Dielloù evit arc’hant

Les bonnes conditions

Posted in Filmoù with tags , , , , , , , , on C'hwevrer 11, 2019 by geekezig

Les bonnes conditions a zo un teulfilm bet kroget e 2003 hag echuet e 2017. Eizh lisead eus lise Victor-Duruy e 7vet arondisamant Pariz a gomz eus o endro familh ha sokial (bourc’hiz), o dazont, ar vachelouriezh, o studioù, deroù ar vuhez micherel.
Dedennus-tre oa evidon peogwir on memes oad hag ar re aterset. Fentus gwelet emdroadur pep hini, c’hoant ober plijadur d’o zud, heuliañ an hent bet dibabet evito, pe ar c’hontrol-mik. Me gav e seblantent onest, anzav a raent kaout kalz sikour digant o zud, bezañ bet gouest da vezañ perc’henn hag all a drugarez dezho. Reoù zo a seblanto kaout prantadoù “dispac’h”, o klask mont davet an arzoù da skouer, a-raok distreiñ d’ur vuhez sirius, reoù all n’o deus ket cheñchet hent…
An holl anezho avat a seblant lavar n’int ket stag ouzh an talvoudoù bourc’hiz bet desket dezho, d’ar madoù. Plijout a ra dezho bevañ mat ha gallout beajiñ hag all, n’int ket sot, met ne fell ket dezho dre ret bevañ e memes stumm ha rummad o zud. N’eo ket sur e teufent a-benn, rak gwall sirius int chomet evit an darn vrasañ. Dedennus hag un tamm trist, neuze… met komprenus. Ne seblantont ket bezañ tud otus pe hegasus, gouzout a reont o deus bet chañs ha seblantout a reont trugarekaus.
Ur sapre labour war un hir a brantad, dedennus-tre da sellet.

Teufilm sevenet gant Julie Gavras. Frañs, 2018, 1e26.

Money Monster

Posted in Filmoù with tags , , , , , on Here 15, 2016 by geekezig

money-monsterUr film tro-dro d’un abadenn ekonomikel eo Money Monster. Moarvat ez eus abadennoù a seurt-se er skinwel, a guzul an dud evit plasañ arc’hant ha traoù a seurt-se. Lee Gates eo a ginnig an abadenn-se a ra kalz berzh. An deiz a-raok ez eus c’hoarvezet un darvoud digredus : digresket kenlodennoù un embregerezh a oa stabil betek-hen, IBIS Clear Capitol. Fellout a ra da Lee Gates lakaat ar gaoz war-se met prezidant an embregerezh a zo o veajiñ… Animatour an abadenn en doa kuzuliet postañ arc’hant en embregerezh-se, peogwir e oa sur da vat. Ur paotr yaouank, Kyle, en doa plaset e arc’hant hervez e guzulioù a zo bremañ hep arc’hant a-gostez ha tad da zont hag a ziviz mont da c’houlenn kontoù digantañ, war-eeun en abadenn.
Un tamm souezhus eo, an doare m’eo diskouezet ar sponter-se. Dre ret, evel Lee Gates, e fell d’ar seller-ez en defe respontoù hag e tremenfe mat pep tra evitañ (e gwirionez ez eus un abeg all a vez diskoachet buan a-walc’h d’ar sellerien-ezed a greñvaat ar santad-se). Komprenus eo e abegoù ar paotr-se, a lak ur skipailh skinwel gouestl, ar pezh a zo nec’hus memestra! Lakaat a ra da brederiañ war ar bed ekonomikel ha start eo pas bezañ a-du gantañ e gwirionez…
Dedennus-tre ‘m eus kavet ar film en e doare da ziskouez bed ar skinwel (a bep seurt tud eus ar skipailh teknel a vez heuliet da vareoù zo) hag ur seurt enklask a zo e diabarzh an embregerezh kaoz d’ar reuz-se. Fellout a ra d’an holl kompren petra zo c’hoarvezet ha ni ivez! Heuliet e vez ar skipailh skinwel o verrañ sioul an traoù a-benn chom bev, ar polis a glask dieubiñ an dud-ouestl, mouezh IBIS Clear Capitol a gompren hi ivez n’eo ket sklaer an traoù… Danvez ha birvilh a zo! Ur film a dremen buan-tre eo. Kavet ‘m eus e oa lusket ha savet en un doare efedus. Un tamm direnket on bet gant ar fin marteze, un tamm re “velo” a-raok bezañ kinek da vat.

Film sevenet gant Jodie Foster. Stadoù-Unanet Amerika, 2016, 1e39.

Platinum End 1

Posted in Levrioù bannoù-treset with tags , , , , , on Mae 25, 2016 by geekezig

platinum-end-gHirie e teu Platinum End er maez e Japan (e stumm un dastumad chabistroù) hag e stalioù levrioù Frañs. Ha tro ‘m eus bet da lenn anezhañ a-raok evel ma tivinit moarvat. Ral eo neuze evit ur wech n’em eus ket tapet dale evit skrivañ ma fennad! :p
Platinum End a zo manga nevez krouerien Death Note ha Bakuman. Un degouezh bras eo.
En ur brientiñ ma fennad em eus desket ivez e oa deuet a-benn Kazé da gaout emglev evit embann ar chabistroù kazi diouzhtu goude ma vefent embannet e Japan. Emañ an embannerien o klask tallañ ouzh ar “scantrad” a vez kavet digoust war ar rouedad met maez lezenn a-grenn. Ur sapre labour (ret eo treiñ ar pajennoù e 12 eurvezh hepken)!
Paouez a rin da gomz eus pezh a c’hoarvez tro-dro d’ar manga evit displegañ petra ‘zo ennañ :
Ur paotr yaouank, Mirai, a echu gant ar skolaj. Dizesper a-grenn, e klask en em lazhañ. Ur vuhez gwall drist en deus bevet ret eo lârat (marvet e dud pa oa 7 vloaz, o vevañ gant e voereb a implij anezhañ evel sklav). Pezh a zo e vez savetaet gant un ael. An ael-se ne zispleg ket pep tra da v/Mirai met komprenet ‘vo tamm-ha-tamm ez eus ur genstrivadeg etre trizek ael evit kavout un doue nevez. Da zibab o deus e-touez tud o deus kollet spi er vuhez. Mirai eo ar c’henstriver bet dibabet gant Nasse, ael lamponez a ro titouroù a dammoù ha ne seblant ket kaout diegi da lazhañ pe implij ar reoù all gant ma roio startijenn en-dro d’ar paotr yaouank, kalz reishoc’h egeti…
Gwelet e vo peseurt galloudoù a c’hall an aeled reiñ d’an dud met ivez dañjerioù ar genstrivadeg. Ne lârin ket kalz tra diwar-benn an tresadennoù a gavan kaer.
Ur bern traoù a chom da zizoloiñ evel-just met kroget eo ar genstrivadeg dija ha moarvat e vo plijus dizoloiñ ar genstriverien all, tamm-ha-tamm. Ul levrenn digeriñ a ro c’hoant kenderc’hel ganti eo!Platinum-End

Istor gant OHBA Tsugumi, tresadennoù gant OBATA Takeshi. Embannet e galleg gant Kazé, d’ar 25 a vie Mae 2016.

She’s Funny That Way

Posted in Filmoù with tags , , , , on Genver 10, 2016 by geekezig

shes-funny-that-wayUr film skañv eo She’s Funny That Way, diazezet war metou ar c’hoariva e New York hag ivez war gevier an tudennoù. Santet e vez splann levezon Woody Allen. Dudius ha plijus eo, gant kalz fent (pezh a zo disheñvel eus filmoù ar sevener brudet nevez zo). Kalz daveoù a bep seurt a zo, ur c’hameo dispar er fin. Kuzuliañ a ran deoc’h ma plij deoc’h ar filmoù gant kalz kaoz ha ma n’hoc’h ket jenet gant tud wenn kentoc’h pinvidik o klemmichat 😉

Film sevenet gant Peter Bodanovich. Stadoù-Unanet Amerika, 2014, 1e33.

La Théorie de la tartine

Posted in Levrioù with tags , , , , , , , on Kerzu 9, 2015 by geekezig

La-Theorie-de-la-TartineDiv lodenn a zo da eil romant Titiou Lecoq (Les Morues a oa he romant kentañ met n’am eus ket e lennet). Ar penn-kentañ a grog e 2006 : Emañ Youporn o paouez digeriñ, penn-kentañ al lec’hiennoù kelaouiñ-arvest eo, an dud a grog d’ober anaoudegezh gant 4chan hag all. Dre zegouezh e ra anaoudegezh Marianne, studierez ha blogourez ha n’em adkav en desped dezhi e kreiz unan eus videoioù kentañ Youporn, Christophe kelaouenner evit Vox ul lec’hienn bet krouet gantañ ha Paul, paotr yaouank un tamm kollet anezhañ met donezonet evit ar stlennek. Un doare mignoniezh iskis a ziwan etrezo, liammet gant karantez ar rouedad.
E 2015 e vezont adkavet en eil lodenn : Marianne ha Paul n’ho deus labour gwirion ebet, Christophe a zo e penn ur pezh lec’hienn kelaouiñ ha kudennoù o deus adarre.
A bep seurt dodennoù a zo d’ar romant : buhez tud etre 20 ha 40 er bloavezhioù 2000 (dilabour, arc’hant, karantez, familh…), mignoniezh evel-just. Ur romant a ziskouez kement tuoù fall ar rouedad eget e duoù mat eo a gav din. Ur sell gwirheñvel war buhezioù tud ar bloavezhioù 2000 e ro ivez, daoust din kavout eo un tamm re Parizian memestra. Mont a ra un tamm pell ganti a-wechoù (met c’hoarzhet ‘m eus ur wech pe div!) hag al live yezh a c’hallo jeniñ tud ‘zo d’am soñj met plijus em eus kavet bepred.

Romant skrivet gant Titiou Lecoq. Embannet gant Au Diable Vauvert d’an 19 a viz Meurzh 2015.

Girls – bloavezh 3

Posted in Stiradoù, webstiradoù ha skinwel with tags , , , , , , , , on Du 2, 2015 by geekezig

Girls-Season-3Adam hag Anna a vev asambles goude istorioù fin an eil bloavezh. Seblantout a ra tremen mat an traoù er ranndi. Marnie zo bet dilezet gant Charlie, Shoshanna a ra un tamm forzh petra ha Jessa a zo en ul lec’h a-ratozh evit pareañ he c’hudennoù dramm.
Setu penaos e krog an traoù.
Un toullad traoù a-feson a zo bet er bloavezh-mañ me gav : labour Hannah e GQ da skouer, an istorioù tro-dro d’ar marv (dreist-holl hini mamm-gozh Hannah). Un tamm dipitet on gant emdroadur Marnie, daoust din kavout bepred eo tudenn gwirheñvelañ ar stirad. Shoshannah ‘zo bet dilezet un tamm ha Jessa hegasus pa veze gwelet. Dizoloet hon eus c’hoar Adam ivez. A bep seurt traoù a zo bet neuze er stirad, traoù dipitus ivez evel-just met ur bloavezh a galite eo me gav a live gant an eil digudenn.

Stirad bet krouet gant Lena Dunham. Bloavezh gant 12 rann tro 30 munut, bet skignet evit ar wech kentañ war HBO etre an 12 a viz Genver hag an 23 a viz Meurzh 2014.

A Girl Walks Home Alone At Night (Dokhtari dar šab tanhâ be xâne miravad‎‎ دختری در شب تنها به خانه می‌رود)

Posted in Filmoù with tags , , , , , on Here 26, 2015 by geekezig

girl-walks-home-alone-at-nightNe oan ket deuet a-benn da welet A Girl Walks Home Alone at Night peogwir n’eo ket bet skignet dispar, zoken e Pariz. Ur film iranian eo am boa klevet kalz komz dre twittoù Elijah Wood, produer anezhañ evit ar film-se. Me soñje din e oa ur film spont met n’eo ket tamm ebet a-benn ar fin. Ur film gorrek-kenañ eo. Kalz pouez a zo gant ar sonerezh, brav eston ar skeudennoù gwenn-ha-du… Un neuz klip a zo gant ar film da vareoù zo. Plijus-tre eo da sellet evit ar skeudennoù hag ar sonerezh neuze. An istor avat am eus kavet dipitus un tammig : ur sunerez-gwad a bourmen e straedoù Bad City, gwisket gant he z/tchador. Tagañ a ra tud resis : ur gwerzher dramm, arval ur c’hast a ro dramm dezhi… Arash, ur paotr yaouank a vez heuliet ivez. N’eo ket displijus met mankout a ra un draig bennak evit bezañ ur film eus ar gwellañ, evidon-me.

Film sevenet gant Ana Lily Amirpour. Stadoù-Unanet Amerika, 2014, 1e41.

Girls – bloavezh 2

Posted in Stiradoù, webstiradoù ha skinwel with tags , , , , , , , , on Here 5, 2015 by geekezig

girlss2.jpgPa ‘m eus gwelet e oa eil bloavezh Girls el levraoueg n’on ket bet pell o kemer, nag o sellet! Traoù nevez a dremen evel-just. Un tamm dipitet on gant tudenn Jessa hag an nebeut a vez gwelet Shoshanna. Mod all ez eus bepred re a Hannah ha Marnie an hini eo a blij din ar muiañ. Marteze e vez gwelet muioc’h ar baotred ivez (Ray, Charlie, Adam hag Elijah) pezh n’eo ket displijus. Fin ar bloavezh gant kudennoù bras anken Hannah a zo un tamm dedennusoc’h eget ar penn-kentañ. Plijus eo bepred an doare featurette a zo evit pep rann e lec’h ma tispleg Lena Dunham un tamm pal pep hini. Kenderc’hel a rin gant ar stirad gant plijadur!

Stirad bet krouet gant Lena Dunham. Bloavezh 10 rann tro 30 munutenn bet skignet gant HBO etre an 13 a viz Genver hag ar  17 a viz Meurzh 2013 .

Girls – bloavezh 1

Posted in Stiradoù, webstiradoù ha skinwel with tags , , , , , , , on Gwengolo 1, 2015 by geekezig

girls-season-season1-episode2Kouezhet on dre zegouezh war Girls el levraoueg ha soñjet e oa poent din sellet ouzh ar stirad. Daou vignon din a blij kalz dezho ar stirad ha Judd Apatow, ha setu tamm-pe-damm.
Berr tout eo ar bloavezh (10 rann 30 munut). Poan spontus ‘m eus bet gant ar rannoù gentañ (lakaomp an teir gentañ) war var on bet da baouez zoken. Met bet on betek ar penn ha kavet kentoc’h mat ar pezh a oa war-lerc’h.
Girls a zo ur stirad diwar-benn ur strollad mignonezed etre 20 ha 25 o vevañ e New York. Ur santad “o paourkaezh merc’hedigoù pinvidik” a zo er penn-kentañ peogwir e seblantont tremen o amzer o klemm padal n’eo ket re fall ar pezh o deus. Lakaet on bet diaes ivez gant tudenn Adam a vez komprenet kalz gwelloc’h goude e kreiz ar bloavezh. Ma, goude-se eo un tamm “gwirheñveloc’h” an traoù ha div rann ‘m eus kavet brav-tre zoken (Hannah o tistreiñ e ti he zud hag ar gouel divent). Ur stirad diwar-benn kudennoù ur remziad eo (klask labour, darempredoù karantez ha rev, arc’hant…) met ivez mignoniezh. Domaj eo e vefe kement a bouez gant tudenn Hannah ha ken nebeut gant an teir all avat.

Stirad bet krouet gant Lena Dunham. Bloavezh gant 10 rann tro 30 munut, bet skignet evit ar wech kentañ war HBO etre ar 15 a viz Ebrel 2012 hag 17 a viz Even 2012.

Entourage

Posted in Filmoù with tags , , , , , on Gouere 29, 2015 by geekezig

entourageNe oan ket bet plijet gant fin Entourage met dedennet e oan gant ar film forzh penaos. Un darempred iskis ‘m eus gant Entourage, merzet ho poa dija. Ma, bet on neuze o welet ar film. Evel-just eo dispennet fin ar stirad er pemp munut kentañ : dispartiet eo Vince ha Ari a zistro da labourat. Ouf.
Ar film a zo tro-dro da “Hyde” film nevez Vince. Pezh zo en deus goulennet seveniñ ar film ouzhpenn ha goulenn a ra arc’hant ouzhpenn evit echuiñ ar film hep diskouez un disoc’h james. Nec’het eo Ari neuze ha rankout a ra displegañ d’ar broduourien petra c’hoarvez.
Heuliet e vo E. hag e istorioù gant Sloan evel-just, Ari o klask merañ e gounnar ha dreist-holl Haley Joel Osment (a oa chomet sac’het en tu bennak?) evel hini “drouk” droch, redneck pinvidik. ‘M eus aon eo marvet skeudenn ar paotrig koant em spered da viken aze. Ma. C’hoarzhet ‘m eus, ur bern kameo a galite a zo, ‘m eus ket kavet hir ma amzer ha dreist-holl ec’h echu an traoù EVEL MA OANT DLEET. E gwirionez ez eo ar c’hlozadur a oa ret d’ar stirad. Neuze ‘m eus ket keuz eus ar film, pell ac’hann (mod all vefe echuet nul) met perak pas bezañ graet ur bloavezh a-bezh tro-dro da “Hyde”? (ha d’an traoù all a c’hoarvez er film) evit echuiñ evel ar film? Na gomprenan ket. Kalz gwelloc’h vefe bet.
Ma, Entourage a zo ur film da welet groñs evit ar re a oa bet betek penn ar stirad. Evit an dud all n’en deus ket kalz a bouez rak ne vez ket displeget kalz tra. L’Chaim, bitches!

Film sevenet gant Doug Ellin. Stadoù-Unanet Amerika, (e sinemaoù Frañs d’ar 24 a viz Even) 2015, 1e46.

%d bloggers like this: