Lou ha Ruben a vev en o c’harr, war an hentoù da son e abadennoù a bep seurt gant o strollad Blackgammon.
Kregiñ a ra Ruben da goll ar c’hleved e-kerzh an droiad, ha buan. Krediñ a ra e c’hallo kenderc’hel da son met Lou a glask kavout sikour dezhañ. Degemeret eo Ruben en ur gumuniezh tud vouzar, kalzik anezho o deus ivez kudennoù sujidigezh (d’an alkool, d’an dramm…) evel Ruben. Pell eus Lou hag e vuhez e vo dav dezhañ boaziañ d’ur vuhez nevez, degemer e vo bouzar, deskiñ ur bern traoù, cheñch e sell war ar bed.
Kregiñ a ra ar film o tisplegañ eo istitlet ar film evit an dud vouzar ha pounner-glev. Gwir eo eo ral gwelet er sinema filmoù istitlet dre ziouer. Ul labour ramzel a zo bet graet war ar son, evit klevet (evit ar re a c’hall) an diforc’h etre pezh a glev “ar bed” ha pezh a glev Ruben, tamm-ha-tamm. Lodennoù fromusañ ar film evidon a zo liammet gant ar sonioù-se hag ar santad digenvez bras a c’hall Ruben kaout, kollet pa n’hall ket eskemm gant ar re vouzar pe kollet e kreiz trouzioù ar bed… Dedennus-kenañ eo emdroadur Ruben ha sell ar gumuniezh e lec’h ma vev : evito n’eo ket bezañ bouzar un namm da vezañ pareet. Met dav e vo da Ruben deskiñ an dra-se drezañ e-unan…
Riz Ahmed a zo un aktour a blij kalz din abaoe pell ha dispar eo e labour er film, a ziskouez splann ar c’hounnar, an dristidigezh hag holl fromoù Ruben.
Ur film dedennus ha brav.
Film sevenet gant Darius Marder. Stadoù-Unanet Amerika, 2019, 2e.
Tud zo a soñjo eo ar ger “Switch” en deus roet din c’hoant sellet ouzh The Princess Switch met e gwirionez ne anavezen ket an titl orin p’on kroget da sellet outañ. Ne ouien ket ouzh petra sellet goude un dibenn-sizhun dreist met skuizhus, ur film Nedeleg gant tud o tivizout eskemm buhez a seblantas mat din.
Diazezet eo Wild war levr Cheryl Strayed, ur plac’h bet graet ganti ar PCT (Pacific Crest Trail) er bloavezhioù 90. Bet eo hec’h unan war an hentoù e-pad 3 miz. Koulskoude ne oa ket ur plac’h da gerzhet kement-se met ezhomm he doa d’ober un tamm kempenn en he buhez. Goude marv he mamm eo aet an traoù da hesk eviti, dramm ha rev e doareoù dañjerus.
Resevet eo bet pempvet bloavezh Girls el levraoueg ha soñjet ‘m eus “sell ‘ta! Petra ‘zo c’hoarvezet gant an tudennoù-se?!”
Fromus-tre ‘m eus kavet Brooklyn. Marteze peogwir e lakae an istor-se ac’hanon da soñjal ennon, en un doare bennak. Eilis a guita Iwerzhon evit mont da glask labour e New York, e deroù ar bloavezhioù 50. Ur gumuniezh iwerzhonat a zo tro-dro dezhi met poan he deus o vevañ pell eus he bro hag he familh. Un deiz bennak avat e raio anaoudegezh gant un italian yaouank hag e krogo da gavout plijadur o vevañ e New York, studial a raio ouzhpenn evit dont da vezañ kontourez a-vicher. Rankout a raio distreiñ da Iwerzhon avat ha digempouezet e vo he buhez, adarre.
Kuzuliet eo bet Petite voleuse din gant ur genseurtez. N’ouzon ket perak e oan aet da ijinañ a bep seurt diwar-benn al levr bannoù-treset-mañ ha n’eo ket tamm ebet an istor a grede din, a-benn ar fin. Heuliet e vez Corrina, ur plac’h yaouank a labour e metou ar bruderezh e New York. Divlaz eo he buhez un tamm ha laerez a ra kelaouennoù ur wech an amzer evit kaout un tamm birvilh. D’ur mare bennak e vo kinniget dezhi mont kuit eus he labour, meur a zra a c’hoarvezo goude-se met poent eo dezhi prederiañ diwar-benn ar pezh a fell dezhi, he hunvreoù…
Setu, sellet am boa ouzh pevare bloavezh Girls a-benn ar fin! Sapre cheñchamant a zo da gaout peogwir e kuita Hannah New York evit mont da studial en Iowa! Div rann gentañ ar bloavezh a zo bet start-tre evidon, lakaet diaez e oan ha ne blije netra din, e gwirionez (merzet am boa e oant sevenet gant Lena Dunham hec’h unan ha n’ouzon ket ma c’hall bezañ un abeg). Tamm-ha-tamm eo gwellaet an traoù evidon a-drugarez da dudennoù nevez (Mimie-Rose, Fran) pe c’hoazh d’ar rann a dremen penn-da-benn er ranndi ma teu pep hini d'(h)e dro mignoned ha mignonezed Hannah da welet anezhi. Soshanna a glask labour, Jessa n’ouzer ket mat, Marnie a glask displegañ da z/Desi e fell dezhi kaout un darempred ofisiel… Prantadoù dedennus-tre a zo tro dro d’ar c’hrouiñ (ha d’ar skrivañ dreist-holl) peogwir e tiviz Hannah dilezel he studioù (war ar skrivañ faltazi) goude bezañ bet barnet gant he c’hamaladed. Ar preder-se n’eus plijet kalz din. Fentus em boa kavet ivez gwelet anezhi o kelenn hag o klask bezañ mignonez gant krennardezed. Ray a grog gant un hent nevez, ar politikerezh lec’hel, ar pezh a gavan ur mennozh mat evitañ. Prantadoù brav a zo, ganedigezh nizez Adam da skouer. Ur wech ouzhpenn em boa kavet e oa dilezet Marnie. Met cheñchamant bras a vez santet o tont. Penaos ‘ta e vo ar pempvet bloavezh?
Soubenn ar geek 