Kontañ a ra Nous étions les ennemis istor familh George Takei, an aktour, ha dreist-holl e vugaleaj p’eo bet kaset e familh en ur c’hamp bac’h evit Amerikaned a orin eus Japan goude Pearl Harbor.
Diskouez a ra sell ur bugel na gomprene ket dre ret pegen spontus e oa pezh a c’hoarveze met ivez sell un den bras war e dud, kalz war-lerc’h. Pa oa krennard e oa kounnaret George ha ne gomprene ket penaos o doa gallet kement a dud asantiñ bezañ gwallgaset evel-se. Dedennus eo e darempred gant e dad, ar c’hoant bezañ mouezh ar re all a voe ivez evit tud heñvelreviad da c’houde. Nebeut a draoù a ouien diwar-benn an darvoudoù-se ha displeget int en un doare simpl, efedus ha fromus ivez gant an dibab dezrevell ken personel.
Istor gant George Takei, Steve Scott ha Justin Eisinger, tresadennoù gant Harmony Becker. Embannet e galleg gant Futuropolis, d’ar 27 a viz Mae 2020.
Yu ha Chi a zo div blac’h o klask treuzvevañ en ur bed trist. Roudoù ur brezel a zo e pep lec’h, kavout a reont armoù met nebeut a voued. Treuziñ a reont kalz lec’hioù, savadurioù dilezet, erc’h tro-dro dezho… Kalz goulennoù “prederouriezh” o deus, da betra servij dezho bevañ pa glaskont just warlerc’h boued ha mat pell zo? Plijadurioù bihan a vevont ivez, ur gibelladenn dour-tomm, gallout kannañ dilhad ha laoskel anezho da sec’hañ en heol…
Klasket he deus Thilde Barboni ijinañ roud piv a c’halle bezañ war ur maen e park ar peoc’h e Hiroshima. Re vras eo evit bezañ ur Japanad hag Alamaned a oa o labourat er Genbaku dom d’ar mare-se.
Ne ouien ket zoken e oa tennet Noô diwar oberenn Stefan Wul pa oan kroget da lenn. Souezhus eo an doare da gontañ al levr bannoù-treset, tremen a ra buan an traoù hag an amzer hep kalz displegadennoù. Anzav a ran n’am eus ket heuliet kalz-tra, perak e oa Jouve o stourm, perak e oa Brice o stourm dre guzh ouzh Jouve. N’eo ket gwall sklaer an darempredoù hag an endro politikel/kevredigezhel. Marteze e oa dija evel-se el levr? Met hir ‘m eus kavet padal eo berr tout peogwir ne gomprenen ket pezh a c’hoarveze ha pegen pouezus e oa pe get. N’in ket pelloc’h gant an istor-se ‘m eus aon.
Ne anavezen ket an albom/kontadenn La fameuse invasion des ours en Sicile, setu ne ouien ket petra oa an istor. Ur film kontet e doare commedia dell’arte eo.
E 1864, ur soudard “yankee” gloazet a vez degemeret gant izili ur skol evit ar merc’hed e Virginia (ur stad eus ar Su). Disfiz o deus rakañ met tamm-ha-tamm, abalamour ez eus ur paotr e-touez ar gumuniezh-se e tiwan un aergelc’h nevez.
Da vare aloubadeg Korea gant ar Japaniz e voe kaset kantadoù a dud da labourat e mengleuz glaou Gujanjima (enezenn batimant brezel). Heuliet e vo meur a dudenn met dreist-holl un tad, soner hag e verc’h. E 1945 e krog an disfiz e-touez annezidi an enezenn : moarvat e kollo Alamagn ar brezel hag e vo barnet ar re a-du ganto, an Amerikaned a vefe o prientiñ ur vombezenn ivez…
Soubenn ar geek 