Dielloù evit azasadenn

Sin City : A Dame To Kill For

Posted in Filmoù with tags , , , on Meurzh 28, 2017 by geekezig

Sin City, ar film, a blij kalz kalz din. E Japan e oan pa oa deuet er maez Sin City : A Dame to Kill For e sinemaoù Frañs ha c’hwitet warnañ war ar skramm bras neuze.
‘M eus aon n’eo ket bet ur c’hwitadenn (eus ma ferzh) kement-se peogwir n’on ket bet entanet gant an heuliad-mañ. Digempouez eo an istorioù, gant un istor kalz pouezusoc’h eget ar re all. Ha torr-penn ‘m eus kavet peogwir e oa tro-dro d’un “intañvez zu” (Eva Green) (ma kavit ur ger pe un dro lavar propoc’h lârit din marplij!). Splann eo aze eo ar merc’hed evel kirri pe traoù estreget pa int drouk hag ec’h implijont o c’horf evit kaout arc’hant. Ec’h.
An istorioù all n’int ket tennet eus ar rummad levrioù BT war-eeun met ijinet gant Frank Miller a-ratozh evit ar film ha kentoc’h dedennus met re verr siwazh.
Distabilaet on bet ivez gant ar cheñchamantoù aktourien, dreist-holl ar plac’h a c’hoari deadly little Miho. An dibaboù liv ne seblantont ket ken “arouezel” hag a oant e Sin City ha kavet ‘m eus ivez e oa kazi viloc’h an disoc’h gant teknologiezhioù 2014 eget gant reoù kreiz ar bloavezhioù 2000…
N’on ket gouest da lârat e oa null met anat n’eo ket a live gant ar film kentañ, pell alese.

Film sevenet gant Robert Rodriguez ha Frank Miller. Diazezet war levrioù bannoù-treset Frank Miller. Stadoù-Unanet, 2014, 1e42.

The Jungle Book

Posted in Filmoù with tags , , on Genver 22, 2017 by geekezig

thejunglebookDaoust din bezañ souezhet c’hoazh gant giz filmoù “live” Disney, ne gavan ket anezho ken fall-se evit ar mare. Sellet ‘m eus ouzh The Jungle Book neuze.
E-kerzh ar munutennoù kentañ e oan prest da baouez gant an DVD ken jenet ma oan gant an efedoù isipisial, ne oa netra gwir estreget Mowgli! Kendalc’het ‘m eus koulskoude betek bezañ o krenañ gant an aon dirak tudennoù zo, tapet da vat!
Plijet on bet gant doareoù Baloo a zo kalz skoempoc’h eget na oant er film bevaat (em eñvorennoù d’an nebeutañ!). Un drugar e oa ivez klevout an aktourien hag aktourezed a-feson a advouezh al loened.
Ur film plijus eo evidon-me, a ziskouez ur wech ouzhpenn eo soñjet kentoc’h mat ar rummad filmoù-mañ gant Disney. Marteze e oa gwelloc’h c’hoazh war skramm bras, neuz “vil” ha faos skeudennoù zo a oa marteze un efed eus ar pezh a oa lakaet war-wel e 3D? Piv ‘oar!

Film sevenet gant Jon Favreau. Stadoù-Unanet Amerika, 2016, 1e46.

 

Brooklyn

Posted in Filmoù with tags , , , , , , , , , on Genver 15, 2017 by geekezig

brooklynFromus-tre ‘m eus kavet Brooklyn. Marteze peogwir e lakae an istor-se ac’hanon da soñjal ennon, en un doare bennak. Eilis a guita Iwerzhon evit mont da glask labour e New York, e deroù ar bloavezhioù 50. Ur gumuniezh iwerzhonat a zo tro-dro dezhi met poan he deus o vevañ pell eus he bro hag he familh. Un deiz bennak avat e raio anaoudegezh gant un italian yaouank hag e krogo da gavout plijadur o vevañ e New York, studial a raio ouzhpenn evit dont da vezañ kontourez a-vicher. Rankout a raio distreiñ da Iwerzhon avat ha digempouezet e vo he buhez, adarre.
Klasel-kenañ eo stumm ar film e gwirionez. N’eus netra bamus. Nerzh an istor eo neuze en deus plijet din forzh pegement (daoust ma chom klasel-tre ivez ^^) hag ar bagad aktourien hag aktourezed. Ar prantadoù (rouez koulskoude!) gant Jim Broadbent da skouer, am eus kavet dibar. Setu ur film dramatek diwar-benn istor ur plac’h yaouank, ur skouer eus ur plac’h yaouank he deus rankout tec’hout he bro dre heg, dre ziouer a labour. Un istor etrevroadel hag a zo gwir c’hoazh hirie an deiz… Kompren a rin digudenn e kavfe tud zo ar film divlaz un tamm, me zo bet tapet da vat, evit abegoù personel. C’hoarvezout a ra! 🙂

Film sevenet gant John Crowley, diazezet war romant Colm Tóibín. Rouantelezh-Unanet, Kanada hag Iwerzhon, 2015, 1e52.

Elle

Posted in Filmoù with tags , , , , , , on Kerzu 28, 2016 by geekezig

elleElle a oa deuet er-maez da vare festival Cannes. Rik d’ar mare e lec’h ma n’aen ket tamm ebet d’ar sinema ken ha ne oan ket bet o welet ar film neuze.
Ur film diwar-benn ur vaouez emren, sur outi, penn-embregerezh eo. Un deiz bennak e voe taget en he zi ha gwallet gant un den masklet. Ne seblant ket bezañ nec’het kement-se. Da c’houde e resev pellgomzadennoù pe kemennadennoù a laka anezhi da soñjal emañ an den en he endro labour. Kregiñ a ra neuze un doare enklask hag ur c’hoant dial zoken…
Direnkus-tre eo Elle. Da gentañ peogwir e tiskouez prantadoù feuls (ar gwall, meur a wech peogwir e krog an dudenn da adijinañ penaos eo tremenet an traoù n’he fenn) ha goude-se gant an doare darempred skoemp etre Michèle hag he gwaller. Lakaet on bet diaes met hep bezañ bamet rak ar skeudennoù pe dedennet gant ar mennozhioù silet.
Iskis eo ivez he darempredoù gant he familh (he mamm pe he mab), ur plac’h luziet eo sur (komprenet e vez buan, gant istor he familh) ha pell da vezañ disi (kontañ ‘ra gaou d’he mignonez/kenlabourerez). Ral eo gwelet maouezed eus seurt Michèle er filmoù ha se zo unan eus nerzhioù ar film, da vat!
Start eo din reiñ un ali resis met n’on ket bet plijet gant ar film, re zirenket on bet, war meur a boent… Tud zo a lâro n’eo ket souezhus gant un oberenn savet gant Paul Verhoeven. Lakaomp!

Film sevenet gant Paul Verhoeven, diwar romant Philippe Djian Oh…. Alamagn & Frañs, 2016, 2e10. Difennet d’ar re dindan 12 vloaz.

Arrival

Posted in Filmoù with tags , , , , , , on Kerzu 6, 2016 by geekezig

arrivalE festival an Utopiales am eus bet tro da welet Arrival, d’al Lun 31 a viz Here, pezh a oa a-raok ar gelaouennerien zoken war a seblant! Poent din skrivañ diwar-benn ar film-se neuze peogwir e vo war ar skrammoù bras a-benn warc’hoazh… 😀
Ur film diwar-benn an darempred kentañ gant boudoù tre-oabl eo Arrival. Daouzek lestr estren a zo erru d’un deiz d’egile e meur a lec’h er bed. Louise Banks a zo yezhoniourez ha brudet evit he zroidigezhioù, goulennet e vez diganti gant an arme amerikan klask jubenniñ ar pezh a lâr ar boudoù ha kavout perak int deuet.
Dedennus ‘m eus kavet gwelet an darvoudoù dre tu ar yezhoù, an eskemm, an deskiñ. Dizoloiñ ha studial un doare da eskemm (ha da soñjal) nevez, pe c’hoazh eskemm gant ar broioù all diwar-benn kement-mañ. N’eo ket dre ret ar pezh vez lakaet en a-raok da gustum e seurt filmoù. Gwirheñvel a-walc’h en deus seblantet din penaos e tro an traoù. Un twist a zo d’ur mare bennak met n’ouzon ket perak resis n’on ket bet souezhet tamm-ebet, ar fin n’en deus ket displijet din daoust da se. Daoust ha levezonet on bet gant an doare da sellout ouzh ar film (leun-chouk ar sal ha tost-tre eus ar skramm, war ar c’hostez da vat)? Marteze ‘walc’h rak da gustum e vefen bet fromet gant ar c’hlozadur d’am soñj…
Ur film savet mat, brav e skeudennoù ha plijus e aktourien eo Arrival met siwazh evitañ e lak da soñjal kement e Interstellar e pep keñver ken n’on ket bet gouest d’e gavout mat penn-da-benn. Marteze e vefe dav din e welet en-dro pe paouez da vont da welet filmoù skiant-faltazi, piv ‘oar… ? 😀
(Soñj ‘m eus e oan bet displijet a-walc’h gant Prisoners ivez neuze marteze eo liammet gant doare da seveniñ Denis Villeneuve… Nag a deoriennoù!)

Film sevenet gant Denis Villeneuve, diwar un danevell gant Ted Chiang. Stadoù-Unanet Amerika, (war skrammoù bras Frañs gant an titl Premier Contact adalek ar 7 a viz Kerzu) 2016, 2e07.

小さいおうち (Chiisai o-uchi / La maison au toit rouge)

Posted in Filmoù with tags , , , , , , on Here 19, 2016 by geekezig

la_maison_au_toit_rougeMoereb kozh Takeshi a zo o paouez mont d’an anaon. Un darempred tener a oa etrezo ha lenn a rae ingal he eñvorennoù, a oa hi o skrivañ. En ur gempenn he zi e kav ar paotr yaouank an destenn, klokaet ganti. Etre amzer a vremañ hag amzer dremenet e vo gwelet penaos e oa ar vuhez evit Taki, plac’h yaouank eus hanternoz Honshū, aet da vatez ur familh bourc’hiz e Tokyo e deroù an eil brezel bed. Poltred ur mare hag un doare da vevañ.
Dedennus-tre eo La maison au toit rouge peogwir e tiskouez un dro spered (broadelour, a-du gant ar brezel) hep klask kuzhat an traoù. Plijout a rae da Daki bevañ ha labourat gant ar familh Hirai, daoust da bep tra. Takeshi a ro un tamm ar sell a-vremañ, a varn tro spered ar bloavezhioù 30 ha 40. Evel-just ez eus traoù a seblant iskis hirie an deiz, met kavout a ran mat e vefe taolennet ivez tuioù fall ur gevredigezh, na oa ket dre ret spontet gant an traoù a c’hoarveze.
Ar film a ziskouez ivez ha dreist-holl un istor karantez peogwir eo test Taki eus an darempred a ziwan etre he renerez hag ur c’henseurt d’he gwaz.
Ur film hir ha brav eo, daoust din bezañ kavet e oa un tammig “re” ar fin marteze, peadra da lakaat an holl da ouelañ dourek. Ne oa ket soutil-tre. Me gav din eo dedennus dreist-holl evit taolennadur Tokyo da vare an eil brezel bed, en ur metou bourc’hiz.

Film sevenet gant YAMADA Yōji. Japan, 2014, 2e16.

Miss Peregrine’s Home for Peculiar Children

Posted in Filmoù with tags , , , , , , , on Here 18, 2016 by geekezig

miss-peregrines-home-for-peculiar-childrenFellout a rae din lenn levrioù Miss Peregrine’s Home for Peculiar Children a-raok gwelet ar film. Siwazh din, n’on ket deuet a-benn! Kinniget eo bet din mont da welet ar film gant ur genseurtez ha kavet ‘m eus e oa un degouezh mat!
Dizoloet ‘m eus istor Miss Peregrine’s Home for Peculiar Children neuze. Un istor klasel-tre pa soñjer er romantoù faltazi (pe rummadoù comics brudet ivez…) evit ar re yaouank met dedennus hag efedus, gav din.
Jake, ur c’hrennard ordinal, a zo test eus marv e dad-kozh, marvet en un doare kevrinus-tre. Kregiñ a ra da brederiañ diwar-benn an istorioù leun a ijin a gonte e dad-kozh dezhañ pa oa bugel. Evit klask aesaat e gañv e tivizo mont da Gerne-Veur war un enezennig da glask war-lerc’h an ti evit an emzivaded dalc’het gant Miss Peregrine a veze meneget gantañ bepred. Dizoloiñ a raio buan e c’hall gwelet kement a draoù souezhus ha ma c’halle e dad-kozh…
Plijet on bet evel-just gant ar veaj en amzer hag an doare da c’hoari gant al lec’hioù (un tamm e-giz Jumper aze). A bep seurt tudennoù a zo e-touez ar vugale ha prantadoù birvilh keit ha from. Brav-tre eo ar skeudennoù ouzhpenn ha plijus ‘m eus kavet gwelet efedoù ispisial un tamm giz kozh asambles gant reoù modern-tre. Un dudi a galite eo evidon me!
Ne vez ket santet kement-se eo ur film sevenet gant Tim Burton, pezh a zo mat marteze, met traoùigoù a lak da soñjal koulskoude e peurrest e oberenn :bannlevioù cheuc’h penn-kentañ ar film pe neuzioù euzhviled zo, da skouer. Un azasadenn eo a-raok bezañ ur film gant Tim Burton marteze ha n’eo ket fall dre-ret…
Bremañ e vo dav din kregiñ barzh al levrioù memestra!

Film sevenet gant Tim Burton, diwar romant Ransom Riggs. Stadoù-Unanet Amerika, (war skrammoù Frañs abaoe ar 5 a viz Here) 2016, 2e07.

%d bloggers like this: