Dielloù evit karantez

Trainwreck

Posted in Filmoù with tags , , , , on Gwengolo 9, 2018 by geekezig

Daoust din kavout darn vrasañ filmoù Judd Apatow a live etre a-benn ar fin e fell din bepred gwelet anezho. Trainwreck a ziskouez Amy, ur plac’h sur outi, prest bepred da gaout darempredoù revel, ul labour a-feson ganti hag all. Ober a ra goap ouzh he c’hoar vihan he deus dibabet ur vuhez “ordinal”. Ober a raio anaoudegezh gant ur mezeg evit ur pennad he deus da sevel ha kregiñ a raio etrezo un darempred kalz siriusoc’h eget boaz eviti.
Prantadoù fentus a zo e Trainwreck ha dreist-holl istudennoù dispar (c’hoariet gant Tilda Swinton, John Cena, Ezra Miller, LeBron James). Prantadoù fromus a zo evel-just ha prantadoù chikan gwirheñvel a-walc’h. Hir-tre eo ar film avat ha dipitus a-walc’h ar c’hemenn a-benn ar fin peogwir n’hall ket Amy bezañ eürus gant he zechoù fall hag hec’h unan. Klasel-kenañ a-benn ar fin neuze. Dudi ‘m eus bet memestra met dipitet on bet e gwirionez.

Film sevenet gant Judd Apatow. Stadoù-Unanet Amerika, 2015, 2e05.

Advertisements

Le mari de mon frère 1

Posted in Levrioù bannoù-treset with tags , , , , , , , on Eost 15, 2018 by geekezig

Ur manga simpl ha koant eo Le mari de mon frère. Yaichi a vev gant e verc’h Kana. Un deiz e son Mike ouzh dor o zi. Mike a zo intañv breur gevell Yaichi, marvet miz zo. Kana a ginnig da v/Mike chom ganto. Evel-se e tizoloio ar C’hanadian bro Japan ha eus o zu, Yaichi ha Kana a glasko degemer an titouroù nevez-se diwar-benn paotred a c’hall dimeziñ asambles…
Savet eo mat ar manga peogwir ez eus kalz fent e darempredoù an tudennoù, Kana a zo leun a startijenn ha kurius. Yaichi, evel forzh peseurt den deuet a gred dezhañ gouzout eo “reizh” an doare ma vev eñ. N’en doa ket klasket kompren kement-se penaos e veve e vreur. An holl anezho a ranko ivez degemer marv Ryôji, pep hini en (h)e stumm.
Prantadoù “kentelioù” diwar-benn ar sevenadur LGBT hag istor ar stourmoù a zo ivez evit sikour an dud na ouifent netra. Un doare simpl ha koant da gregiñ gant an dodenn neuze. Ur manga kentelius en un doare fin, dudius, fromus ha pouezus.

Istor ha tresadennoù gant Gengoroh Tagame. Embannet e galleg gant Akata, d’an 8 a viz Gwengolo 2016.

The Sense of an Ending

Posted in Levrioù with tags , , , , , , on Gouere 12, 2018 by geekezig

Un den a heulian war twitter hag a gomz ingal diwar-benn levrioù en doa kuzuliet ar romant-mañ. Ur romant e div lodenn eo. Al lodenn gentañ a ziskriv ur strollad krennarded saoz er bloavezhioù 60. O klask ober daveoù speredek, leun a sevenadur hag all. Adrian, unan anezho, a n’em zistruj.
An eil lodenn a dremen ur wech erru Tony, dezreveller al lodenn gentañ, kozh. Sarah, mamm Veronica (bet karedig Tony ha goude-se Adrian en ho yaouankiz), a varv hag a leg dezhañ deizlevr Adrian. Pezh a zo, ne vo ket ken anat kaout an deizlevr-se.
Tony a ranko prederiañ kalz diwar-benn gerioù bet lâret/skrivet gantañ hag o efedoù war buhez tud all. Gorrek a-walc’h eo an traoù met ur blijadur eo bet lenn ar romant-mañ. Ar santimant ‘m eus bet gwelet haroz The Catcher in the Rye a vefe kozh, un tamm.
Frazennoù brav-ker a zo e barzh ouzhpenn ha tapet on bet betek ar penn, souezhet gant ar fin. Ur romant en deus lakaet ac’hanon da brederiañ ivez diwar-benn an drouk a lârer en un doare “skañv” hag ar santimant ne dizho ket ar re all, dreist-holl pa vezer krennard. Klask a rin lenn traoù all gant Julian Barnes marteze rak e stil en deus plijet din.

Romant skrivet gant Julian Barnes. Embannet gant Random House d’ar 4 a viz Eost 2011. Un droidigezh e galleg a zo anvet : Une fille, qui danse.

Paterson

Posted in Filmoù with tags , , , , on Gouere 10, 2018 by geekezig

Paterson a zo blenier karr-boutin e kêr Paterson, New Jersey. Emañ o vevañ gant Laura, e vignonez ha Marvin, ur c’hi bihan. Ar film a ziskouez ur sizhun a-bezh gant boazioù ar c’houblad, an dud a wel Paterson bemdez hag all. Plijet on bet gant ar c’haozeadennoù klevet gantañ er c’harr-boutin, an eil-tudennoù en davarn, evel ur stirad heuliet e gwir. Ar pep gwellañ evidon a oa div lodenn resis : pa gomz Paterson gant ur plac’hig a skriv barzhonegoù ha pa teu ur japanat da gomz gantañ er fin. Ur film diwar-benn barzhoniezh eo Paterson, Paterson a skriv barzhonegoù a-raok e labour, e-pad e ehan hag all. E gwirionez ez eus kalz traoù o deus plijet din er film-se met hegaset on bet spontus gant tudenn Laura hag an darempred a zo etre hi ha Paterson. Lakaet e oan diaes gant kinkladur an ti (aozet gant Laura). Kompren a ran neuze e c’hallfe plijout ha displijout da dud all, me zo bet re jenet gant traoù zo evit profitañ e gwirionez eus al lodennoù o deus plijet din spontus. Marteze ur film berroc’h a vefe bet gwelloc’h? Pe ur film berr zoken gant ar gaozeadenn etre Paterson hag ar japanat hepken? Piv ‘oar!

Film sevenet gant Jim Jarmusch. Stadoù-Unanet Amerika, Alamagn ha Frañs, 2016, 1e58.

Les tribulations d’une caissière

Posted in Filmoù with tags , , , , , , , , on Meurzh 6, 2018 by geekezig

Perak ‘ta en deus fellet din sellet ouzh film Les tribulations d’une caissière padal e oan bet dipitet gant al levr dija (dedennus e oa an dodenn, ral klevout komz eus labour an dud a vez e kef ar stalioù bras met moarvat e klote gwelloc’h gant stumm ur blog eget gant ul levr) ? Peogwir on droch.
Evit gallout kaout ur film e oa ret kaout un doare steuñvenn neuze emañ Frañs a-bezh o klask piv a skriv ur blog diwar-benn labour an dud a labour e kefioù ar gourmarc’hadoù, hag sikour da lakaat war-wel kudennoù ar vicherourien ha micherourezed-se. Ur gelaouennerez a labour dre guzh en ur gourmarc’had kostez Pariz zoken, sur emañ perc’hennez ar blog o labourat du-hont. Pezh a zo gwir. Eus he zu, Solweig a gendalc’h da skrivañ, da labourat, d’ober war-dro he breur bihan peogwir emañ he zad en ospital. E keit-se hag un tammig pep lec’h e krog an harz labour gant implijidi ar gourmac’hadoù.
Nebeut a draoù a vo gouezet e gwirionez diwar-benn o labour (estreget un toullad lodennoù pennadoù blog, buan-ha-buan). Dipitet on bet e vefe bet divizet lakaat an darvoudoù da dremen e-kichen Pariz (sinema gall forever), ur sapre istor karantez NULL a zo ivez, diabeg, evit reiñ ur blaz kontadenn d’an hollad. Ur gontadenn c’hwitet neuze rak gallet en defe ar film diskouez e gwirionez tuioù sokial/kevredigezh pouezus. Ur film koantik ha jentil ha neuze un tamm lu a vo e plas. Da betra servij? Reoù kalz gwelloc’h a zo hag a ra hep ober van komz eus dodennoù pouezus. Domaj.

Film sevenet gant Pierre Rambaldi diwar levr Anna Sam. Frañs, 2010, 1e42.

Ruby Sparks

Posted in Filmoù with tags , , , , , on C'hwevrer 12, 2018 by geekezig

Calvin a zo ur skrivagner. Brudet eo abalamour d’e romant kentañ bet skrivet da 19 vloaz. 10 vloaz zo bremañ n’en deus ket skrivet kalz traoù all ha ren a ra ur vuhez digenvez en e di. Hunvreal a ra ouzh ur plac’h yaouank hag adkavout a ra e awen, o skrivañ diwar he fenn. Un deiz bennak avat e tizolo en deus krouet ar plac’h-se e gwirionez, bez ez eus outi, hag o chom en e di emañ hi…
N’eus netra souezhus e Ruby Sparks, ur film diwar-benn ur c’hrouer a fell dezhañ krouiñ ur plac’h hervez e c’hoant. Prantadoù fentus a zo er film met kalz prantadoù direnkus a zo ivez pa grog Calvin da glask cheñch Ruby en-dro (paouezet en doa da skrivañ diwar he fenn ur wech komprenet ar galloud en doa warni) pa n’a ket mat an traoù etrezo. Ur prantad start kenañ a vo er fin ivez, tro-dro da se. Iskis eo peogwir e seblant diskouez tuoù droch ar “Manic Pixie Dream Girl” (kaset betek penn ouzhpenn, o vezañ krouet gant an haroz e unan!) met war a seblant ne oa ket c’hoant Zoe Kazan, he deus skrivet ar senario hag a c’hoari perzh Ruby…
D’ur mare zo e vez lâret da g/Calvin pegen emgar eo met ne seblant ket klask eñ cheñch evit gwellaat e darempred gant Ruby ha klask kompren anezhi ha piv eo. Abalamour da se on bet lakaet diaes en ur sellet ouzh ar film a zo skañv ha fentus memestra ma na glasker ket prederiañ re.

Film sevenet gant Jonathan Dayton & Valerie Faris. Stadoù-Unanet Amerika, 2012, 1e44.

Après la pluie 1

Posted in Levrioù bannoù-treset with tags , , , , , on Du 18, 2017 by geekezig

Akira a zo liseadez, e kentañ klas. Sirius eo ar plac’h yaouank. Gloazet eo bet ha n’hall ket redek ken evel ma c’halle met tremen a ra hec’h amzer goude ar c’hentelioù o labourat en ur preti. Karout a ra ar perc’henn, un den 45 vloaz, un tamm penn-skañv ha skuizh.
Dipitet on bet un tamm gant tresadennoù Après la pluie ha jenet ivez gant an istor karantez-se. Fentus eo tudenn Akira, yen un tamm anezhi (ha koulskoude he deus kalz mignoned ha mignonezed) met start am eus kavet gwelet an dud oc’h ober goap eus perc’henn ar preti. Lenn a rin memestra klozadur an istor (a lako ac’hanon da cheñch ali marteze!) met n’on ket bet fromet kement-se gant an istor-se, evit ar poent.Istor ha tresadennoù gant MAYUZUKI Jun. Embannet e galleg gant Kana d’ar 7 a viz Ebrel 2017.

%d bloggers like this: