Star Daughter

Brav eston e kaven golo Star Daughter. Ur romant “own voices” e oa, hag ur romant Young Adult faltazi mesket gant sevenadur Indez a seblant ral!
Sheetal a zo merc’h un den hag ur steredenn. He mamm he deus dilezet anezho avat setu ne oar ket kalz a dra diwar-benn lodenn-se hec’h identelezh estreget e rank livañ he blev bepred evit ma chomfe kuzh he blev griz arc’hantet.
Un deiz bennak e gloaz he zad gant he galloudoù steredenn hag evit e sikour he deus ezhomm gwad ur steredenn.
Mont a ra neuze da welet familh he mamm, met pezh ne oar ket eo e vo implijet gant he zud-kozh evit kemer perzh en ur genstrivadeg evit ren war rouantelezh ar stered. Gwelet e vo fall gant ar berzhidi all, ret e vo dezhi deskiñ ur bern traoù buan-kenañ, doareoù da vezañ ha me oar me, ha souezhet fall e vo ouzhpenn gant he familh. Ne vo ket aes!
Ur romant plijus eo Star Daughter, brav eo ar bed kinniget hag ijinet, skeudennoù brav-tre a zeu e spered al lenner-ez.

Romant skrivet gant Shveta Thakrar. Embannet gant HarperTeen d’an 11 a viz Eost 2020.

The Boys – bloavezh 1

The Boys a ginnig deomp ur bed e lec’h ma ‘z eus gourharozed. Met meret int gant ur gevredigezh divent, evel aktourien sinema, sportourien pe youtuberien. Hughie a oa o vont da zebriñ gant e vignonez p’eo bet he lazhet gant A-Train, ur gourharoz e-touez ar “seven”, ar seizh gourharoz pouezusañ. Adalek ar mare-se e fello dezhañ kompren perak. Un den souezhus, Billy Butcher, a deuio da glask war e lerc’h ha da ginnig dezhañ dial, sur ez eus traoù lous ha kuzh e bed ar gourharozed.
Feuls ha gwadek eo The Boys. Tamm-ha-tamm e vo dizoloet petra eo sekredoù Vought (an embregerezh e penn pep tra) hag ar gourharozed met ivez perak ne vez ket enklaskoù gant servijoù difenn ar gouarnamant evit tallañ ouzh an traoù dre zindan graet ganto. Ur mennozh mat eo ha liesseurt eo an tudennoù, gant abegoù disheñvel d’ober an traoù ha savoù-poent disheñvel. Plijadur ‘m eus bet o sellet ouzh ar bloavezh kentañ ha kenderc’hel a rin gant plijadur moarvat. N’am eus ket bet tro da lenn ar c’homic book avat setu n’hallan ket keñveriañ an div oberenn.

Stirad krouet gant Eric Kripke, diwar comic book Garth Ennis ha Darick Robertson. Stadoù-Unanet Amerika, 2019 (8 rann 50 munut). Dasparzhet gant Amazon Prime.

Les Indes Fourbes

Ur pikol levr bannoù-treset eo Les Indes Fourbes. E meur a levrenn en defe gallet bezañ bet embannet kazi. Teir lodenn a zo d’an istor, a vo dizoloet e doare disheñvel a bep eil.
Dispar eo tresadennoù (treser Blacksad eo Guarnido) hag evit ar re a blij De Capes et de Crocs dezho (eveldon) ne vo ket souezhus stil “c’hoariva” an istor, savet gant memes den.
Pablos a zo ur paourkaezh spagnol paour a n’em gavo er c’hevandir nevez, klask a raio dreistbevañ hag ivez klask arc’hant hag aour, marteze ? Daoust hag un haroz pe un toueller eo ?
Se a vezo dizoloet tamm-ha-tamm. Ul levr plijus-tre!

Istor gant Ayroles ha tresadennoù gant Guarnido. Embannet e ti Delcourt, d’an 28 a viz Eost 2019.

Widows

Ur strollad torfedourien a laer arc’hant digant ur politikour e Chicago. Harzet int gant ar polis ha mervel a reont er c’harr. Peder intañvez a chomo war o lerc’h. Veronica, intañvez an hini a oa e penn a vez goulennet diganti restaol an arc’hant gant strollad ar politikour. Divizout a ra neuze implij karned labour he gwaz evit dastum arc’hant gant sikour an intañvezed all.
Ur film efedus eo Widows, a ziskouez tuioù gwall vil mab-den. Doareoù mafia politikourien zo, feulster, gouennelouriezh. Savet eo mat ha tamm-ha-tamm e vo komprenet itrikoù don tudennoù zo. Ur film “polis” a galite met n’eo ket gwellañ film Steve McQueen avat.

Film sevenet gant Steve McQueen. Rouantelezh-Unanet ha Stadoù-Unanet Amerika, 2018, 2e10.

La fameuse invasion des ours en Sicile

Ne anavezen ket an albom/kontadenn La fameuse invasion des ours en Sicile, setu ne ouien ket petra oa an istor. Ur film kontet e doare commedia dell’arte eo.
Meur a daolenn a zo, a bep eil, gant prantadoù “kinnig” gant tudennoù konterien.
Brav eo ar film, met n’eo ket dre ret brav ar bevaat d’am meno, ha n’on ket deuet a-benn da chom war evezh evit heuliañ aketus an istor. Domaj eo, marteze ne oan ket imoret mat evit sellet, re glasel eo evidon, re eeun.

Film sevenet gant Lorenzo Mattotti diwar kontadenn Dino Buzzati. Frañs hag Italia, 2019, 1e25.

Le château des animaux 1

Awenet eo Le château des animaux gant Kêr al Loened George Orwell.
En ur c’hastell emañ al loened o vevañ. An holl a rank labourat, rannañ an dafar hag ober e lod. Tamm-ha-tamm e tiwan un emsavadeg e-touez al loened rak nebeutoc’h-nebeutañ a voued a zo, loened lazhet dirak an holl evel pinijenn ha traoù kriz ha dic’houzañvus a seurt-se. Heuliet e vo loened resis a fell dezho cheñch an traoù, erru skuizh gant an doare m’eo aozet an traoù er c’hastell.
Savet mat eo al levr, plijus an tudennoù, brav an tresadennoù ha speredek emdroadur an tudennoù (n’int ket holl prest da emsevel diouzhtu da skouer). Hast ‘m eus lenn hiroc’h!Istor gant Xavier Dorison, tresadennoù gant Félix Delep. Embannet e ti Casterman d’an 18 a viz Gwengolo 2019.

King Arthur : Legend of the Sword

Gouzout a ouien dija peseurt techoù a vefe gant film Guy Ritchie : un doare da frammañ prim-kenañ, kanaouennoù modern, traoù a seurt-se. Prest e oan.
Ne oan ket prest avat da welet Mordred koshoc’h eget Uther, e-penn ur bagad olifanted zombi iskis, pe c’hoazh Uther gant ur breur bihan anvet Vortigern (evel ar roue gwir) hag a lazh Uther. Se zo e deroù ar film. E Peurrest ar film e vo Vortigern o klask war-lerc’h mab Uther a oa deuet a-benn da dec’hout kuit. Mojenn Gwenn-Erc’h eo a vo kontet deomp kentoc’h eget traoù all.
Estreget Arzhur, anv Marzhin ha Kaled-voulc’h, n’eus netra da welet etre King Arthur ha mojennoù an Daol-Grenn (ale, un daol-grenn a vo gwelet d’ur mare zo ivez, lakaomp). N’on ket evit kompren neuze. Un arguzenn evit gwerzhañ ar film hepken? Rak mod all eo ur film birvilh graet gant Guy Ritchie : fent, emgannoù : efedus. Perak ez eus un neuz kozh c’hoarioù video/klip metal gant lodennoù zo ? N’ouzon ket re kennebeut. Na gollit ken ho amzer gant ar film-se.

Film sevenet gant Guy Ritchie. Stadoù-Unanet Amerika, Aostralia, Rouantelezh-Unanet, 2017, 2e06.

The Favourite

Fellout a rae din gwelet The Favourite abaoe pell, kement a veuleudi am boa klevet diwar-benn ar film.
The Favourite a ziskouez an darempred kevezerezh a vo etre div vaouez evit bezañ hini karetañ ar Rouanez Anne e 1711.
Bamus a-walc’h eo an teir aktourez pennañ ha plijus a-walc’h eo lusk ar film (rannet e chabistroù) ha gwelet troioù kamm pep hini. Plijus eo ar film neuze daoust din bezañ bet jenet un tamm gant dibab an talennoù “fish-eye” ur wech an amzer. N’am eus ket kavet ken kreñv ha The Lobster a alifen aesoc’h, daoust d’an istor hag a zo kalz souezhusoc’h.

Film sevenet gant Yorgos Lanthimos. Rouantelezh-Unanet, Iwerzhon ha Stadoù-Unanet Amerika, 2018, 1e59.

La vampire de Barcelone

Klevet am boa meur a genseurtez o komz diwar-benn al levr bannoù-treset-mañ. An istor a oa dianav din penn-da-benn ha seblantout a rae kaset mat.
La vampire de Barcelone a gont istor ur plac’h a skrape bugale e Barselona e 1912. Iskis-kenañ eo bet an doare da enklask eus perzh ar polis. Ar plac’h a skrape bugale hag a lazhe anezho evit ober koavenoù a werzhe da dud pinvidik ha galloudus, abalamour da se ne vefe ket bet kaset da benn an enklask. Ma. Un istor souezhus ha kevrinus eta!
Un tamm dipitet on bet gant an doare da gontañ an istor, re vuan ez a an traoù  ha ne vez ket komprenet mat red an darvoudoù na netra. An tresadennoù a zo klasel ha plijus a-walc’h memestra ha klokaet eo al levr gant kalzik skeudennoù, pennadoù a bep seurt evit displegañ un tamm petra eo an istor diazez, penaos o deus labouret an arzourien hag all.

Istor gant Miguel Angel Parra hag Ivan Ledesma, tresadennoù gant Jandro Gonzalez. Embannet e galleg gant Les éditions du Long Bec d’an 22 a viz Mae 2019.

The Nutcracker and the Four Realms

Anzav a ran n’anavezan ket istor kontadenn Nußknacker und Mausekönig. Dedennet e oan o welet ur film Disney nevez avat, dreist-holl unan ne oa ket remake ur film bevaat.
D’ar 24 a viz Kerzu e resev bugale ar familh Stalbhaum profoù digant o mamm, marvet nevez zo. Clara a resev un û, posupl eo digeriñ ar prof souezhus-se met n’emañ ket an alc’hwez ganti. E kerzh ar bal lec’h m’eo pedet he familh e vo kaset en ur bed meurdezus e lec’h ma oa rouanez he mamm. Peder rouantelezh a zo er bed-se hag unan a zo a-gostez, ur brezel a zo o tostaat. An diskoulm a zo kavout an alc’hwez…
Brav eo The Nutcracker and the Four Realms, ar skeudenn, an dilhad… Ur film klasel-kenañ eo mod all, hep souezhadenn ebet e gwirionez. Un dudi familh plijus.

Film sevenet gant Lasse Hallström ha Joe Johnston. Stadoù-Unanet Amerika, 2018, 1e39.