Dielloù evit tresañ

Relation cheap

Posted in Levrioù bannoù-treset with tags , , on Ebrel 26, 2016 by geekezig

relationcheapPeseurt darempredoù a vez skoulmet dre ar genrouedad etre daou zen? Setu skouer daou arzour oc’h ober anaoudegezh dre ar pezh a ijiner bezañ ul lec’hienn merc’heta ha paotreta. Ur paotr hag ur plac’h gant memes fent (groz) hag a gomz eus temoù heñvel en o labourioù (marv, rev…). Fentus ‘m oa kavet al lodennoù peder c’hazenn eskemm etrezo (pep hini dirak (h)e urzhiataer) a ijinan gwirheñvel penn-da-benn. Un tamm dipitetoc’h on bet gant al lodennoù a ginnig labourioù kozh an daou arzour. Un doare da zizoloiñ Elosterv eo (ar pezh n’eo ket fall) met torr-pennoc’h eo bet evidon evit labourioù Davy Mourier peogwir em boa lennet anezho dija war e vlog. Daoust din bezañ sur e ro un neuz gwiroc’h ha heñveloc’h eus ar pezh eo bet an eskemm etrezo e gwirionez n’em boa ket kavet-se plijus-tre da lenn. Troc’hañ a ra an istor ha ne zegas ket kement-se a draoù, d’am meno. Plijus-tre ‘m oa kavet ar fin avat pa n’em welont «evit gwir» e Breizh. Me gav eo deuet brav ganto ar blijadur a c’haller kaout oc’h eskemm gant unan bennak a-bell hag an diforc’h a c’hall bezañ pa vez kejet ez-vev. Ul levr gwirheñvel eo neuze, un tamm re verr evidon-me (al lodenn traoù nevez d’an nebeutañ) a ro un tañva eus petra c’hall bezañ an darempredoù hirie an deiz (hag eus labourioù kozh an daou arzour), evit daou zen d’an nebeutañ 😉RelationCheapdIstor ha tresadennoù gant Davy Mourier hag Elosterv. Embannet gant Delcourt, d’an 13 a viz Genver 2016.

リアル〜完全なる首長竜の日〜 (Riaru: Kanzennaru Shuchō Ryū no Hi) / Real

Posted in Filmoù with tags , , , , , on Gouere 26, 2015 by geekezig

realKuzuliet e oa bet din Real gant Tornoz, en doa gwelet ar film en Utopiales. Gwerzhet e vez evel ur film heñvel eus Inception… Ma, n’eo ket kement-se. Mignonez Koichi, Atsumi, a zo en ur stad gourhun abaoe 1 bloaz. Evit sikour anezhi e vez kinniget dezhañ splujañ en hec’h emskiant da glask lârat dezhi dihuniñ. Koichi a zizolo e vignonez spontet gant he labour mangaka ha sorc’hennet gant un dresadenn pleziosaor he doa graet pa oant bihan. Koichi a grog da welet traoù iskis ivez en e vuhez pemdez.
Gorrek a-walc’h e tremen an traoù er film. Ur bern temoù a zo meneget, diwar c’horre un tamm met n’eo ket grevus dre ret : an emlazh (soñjal a ra d’an holl he deus klasket Atsumi n’em zistruj), bec’h al labour mangaka hag an darempredoù gant an embanner, ul lodenn eus Japan (aze, un enezenn, Hikone) dilezet goude c’hwitadenn un doare kreizenn-douristel ha darempredoù fall etre bugale er skol. Traoù a gav din a zo boutin a-walc’h en oberennoù japanat ar pezh a ziskouez pegen pouezus int er gevredigezh.
Traoù ‘zo ‘m eus kavet un tamm droch, gant ar vezeien da skouer, met n’en deus ket miret ouzhin da gavout plijus ar film hag an istor. N’eo ket ispisial met plijus ha mat pell zo.

Film sevenet gant KUROSAWA Kiyoshi, savet diwar A Perfect Day for Plesiosaur gant INUI Rokuro. Japan, 2013, 2e07.

Petite épopée nippone

Posted in Levrioù bannoù-treset with tags , , on Gouere 21, 2015 by geekezig

EPOPEENIPPONEUl levr bannoù-treset? N’on ket ken sur-se. Un toullad bannoù a zo war pajennoù zo gant istorioù bihan (gwirheñvel-tre!!) Diwar-benn “ar re a gred dezho lenn ar c’hanji evit kavout ho hent” (me n’eus se savetaet ac’hanon met ijinañ ran e c’hallfe bezañ ar c’hontrol ^^) pe tud o sikour da gavout ul lec’h, o kas an estrenien betek ar polis hag all e-pad 1eur.
Mod all, darn vrasañ al levr a zo tresadennoù brav eston eus tud, lec’hioù, mirdioù en deus Philippe Buchet gwelet. Ul lodenn vras eus al lec’hioù a anavezen dija (bet gwelet zoken) neuze e oa plijus gwelet anezho en-dro. Un darn all a oa dianav din neuze ‘m eus notennet anezho 😀 (evit ur veaj da zont?) Ul levr brav ha simpl evit beajiñ gant tresadennoù a-feson. Ha mat pell zo….petite-epopee-nippone

“Istor” ha tresadennoù gant Philippe Buchet. Embannet gant Kana d’an 3 a viz Du 2011.

Une métamorphose iranienne

Posted in Levrioù bannoù-treset with tags , , , , , on Ebrel 28, 2015 by geekezig

metamorphose-iranienneMoarvat e vo degemeret Mana Neyestani el levraoueg e fin ar bloaz neuze e oa un dra vat din lenn e levr! Un treser iranian eo hag abaoe 2007 en deus ranket tec’hout e vro. Une métamorphose iranienne a ginnig kontañ penaos eo c’hoarvezet e harlu politikel. Abalamour en deus implijet ur ger resis en un dresadenn evit ar vugale eo bet tamallet ober goap eus yezh Azeri (kumuniezh a gaoze ur yezh eus familh an Turkeg). Adalek ar mare-se e trenk penn-da-benn an traoù : manifestadegoù, manifesterien azeri lazhet gant ar polis hag un den da damall evit ar reuz-se : Mana Neyestani. Heuliet e vo e emgavioù gant un alvokad, an atersadennoù, ar vuhez en toull-bac’h ha goude-se pa tec’ho kuit gant e wreg, da Valezia. Ankenius-tre eo ar pezh a c’hoarvez gant an treser ha digredus, koulskoude eo gwir pep tra… Un tamm fent a zo el levr ha lusket ha treset mat eo. Ur sapre dizoloadenn, hast ‘m eus labourat tro-dro d’e oberenn e fin ar bloaz!Metamorphose-

Istor ha tresadennoù gant Mana Neyestani. Bet embannet e galleg gant ça et là hag embannadurioù Arte, d’ar 15 a viz C’hwevrer 2012.

Des pas dans la neige : Aventures au Pakistan

Posted in Levrioù with tags , , , , , on Meurzh 24, 2015 by geekezig

erik-l-homme-des-pas-dans-la-neigePa oan krennardez en doa plijet din kalz Le livre des étoiles. N’am eus ket lennet levrioù all skrivet gant Erik L’Homme abaoe met an den a blij din, diabeg resis, ha fellout a ra din lenn e romantoù all un deiz bennak. Profet eo bet din Des pas dans la neige da vare an Utopiales, p’eo deuet da sinañ levrioù :3
N’eo ket kement-se ur romant ar wech-mañ met kentoc’h un dezrevell beaj. Ar veaj en deus graet Erik gant e vreur Yannik hag o mignon Jordi betek an Hindou Kouch, ul lodenn meneziek eus Pakistan (tost eus Afghanistan). Tud yaouank e oant, aet da glask war-lerc’h ar barmanou, un den gwez a vez gwelet el lec’hioù-se. Ur bern mojennoù a zo c’hoazh er c’horn-bro (boudiged, euzhviled) met sur e oant e oa ar barmanou d’ul live all. Gant chabistroù lodennet e pennadoù berr-berr e kont deomp Erik an dud o deus graet anaoudegezh gante, doareoù ar vro (ar re blijus hag ar re zisplijus), degemer an dud, ar prantadoù aon, ar c’hudennoù melestradurel, an amzer o tremen, ar baotred o skuizhañ abalamour d’an diouer a voued, a gousk…
Prantadoù start-tre o deus bevet met ur sapre avantur ivez hag anat eo eo bet dibar ar veaj-se evit stummañ anezho. Paotred yaouank ne ouient ket re da belec’h mont na petra ober.
Un tamm poan ‘m eus bet gant al lusk er penn-kentañ, un tamm buan e kaven e oa kontet an traoù, met embannet eo bet evit ar vugale memestra! Ur wech boaziet on bet tapet penn-da-benn. Reiñ a ra c’hoant da veajiñ. Un tamm domaj e kavan e vefe bet moullet gant skeudennoù gwenn-ha-du rak meur a wech e vez deskrivet al livioù er skrid ha ne vezont ket gwelet er skeudennoù.
Un embannadur un tamm cheuc’hoc’h a vefe bet mat evit seurt dezrevell beaj d’am soñj.

Dezrevell-beaj bet skrivet gant Erik L’Homme. Embannet gant Gallimard Jeunesse en dastumad Scripto d’an 11 a viz C’hwevrer 2010.

Muze n° 67

Posted in Kelaouennoù with tags , , , , , , , , , on Eost 18, 2014 by geekezig

Muze-67Plijus ‘m eus kavet niverenn-mañ ar gelaouenn Muze. Kregiñ a rae gant un tamm pourmenadenn (distro, evidon) e diskouezadeg Tim Burton a oa bet e filmaoueg Frañs gant ivez danevell “Le Corbeau” Edgar Allan Poe (n’ouzon ket m’am boa bet lennet dija). Ur poltredig eus Artemisia a oa da c’houde, n’anavezen ket tamm ebet ha spontus ‘m eus kavet hec’h istor! Ur pennad-kaoz gant Raphaël Enthoven a ginnig an abadenn philosophie war Arte a oa da heul, dedennus seblant bezañ. Un deiziataer sevenadurel a oa ivez met un tamm diwezhat e oa evel-just ^^
Un teuliad bras diwar-benn Portugal a oa kinniget en niverenn-mañ : an arz ha penaos eo bremañ, degemeret pe get, o tiskouez trubuilhoù an dud (dilabour da skouer), tresadennoù Paula Rego, ur pennad diwar-benn ar merc’hed en arzoù hag an arzourezed (en o-zouez Agustina Bessa-Luís), pouez ar varzhoniezh gant Camões, Pessoa hag all. Ur pennad-kaoz a oa ivez gant Maria de Medeiros aktourez ha sevenourez, eviti eo ar portugaleg he bro ha n’eo ket kement-se al lec’h, ur soñj en deus plijet kalz din :), labouret he deus bet ivez tro-dro d’an dañs ha d’ar c’hezeg, e gwirionez em eus kavet e seblante bezañ ur vaouez dedennus-tre! Oberennoù Carla Cabanas a oa diskouezet goude, etre skeudenn hag engraverezh, kavet ‘m eus e oa kreñv santad ar memor o tispenn… Un dastumad skeudennoù evit taolenniñ Portugal (lec’hioù, tud) a oa da c’houde a-raok treiñ war-zu ar fado gant Amália Rodrigues, ar plac’h nemeti e panteon Portugal (!) ha Cristina Branco a gan fado hirie an deiz. Ur pennad-kaoz a oa ivez gant Joana Vasconcelos, arzourez bet pedet e Versailhez, a labour arouezioù Portugal ha plas ar merc’hed er gevredigezh. Evit echuiñ an teuliad e oa ur poltredig eus ar varzhez Sophia de Mello Breyner ha danevell “Le mari” skrivet gant Lídia Jorge, un istor spontus a-walc’h diwar-benn ur plac’h gwallgaset gant he gwaz ha poltred ar skrivagnerez.
An eil teuliad a oa diwar-benn ar bannlevioù : ur sell e-keñver prederouriezh, petra dalvez bezañ “o chom” en un tu-bennak, ur pennad-kaoz gant ur sokiologour : an arz krouet er bannlevioù (rap, tag hag all) n’eo ket savet evit padout, an dramm e diavaez ar rouedadoù kenwerzhel, un toullad skeudennoù a oa e-kichen da ziskouez krouidigezhioù tisavouriezh an XXvet kantved. Da c’houde e oa neuze ur sell kentoc’h war ar sevenadur hag an arz : gant merc’hed ar Bondy Blog hag o sell war ar sevenadur, an doare ma vez lakaet an dud da soñjal emañ ar “gwir” sevenadur e Pariz hag an dud o vevañ er bannlevioù n’int ket graet evit mont d’ar c’hoariva ha d’ar mirdioù, seurt rakvarnioù start hag a vez intret en dud. An doare a zo ivez gant tiez ar sevenadur er bannlevioù a lak a-benn ar fin ar “boboed” parizian da brofitañ “eus an daou du” ha n’eo ket kement-se tud ar gumun. Hanane, a blij ar c’hoariva dezhi hag a vez graet goap outi en he metou, ha pa ya da welet pezhioù c’hoari e Pariz e vez selloù du warni digant tud wenn cheuc’h… Pe c’hoazh skouer Genevilliers a ginnig kentelioù dizoloiñ an arzoù hag ar sonerezh. Skouerioù filmoù a daolenn bannlevioù a zo goude ha neuze o emdroadur ivez (1936 : maezioù, pourmen goude kreisteiz e-barzh filmoù Rohmer betek La Haine pe L’esquive a ginnig selloù all penn-da-benn). Skeudennoù a oa goude-se eus oberennoù lightgraff Guillaume Plisson : brav-eston! JR a zo un arzour a dap skeudennoù “korn-ledan” eus yaouankizoù bannlev a voe peget war mogerioù Pariz. Ur pennad-kaoz a zo da c’houde diwar-benn an tag hag ar graff a oa dedennus-tre : istor, metouioù sokial a bep seurt ha dreist-holl disheñvel eus ar street art a zo degemeret gwelloc’h gant reolennoù digoroc’h (moulloù-livañ da skouer). Ur pennad-kaoz a zo da c’houde gant Malika Bellaribi-Le Moal, kannerez opera a labour gant bugale. Daou bennad a zo goude diwar-benn “Théâtre Des Quartiers” (TDQ) en Ivry ha levrdi La Courneuve, ar pezh a zo fromus un tamm da lenn en ur c’houzout eo bet serret al levrdi e deroù 2014… a-raok un tamm dibab levrioù ha filmoù evel-just.
Un teuliad all a oa diwar-benn ar boued : ur pennad-kaoz gant Anne-Sophie Pic, gwellañ chef ar bed e 2011 met ivez gant ur bredelfennerez ha poltredoù levrioù gant boued (Bridget Jones da skouer) dielfennet. Un dastumad skeudennoù gwastilli Amy Stevens ha boued-danvez Ed Bing Lee (fentus-tre!) pe c’hoazh skeudennoù Laura Letinsky. Da c’houde e tisto an traoù d’ar prederouriezh gant levr Michel Onfray diwar-benn prederourien ha boued pe c’hoazh skol-veur-pobl Argentan (anavezet ivez evel skol-veur-pobl ar blaz). Ur pennad a zo ivez diwar-benn an nann-kigdebrerien hag ar prederouriezh pe ar reolioù-voued. Ur pennad-kaoz a zo gant Caroline Mignot he deus ur blog kelaouenniñ boued ha poltredoù merc’hed a ra “stilouriezh” voued evit al levrioù kegin hag all. Un danevell a zo evit klozañ “Oeuf” gant Claude Pujade-Renaud he deus bet skrivet kalz diwar-benn ar boued hag an dibab levrioù ha DVD.
Al lodenn fin a tro-dro d’ar barzhoniezh ha da nevez-amzer ar barzhed, gant ur pennad-kaoz gant André Velter barzh hag embanner barzhoniezh, barzhonegoù lennerien ha lennerezed. Hag evit echuiñ e oa un danevell, ‘m eus kavet un tamm cliché chick lit tro-dro d’an eured bet skrivet gant Cali Keys hag ur pennadig-kaoz ganti.
Un niverenn leun a voued (aha) e oa neuze, gant a bep seurt temoù ha dizoloadennoù pinvidik bepred. Ur gwir blijadur e oa da lenn hag ur bern traoù ‘m eus ouzhpennet da ma listennoù levrioù da lenn ha filmoù da sellet! ^^

Le Hérisson

Posted in Filmoù with tags , , , , , , on Genver 18, 2014 by geekezig

le-herissonKalz kaoz ‘oa bet eus levr L’élégance du hérisson pa oa deuet er-maez met n’am boa ket lennet anezhañ. Kaoz oa bet ivez eus ar film (hag eus penn Josiane Balasko) met ket kement.
Tremen a ra ar film en un ti cheuc’h e Pariz. Kontet eo an traoù gant Paloma, ur plac’h 11 vloaz a ziviz n’em zistruj deiz he daouzek vloaz. Filmañ a ra he familh, tresañ ha deskiñ Japaneg. Ne seblant ket kaout mignoned. Izili he familh a zo displijus. Heuliet e vez ivez ar borzhierez a guzh ur sekred a vez dizoloet gant ur perc’henn nevez, ur Japanad war e leve. Un doare mignoniezh a vo etre an tri anezho ha karantez zoken evit an daou “vras”. Sioul e ya an traoù war-raok…
Ur prantad plijus ‘m eus tremenet o sellout ouzh ar film, daoust din kaout un tamm poan o krediñ e tudenn Paloma, dreist-holl pa gaozee. Laouen e vefen o lenn al levr bremañ!

Film sevenet gant Mona Achache. Frañs, 2009, 1e40.

%d bloggers like this: