Dielloù evit Stadoù-Unanet

I Don’t Feel at Home in This World Anymore

Posted in Filmoù with tags , , , on Even 13, 2017 by geekezig

Film kentañ Macon Blair eo ha gounezet en deus priz bras ar juri e festival Sundance (er rann “US dramatic”) a zo brudet evit lakaat war-wel filmoù bihan/dizalc’h amerikan.
An titl en doa plijet din hag abalamour e oa Elijah Wood o c’hoari e-barzh e felle din awalc’h e welet.
Ruth a zo ur plac’h erru skuizh gant an dud diseblant ha diseven tro-dro dezhi. Pa ‘vez laeret traoù resis diganti en he zi e tiviz klask war-lerc’h al laeron gant sikour hec’h amezeg iskis, Tony.
Ur film simpl a-walc’h eo I Don’t Feel at Home in This World Anymore met plijet on bet gant an aergelc’h (kêriadennig amerikan, live sokial etre pe izel zoken). Fentus eo me gav (tudenn Tony, an enklask da skouer a zo diskoulmet “aes” hag e doareoù dic’hortoz met gwirheñvel) daoust da eil lodenn ar film bezañ kazi lu peogwir n’eo ket gwirheñvel tamm ebet ken (met feuls ne lavaran ket!). Ur film berr ha simpl a guzulian digudenn neuze.

Film sevenet gant Macon Blair. Stadoù-Unanet Amerika, 2017, 1e36. Skignet gant netflix abaoe ar 24 a viz C’hwevrer e Frañs.

Deepwater Horizon

Posted in Filmoù with tags , , , on Even 5, 2017 by geekezig

Peter Berg a blij din peogwir en deus krouet Friday Night Lights, unan eus ma stiradoù karetañ. Met e filmoù avat a zo un afer all (Hancock am boa kavet spontus da skouer)… Koulskoude en deus fellet din sellet ouzh Deepwater Horizon. Ur film a glask diskouez petra oa c’hoarvezet e miz Ebrel 2010 er mor e Louiziana hag a voe da c’houde gwashañ lanv du Amerika an Norzh eo. Kaset eo mat ar film ha bamus da vat an tarzhadennoù ha darvoudoù pa ya pep tra da get war al leur direoul.
Ur film “gwallreuz” efedus neuze met n’eo ket kalz tra ouzhpenn. Un tu “amerikan” da vat a zo evel-just (un tamm torr-penn) gant harozed hag harozezed ordinal (“everyday hero”). Pal ar film a zo diskouez an darvoudoù ket dre ret bezañ ur film gant tudennoù dedennus, from hag all. Un doare onest ha dedennus da welet an traoù eo me gav met start eo neuze gwelet anezhañ evel ur gwir film klok. E berzhioù mat en deus koulskoude. Ma fell deoc’h tremen ur prantad war ul leur direoul e lec’h ma tro fall an traoù, e kuzulian ar film-se deoc’h. Mod all, pas kement-se! ^^

Film sevenet gant Peter Berg. Stadoù-Unanet Amerika, 2016, 1e47.

Freaks and Geeks

Posted in Stiradoù, webstiradoù ha skinwel with tags , , , , , , on Mae 7, 2017 by geekezig

Brud Freaks and Geeks a anavezen met ne oan ket bet dedennet a-walc’h james evit sellet ouzh ar stirad. Gant ma c’houmanant netflix avat ne oa abeg ebet ken da chom hep sellet ouzh ar stirad-se ha zo ur bloavezh hepken ha 18 rann en holl.
Peadra da ziskouez ur bloavezh skol e McKinley, e kontelezh Chippewa, er Michigan, e deroù ar bloavezhioù 80. Sam, 14 vloaz, a zo o paouez kregiñ gant al lise, gant e vignoned Neal ha Bill emañ e-touez ar geeked. Lindsay, e c’hoar, a zo ur plac’h sirius met a zo o klask bevañ traoù nevez, mont a ra davet strollad ar re a vutun hep labourat kalz, ar “freaks”. Gwelet e vo neuze istorioù an daou strollad mignoned met ivez  reoùar familh Weir. Fentus-tre eo ar stirad ha gwirheñvel ivez, gant prantadoù start, fromus…
Souezhet on bet gant pegen “gwenn” e oa an holl er stirad met goude bezañ bet o klask, n’eo ket ken souezhus-se rak 72% eus an dud a oa gwenn e kontelezh Chippewa e… 2010! Ouzhpenn bezañ marteze ur gudenn skinwel heverk eus ar bloavezhioù 90.
Fentus eo gwelet ur bern aktourien a vo brudet da c’houde (e strollad ar freaks dreist-holl).
Unan eus nerzhioù ar stirad a zo an eiltudennoù : Tad Lindsay ha Sam (fentusañ tudenn ar stirad d’am meno!), Rosso ar c’huzulier-heñchañ, ar c’helenner sport, Harris. An tudennoù “displijus” zoken (evel Vicki e penn an chearleader pe Todd eus ar skipailh basket). Kalz mignoniezh ha prantadoù “familh” a feson a zo ivez. Souezhet on bet ivez e vefe lakaet ar gaoz war an dud etrerevel, en un doare a gave din null er penn-kentañ met hag a zo echuet mat. E gwirionez eo deuet a-benn ar stirad-se da lakaat ar gaoz war ur bern traoù sirius en ur virout un ton skañv.
Ur gwir blijadur eo bet evidon gant c’hoarzhadennoù e-leizh, prantadoù fromus, tudennoù dreist, prantadoù heverk, a chomo em spered e pad pell d’am soñj.

Stirad krouet gant Paul Feig. Bloavezh gant 18 rann 44 munut. Bet skignet evit ar wech kentañ d’ar 25 a viz Gwengolo 1999.

Girls bloavezh 5

Posted in Stiradoù, webstiradoù ha skinwel with tags , , , , , , , , , , on Ebrel 13, 2017 by geekezig

Resevet eo bet pempvet bloavezh Girls el levraoueg ha soñjet ‘m eus “sell ‘ta! Petra ‘zo c’hoarvezet gant an tudennoù-se?!”
Plijadur ‘m eus bet gant lodenn gentañ ar bloavezh, dreist-holl gant ar pezh a c’hoarveze gant Shoshanna, e bro Japan.
Ur rann a-bezh a zo tro-dro da Varnie, a zo un dudenn a zisplij d’ur bern tud ha koulskoude e kavan eo an hini gwirheñvelañ (pe ez eus traoù a gavan ouzhin enni?) : “Panic at Central Park” a zo deuet brav-tre. Goude-se avat n’on ket bet plijet kement gant fin ar bloavezh, abalamour marteze da zarempred Jessa hag Adam pe d’an nebeut a Shoshanna a vez gwelet. Piv ‘oar!
Nebeutoc’h a draoù dedennus a zo dre vras er bloavezh avat (n’eus ket kaoz ken eus politikerezh gant tudenn Ray na kement-se eus krouiñ ha skrivañ, gant Hannah ha Marnie). An holl a zo o labourat pe gant studioù, darempredoù stabil tamm-pe-damm, n’eus ket kalz tra nevez… Estreget Shoshanna hag ar pezh a vev pell vro hag an doare m’eo rannet etre ar c’hoant da zistreiñ hag an ezhomm da dec’hout ‘m eus kavet kreñv-tre. Ar peurrest ne oa ken met adlavarout traoù a oa bet lavaret dija, siwazh. Ma, ne chom ket kalz a rannoù ken, tost echu ar stirad a-bezh neuze e klaskin mont betek ar penn memestra. Diwezhatoc’h!
Ur wech ouzhpenn e oa plijus sellet ouzh ar “featurette” evit pep rann a zo war an DVD hag un toullad tammoù bet tennet.

Stirad bet krouet gant Lena Dunham. Bloavezh gant 10 rann tro 26 munut, bet skignet evit ar wech kentañ war HBO etre an 21 a viz C’hwevrer hag ar 17 a viz Ebrel 2016.

Anomalisa

Posted in Filmoù with tags , , , , on C'hwevrer 5, 2017 by geekezig

anomalisaUr film bevaat eo Anomalisa. Ur film bevaat evit ar re vras. Bamus eo an teknik, ur film e “stop motion” eo ha talennoù brav-kenañ a zo er film. Plijus eo ivez an advouezhiañ gant taol-mouezh saoz David Thewlis (Lupin forever <3) ha ton dous Jennifer Jason Leigh.
Heuliet e vo Michael Stone, un den en deus skrivet levrioù o deus graet berzh evit sikour embregerezhioù gant o darempredoù gant o arvalien. Tremen a raio un nozvezh en un ostaleri a-raok kemer ar gaoz dirak ur saliad tud. Ne oa ket deuet e Cincinnati en-dro abaoe pell ha klask a raio adkavout roud ur c’haredig a-gozh. A bep seurt traoù a c’hoarvezo gantañ e kerzh an noz, betek e gejadenn gant Lisa.
Ur film iskis eo Anomalisa, en deus lakaet ac’hanon diaes. An holl tudennoù estreget Michael ha Lisa o deus memes penn ha memes mouezh. Ur bed nec’hus kenañ a zo diskouezet er film. Splann eo eo evit taolenniñ kudennoù bred an dudenn (a vefe klañv gant kleñved Fregoli hervez ar pezh am eus lennet) met n’on ket deuet a-benn da gavout dedennus ken diaesaet e oan. Domaj eo rak ral eo filmoù bevaat ken mat e-keñver teknik ha gant temoù evit an dud deuet…

Film sevenet gant Duke Johnson ha Charlie Kaufman. Stadoù-Unanet Amerika, 2015, 1e30.

Brooklyn

Posted in Filmoù with tags , , , , , , , , , on Genver 15, 2017 by geekezig

brooklynFromus-tre ‘m eus kavet Brooklyn. Marteze peogwir e lakae an istor-se ac’hanon da soñjal ennon, en un doare bennak. Eilis a guita Iwerzhon evit mont da glask labour e New York, e deroù ar bloavezhioù 50. Ur gumuniezh iwerzhonat a zo tro-dro dezhi met poan he deus o vevañ pell eus he bro hag he familh. Un deiz bennak avat e raio anaoudegezh gant un italian yaouank hag e krogo da gavout plijadur o vevañ e New York, studial a raio ouzhpenn evit dont da vezañ kontourez a-vicher. Rankout a raio distreiñ da Iwerzhon avat ha digempouezet e vo he buhez, adarre.
Klasel-kenañ eo stumm ar film e gwirionez. N’eus netra bamus. Nerzh an istor eo neuze en deus plijet din forzh pegement (daoust ma chom klasel-tre ivez ^^) hag ar bagad aktourien hag aktourezed. Ar prantadoù (rouez koulskoude!) gant Jim Broadbent da skouer, am eus kavet dibar. Setu ur film dramatek diwar-benn istor ur plac’h yaouank, ur skouer eus ur plac’h yaouank he deus rankout tec’hout he bro dre heg, dre ziouer a labour. Un istor etrevroadel hag a zo gwir c’hoazh hirie an deiz… Kompren a rin digudenn e kavfe tud zo ar film divlaz un tamm, me zo bet tapet da vat, evit abegoù personel. C’hoarvezout a ra! 🙂

Film sevenet gant John Crowley, diazezet war romant Colm Tóibín. Rouantelezh-Unanet, Kanada hag Iwerzhon, 2015, 1e52.

Arrival

Posted in Filmoù with tags , , , , , , on Kerzu 6, 2016 by geekezig

arrivalE festival an Utopiales am eus bet tro da welet Arrival, d’al Lun 31 a viz Here, pezh a oa a-raok ar gelaouennerien zoken war a seblant! Poent din skrivañ diwar-benn ar film-se neuze peogwir e vo war ar skrammoù bras a-benn warc’hoazh… 😀
Ur film diwar-benn an darempred kentañ gant boudoù tre-oabl eo Arrival. Daouzek lestr estren a zo erru d’un deiz d’egile e meur a lec’h er bed. Louise Banks a zo yezhoniourez ha brudet evit he zroidigezhioù, goulennet e vez diganti gant an arme amerikan klask jubenniñ ar pezh a lâr ar boudoù ha kavout perak int deuet.
Dedennus ‘m eus kavet gwelet an darvoudoù dre tu ar yezhoù, an eskemm, an deskiñ. Dizoloiñ ha studial un doare da eskemm (ha da soñjal) nevez, pe c’hoazh eskemm gant ar broioù all diwar-benn kement-mañ. N’eo ket dre ret ar pezh vez lakaet en a-raok da gustum e seurt filmoù. Gwirheñvel a-walc’h en deus seblantet din penaos e tro an traoù. Un twist a zo d’ur mare bennak met n’ouzon ket perak resis n’on ket bet souezhet tamm-ebet, ar fin n’en deus ket displijet din daoust da se. Daoust ha levezonet on bet gant an doare da sellout ouzh ar film (leun-chouk ar sal ha tost-tre eus ar skramm, war ar c’hostez da vat)? Marteze ‘walc’h rak da gustum e vefen bet fromet gant ar c’hlozadur d’am soñj…
Ur film savet mat, brav e skeudennoù ha plijus e aktourien eo Arrival met siwazh evitañ e lak da soñjal kement e Interstellar e pep keñver ken n’on ket bet gouest d’e gavout mat penn-da-benn. Marteze e vefe dav din e welet en-dro pe paouez da vont da welet filmoù skiant-faltazi, piv ‘oar… ? 😀
(Soñj ‘m eus e oan bet displijet a-walc’h gant Prisoners ivez neuze marteze eo liammet gant doare da seveniñ Denis Villeneuve… Nag a deoriennoù!)

Film sevenet gant Denis Villeneuve, diwar un danevell gant Ted Chiang. Stadoù-Unanet Amerika, (war skrammoù bras Frañs gant an titl Premier Contact adalek ar 7 a viz Kerzu) 2016, 2e07.

%d bloggers like this: