Dielloù evit muntr

Sangre 1 – Sangre la survivante

Posted in Levrioù bannoù-treset with tags , , , , , , on Genver 30, 2017 by geekezig

sangreSetu stirad bannoù-treset nevez Arleston, un istor galloudoù hud HA bedoù kenstur! Na petra ta! 😀
Sangre a zo ur plac’hig test eus drouklazh he c’humuniezh gwiniegourien pa oant o veajiñ davet ar gêr vras. Dont a raio da vezañ besteod ha ne chomo nemet ur spi ganti : adkavout he mamm (m’eo bev c’hoazh) ha lazhañ muntrerien he familh. Ur vuhez digenvez ha diazezet war al laeroñsi e vevo goude bezañ bet skarzhet eus ar skol e lec’h ma oa bet degemeret.
Klasel eo diazezoù an istor (bugel emzivad, dial, itrikoù evit kaout galloud gant lodennoù uhelañ ar gevredigezh…) met dedennus eo ar bed, efedus an tresadennoù hag an doare da gas an istor war-raok. Hast ‘m eus gouzout hiroc’h!sangredIstor gant Arleston, tresadennoù gant Floch. Embannet gant Soleil d’an 19 a viz Here 2016.

Lullaby

Posted in Levrioù with tags , , , on Kerzu 5, 2016 by geekezig

lullabyO komz e oan gant ur genseurtez diwar-benn Fight Club 2 hag anzavet n’em boa ket bet lennet ul levr gant Chuck Palahniuk james! Kuzuliet he deus Lullaby din.
Ul levr a zere d’al levraouegerien ha levraouegerezed eo… Haroz ar romant a zo kelaouenner, o klask sevel ur pennad diwar-benn ar babiged a varv “diabeg” emañ. E-pad e enklask e kav ul levr e pep ti, un dastumad luskellerezioù eus ar bed. Unan anezho a zo ur ganaouenn evit sikour brezelourien gloazet da vervel sioul.
Carl a gompren buan ar galloud a zo gantañ bremañ hag an dever ivez : distruj pep skouerenn eus al levr a chom. Kavout a ra war e hent Helen, a werzh tiez satanazet a-benn adprenañ anezho. Gouzout a ra hi ivez ur bern traoù diwar-benn al luskellerez-se…
Kregiñ a ra ar romant gant deskrivadur an div dudenn-se, ha penaos e kompren Carl ar pezh a rank ober. Da c’houde e vo kentoc’h ur veaj war hentoù ar Stadoù-Unanet. Pevar den a veajo asambles, pep hini o kaout alioù disheñvel, selloù disheñvel war ar bed hag an traoù evel m’emaint. Dedennus neuze gwelet ali pep hini war o dever, hervez o roll er gevredigezh, pe an arouez roet dezho el levr. Leun a faltazi eo ar romant evel-just ha flemmus. Ur blijadur eo bet e lenn. Un tamm gwanoc’h ‘m eus kavet ar fin avat, dipitet marteze gant an divizoù bet kemeret gant an tudennoù. Laouen on bet da vezañ lennet ul levr gant Chuck Palahniuk a-benn ar fin! Marteze e klaskin en-dro, piv oar?

Romant bet skrivet gant Chuck Palahniuk. Embannet gant Doubleday, d’ar 17 a viz Gwengolo 2002.

Glas evel daoulagad c’hlas na oant ket ma re

Posted in Levrioù with tags , on Eost 16, 2016 by geekezig

glasevelUl levr koshoc’h a felle deomp lenn e klub lenn Pariz, hag unan berr a-raok an hañv.  O sellout ouzh levraoueg Yann em eus gwelet Glas evel daoulagad c’hlas na oant ket ma re. Pell zo e felle din lenn romant Per Denez abalamour d’e ditl a gavan ken brav (gwashoc’h abeg a zo marvat?)!
Plijet on bet gant lodenn gentañ ar romant, deskrivadur buhez ha doare da welet ar vourc’hizez-se, a ra pep tra evit he gwaz. Trenkañ a ra he buhez pa varv eñ. Divlaz e vo pep tra eviti a-raok na gomprenfe en doa he gwaz ur vestrez. Adalek ar mare-se e savo ar plac’h ur pech da dapout ar plac’h yaouank ha lakaat anezhi da goll blaz ar vuhez evel m’he deus hi kollet en ur goll he gwaz.
Tremen a ra pep tra pe dost e ti an dudenn-bennañ ha nebeut a dra a vo gouezet diwar-benn ar vaouez-se a-benn ar fin, dallet gant he c’harantez betek koll he fenn (hag he fersonelezh marteze?). Ur sapre raktres, leun a widre a savo ha fent ganti zoken (anv ar roz!!). Tapet on bet penn-da-benn en istor, plijet gant frazennoù zo, brav eston.
Ul levr dudius ha teñval, en deus lakaet ac’hanon da soñjal e istorioù Desperate Housewives un tamm !
Laouen on o vezañ bet lennet ar romant-mañ, a-benn ar fin.

Romant skrivet gant Per Denez. Embannet gant Al Liamm, e miz Here 1979.

My Friend Dahmer

Posted in Levrioù bannoù-treset with tags , , , , , , on Gouere 18, 2016 by geekezig

dahmercoverDerf Backderf a zo bet el lise gant Jeffrey Dahmer, ul liesvuntrer brudet. El levr bannoù-treset-mañ e kont deomp penaos en em gleve gantañ (tamm-pe-damm) ha penaos e oa ar vuhez er bloavezhioù 70 war ar maez er Stadoù-Unanet (kostez Bath, en Ohio). Pezh a zo, ne oa ket dre ret heñvel an traoù e pep familh… Penaos en deus gallet an dud deuet chom ken diseblant dirak stad Dahmer (pa oa mezv-dall bemdez el lise) ? Daoust hag eñ en defe gallet kaout sikour ? Onest kennañ eo Derf Backderf en e levr, diskouez a ra splann ne oa ket ur c’hrennard na fin na jentil (un darempred iskis en doa gant Dahmer, ober a raent kalz goap ouzh an dud…). Marteze en defe gallet an traoù c’hoarvezout e doareoù all met spontus eo gwelet pegent diseblant e oa kerent Dahmer (o tispartiañ en un doare kalet) ha dreist-holl kelennerien al lise… Deuet eo an arzour a-benn da reiñ e desteni (kalz enklaskoù n’eus graet, atersadennoù n’eus graet ha dielloù eo bet o lenn evit keñveriañ anezho gant e eñvorennoù ha sevel ul levr diellet mat), gant e stil da dresañ un tamm ispisial. Eveltañ ne gav ket din e vefe ur poltred a lakfe Dahmer da seblantout jentil (lazhet en deus 17 den memestra!) met diskouez a ra penaos e c’hall un den, debret gant sorc’hennoù revel divoutin, en un endro digenvez ha diseblant, dont da vezañ un euzhvil. Un testeni start ha kreñv.dahmer1
Istor ha tresadennoù gant Derf Backderf. Embannet gant Abrams d’ar 1añ a viz Meurzh 2012.

Heavy Rain

Posted in C'hoarioù video with tags , , , on Even 25, 2016 by geekezig

Heavy-Rain_tE-kerzh diskouezadeg ar mirdi Art Ludique (bet meneget dija e pennad Soldats Inconnus) e oa un toullad taolennoù a blije spontus din ha bep tro e oant o tont eus memes c’hoari : Heavy Rain. Ur c’hoari a oa ganin abaoe pell peogwir e oa gwerzhet gant al letrin p’am boa prenet ar PS3. Fellout a rae din c’hoari un deiz bennak met ne oan ket mennet, levezonet marteze gant ar farsadennoù diwar-benn David Cage (krouer ar c’hoari) ha da begen kozh eo ar c’hoari bremañ.
N’am eus ket bet ezhomm kalz amzer evit echuiñ Heavy Rain. Pep brasañ ar c’hoari am eus graet en un abardaevezh pe dost.
Reiñ a rin ma ali diouzhtu kuit deoc’h da vont pelloc’h ma ne fell ket deoc’h gouzout hiroc’h : tapet on bet gant Heavy Rain evel ma c’haller bezañ tapet dirak ur film polis a live etre er skinwel. Fellout a rae din gouzout hiroc’h, tudennoù zo o deus plijet din ha traoù all o deus hegaset ac’hanon spontus. Lonket eo bet ganin avat, en un doare klañvidik kazi. An aergelc’h er gêr gronnet gant ar glav (awenet gant Philadelphia war a seblant) hag ar sonerezh savet gant Normand Corbeil o deus sikouret da vat d’am soñj. Laouen on da vezañ bet betek penn ar c’hoari-mañ. N’hallan ket lârat eo ur c’hoari fall peogwir on bet tapet da vat. N’hallan ket lârat eo ur c’hoari mat peogwir ez eus ur bern techoù torr-penn hag an istor n’eo ket dispar ouzhpenn-se! Arabat eo disoñjal memestra e oa un doare dispac’h (abalamour d’ar motion capture bet implijet, ar pezh a greñva santad ar film bevaat, gant teknologiezh ur meziant anvet The Capture) d’ar mare m’eo deuet er-maez, gwirheñvel ha brav-tre e oa. Un dispac’h a oa ivez peogwir ne oa game over ebet : ma tremene fall an traoù evit un dudenn e kendalc’h an istor! Peadra da vezañ gwall enkrezet neuze! Anzav a ran e choman dedennet gant c’hoarioù David Cage daoust da bep tra ^^
Setu, neuze :
Heavy Rain a zo ur “film ma c’haller kemer perzh ennañ” ma fell deoc’h. Un istor a zo ha traoùigoù d’ober ur wech an amzer, e stumm QTE (Quick Time Event) dreist-holl ha point ‘n’ click un tamm da vareoù all. Dibaboù zo d’ober da vareoù zo a c’hallo kaout disoc’hoù disheñvel (tudennoù zo a c’hall mervel da skouer) ar steuñvenn a c’hall cheñch kalzik met elfennoù eus an istor a chomo ar memes re evel-just. Ur ben traoù SPONTUS a c’hall c’hoarvezout (am eus dizoloet en ur skrivañ ar pennad-mañ) gant dibaboù zo pe en ur c’hwitout QTE zo avat ha laouen on da vezañ chomet hep gwelet an traoù-se rak moarvat em befe kavet-se null ha feulz hag heugus evit netra. MA!heavy_raingpEthan Mars a zo chomet stroñset abaoe marv e vab, diskaret gant un oto. Treiñ a raio fall an traoù pa vo skrapet e vab all, Shawn (war ar skeudenn a-us) gant an Origami Killer, ul liesvuntrer a skrap paotredigoù hag a zilez anezho dezho da vezañ beuzet pa ra glav-bil.
Ethan Mars a vo c’hoariet evel-just, Madison Paige, ur gelaouennerez, Scott Shelby, un enklasker prevez hag un enklasker eus an FBI anvet Norman Jayden. Pep hini gant (h)e (f/)bersonelezh ha gant elfennoù ispisial ouzhpenn evit paotr an FBI a-drugarez d’e lunedoù ARI (prantadoù enklask o deus plijet kalz din ^^).heavyrainjaydenScott Shelby an hini en deus plijet din ar muiañ mod all, poliser-bet, kudennoù gant an alkool, ur vuhez start a ijiner.
Evel traoù o deus seblantet torr-penn din e oa an tech da lakaat traoù “mature” (met diezhomm) evel merc’hed en noazh. Ne lak ket an istor da vont war-raok na netra. Ur mennozh all a oa ivez gant David Cage a oa lakaat ar c’hoarier-ez da vezañ chalet gant ur prantad diwiskañ dre heg evit tudenn Madison. Ha me lâr deoc’h ne oan ket en ma aez…
Hegasus ‘m eus kavet ar QTE ivez, e gwirionez em eus spi e paouezfe seurt traoù er c’hoarioù video, re dorr-penn int >< N’on ket n’em dennet re fall koulskoude met ne blij ket se din tamm ebet.
An embannadur “Move Edition” a zo ganin met n’am eus ket ar Playstation move setu ‘m eus c’hoariet gant an dornell. Mennozhioù zo a zo mat-tre evit ar c’h/QTE hag an traoù d’ober avat rak ar jestr d’ober gant an dornell a zo heñvel ouzh an hini graet e gwir (evit digeriñ un nor da skouer).
Rann nemeti Heavy Rain Chronicles a zo gant an embannadur-mañ ivez. Sañset e oa da vezañ rannoù da bellgargañ ouzhpenn o tiskouez un tamm istor kent pep tudenn. The Taxidermist a zo hini Madison Paige. N’eo ket hir, echuet e vez en ur c’hard eur bennak gant un diskoulm. Pemp diskoulm a zo met n’on ket bet kalonek a-walc’h evit adkregiñ, ne zegase ket kalz tra evidon, komprenet ‘vez eo Madison prest d’ober traoù dañjerus evit kavout ur scoop… Pezh a c’haller kompren dija gant ar c’hoari diazez.
Diskoulm an istor a zo dister a-walc’h ha chomet on un tamm “Of? Setu tout?” un doare page turner e doare ur c’hoari eo Heavy Rain a-benn ar fin ^^

C’hoari evit 1 c’hoarier-ez, diorroet gant Quantic Dream hag embannet gant Sony Computer Entertainment. Stumm pladenn pe niverel evit Playstation 3 abaoe ar 24 a viz C’hwevrer 2010 ha Playstation 4 abaoe ar 1añ a viz Meurzh 2016. PEGI 18

Polytechnique

Posted in Filmoù with tags , , , , , , , , on Meurzh 21, 2016 by geekezig

polytechniqueE miz Kerzu, nepell goude “deiz-ha-bloaz” an darvoud an hini ‘m eus sellet ouzh Polytechnique a ziskouez ar gwalldaol gourelour bet c’hoarvezet e skol Polytechnique Montreal d’ar 6 a viz Kerzu 1989. Heuliet e vez ur plac’h yaouank (n’eo ket ur plac’h wir), ur mignon dezhi hag un tamm ar sponter. Ur film e gwenn-ha-du eo gant div lodenn splann. Unan e-pad an darvoud, ar beurevezh-se, gant ar studierien er skol-veur, an erc’h, an dud o tec’hout, an harozez oc’h ober van bezañ marv evit chom bev, e mesk korfoù ar merc’hed bet lazhet hag all. Hag ul lodenn kalz diwezhatoc’h gant pouez an darvoud-se evit reoù a zo chomet bev da c’houde.
Efedus-tre ha spontus eo al lodenn gentañ a ziskouez en un doare un tamm yen an darvoudoù. An eil lodenn avat n’am eus ket kavet ken dedennus, pell alese. E gwirionez em befe kavet gwelloc’h ur film berr gant al lodenn gentañ hepken, zoken ma seblantfe un tamm trumm ha start. A bouez eo me gav kaout un testeni er stumm-se eus ar gwalldaol spontus-se (muntret ez eus bet 14 flac’h ha gloazet 14 den, pevar paotr en o-zouez). En eil lodenn e vez ijinet traoù psikologel tro-dro da div dudenn. Me gave gwelloc’h an doare ma tiskouez al lodenn gentañ un den sot ha leun a gasoni ouzh ar merc’hed, ur plac’h gant un dazont brav dirazi hag ur paotr a glask reiñ sikour hag an holl dud tro-dro, falc’het o dazont diganto. Marteze en defe manket a from? Evidon-me en deus an eil lodenn pounneraet ha disteraet nerzh testeni an darvoud.

Film sevenet gant Denis Villeneuve. Kanada, 2009, 1e17.

L’autre – Le rapport de Brodeck 1

Posted in Levrioù bannoù-treset with tags , , , on Meurzh 7, 2016 by geekezig

L_Autre_Le_Rapport_de_Brodeck_tome_1Me oar a-walc’h e plij labour Manu Larcenet d’ur bern tud. N’am eus ali resis ebet, anzav a ran. Lennet ‘m eus bet traoù zo gantañ a gaven kentoc’h plijus met hep mont pelloc’h. Ne oan ket e-touez ar re dedennet spontus gant Le rapport de Brodeck neuze. An tresadennoù koulskoude o deus roet din c’hoant lenn rak seblantout a rae brav-tre memestra.
Setu me o lenn L’autre. Splujet diouzhtu en ur gêriadenn, pouez ar sekredoù spontus, ar strollad a-enep an hinienn. Penndudenn an istor a rank sevel ur rentañ-kont diwar-benn ur darvoud a zo c’hoarvezet er gêriadenn, komprenet e vez buan pegen mantrus eo bet. N’en deus ket kemeret perzh setu perak e raio eñ war-dro. Ouzhpenn eo boaz da skrivañ. E gwirionez e vo lennet ur skrid all, ur skrid e lec’h ma kont ar wirionez, sell ar baotred all warnañ, e vuhez start, penaos e tremene an traoù gant “an estren” a zo e kreiz ar rentañ-kont. Un istor spontus eo. Ne ouien ket e oa ur romant a-raok lenn ar levrenn-mañ. Tapet on bet penn-da-benn e testeni Brodeck, abalamour ivez evel-just d’an tresadennoù teñval, brav eston a ziskouez mat aergelc’h ar gêriadenn, yen ha kalet. Ur stumm ispisial a zo d’al levr (stumm italian evel ma vez lavaret) ha klotañ a ra mat me gav. Dodennoù start-tre a zo el levr, ar c’hampoù bac’h en o-zouez. Kreñv-tre eo an oberenn. Gortoz a ran an eil levrenn bremañ!RapportBrodeck_PL

Istor ha tresadennoù gant Manu Larcenet diwar romant Philippe Claudel. Embannet gant Dargaud d’an 10 a viz Ebrel 2015.

%d bloggers like this: