Dielloù evit studioù

Polytechnique

Posted in Filmoù with tags , , , , , , , , on Meurzh 21, 2016 by geekezig

polytechniqueE miz Kerzu, nepell goude “deiz-ha-bloaz” an darvoud an hini ‘m eus sellet ouzh Polytechnique a ziskouez ar gwalldaol gourelour bet c’hoarvezet e skol Polytechnique Montreal d’ar 6 a viz Kerzu 1989. Heuliet e vez ur plac’h yaouank (n’eo ket ur plac’h wir), ur mignon dezhi hag un tamm ar sponter. Ur film e gwenn-ha-du eo gant div lodenn splann. Unan e-pad an darvoud, ar beurevezh-se, gant ar studierien er skol-veur, an erc’h, an dud o tec’hout, an harozez oc’h ober van bezañ marv evit chom bev, e mesk korfoù ar merc’hed bet lazhet hag all. Hag ul lodenn kalz diwezhatoc’h gant pouez an darvoud-se evit reoù a zo chomet bev da c’houde.
Efedus-tre ha spontus eo al lodenn gentañ a ziskouez en un doare un tamm yen an darvoudoù. An eil lodenn avat n’am eus ket kavet ken dedennus, pell alese. E gwirionez em befe kavet gwelloc’h ur film berr gant al lodenn gentañ hepken, zoken ma seblantfe un tamm trumm ha start. A bouez eo me gav kaout un testeni er stumm-se eus ar gwalldaol spontus-se (muntret ez eus bet 14 flac’h ha gloazet 14 den, pevar paotr en o-zouez). En eil lodenn e vez ijinet traoù psikologel tro-dro da div dudenn. Me gave gwelloc’h an doare ma tiskouez al lodenn gentañ un den sot ha leun a gasoni ouzh ar merc’hed, ur plac’h gant un dazont brav dirazi hag ur paotr a glask reiñ sikour hag an holl dud tro-dro, falc’het o dazont diganto. Marteze en defe manket a from? Evidon-me en deus an eil lodenn pounneraet ha disteraet nerzh testeni an darvoud.

Film sevenet gant Denis Villeneuve. Kanada, 2009, 1e17.

Boyhood

Posted in Filmoù with tags , , , , , , , on C'hwevrer 3, 2016 by geekezig

boyhoodC’hwitet em boa Boyhood er sinema ha gwall dilaouen e oan d’ar mare-se. Film nevez Richard Linklater a oa ur raktres sot-nay : filmañ bugaleaj ha krennardiezh ur paotr. Gant memes aktourien! Filmet eo bet e pad 12 vloaz neuze!
Etre 6 ha 18 vloaz e vez heuliet Mason Junior hag e familh : prantadoù dister ar vuhez, traoù didalvoud (c’hoari er park gant o zad a-raok ur c’hrogad baseball), prantadoù a-bouez ar vuhez, fentus ha fromus… Moarvat ez eus bet divizet traoù senario abalamour d’ar filmañ (diloj hag all) met un taol dreist e chom rak redek a ra an istor en un doare naturel-kenañ. Dedennus-tre ‘m eus kavet ar bonusoù war eil pladenn an DVD evit kompren gwelloc’h pegen digustum eo seurt raktres, hag an traoù a c’hall cheñch e-kerzh 12 vloaz (merc’h ar sevener a c’hoari c’hoar vihan Mason na felle ket dezhi ken c’hoari ar pezh goude ur mare da skouer)…
Ur film digredus dre an doare m’eo bet filmet, hag ur film brav ha simpl diwar-benn ar vuhez dre vras.

Film sevenet gant Richard Linklater. Stadoù-Unanet Amerika, 2014, 2e05.

Fangirl

Posted in Levrioù with tags , , , , on Kerzu 21, 2015 by geekezig

fangirlUr wech an amzer e c’hoarvez din kavout un oberenn a gavan a glot ganin e pep keñver. Shä & Salomé ‘oa ar wech diwezhañ me gred. Fangirl a zo kazi heñvel. Brouilhed ar pennad am boa savet pell zo met ne teuen ket a-benn da gregiñ ‘barzh. Evel ma echufe un dra bennak etrezomp, ret ‘vo din rentañ al levr goude hag e vo echu, echu da vat…
Fangirl a zo ur romant skrivet gant Rainbow Rowell a felle din groñs lenn abaoe Eleanore & Park. Goude-se e oa treset ar golo gant Noëlle Stevenson he deus savet unan eus ar bannoù-treset n’eus plijet ar muiañ din ar bloaz-mañ. A! Kregiñ ‘rae mat.
Cath a grog gant ar skol-veur. Divizet he deus he c’hoar Wren chom hep lojañ ganti ar bloaz-mañ. Diskaret eo Cath un tammig… Ret ‘vo dezhi dont a-benn da genlojañ gant ur plac’h dianav neuze! Laouen eo o kregiñ gant ar c’hentelioù avat, dreist-holl ar gentel tro-dro d’ar skritur. Skrivañ a ra Cath forzh pegement, peogwir e skriv ur fanfic eus Simon Snow. Brudet eo er bed a-bezh evit he labour.
Ur sapre bloavezh skol-veur a vevo Cath. A bep seurt dodennoù a vez gwelet el levr : ar santadoù chomet goude un disparti (aet eo kuit mamm Cath ha Wren ha klask a ra kaout darempred ganto en-dro), ar skrivañ dre vras (gant lodennoù pozitivel ha reoù all negativel) hag ar selloù a bep seurt diwar-benn ar fanfiction (n’int ket gwir oberennoù), ober war-dro un den digempouez a-spered, kenlojañ, ar baotred hag all hag all.
Pep chabistr a echu gant ur skrid a vefe eus levrioù Simon Snow “orin” pe eus traoù bet skrivet gant Cath (pe zoken gant Cath hag he c’hoar). Kalz a fent a zo el levr, c’hoarzhet ‘m eus ingal. Fromus kenañ eo ivez, alies mat. Ur bern traoù a c’hoarvez e gwirionez met mont a ra an traoù war-raok en un doare gwirheñvel (an darempredoù o cheñch etre Cath hag he c’henlojerez, etre Cath ha Wren, boaziañ d’ar c’hentelioù, da endro ar skol-veur…). Evidon-me ne oa netra a re, met ne oa ket re nebeut kennebeut. Ral eo c’hoazh an oberennoù a zispleg hep barn met a ziskouez ken splann pegen pouezus e c’hall bezañ ur rummad oberennoù pa vezer fan hag ar pouez en deus en ur vuhez. Ne vir ket da vevañ traoù, evel forzh piv, met un dra ouzhpenn a zo, dre ret. Simon Snow a zo ul lodenn eus buhez Cath, eus he fersonelezh. N’eo ket abalamour da se ne skrivo netra all estreget fanfic met n’hallo ket dilezel an tudennoù-se kennebeut…
Me zo ur fan eus Magicath hag eus Cath dre vras. Me zo fan eus Fangirl ha mat pell zo. ❤

(Marteze vefe bet ret din skrivañ ar pennad-mañ abretoc’h : dizoloet ‘m eus e oa deuet er maez levr nevez ar skrivagnerez HAG EZ EO FANFIC CATH E LEVR met ivez ez eus bet embannadurioù cheuc’h eus Fangirl gant fanart e-barzh. *o vervel gant ar c’hoant*)

Romant skrivet gant Rainbow Rowell. Embannet e galleg gant Castelmore, d’an 18 a viz C’hwevrer 2015.

Glee – bloavezh 4

Posted in Stiradoù, webstiradoù ha skinwel with tags , , , , , , , , , on Here 20, 2015 by geekezig

glee4A-greiz-holl ez eus deuet ar c’hoant din gouzout petra ‘oa deuet da vezañ tudennoù Glee. Setu me kroget en-dro gant ar stirad. Rachel ha Kurt a vez heuliet ingal e New York hag ar re all e McKinley High, evel gwechall. Ar bloaz-mañ e vo kaoz eus kudennoù boued/skeudenn, eus disleksiezh pe c’hoazh eus identelezh jener gant Unique.
Evidon-me ne oa ket dav heuliañ Rachel ha Kurt ken (ur seurt santad Ugly Betty c’hwitet a oa un tamm evidon, gant e labour e Vogue.com) estreget evit cameo Kate Hudson ha Sarah Jessica Parker marteze. Tudennoù nevez a zo el lise gant bepred un tamm memes neuz : tud paour o klask bezañ degemeret, un cheerleader drouk, ur plac’h gant a gar daou baotr ha me oar. Tro-dro da rannoù Nedeleg (un tamm a-raok kreiz ar bloavezh) em eus kavet e oa plijus-tre ar rannoù met diskennet eo en-dro ma evezh goude ur mare. Traoù zo a zo deuet brav met dre vras em eus kavet ar prantadoù kan/dañs a live izeloc’h ha n’em boa ket kement a blijadur o sellet eget a-raok. Marteze on erru re gozh?

Stirad bet krouet gant Ryan Murphy, Brad Falchuk hag Ian Brennan. Stadoù-Unanet. Bloavezh gant 22 rann 42 munut. Bet skignet evit ar wech kentañ war ar chadenn Fox etre an 12 a viz Gwengolo 2012 hag an 9 a viz Mae 2013.

La crème de la crème

Posted in Filmoù with tags , , , , on Mae 3, 2015 by geekezig

la-creme-de-la-cremeSoñj ‘m eus c’hoazh em boa kavet droch penn-da-benn bomm brudañ La crème de la crème er sinema warlene, a-raok gwelet anv ar sevener ha soñjal “Hañ?!”. Ma, setu me o sellet ouzh La crème de la crème neuze. Tremen a ra ar film er mare-mañ, e Pariz, en ur skol kenwerzh brudet (met na vez ket anvet). Daou vignon eil bloavezh a vez heuliet er penn-kentañ, pa klaskont merc’heta e-pad ur gouel. Anaoudegezh a reont gant Kelliah hag a zeuio ar mennozh dezhi kinnig arc’hant da verc’hed evit bezañ gwelet er gouelioù gant paotred zo, n’int ket gwelet mat gant merc’hed ar skol. E-pad ur gouel e vo merzet o jeu gant ur c’hamalad a ginnigo dezho kreskiñ an traoù, tamm-ha-tamm e teuio o afer da vezañ ur sapre rouedad gisti o vont en tu-hont d’o skol.
Daoust da bep tra e chom gwall fur an traoù er film ha tremen a ra an darvoudoù kentoc’h tro-dro da istorioù karantez an teir zudenn bennañ. Kalz klichedoù a zo met efedus a-walc’h eo ar film a-drugarez da skouer d’ar prantadoù gouelioù a zo bet awenet gant gwir gouelioù skolioù kenwerzh moarvat. Anzav a ran ouzhpenn ez on kentoc’h plijet gant Alice Isaaz, abaoe Les yeux jaunes des crocodiles hag e kendalc’han da gavout anezhi plijus er film-mañ. Domaj eo e vefe bet dibabet echuiñ ar film evel ma ra, met un dudi mat a-walc’h eo memestra. N’eo ket a live gant Dog Pound, ar film a oa bet graet a-raok gant Kim Chapiron, siwazh.

Film sevenet gant Kim Chapiron. Frañs, 2014, 1e30.

Dear White People

Posted in Filmoù with tags , , , , , on Ebrel 6, 2015 by geekezig

dear-white-peopleUr pennad ‘zo bremañ em boa klevet komz diwar-benn Dear White People. Dedennus ‘gaven an istor, awenet gant gouelioù a bep seurt a zo bet e skolioù-meur amerikan oc’h implijout kumuniezhioù resis evit treuzwiskañ. Heuliet ‘vez pevar studier yaouank du er film, a zo sañset da vezañ heverk eus doareoù da vezañ disheñvel. Tudennoù Lionel ha Sam o deus plijet kalz din hag hini Coco ‘m eus kavet dedennus-tre ivez. Ar film a zo troc’het e chabistroù doare filmoù Wes Anderson un tammig. Diaes ‘m eus kavet al lusk-se, dreist-holl el lodenn gentañ a seblante din bezañ un heuliad sketchoù bet gwelet war YouTube er bommoù-bruderezh. An eil lodenn, tro-dro d’ar gouel resis ‘m eus kavet kalz gwelloc’h. N’am eus ket c’hoarzhet kalz, met fent a zo, anat. Direnket on bet gant an is-titloù galleg a implij ar ger “black” alies (pezh a ya kontrol da vat d’ar pezh a vez lâret er film). E gwirionez e choman etre-daou gant ar film a gavan dedennus met c’hoant am befe da c’houzout ali ar gumuniezh zu rak, evidon-me e seblant c’hwitout un tamm e bal, dreist-holl abalamour d’e stumm.

Film sevenet gant Justin Simien. Stadoù-Unanet Amerika, 2014, 1e48.

Ecole 42, Born to Code

Posted in Stiradoù, webstiradoù ha skinwel with tags , , , , , , , on Ebrel 5, 2015 by geekezig

Marteze e oar reoù zo em eus bet ur prantad goulennoù a bep seurt diwar-benn ma hent micherel n’eus ket keit-se zo. Dre guriusted e oan bet o tremen arnodennoù skol 42 war ar rouedad. Ne oan ket aet pelloc’h avat (met gallet em befe!). Un tamm dedennet on gant ar skol-se, gant an doare da «gelenn», abaoe m’eo digoret. Tro ‘m oa bet da heuliañ blog ur plac’h a oa bet er «piscine». O welet e oa un teulfilm diwar-benn ar skol e soñje din gouzout a-benn ar fin petra ‘oa ar skol ur wech tremenet an taol-arnod ur miz-se. Na pebezh dipit ! Un teulfilm diwar-benn ar «piscine» eo hepken! E-pad 52 munut e vez heuliet ur plac’h ha tri faotr, oadoù ha metouioù disheñvel o deus divizit klask dont d’ar skol-se evit abegoù a bep seurt. Aterset e vezont, filmet e-pad ar prantadoù poelladennoù hag arnodennoù ha goulennet ‘z eus bet digante n’em filmañ e doare ur video blog gant ur pellgomz hezoug. N’am eus ket kavet talvoudus-tre ar mennozh-se (estreget ober «modern»). Ur wech ouzhpenn e seblant start spontus ar mizvezh-se (met ar pevar ‘zo bet betek ar penn, ‘pezh ‘m eus kavet souezhus dija!) met n’am eus desket netra, pezh a zo domaj un tamm evit un teulfilm!

Teulfilm sevenet gant Emmanuel Réau. Frañs, 55 munut, 2014. Bet skignet war France 4.

%d bloggers like this: