Archive for the Levrioù bannoù-treset Category

À nous deux, Paris!

Posted in Levrioù bannoù-treset with tags , , , on Ebrel 18, 2017 by geekezig

N’on ket bet dedennet james gant levrioù JP Nishi, ur Japanad o reiñ e sell war b/Pariz. Met dre m’eo bet kinniget deomp gant embanner e levr diwezhañ degemer anezhañ el levraoueg e seblante sirius lenn un tamm ar pezh en doa graet, memestra.
Kroget on en urzh neuze gant À nous deux, Paris! a zispleg penaos eo erruet e Pariz, hep gouzout galleg, evit dont da labourat gant tresourien bannoù-treset (met buan e komprenas ne ya ket en-dro an traoù evel e Japan).
Kontañ a ra neuze gant fent hag en un doare skañv-tre an traoù a gav souezhus e Pariz, doareoù da vezañ hag all. Un tamm pounner eo a-wechoù abalamour d’e dudenn lu ha kliched met moarvat gwir-tre evit Japaniz a zeu da veajiñ ha/pe da vevañ e Frañs.
Istor ha tresadennoù gan Jean-Paul Nishi. Embannet e galleg gant Philippe Picquier, d’ar 4 a viz Mae 2012.

Dédale 1

Posted in Levrioù bannoù-treset with tags , , on Ebrel 3, 2017 by geekezig

Div harozez Dédale a genloj asambles peogwir e labouront evit un embregerezh c’hoarioù video. En em adkavout a reont en ul lec’h souezhus, ur savadur heñvel ouzh hini o labour met a seblant mont en-dro evel ma c’hallfe ur c’hoari ober. Dañjerioù a zo met ivez traoù a ya en-dro en un doare resis. Mont a reont war-raok en endro iskis-mañ en ur glask a bep seurt traoù ha kompren reolennoù al lec’h…
Ur meskaj etre ar c’hoari Portal hag ar film Cube eo Dédale kazi. Un daouad fentus eo (an div dudenn), unan a glask pep tra evit gwelet penaos e ya en-dro ar “c’hoari” eben a zo kentoc’h dedennet gant an istor, petra eo sekred al lec’h… Un daolenn eus an doareoù c’hoarierien ha c’hoarierezed a zo 😉
Un tamm souezhus eo avat gwelet ur “c’hoari video” war baper evelse, traoù zo n’int ket anat da gompren, ne seblantont ket dre ret mont en-dro. Fentus eo ar mennozh avat ha kevrinus ar bed ha perak emañ ar merc’hed aze. E-pad pegeit e chomo ken dudius ? Un afer all eo !

Istor ha tresadennoù gant Takamichi. Embannet e galleg gant Doki doki, d’ar 6 a viz Gouere 2016.

Les trois fantômes de Tesla 1

Posted in Levrioù bannoù-treset with tags , , , , on C'hwevrer 28, 2017 by geekezig

trois-fantomes-teslaGolo Les trois fantômes de Tesla en doa plijet din. A-wechoù, n’eus ezhomm mann all ebet evit kaout c’hoant da lenn un oberenn, neketa ?
E fin 1941, e New York, e tremen darvoudoù an istor. Ur paotrig hag e vamm, nevez erruet, a vo heuliet. Ar Stadoù-Unanet ne gemeront ket perzh c’hoazh en eil brezel bed met stignet eo an traoù evel-just. Un doare ukroniezh eo an istor neuze, savet war kevezerezh Tesla hag Edison. N’eo ket klok an istor evel-just met peadra a zo da ijinañ e vo savet armoù, robotoù ha me oar ivez eus tu Japan.
Brav ‘m eus kavet an tresadennoù met un tamm iskis al lusk, ne oan ket tapet kement-se en istor. Un diouer a bersonelezh gant an haroz marteze ? Santet e vez un tamm levezon Alex Alice (a zo trugarekaet gant an oberourien) met hep an nerzh… Da welet penaos e troio an istor!fantomesteslaIstor ha livioù gant Marazano, tresadennoù gant Guilhem. Embannet gant Le Lombard, d’ar 26 a viz Eost 2016.

Mia & Co 1

Posted in Levrioù bannoù-treset with tags , , , , on C'hwevrer 27, 2017 by geekezig

miaco1Klevet am boa komz diwar-benn Mia & Co en ur glevout an treser, Hitori De, en un abadenn war chadenn Nolife. O c’houzout e oa ur c’henlabour gant Vanyda e oan en soñj e lenn diouzhtu. Mia & Co a zo un istor krennarded ordinal a-walc’h. E pevare klask emaint ha Mia, an harozez, a n’em glev kentoc’h gant paotred. C’hoari a reont gant c’hoarioù video asambles goude ar c’hentelioù e ti tad-kozh unan anezho. Studierien yaouank a vez o lojañ en ti bras-se ivez.
Mignoniezh ha deroù karantez, setu ar pezh a gont an istor evit ar mare. Plijus e oa da lenn met erru on skuizh un tamm gant an tech tudenn “plac’h n’em em glev ket gant ar merc’hed all” hag a vez o troukkomz diwar-benn ar merc’hed a lak fardaj pe me oar me (merc’hed gwelet evel “gwregeloc’h” egeti lakaomp). War memes tro on kazi sur e oa lodennoù ouzhin un tammig evel-se d’an oad-se met evel den deuet e kavan torr-penn diskouez ar skouer-se d’ar grennardezed.
An tresadennoù n’int ket ken brav hag ar pezh em befe kredet kennebeut (stummet eo bet Hitori De e skol Disney Milan neuze ec’h ijinen tresadennoù heñveloc’h eus W.I.T.C.H. da skouer a blije din lenn pa oan el lise ^^, marteze eo kenkoulz na vefe ket e gwirionez). Ul lennadenn skañv mat evit ar grennarded, marteze pas kement evit ar re vras!miacodiIstor gant Vanyda, tresadennoù gant Hitori De. Embannet gant Dargaud, d’an 2 a viz Gwengolo 2016.

Un million d’éléphants

Posted in Levrioù bannoù-treset with tags , , , , , , on C'hwevrer 18, 2017 by geekezig

un-million-delephantUn million d’éléphants a ginnig ur sell war istor al Laos e-kerzh an XXvet kantved. Awenet gant istor familh Vanyda, met ivez testenioù bet dastumet e-pad ur veaj du-hont, e vo tro da welet a-hed ar pajennoù istorioù buhez liesseurt. Brezelioù (Indosina, Vietnam), diktatouriezh komunour, divroañ… N’eo ket skañv an darvoudoù kontet.
Desket ‘m eus ur bern traoù diwar-benn istor al Laos met start ‘m eus kavet pas kaout ur gartenn (hag a zo er fin e gwirionez, pebezh drochez!) evit kompren pelec’h e tremene an traoù pe d’an nebeutañ pegen pell e oa ar c’hêrioù an eil re eus ar re all pe e-kichen peseurt harzoù. Ma, ma vefen fin ne vefe ket bet ken poanius. Memes kudenn ‘m eus bet gant an tudennoù, ur BERN a zo, rummadoù disheñvel eus memes familh ha peadra da vezañ kollet mik. Evidon-me e vefe bet boued evit div levrenn pe neuze e vefe bet ret chom hep kontañ traoù zo (marteze ne oa ket ezhomm komz diwar-benn al ladyboy da skouer?)…
Ma, ul levr dedennus eo memestra gant tresadennoù ha livioù a-feson. Santet e vez e oa pouezus evit Vanyda komz diwar-benn istor he familh ha bro hec’h orinoù. Marteze e vefe bet gwelloc’h dezhi sevel an istor hec’h unan?millionelephantsIstor gant Jean-Luc Cornette, tresadennoù gant Vanyda. Embannet gant Futuropolis, d’an 3 a viz Genver 2017.

This One Summer

Posted in Levrioù bannoù-treset with tags , , , , , on C'hwevrer 17, 2017 by geekezig

thisonesummerAbaoe pell e welan This One Summer hag e fell din e lenn, aliet eo bet gant ur bern tud ouzhpenn.
Rose a ya betek an ti a vez feurmet gant he zud bep bloaz evitan hañv. Du-hont e c’hoari gant Windy, he amezegez a zo un tammig yaouankoc’h. Stignet eo an traoù etre mamm ha tad Rose. An div rak-krennardez a feurm filmoù, a ya da neuial, a bren madigoù hag a glask heuliañ istorioù ar re yaouank a labour er stal…
Ur poltred fromus a ginnig an div genitervez el levr bannoù-treset-mañ. Un istor familh, gant an darvoudoù start, mignoniezh, ar vakañsoù ha dreist-holl ar guriusted a c’hall krennarded “vihan” kaout evit ar re “vras”, dieub hag o vevañ traoù all… Brav eo an tresadennoù hag an dibab livioù (un doare bikromiezh a vez kavet ingal e Amerika an Norzh war a seblant). Un istor gant tudennoù gwirheñvel, ul levr leun a gizidigezh a alian deoc’h ivez bremañ.this-one-summerIstor gant Mariko Tamaki, tresadennoù gant Jillian Tamaki. Embannet gant First second, d’ar 6 a viz Mae 2014.

Sangre 1 – Sangre la survivante

Posted in Levrioù bannoù-treset with tags , , , , , , on Genver 30, 2017 by geekezig

sangreSetu stirad bannoù-treset nevez Arleston, un istor galloudoù hud HA bedoù kenstur! Na petra ta! 😀
Sangre a zo ur plac’hig test eus drouklazh he c’humuniezh gwiniegourien pa oant o veajiñ davet ar gêr vras. Dont a raio da vezañ besteod ha ne chomo nemet ur spi ganti : adkavout he mamm (m’eo bev c’hoazh) ha lazhañ muntrerien he familh. Ur vuhez digenvez ha diazezet war al laeroñsi e vevo goude bezañ bet skarzhet eus ar skol e lec’h ma oa bet degemeret.
Klasel eo diazezoù an istor (bugel emzivad, dial, itrikoù evit kaout galloud gant lodennoù uhelañ ar gevredigezh…) met dedennus eo ar bed, efedus an tresadennoù hag an doare da gas an istor war-raok. Hast ‘m eus gouzout hiroc’h!sangredIstor gant Arleston, tresadennoù gant Floch. Embannet gant Soleil d’an 19 a viz Here 2016.

%d bloggers like this: