pour te voir cinq minutes encore

Aurélie Le Floch he doa kollet he zad e miz Genver 1994. Ur grennardez e oa d’ar mare-se. He zad a oa klañv gant ar sida. Trouver les mots pour te voir cinq minutes encore, pour garder ton image a zo un testeni berr ha fromus eus bugaleaj ur plac’h, he zud dispartiet pa oa bugel, he zad divreviat. A bep seurt eñvorennoù a zo en he zestenn : un darempred start gant he mamm, dilojadegoù, kalz traoù graet en desped dezhi hag ar blijadur bepred da vont da Roazhon e ti he zad pe he mamm-gozh, da vevañ traoù all, ur metou all. Nebeut a blas a gemer ar c’hleñved el levr, ken prim e seblant bezañ bet an traoù. N’eo ket al lodenn-se ar pep pouezusañ met kentoc’h an doare m’he deus ur plac’h da zegemer marv he zad. Ul levr bihan efedus ha kreñv.

Testeni gant Aurélie Le Floch. Embannet e ti Ateliers Henry Dougier, en dastumad Une Vie Une Voix, d’ar 7 a viz C’hwevrer 2019.

Plaire, aimer et courir vite

Daoust hag eñ e felle din sellet ouzh Plaire, aimer et courir vite evit gwelet straedoù Roazhon war ar skramm ? Marteze ‘walc’h.
1993. Ur skrivagner parizian eo Jacques, klañv eo gant ar sida. Arthur a zo ur studier eus kreiz Breizh, studial a ra e Roazhon. E sal sinema an TNB e raio anaoudegezh an daou baotr.
Setu tout ar pezh a blij din hag en deus hegaset ac’hanon e memes frazenn. Romantel kenañ eo ar film ha koulskoude e seblant gwirion ha brav, n’eo ket re, met evit ar re o deus anavezet Roazhon er bloavezhioù 90 e oa poanius gwelet an TNB evel m’emañ hirie an deiz è_é (evit ar straedoù all mont ‘rae c’hoazh).
Farsal a ran evel-just rak n’eo ket grevus-tre. Hegaset on bet muioc’h gant hirder ar film. Brav eo koulskoude ha ral eo un testeni ken “personel” eus tud o vervel gant ar sida er bloavezhioù 90 e Frañs (120 battements par minute na oa ket ken personel lakaomp). Aliañ a ran ar film deoc’h e gwirionez.

Film sevenet gant Christophe Honoré. Frañs, 2018, 2e12.

Paotr Louarn 1 : Nozvezh al Louarn

Setu lennet levr kentañ Paotr Louarn a-benn ar fin! Prenet em boa e saloñs Karaez met n’em boa ket kemeret amzer d’e lenn c’hoazh daoust da dud zo o pouezañ reoliek :p (ha din bezañ bet un dresadenn gant an aozer abaoe!). Koulskoude e vez lennet buan! Ma, graet eo.
Paol a zo ur paotr a 16 vloaz o vevañ e Roazhon. Barnerez eo e vamm ha marvet eo e dad pa oa bihan. Ur c’hrennard eus an displijusañ eo (brabañser, dismegañsus…) met tresañ a ra mat-tre ha plijout a ra kalz dezhañ al levrioù bannoù-treset abaoe e vugaleaj, an haroz Fox Man dreist-holl. Un nozvezh e kej gant un den iskis a lakao da zispakañ galloudoù souezhus dezhañ. Ul levrenn digoradur eo hepken setu e oa blaz ar re nebeut evel-just, peogwir e krog hepken da vezañ dedennus e fin an istor. Plijet on bet o welet lec’hioù Roazhon en tresadennoù. Dre vras e kavan eo deuet brav al labour tresañ gant Laurent Lefeuvre. Un tamm dipitetoc’h on bet gant ar brezhoneg a zo dizampart a-wechoù (“boutoñsoù” evit bosoù, “ibil” (!) evit ufern, “diskouarn” e plas diskoaz er fin…). N’eo nemet un nebeudig traoù met iskis a ra pa vezer tapet el lennadenn. Ma, laouen on memestra e vefe un haroz breizhat hag e brezhoneg daoust din kaout c’hoant lenn muioc’h a-raok lârat e plij din Paotr Louarn e gwirionez rak evit ar mare ne blij ket Paol din, anat ^^

Istor ha tresadennoù gant Laurent Lefeuvre. Embannet gant Keit Vimp Bev e miz Here 2014.