Dielloù evit brezel

Les trois fantômes de Tesla 1

Posted in Levrioù bannoù-treset with tags , , , , on C'hwevrer 28, 2017 by geekezig

trois-fantomes-teslaGolo Les trois fantômes de Tesla en doa plijet din. A-wechoù, n’eus ezhomm mann all ebet evit kaout c’hoant da lenn un oberenn, neketa ?
E fin 1941, e New York, e tremen darvoudoù an istor. Ur paotrig hag e vamm, nevez erruet, a vo heuliet. Ar Stadoù-Unanet ne gemeront ket perzh c’hoazh en eil brezel bed met stignet eo an traoù evel-just. Un doare ukroniezh eo an istor neuze, savet war kevezerezh Tesla hag Edison. N’eo ket klok an istor evel-just met peadra a zo da ijinañ e vo savet armoù, robotoù ha me oar ivez eus tu Japan.
Brav ‘m eus kavet an tresadennoù met un tamm iskis al lusk, ne oan ket tapet kement-se en istor. Un diouer a bersonelezh gant an haroz marteze ? Santet e vez un tamm levezon Alex Alice (a zo trugarekaet gant an oberourien) met hep an nerzh… Da welet penaos e troio an istor!fantomesteslaIstor ha livioù gant Marazano, tresadennoù gant Guilhem. Embannet gant Le Lombard, d’ar 26 a viz Eost 2016.

Advertisements

小さいおうち (Chiisai o-uchi / La maison au toit rouge)

Posted in Filmoù with tags , , , , , , on Here 19, 2016 by geekezig

la_maison_au_toit_rougeMoereb kozh Takeshi a zo o paouez mont d’an anaon. Un darempred tener a oa etrezo ha lenn a rae ingal he eñvorennoù, a oa hi o skrivañ. En ur gempenn he zi e kav ar paotr yaouank an destenn, klokaet ganti. Etre amzer a vremañ hag amzer dremenet e vo gwelet penaos e oa ar vuhez evit Taki, plac’h yaouank eus hanternoz Honshū, aet da vatez ur familh bourc’hiz e Tokyo e deroù an eil brezel bed. Poltred ur mare hag un doare da vevañ.
Dedennus-tre eo La maison au toit rouge peogwir e tiskouez un dro spered (broadelour, a-du gant ar brezel) hep klask kuzhat an traoù. Plijout a rae da Daki bevañ ha labourat gant ar familh Hirai, daoust da bep tra. Takeshi a ro un tamm ar sell a-vremañ, a varn tro spered ar bloavezhioù 30 ha 40. Evel-just ez eus traoù a seblant iskis hirie an deiz, met kavout a ran mat e vefe taolennet ivez tuioù fall ur gevredigezh, na oa ket dre ret spontet gant an traoù a c’hoarveze.
Ar film a ziskouez ivez ha dreist-holl un istor karantez peogwir eo test Taki eus an darempred a ziwan etre he renerez hag ur c’henseurt d’he gwaz.
Ur film hir ha brav eo, daoust din bezañ kavet e oa un tammig “re” ar fin marteze, peadra da lakaat an holl da ouelañ dourek. Ne oa ket soutil-tre. Me gav din eo dedennus dreist-holl evit taolennadur Tokyo da vare an eil brezel bed, en ur metou bourc’hiz.

Film sevenet gant YAMADA Yōji. Japan, 2014, 2e16.

Fight Club 2

Posted in Levrioù bannoù-treset with tags , , , , , , , on Gwengolo 18, 2016 by geekezig

fight-club-2super-8Poent eo din anzav n’am eus ket bet lennet Fight Club, romant Chuck Palahnuik (na romant ebet gantañ evit lârat ar wirionez) met plijout a ra spontus din film David Fincher. Ne oan ket o c’hortoz Fight Club 2 ha souezhet e oan bet o lenn e kendalc’hfe an istor e stumm ul levr bannoù-treset. Perak ket neuze?
Tremen a ra Fight Club 2 goude darvoudoù ar romant (met gant fin ar film). Da gentañ tout, brasañ souezhadenn : un anv a zo gant haroz an istor (ha n’eo ket Jack ouzhpenn. 😥 ). Un tamm dipitet e oan dija gant an digoradur, dimezet gant Marla, ur mab, ur vuhez sioul, ret dezhañ kemer louzoù evit mirout personelezh Tyler kousket… Evel-just e tihuno Tyler en-dro met Tyler troet da sot gant ar galloud, displijus hepken. Ne gontin ket tout an istor (ur pikol levr eo memestra!) met treiñ a ra e gwirionez d’ur farsadenn, “meta” da vat, gant an tudennoù o pellgomz da Chuck Palahnuik zoken ! (Ur boelladenn skrivañ e seblant bezañ kazi pe un doare da glask kaout mestroni en-dro war e oberenn, deuet da vezañ “klasel” evit ur bern tud, hep na vefe bet c’hoant gantañ)
Estreget an tresadennoù o deus seblantet dereat din, al labour tro-dro d’an “traoù” (louzeier, petalennoù bleunioù) o kuzhat ar c’haozeadennoù (etre dedennus-tre ha hegasus), hag ar pajennoù doare reolennoù surentez karr-nij etre pep chabistr a oa fentus-tre, n’am eus ket kavet da betra servije Fight Club 2.
A-wechoù e vez graet heuliadoù da oberennoù n’o deus tamm ezhomm ebet ha gwechoù all e chomomp da c’hortoz heuliadoù na vo james diouto (ya, emaon o c’hortoz C’hwezh ar pebr bepred). Dav eo din kompren ne ra ket ar bed hervez ma c’hoantoù din-me!fight_club_2Istor gant Chuck Palahniuk, tresadennoù gant Cameron Stewart. Embannet e gallet gant Super 8, d’an 28 a viz Ebrel 2016.

N’eus ket a garantez eürus

Posted in Levrioù with tags , , , , , , , on Mae 30, 2016 by geekezig

n-eus-ket-a-garantez-eurusRomant Goulc’han Kervella a zo ur romant a lak ar gaoz war un istor karantez met war an Istor dreist-holl. Tremen a ra un darn eus an darvoudoù dezrevellet kostez enez Molenez, e 1914, ha deskrivet e vez dre ar munud labour ha buhez ar vezhinaerien. Santet e vez en deus ar skrivagner klasket ur bern titouroù ral ha dedennus war an dodenn-se.
An istor karantez, etre daou baotr yaouank, a zo plijus ivez met buan eo falc’het o darempred evit kas ar baotred d’ar brezel. Ur prantad heverk eo a brezel bed kentañ evel-just hag en deus merket ur bern tud e Breizh, ouzhpenn da-se. Dedennus em boa kavet ivez al lodenn-se met kalz re hir keñveriet gant ar peurrest. Goude ur mare e seblante start din
krediñ e chomfe Jaig ken stag ouzh e garantez, gant an amzer o tremen (hag an dud o vervel tro-dro dezhañ). Un diouer a from pe plaset fall ar from a-benn ar fin (Fromet on bet muioc’h gant marv kenderv Jaig, Glaoda, eget gant tonkad ar c’houblad paotred da skouer) ? Un tamm gwan em boa kavet an displegadenn gant mamm Franz er fin ha klozet re vuan ar romant goude-se. Plijet en defe din lenn al lizheroù bet kaset gant Franz pe gouzout un tamm pezh a zo c’hoarvezet gant Jaig goude. Souezhet on da skouer ne vefe ket bet muioc’h a feulster e keñver an daou baotr (estreget feulster psikologel mamm Franz). Fin tout ar romant en doa lakaet ac’hanon da soñjal e Brokeback Mountain en un doare un tamm re splann ivez ^^. Dedennus spontus ‘m eus kavet N’eus ket a garantez eürus, ur gentel war buhez ar vezhinaerien hag hini ar soudarded e-pad ar brezel bed kentañ met blaz ar re nebeut eus tu an istor karantez, da vat! N’on ket bet dipitet neuze met o c’hortoz un dra bennak all e oan, moarvat!
Plijout a ra din golo al levr ivez ha poent e vefe din sellet ouzh Finis terrae un deiz bennak, bet kuzuliet din gant ur c’helenner skol-veur pell ‘zo koulskoude! 😀
Eil priz Dazont ar Brezhoneg (F3 hag Ofis publik ar Brezhoneg) a oa aet gant ar romant-mañ, e rann ar al levrioù faltazi.

Romant bet skrivet gant Goulc’han Kervella. Embannet gant Skol Vreizh, d’ar 16 a viz Du 2015.

Soldats Inconnus : Mémoires de la Grande Guerre

Posted in C'hoarioù video with tags , , on Mae 9, 2016 by geekezig

soldats-inconnus-memoires-de-la-grande-guerrePrenet em boa Soldats Inconnus pell zo met ne oan ket aet gwall bell, n’ouzon ket perak. Goude bezañ bet d’an diskouezadeg “L’art dans le jeu vidéo, l’inspiration française” e mirdi Art Ludique e miz Genver, en deus fellet din adstagañ gant ar c’hoari.
Ur c’hoari gant un neuz levr bannoù-treset eo un tamm, diorroet gant UbiArt Framework memes lusker c’hoari ha Child of Light da skouer (met n’eus doare ebet deoc’h da c’houzout peogwir n’am eus savet pennad ebet diwar-benn ar c’hoari-se ! è_é).
Tremen a ra darvoudoù ar c’hoari e-pad ar brezel bed kentañ. Heuliet e vez a bep eil Emile, Freddie, Karl hag Anna.
Un dibab tudennoù a bep seurt : un Alaman, ur Gall kozh, un Amerikan, ur Velgiadez. Pep hini en deus barregezhioù, met dre vras e vezont c’hoariet holl e memes stumm.
Ur film bihan diverrañ a zo a-raok pep chabistr evit lec’hiañ an darvoudoù (e keñver mare kement ha lec’h resis, keñveriet gant emgannoù bras pe darvoudoù resis ar brezel). Ur wech lañset an traoù ne vo kaozeadenn ebet ken, tresadennoù-trouzioù hepken evel evit diskouez an doare ma c’hall an dud kompren an eil re ar re all hep komz memes yezh.soldats-inconnus-1Pe vefe war an dachenn emgann pe en ul lec’h siouloc’h (ur gêriadenn da skouer) e vo ret dre vras ober un tamm enklask evit kavout hag eskemm traoù betek kaout an dra on eus ezhomm evit mont war-raok (e stumm ur point ‘n’ click neuze). N’eus netra diaes spontus met ken kas e c’haller kaout sikour gant titouroù (a vez dibabet diskoachañ pe get).
Prantadoù QTE (Quick Time Event) a zo gant Anna pa ra war-dro tud klañv ha prantadoù redadeg ivez gant an taksi.soldats_inconnus_annasoldats-inconnus-taxi Daou pe dri vare “enebour meur” a zo ivez. Liesseurt a-walc’h an doareoù da c’hoari neuze met randonus e c’hallont dont da vezañ goude ur mare rak n’eus nemet an endro o cheñch a-benn ar fin.
Un dudenn all a zo ouzhpenn, Walt, ur c’hi, a sikour kalz ac’hanomp (ne vo ket bepred gant memes tudenn).
E pep lec’h ez eus teñzorioù bihan da zastum (evit un trofe) ha testennoù evit displegañ splannoc’h emgannoù pe elfennoù eus ar brezel-se. Traoù kentelius-tre a zo !Soldats-inconnus-archive Fin en deus seblantet din an dibab na vefe ket re vanikean an traoù : Alamaned drouk a zo met reoù jentil a zo ivez ha memestra eus tud ar C’hallaoued. Fromet-tre on bet gant ar fin ha daoust din bezañ chomet sac’het gwechoù zo n’eo ket ur c’hoari start, na hir. Sonerezh brav-tre a zo ouzhpenn (feson Yann Tiersen un tamm) ha kavout a ran dispar an aergelc’h hag an neuz bann-treset bet dibabet. Plijet on bet gant Soldats Inconnus neuze a zo ur c’hoari ral e keñver arz keit hag e keñver prantad Istor dibabet.

Diorroet gant Ubisoft Montpellier, embannet gant Ubisoft. C’hoari evit 1 c’hoarier-ez, da bellgargañ hepken, abaoe ar 25 a viz Even 2014 evit Windows, Ps3, PS4, Xbox 360, Xbox One, iPad, iPhone hag Android. PEGI 12

L’autre – Le rapport de Brodeck 1

Posted in Levrioù bannoù-treset with tags , , , on Meurzh 7, 2016 by geekezig

L_Autre_Le_Rapport_de_Brodeck_tome_1Me oar a-walc’h e plij labour Manu Larcenet d’ur bern tud. N’am eus ali resis ebet, anzav a ran. Lennet ‘m eus bet traoù zo gantañ a gaven kentoc’h plijus met hep mont pelloc’h. Ne oan ket e-touez ar re dedennet spontus gant Le rapport de Brodeck neuze. An tresadennoù koulskoude o deus roet din c’hoant lenn rak seblantout a rae brav-tre memestra.
Setu me o lenn L’autre. Splujet diouzhtu en ur gêriadenn, pouez ar sekredoù spontus, ar strollad a-enep an hinienn. Penndudenn an istor a rank sevel ur rentañ-kont diwar-benn ur darvoud a zo c’hoarvezet er gêriadenn, komprenet e vez buan pegen mantrus eo bet. N’en deus ket kemeret perzh setu perak e raio eñ war-dro. Ouzhpenn eo boaz da skrivañ. E gwirionez e vo lennet ur skrid all, ur skrid e lec’h ma kont ar wirionez, sell ar baotred all warnañ, e vuhez start, penaos e tremene an traoù gant “an estren” a zo e kreiz ar rentañ-kont. Un istor spontus eo. Ne ouien ket e oa ur romant a-raok lenn ar levrenn-mañ. Tapet on bet penn-da-benn e testeni Brodeck, abalamour ivez evel-just d’an tresadennoù teñval, brav eston a ziskouez mat aergelc’h ar gêriadenn, yen ha kalet. Ur stumm ispisial a zo d’al levr (stumm italian evel ma vez lavaret) ha klotañ a ra mat me gav. Dodennoù start-tre a zo el levr, ar c’hampoù bac’h en o-zouez. Kreñv-tre eo an oberenn. Gortoz a ran an eil levrenn bremañ!RapportBrodeck_PL

Istor ha tresadennoù gant Manu Larcenet diwar romant Philippe Claudel. Embannet gant Dargaud d’an 10 a viz Ebrel 2015.

The Hunger Games : Mockingjay – part 2

Posted in Filmoù with tags , , , , , on Genver 8, 2016 by geekezig

Hunger-games-32Trede levr The Hunger Games n’en doa ket plijet din kement-se m’ho peus soñj mat ha ne oan ket gwall laouen gant an diviz ober daou film gant al levr-se. Ar film 3.1 en doa souezhet ac’hanon kentoc’h mat ha daoust din kavout eo an 3.2 an hini gwanañ eus an tri film diwezhañ (ar re nemetañ a gavan dedennus) em eus kavet ne oa ken sot-se an diviz-se. Kenderc’hel a ra gant tuoù mat ar filmoù all sevenet gant Francis Lawrence. Film diwezhañ The Hunger Games a zo ur sapre film birvilh. Soñj mat em boa eus ar pezh a c’hoarveze (souezhet on bet) met sklaeroc’h ha kreñvoc’h n’eus seblantet din war ar skramm. E gwirionez on bet bamet gant al lodennoù birvilh ‘m eus kavet efedus, savet mat ha lusket dispar. An tammoù psikologel n’am eus ket kavet ken dispar. Dipitet on bet gant ar fin a zo chomet rik ar memes hini met en ur gomz gant ar mignon a oa ganin (n’en deus ket lennet al levrioù) em eus merzet e oa kalz skoempoc’h da gompren war ar skramm eget el levr, neuze eo dedennusoc’h kalz (digoroc’h da doareoù all da ijinañ pe da gompren ar c’hlozadur-se, sur). Ur bern istudennoù plijus a zo er film (er strollad a gas an argad), ar pezh n’em boa ket santet kement en ul lenn al levr (pa adlennan ma fennad!) ha klozañ a ra mat an oberenn am eus kavet doujus en ur vezañ disheñvel ha kazi pinvidikoc’h. D’am soñj e oa pouezus gwelet ar film war skramm bras ivez, ken sebezus eo lodennoù zo.

Film sevenet gant Francis Lawrence. Stadoù-Unanet Amerika, (war skrammoù Frañs abaoe an 18 a viz Du) 2015, 2e17.

%d bloggers like this: