film-klozañ… Anat eo ar fin gwirion. Met n’eo ket MA hini. An dibab a zo d’ober a zo meneget meur a wech gant Max evel ar gwashañ tra posupl ha ne oan ket evit krediñ neuze e vefe se er fin.
Un tamm dipitet on bet gant ar fin neuze, pe kentoc’h gant an diforc’h pouez a zo bet roet d’un dibab ha d’egile.
Koulskoude, n’hallan ket nac’h eo bet Life is Strange ur c’hoari a-bouez kenañ evidon e 2015. Kalz amzer ‘m eus tremenet o c’hoari peogwir e plije din an doare da c’hoari met ivez abalamour d’an aergelc’h (film amerikan dizalc’h, war vord ar mor, er skol-veur), ar sonerezh, mouezhioù an dud (Ashly Burch o vezañ d’am meno unan eus an abegoù omp holl e karantez gant Chloe), pinvidigezh ar bed (gant an deizlevr hag ur bern munudoù dastumet pep lec’h), met ivez pinvidigezh an eiltudennoù a zo evit ar re bouezusañ, bepred luzietoc’h eget ar pezh a ijiner da gentañ, an temoù lakaet ar gaoz warno, en un doare soutil pe get, en un doare splann pe get. Life is Strange a zo ur c’hoari a-bouez evidon. Gant sioù sur met heverk eus nerzh ar c’hoarier-ien/ezed hag al levezon e c’hallont kaout war ar c’hoari (pa vez a dammoù evelse).  Ur c’hoari gant ur bersonelezh, ur c’hoari fromus-tre, brav-kenañ alies.Lis-2-trenSpi ‘m eus n’on ket bet re dorr-penn da lenn. Kompren a rit marteze perak e oa ken start din komz diwar-benn ar c’hoari-se a zo bet “ma c’hoari” eus 2015. Bremañ ‘m eus resevet ma skouerenn eus ar c’hoari “boest” (gant ur bladenn hag ul levr) e c’hallin bremañ distaliañ ar c’hoari eus ma urzhiataer, met sur on e rin se gant un tamm keuz, daoust da bep tra.

C’hoari evit ur c’hoarier-ez, diorroet gant Dontnod Entertainment hag embannet gant Square Enix. Da bellgargañ war Windows, PS3, PS4, Xbox 360 hag Xbox One. Rann gentañ bet embannet d’an 30 a viz Genver 2015, pempvet rann bet embannet d’an 21 a viz Here 2015. Ur bladenn a c’haller prenañ ivez evit memes letrinoù abaoe an 20 a viz Genver 2016.

Spring Breakers

Posted in Filmoù with tags , on Genver 11, 2016 by geekezig

springbreakersA bep seurt em boa klevet diwar-benn Spring Breakers. Eus un tu tud o doa kavet ar film nul da vat hag eus an tu all reoù all a lâre e oa dispar. Ne ouien ket re piv krediñ setu ‘m eus soñjet e oa mat din kaout un ali.
Heuliet e vez peder flac’h yaouank a zo en o bloavezh skol-veur kentañ. C’hoant o deus mont da riboulat forzh pegement evit vakañsoù an nevez-amzer. Pezh a zo, n’o deus ket peadra da vont setu e krogont da laerez arc’hant. Ur wech erru e Florida int laouen, betek ma trofe fall an traoù en ur gouel. Tapet e vezont gant ar polis ha lakaet en toull-bac’h, ret eo dezho paeañ a-benn mont maez. Ne fell ket dezho goulenn sikour digant o zud evel-just. Ur rapour iskis eus ar vro a zivizo sikour anezho. Eil lodenn ar film a dremeno tro-dro d’an den-se hag o darempred ganto, ar strollad o tispenn a dammoù.
Skeudennoù ar c’horfoù, frazennoù adlâret n’ouzon ket pet gwech, tudennoù displijus spontus… Un toullad traoù o deus hegaset ac’hanon er film-se. Un dra zo ivez tro-dro da bellgomzadennoù ar merc’hed d’o familhoù, n’am eus ket komprenet ar pal (ne gontent ket gaou met frazennoù peoc’hus ha leun a furnez a oa kontrol mik d’ar pezh a veze gwelet war ar skeudennoù). E gwirionez, estreget un tamm resis am eus kavet brav-tre (tro-dro da ganaouenn Everytime Britney Spears) em eus soñjet paouez gant ar film alies. Goulo mik eo evidon ha n’on ket gouest da gavout traoù mat da lârat. Ur c’holl-amzer eo, a seblant kalz hiroc’h eget ma n’eo e gwirionez!

Film sevenet gant Harmony Korine. Stadoù-Unanet Amerika, 2012, 1e34.

Dope

Posted in Filmoù with tags , , , , , , , on Kerzu 27, 2015 by geekezig

dopeMalcolm a zo lisead e Los Angeles, en ur c’harter kentoc’h brudet fall. Gant e vignon hag e vignonez e plij spontus dezho rap ar bloavezhioù 90 ha c’hoant o deus mont d’ar skol-veur, liseidi sirius int. Un deiz e kouez Malcolm e krabanoù ur gwerzher dramm a c’houlenn digantañ ober traoù evitañ, e-kreiz ar jeu : ur plac’h a blij dezhañ. Mont a raio gwall bell an traoù pa tizoloio Malcolm ez eus dramm forzh pegement en e sac’h hag e vez lâret dezhañ gant ur c’huzulier evit ar re yaouank kavout un diskoulm evit gwerzhañ an dramm-se. Malcolm hag e vignoned a grog neuze da werzhañ dramm…
Deuet on er-maez eus ar sal gant ur pezh mousc’hoarzh war ma dremm, sonerezh leiz ma fenn. Ur film dudius kenañ eo Dope, ur film krennarded «a-gostez» evel na vez ket gwelet kement-ken. Daoust d’ar film pas bezañ ken start ha Dear White People e vez santet ur c’hoant diskouez ar rakvarnioù a c’haller kaout (gant lizher Malcolm d’ar skol-veur), efedusoc’h ‘m eus kavet neuze peogwir e oa eeunoc’h steuñvenn an istor ha plijusoc’h an hollad, gant memestra daveoù da vediaoù hirie gant ur YouTube Poop fentus-tre. E gwirionez ‘m eus bet kalz plijadur o sellet ouzh Dope, anat deoc’h. Daoust ha hegaset on bet un tamm gant plas ar merc’hed er film avat? Marteze ‘walc’h. Daoust da dudenn Dig eo ur film «strollad krennarded» hag ar merc’hed a chom alies mat tudennoù a faltazi hepken evito (Lily & ar plac’h all). Evel gant Dear White People ez eus memes kudenn gant an istitloù gallek a nac’h skrivañ ar ger “Noir” evit komz eus tud du… Estreget-se ez eo leun a nerzh, peadra da reiñ lañs d’an holl!
(Ya me zo sot gant Awreeoh. Kinnig a ran dec’h selaou ouzh kanaouennoù ar strollad ^^)

Film sevenet gant Rick Famuyiwa. Stadoù-Unanet, (war skrammoù Frañs abaoe ar 4 a viz Du) 2015, 1e43.

A Girl Walks Home Alone At Night (Dokhtari dar šab tanhâ be xâne miravad‎‎ دختری در شب تنها به خانه می‌رود)

Posted in Filmoù with tags , , , , , on Here 26, 2015 by geekezig

girl-walks-home-alone-at-nightNe oan ket deuet a-benn da welet A Girl Walks Home Alone at Night peogwir n’eo ket bet skignet dispar, zoken e Pariz. Ur film iranian eo am boa klevet kalz komz dre twittoù Elijah Wood, produer anezhañ evit ar film-se. Me soñje din e oa ur film spont met n’eo ket tamm ebet a-benn ar fin. Ur film gorrek-kenañ eo. Kalz pouez a zo gant ar sonerezh, brav eston ar skeudennoù gwenn-ha-du… Un neuz klip a zo gant ar film da vareoù zo. Plijus-tre eo da sellet evit ar skeudennoù hag ar sonerezh neuze. An istor avat am eus kavet dipitus un tammig : ur sunerez-gwad a bourmen e straedoù Bad City, gwisket gant he z/tchador. Tagañ a ra tud resis : ur gwerzher dramm, arval ur c’hast a ro dramm dezhi… Arash, ur paotr yaouank a vez heuliet ivez. N’eo ket displijus met mankout a ra un draig bennak evit bezañ ur film eus ar gwellañ, evidon-me.

Film sevenet gant Ana Lily Amirpour. Stadoù-Unanet Amerika, 2014, 1e41.

Maps to the Stars

Posted in Filmoù with tags , , , , , on Gouere 10, 2015 by geekezig

Maps-to-the-StarsDedennet e oan bet gant film diwezhañ David Cronenberg abalamour d’an aktourien pe d’an aktourezed kentoc’h peogwir ez eus Mia Wasikoswa miket ma c’halon outi da viken ha Julianne Moore a gavan plijus dre vras. Ouzhpenn-se e troe tro-dro da vetou Hollywood neuze perak ket?
Meur a dudenn a vez heuliet er film, un aktourez a glask labour met a zo dreist-holl sorc’hennet gant he mamm, aktourez vrudet a zo marvet en un tan-gwall, Agatha ur plac’h yaouank nevez erruet e Los Angeles ha mignonez gant Carrie Fisher, Benjie ur paotr trizek vloaz a ra berzh bras hag en deus kudennoù dramm, e dud, hag ur paotr yaouank a vlein limouzennoù.
Hir ‘m eus kavet ma amzer dirak ar film. Ne zegas netra nevez diwar-benn bed Hollywood me gav ha n’on ket bet dedennet kaer gant ar pezh a c’hoarveze gant an tudennoù. Na guzulian ket ar film-mañ, kollet e vez amzer un tamm.

Film sevenet gant David Cronenberg. Stadoù-Unanet Amerika, Kanada, Frañs, Alamagn, 2014, 1e52.

The Counselor

Posted in Filmoù with tags , , on Mae 11, 2015 by geekezig

CounselorMa breur en deus komzet din en-dro eus ar film-se e fin miz C’hwevrer, n’am eus ket soñj mat perak met o welet anezhañ el levraoueg ‘m eus soñjet e oa mat din e sellet neuze. Na hir ‘m eus kavet ma amzer!! N’on ket deuet a-benn da vezañ dedennet, na gant an tudennoù na gant an istor : hini un alvokad a glask gounit arc’hant en ur sikour trafikerien dramm. Evel-just e vo unan bennak o klask touellañ tout an dud evit mirout ar gounidoù ha setu. Kriz-tre ha gwadek eo, ur bern prantadoù «prederouriezh» ha kaozeadennoù toull ha didalvez a zo ivez… N’am eus gwelet netra plijus er fin evit lârat ar wirionez. 😦

Film sevenet gant Ridley Scott. Stadoù-Unanet Amerika ha Rouantelezh-Unanet, 2013, 1e58.

%d bloggers like this: