Dielloù evit sonerezh

Green Book

Posted in Filmoù with tags , , , , , , , on Even 1, 2020 by geekezig

Green Book a zo savet diwar ur gwir istor. Film kentañ Peter Farrelly e unan eo, hep e vreur Bobby.
Ur film dudius eo, a dremen evel un tenn.
E New York e 1962, emañ Frank Vallelonga o klask labour evit un daou viz bennak, peogwir e vo serret ar voest noz e lec’h ma labour da gustum. Kinniget ‘vez dezhañ bezañ blenier un arzour e-pad e droiad : Don Shirley. Ur soner piano meur eo, un den du eo ivez, neuze ez eus lec’hioù difennet dezhañ e stadoù Su ar Stadoù-Unanet. Dav ‘vo da Frank lenn ar “green book” (un doare levr hentañ a lâre peseurt lec’hioù a oa aotreet d’an dud du) evit gouzout pelec’h kas ar soner.
A-hed an hentoù e komzo an daou zen asambles, disheñvel-mik int. Ur rekipe klasel neuze, peogwir e levezono an daou zen an eil egile, hag e vo nebeutoc’h a rakvarnioù ganto e fin ar gont.
Souezhet on bet e yafe oscar ar gwellañ film gant Green Book peogwir n’eo ket ur meurdez kennebeut met plijadur ‘m eus bet o sellet ouzh ar film ha kuzuliañ a ran anezhañ a galon laouen.

Film sevenet gant Peter Farrelly. Stadoù-Unanet Amerika, 2018, 2e10.

BODIED

Posted in Filmoù with tags , , , on Gwengolo 4, 2019 by geekezig

Gortoz a raen Bodied evel ur sodez. Detention o vezañ unan eus ma filmoù karetañ e felle din groñs gwelet film nevez Joseph Kahn. War Youtube Premium emañ nemetken setu ‘m eus implijet ar miz digoust evit gallout gwelet ar film. Ha keloù mat, daoust din bezañ lâret ar c’hontrol e #2 abadenn Petra c’hoari ganit e vo kavet ar film e DVD ha Blu-Ray a-benn nebeut. Na brav ar vuhez!
Adam a zo ur studier sirius. Fellout a ra dezhañ skrivañ diwar-benn ar rap, ar “battle” zoken. En ur vont da glask danvez evit e labour en em adkav o rapiñ en desped dezhañ.
Lusket mat kenañ eo Bodied, aesoc’h da heuliañ eget Detention moarvat. Ur film rap battle da vat eo, n’eus ket kalz a draoù all. Ur film diwar-benn perc’hennidigezh sevenadurel (cultural appropriation), dereadegezh politikel (PC : political correctness) eo met a ra pep tra en un doare fin a-walc’h pe emskiant pa lârin mat (tudenn Maya da skouer, a gaven dipitus er penn-kentañ hag he deus un emdroadur dedennus a-benn ar fin). E gwirionez ez eo Bodied ur film a ra goap ouzh an holl, hep klask reiñ kentelioù. An holl a vo roet o fegement dezho. Ur film heverk eus e vare (daoust ha koshaat a raio mat ?) d’am meno hag efedus kenañ ouzhpenn bezañ ur film battle rap a galite.

Film sevenet gant Joseph Kahn. Stadoù-Unanet Amerika, 2017, 2e.

Aggretsuko

Posted in Stiradoù, webstiradoù ha skinwel with tags , , , , , , , on Genver 6, 2019 by geekezig

Aggretusko (aggro Retsuko) a zo un dudenn eus embregerezh maskotennoù Sanrio (Hello Kitty hag all). Anavezout a raen an dudenn dija rak tro am boa bet da welet war ar rouedad rannoù eus ar stirad bet savet evit ar chadenn TBS e 2016 gant rannoù berr-kenañ (ur vunutenn).
Memes tudenn ha memes istor a vez kavet er stirad skignet gant Netflix en un doare etrevroadel. Ar wech-mañ int rannoù 10 munut, ur stumm a glot mat-tre gant an istor me gav.
Retsuko a zo ur plac’h 25 vloaz, a labour e servij kontouriezh un embregerezh vras e Tokyo. Ur plac’h sioul ha sirius eo met diouzh noz, evit ezteurel ar gounnar he deus e keñver he renerien pe kenseurted, ez a da ganañ death metal en ur c’haraoke.
Aggretsuko a zo ur stirad diwar-benn bed al labour hag ar vuhez evit ur plac’h yaouank e bro Japan. Soñjal a ra kuitaat he labour evit dimeziñ met n’he deus karedig ebet. Ur bern tudennoù plijus a zo tro-dro dezhi (Fenneko, Haida, Gori ha Washimi) a sikour anezhi da welet pegen kamm e c’hall bezañ he doare da welet an traoù. Moutik ha fentus eo ar stirad ha koulskoude n’eus ket kalz a spi. Santet e vez n’a ket ar sistem en-dro met an diskoulmoù all n’int ket gwelloc’h…
Start an traoù neuze ha koulskoude eo dudius ar stirad!
Ur rann ispisial a zo bet evit Nedeleg a zo fentus ivez (a gomz kalz diwar-benn Instagram) en ur c’hortoz an eil bloavezh a vo da zont er maez e 2019. Hast ‘m eus!

Stirad skrivet ha sevenet gant Rarecho, diwar an dudenn krouet gant Yeti evit Sanrio. Japan. Skignet war Netflix abaoe an 20 a viz Ebrel 2018. 10 rann 10 munut (+ 1 rann ispisial 22 vunutenn abaoe an 20 a viz Kerzu 2018).

Gaga : Five Foot Two

Posted in Stiradoù, webstiradoù ha skinwel with tags , , , , , , on Kerzu 7, 2018 by geekezig

Gaga : Five Foot Two a zo un teulfilm bet filmet pa oa pladenn Joanne o tont er-maez ha Lady Gaga o prientiñ abadenn ar superbowl (fin 2016 neuze).
N’on ket sot gant Lady Gaga, n’anavezan ket mat he labour pe hec’h istor. Daoust da se e plij din sellet ouzh teulfilmoù a ziskouez pegen diskaret e c’hall bezañ an dud abalamour d’ar brud, ar bec’h a vez warno. Aze e vez gwelet da skouer kudennoù yec’hed Lady Gaga (torret he deus he lez e-pad he zroiad) pe c’hoazh ar c’hoant chom “simpl” goude bezañ graet ur bern traoù digredus gant ar riskl e tisplijfe d’ar re a heul anezhi. Fromus a-walc’h eo ivez istor Joanne hag an darempred he deus gant he familh abalamour d’an dibab bezañ graet ur bladenn dediet dezhi (he moereb marvet da 19 vloaz abalamour d’al lupus).
N’eus ket kalz tra ouzhpenn d’an teulfilm-se, Lady Gaga a seblant bezañ un tamm kollet a-wechoù, digenvez alies, nec’het gant penaos e vo degemeret he labour ha c’hoantoù nevez. Un istor bet gwelet kant gwech met a chom bamus, hep na vefen gouest da zisplegañ perak.

Teulfilm sevenet gant Chris Moukarbel. Stadoù-Unanet Amerika, 2017, 1e40. Skignet gant Netflix hepken.

Green Room

Posted in Filmoù with tags , , , , on Eost 14, 2017 by geekezig

Ur film “bihan” eo Green Room. Ar strollad punk Ain’t Rights a glask son un tammig e pep lec’h, er Stadoù-Unanet. Partiet fall-tre eo an traoù met kinniget e vez dezho un abadenn ziwezhañ. Kompren a reont en ur erruout eo en ur sal gant neo-nazied, dreistelourien wenn, hag all.
Ober a reont un tamm atiz neuze (o kanañ “Nazi punks, fuck off” an Dead Kennedys ^^) araok mont kuit didrabas pe dost. Pezh a zo e vo unan anezho test eus ur muntr (pe test eus ar c’horf marv pa lârin mat) ha bac’het e vo ar strollad a-bezh gant aon e vefe pellgomzet d’ar polis ganto. Klask a reont marc’hata ha tec’hout met ne vo ket aes tamm ebet…
Kalz plijadur m’eus bet o sellet ouzh Green Room, ur film-skrij “chom bev” a-feson eo, gant un aergelc’h deuet mat-kenañ (ar sal abadennoù, dilhad an dud, hag all), fent a zo ouzhpenn. Feuls-tre eo ha heugus da vareoù zo met tapet on bet penn-da-benn en istor. Un taol-dreist ral me gav.

Film sevenet gant Jemery Saulnier. Stadoù-Unanet Amerika, 2015, 1e35.

K-shock

Posted in Levrioù bannoù-treset with tags , , , , on Du 17, 2016 by geekezig

kshockKlevet am boa Christelle Pécout o komz diwar-benn he levr bannoù-treset e abadenn 101 pur 100. Displeget he doa he c’hoant da gomz diwar-benn an hallyu, ar wagenn sevenadurel korean. K-Shock a ginnig ur sell war bed ar strolladoù k-pop neuze. Alice, gallez o chom e Korea ar Su a zo dipitet gant he diviz mont da vevañ du-hont. Dre zegouezh e krog da labourat en ul leti. Mab ar berc’hennez a zo eñ rapour ha kinniget e vez dezhañ kemer perzh en ur genstrivadeg skinwel evit mont en ur strollad sonerezh nevez. Tro vo da welet un tamm bed start ar sonerezh e Korea ar Su (an arzourien a embreg abred spontus, hep bezañ sur da labourat un deiz zoken ha n’o deus kazi gopr ebet peogwir e vezont lojet, bouetaet ha roet kentelioù a bep seurt dezho). Dizoloet ‘m eus ur bed n’anavezen ket mat. Un tamm digempouez eo al levr avat, da vareoù zo e oa start din kompren pep tra er metou-se. Tapet on bet gant an tu “kenstrivadeg” avat ha laouen e vin o c’houzout petra c’hoarvez gant an tudennoù memestra! Plijet e vefen bet ivez gant livioù el levr pe gant kazennoù leunoc’h a-wechoù… Beg figus e vefen? 🙂k-shockdIstor ha tresadennoù gant Christelle Pécout. Embannet gant Glénat, d’an 9 a viz Meurzh 2016.

Comment c’est loin

Posted in Filmoù with tags , , , , on Genver 17, 2016 by geekezig

commentcestloinMe oar a-walc’h peseurt brud a zo gant Orelsan ha zoken ma on displijet gantañ da vareoù zo ez eus un dra a blij din ivez. Dedennet e oan gant istor Comment c’est loin ha gouzout e oa an titl un dave da ganaouenn IAM Demain, c’est loin en deus kendrec’het ac’hanon da vont da welet ar film.
Komz a rin diouzhtu eus tuoù fall ar film diwar-benn plas ar merc’hed : evel boaz e bed Orelsan e chom ar merc’hed tud diavaez, torr-penn, a vir da hunvreal, da grouiñ, da vezañ trankil hag oberiant. Ur wech “degemeret” an dra-se e c’haller sellet ouzh Comment c’est loin, a zo e gwirionez ur film tro-dro d’ar bladenn Orelsan et Gringe sont les Casseurs flowteurs.
Daou vignon o vevañ e Caen a glask ober rap abaoe 5 bloaz. Gwechall e oant bet klevet war ur radio lec’hel ha sikouret gant daou din o klask sevel pladennoù rap. Pezh a zo, an daou gomper n’o deus james echuet kanaouenn ebet hag erru eo skuizh o broduerien. Orel a ginnig sevel ur ganaouenn en un devezh evit prouiñ int gouest d’ober un dra bennak.
Setu neuze un devezh e buhez daou baotr a blij dezho ober netra, maez ar gevredigezh pe dost pe d’an nebeutañ an deverioù sokial. Pourmen e Caen, debriñ boued fall, mont e tavarnioù, ober forzh petra el labour, darempredoù skoemp gant o familh hag ar merc’hed ha bepred, bepred chom hep ober netra e plas krouiñ sonerezh.
Kaer en do Orelsan lârat e skriv traoù diwar-benn tudennoù “loser” n’on ket bet gouest da gavout traoù gwir er pezh a lâront : ar c’hoant da pas labourat, da chom da hunvreal, pas bevañ evel ar re all, pas kaout c’hoant kaout ur vuhez ordinal. Fromus ‘m eus kavet prantadoù zo (gant mamm-gozh Orel tro-dro d’ar ganaouenn J’essaye, j’essaye da skouer). Ur film simpl eo, mat da sellet war ur skramm bihan met kavout a ran pouezus gwelet metouioù all estreget bourc’hizien brav ha gwisket mat Pariz ha gwelet tud a fell dezho ober traoù met a chom sac’het abalamour d’o duioù fall, d’o leziregezh, d’o sioù. Setu perak, daoust din kavout hegasus da vat lodennoù zo, on bet plijet gant ar film. Keñveriet eo bet gant gwir abeg da film Kevin Smith Clerks me gav. C’hoarzhet ‘m eus meur a wech (tamm ebet gant peurrest ar sal ^^”), huanadet ‘m eus da vareoù all, met ur film melkonius ha dizesper eo un tamm. Kavet ‘m eus war skramm hag er c’hanaouennoù un dra a gavan a zo ennon ivez, marteze. Moarvat.

Film sevenet gant Orelsan ha Christophe Offenstein. Frañs, (war skrammoù Frañs abaoe an 9 a viz Kerzu) 2015, 1e30.

Dope

Posted in Filmoù with tags , , , , , , , on Kerzu 27, 2015 by geekezig

dopeMalcolm a zo lisead e Los Angeles, en ur c’harter kentoc’h brudet fall. Gant e vignon hag e vignonez e plij spontus dezho rap ar bloavezhioù 90 ha c’hoant o deus mont d’ar skol-veur, liseidi sirius int. Un deiz e kouez Malcolm e krabanoù ur gwerzher dramm a c’houlenn digantañ ober traoù evitañ, e-kreiz ar jeu : ur plac’h a blij dezhañ. Mont a raio gwall bell an traoù pa tizoloio Malcolm ez eus dramm forzh pegement en e sac’h hag e vez lâret dezhañ gant ur c’huzulier evit ar re yaouank kavout un diskoulm evit gwerzhañ an dramm-se. Malcolm hag e vignoned a grog neuze da werzhañ dramm…
Deuet on er-maez eus ar sal gant ur pezh mousc’hoarzh war ma dremm, sonerezh leiz ma fenn. Ur film dudius kenañ eo Dope, ur film krennarded «a-gostez» evel na vez ket gwelet kement-ken. Daoust d’ar film pas bezañ ken start ha Dear White People e vez santet ur c’hoant diskouez ar rakvarnioù a c’haller kaout (gant lizher Malcolm d’ar skol-veur), efedusoc’h ‘m eus kavet neuze peogwir e oa eeunoc’h steuñvenn an istor ha plijusoc’h an hollad, gant memestra daveoù da vediaoù hirie gant ur YouTube Poop fentus-tre. E gwirionez ‘m eus bet kalz plijadur o sellet ouzh Dope, anat deoc’h. Daoust ha hegaset on bet un tamm gant plas ar merc’hed er film avat? Marteze ‘walc’h. Daoust da dudenn Dig eo ur film «strollad krennarded» hag ar merc’hed a chom alies mat tudennoù a faltazi hepken evito (Lily & ar plac’h all). Evel gant Dear White People ez eus memes kudenn gant an istitloù gallek a nac’h skrivañ ar ger “Noir” evit komz eus tud du… Estreget-se ez eo leun a nerzh, peadra da reiñ lañs d’an holl!
(Ya me zo sot gant Awreeoh. Kinnig a ran dec’h selaou ouzh kanaouennoù ar strollad ^^)

Film sevenet gant Rick Famuyiwa. Stadoù-Unanet, (war skrammoù Frañs abaoe ar 4 a viz Du) 2015, 1e43.

ラブ&ピース (Love & Peace)

Posted in Filmoù with tags , , , , , , , , , on Kerzu 26, 2015 by geekezig

love_and_peaceUr film iskis-kenañ eo Love & Peace a felle din gwelet abalamour da vrud e sevener. Ur gontadenn eo, ur gomedienn, ur film troet war ar sonerezh met ivez ur film kaiju! Nag a draoù!! Ouzhpenn-se ez eus ur film gant aktourien met kalz prantadoù bevaat a zo memestra abalamour ez eus kalz c’hoarielloù o kemer perzh en istor.
Ryo a zo ur paotr gant ul labour nul, a vev en ur ranndi bihan dister. Ne blij ket e vuhez dezhañ, an holl a ra goap outañ hag e hunvreoù sonerezh a zo aet da hesk tamm-ha-tamm. Un deiz bennak e pren ur vaot vihan hag un darempred mat a zo etrezo. Koulskoude pa vo graet goap outañ abalamour d’e vaot el labour hag e kaso anezhi kuit dre ar privezioù. Al loen a erruo en ul lec’h iskis, ul lec’h degemer evit al loened hag ar c’hoarielloù bet dilezet gant an dud. Adalek ar marv-se e krogo Ryo da gavout chañs ha da vont davet e hunvre, a-drugarez d’ur ganaouenn a skriv o soñjal e Pikadon (e vaot) hag a vo komprenet evel ur ganaouenn o komz eus ar bombezennoù nukleel (lesanvet evel-se e Japan).
Fentus eo ar film, plijus ar sonerezh, souezhus an emdroadur tro-dro d’an den kozh a zastum ar c’hoarielloù/loened dilezet… Ur film diwar-benn ar gevredigezh beveziñ (hag ar gizioù) ha metou ar sonerezh e Japan eo ivez. Pinvidik ha liesseurt eo da vat! Un tamm hir eo marteze hag ispisial an doare da c’hoari (japanat-tre) met plijet on bet kalz gant ar film, un dudi a-feson eo bet evit echuiñ festival Utopiales ar bloaz-mañ.

Film sevenet gant SONO Sion. Japan, (diskouezet e festivalioù hepken e diavaez Japan evit ar mare) 2015, 1e57.

Je suis un écrivain japonais

Posted in Levrioù with tags , , , , on Du 13, 2015 by geekezig

je-suis-un-ecrivain-japonaisSouezhet on bet gant titl ar romant-mañ! Ingal em boa bet klevet komz eus Dany Laferrière met n’em boa lennet romant ebet skrivet gantañ araok. Un tamm iskis eo peogwir e seblant an traoù kontet gantañ. Tremen a ra an istor e Montréal. Darvoudoù un tamm droch a c’hoarvez, evel an traoù gant Björk da skouer. Goude-se e heulier ur strollad merc’hed yaouank, Japanadezed. Goude-se e vo brudet kaer e bro Japan hag e vevo evel un den dido evit tec’hout ouzh ar Japaniz a glask war e lerc’h. Araok adkavout ur mignon a gozh…
Un tamm na penn na lost eo ar romant-mañ, savet a chabistroù berr. Daoust d’al levr lakaat ar gaoz war un dra dedennus, an identelezh (daoust hag un den du o chom e Montréal a c’hall bezañ Japanad ma fell dezhañ?) e kav din eo kollet ar mennozh-se gant direzonioù, c’hoant ober fent pe preder iskis. N’on ket bet plijet kement-se gant Je ne suis pas un écrivain japonais, d’am soñj n’am eus ket komprenet anezhañ e gwirionez…

Romant skrivet gant Dany Lafferière. Embannet gant Grasset & Fasquelle d’ar 5 a viz Meurzh 2008.

%d bloggers like this: