Aurélie Le Floch he doa kollet he zad e miz Genver 1994. Ur grennardez e oa d’ar mare-se. He zad a oa klañv gant ar sida. Trouver les mots pour te voir cinq minutes encore, pour garder ton image a zo un testeni berr ha fromus eus bugaleaj ur plac’h, he zud dispartiet pa oa bugel, he zad divreviat. A bep seurt eñvorennoù a zo en he zestenn : un darempred start gant he mamm, dilojadegoù, kalz traoù graet en desped dezhi hag ar blijadur bepred da vont da Roazhon e ti he zad pe he mamm-gozh, da vevañ traoù all, ur metou all. Nebeut a blas a gemer ar c’hleñved el levr, ken prim e seblant bezañ bet an traoù. N’eo ket al lodenn-se ar pep pouezusañ met kentoc’h an doare m’he deus ur plac’h da zegemer marv he zad. Ul levr bihan efedus ha kreñv.
Testeni gant Aurélie Le Floch. Embannet e ti Ateliers Henry Dougier, en dastumad Une Vie Une Voix, d’ar 7 a viz C’hwevrer 2019.
Daoust hag eñ e felle din sellet ouzh Plaire, aimer et courir vite evit gwelet straedoù Roazhon war ar skramm ? Marteze ‘walc’h.
N’on ket sod a-walc’h gant Queen evit bezañ bet c’hoant groñs gwelet ar film-mañ er sinema. Anavezout a ran sonerezh ar strollad ha marv Freddie Mercury met nebeut a draoù ouzhpenn a-benn ar fin.
Ral eo gwelet filmoù diwar-benn kevredigezhioù ‘benn ar fin. 120 battements par minute a ziskouez ur prantad eus buhez kevredigezhel Act up Pariz. Ur gevredigezh a-enep ar sida, evit difenn ar re glañv gant ar c’hleñved-se ha dilezet gant ar servijoù foran. Ur bern prantadoù emvodoù a zo, pezh a zo dedennus, gwelet e vez mat e ya en dro evel forzh peseurt kevredigezh all ^^ met kazi re e oa evidon me a-benn ar fin. N’ouzon ket ma felle d’ar sevener diskouez an niver a sujedoù pe betra met re a brantadoù heñvel a oa evidon. Eil lodenn ar film a zo kentoc’h diwar-benn marv un dudenn resis a-benn ar fin, ha penaos e c’hall marv un ezel kaout un efed war an holl izili all. Fromus ha gwirheñvel ‘m eus kavet ar prantad en ti da skouer. Ur film pouezus eo neuze, evit istor ar stourm-se e Frañs, evit lakaat da soñj pegen start e oa evit ar re glañv, an doare tabou eo bet d’ur mare zo er gevredigezh (hag a chom c’hoazh?). Mat e oa ivez gwelet prantadoù oberoù (el labourva, el lise met ivez d’ar 1añ a viz Kerzu) ha prantadoù buhez a-stroll, gouelioù, plijadur. Domaj eo e vefe ken hir ar film a-benn ar fin (gant traoù zo adlavaret me gav) rak mod all ez eus mennozhioù brav, prantadoù kreñv ha reoù sioul, prantadoù foran ha reoù brevez, tud klañv hag a glask doareoù da chom bev pe da gaout respontoù hag aesaat buhez ar re all, ar re a gar anezho o sikour anezho.
Soubenn ar geek 