Dielloù evit faltazi

Ms. Marvel 4

Posted in Levrioù bannoù-treset with tags , , , , , , , , , on Gouere 24, 2017 by geekezig

Echuet eo an traoù el levrenn 3. Met krouet ez eus ur bed Marvel nevez neuze e kendalc’h an traoù e gwirionez (en ur bed all, e lec’h eo Miles Morales Spider-Man da skouer). Ne cheñch ket kalz a dra evit stirad Ms. Marvel peogwir eo bet miret memes skipailh arzourien evit kenderc’hel an istor, an embannerien gallek o deus divizet kenderc’hel ha lakaat ar chabistroù nevez en ul levrenn 4 e plas ober ur stirad nevez.
Kamala a zo e-touez an Avengers bremañ ha kalz, kalz labour he deus. Skuizh marv eo bepred ha ne wel netra eus pezh a c’hoarvez tro-dro dezhi : Bruno en deus ur vignonez, Mike, breur Kamala en deus ezhomm outi evit gallout gwelet ar plac’h he deus piket e galon ha dreist-holl ez eus ur raktres evit lakaat koñversanted da guitaat ur c’harter a-benn sevel ur c’harter nevez ha cheuc’h ha kreskiñ ar prizioù. Ms. Marvel a zo war panelloù bruderezh an embregerezh a ra war-dro zoken… Brud fall spontus a zo ganti neuze ha start eo da Gamala merañ pep tra.
Plijet on bet gant an tud se eus an istor : gwelet pegen start e c’hall ar brud bezañ evit Kamala. Tudennoù nevez ha zo ha dedennus (Mike da skouer), un darempred fentus etre Iron-Man ha Kamala bremañ ma labouront asambles, prantad koant eured breur Kamala… Ar c’hoant da dapout pep lec’h a zo gant Kamala (ha lakaat a raio reuz en ur glask diskoulmoù!) met dibosupl eo evit ul liseadez! Dedennus e oa ivez prientiñ an eured gant familhoù disheñvel, a-fed sevenadur, deskadurezh ha relijion.
Ma paouez a ran da veuliñ Miss Marvel met kompren a rit moarvat on plijet bras bepred gant ar stirad, daoust d’ar “bed” nevez!Istor gant G. Willow Wilson, tresadennoù gant Adrian Alphona, Nico León  Takeshi MIYAZAWA. Embannet e galleg gant Panini Comics en dastumad 100% Marvel, d’ar 7 a viz Gwengolo 2016. (Chabistroù 1-6 eus Ms Marvel 2016)

The Strangers (곡성 / Gok-seong / The Wailing)

Posted in Filmoù with tags , , , on Even 6, 2017 by geekezig

Sot on gant The Chaser ha keuz em boa pas bezañ bet gwelet The Strangers warlene er sinema. Ur film faltazi eo ha spont zoken kazi. En ur gêriadennig e Korea e krog an dud da vervel e doareoù souezhus ha feulz. Ur poliser diampart a rank enklask gant peurrest e skipailh. Buan e komz tud ar vro eus “ar Japanad” un den kozh estren a vev en un ti don er c’hoadoù. Pa vo taget merc’h ar poliser gant ar seurt spered fall a zo er vilajenn e vo startoc’h c’hoazh an traoù…
Un enklask eo The Strangers neuze met ivez ur film faltazi (gant speredoù, stoliadur, kredennoù lec’hel hag all). Lodennoù feuls-tre ha gwadek kenañ a zo er film. Stegn eo an aergelc’h evel m’eo ret ha kaset eo mat an traoù war-raok. Plijus eo ivez aergelc’h ar gêriadennig e-kichen ar menezioù, dindan ar glav… Evel boaz kazi er filmoù korean e seblant divarrek ar polis met aze eo liammet kentoc’h gant pegen dic’hortoz ha divent eo an darvoudoù evit ur skipailh kustum da aferioù “trankil” ur gêriadennig. Anat eo e c’haller lakaat ar gaoz war an disfiz a vez rak tud disheñvel/estren, ivez, diouzhtu e vez lakat ar bec’h war an den a gostez ha n’eo ket korean (gant gwir abeg pe get).
Ur film a-feson eo (chom a raio The Chaser ma hini karetañ avat) met dav bezañ prest da c’houzañv huchadennoù ha gwad, me lâr deoc’h!

Film sevenet gant Na Hong-jin. Korea ar Su, 2016, 2e36. Difennet d’ar re dindan 12 vloaz.

Beauty & The Beast

Posted in Filmoù with tags , , on Ebrel 28, 2017 by geekezig

Ur genseurtez/mignonez he doa bet kement a blijadur gant Beauty & The Beast e felle dezhi e welet en-dro ha bet on ganti.
Ret eo gouzout emañ Beauty & The Beast e-touez ar filmoù bevaat Disney a blij ar muiañ din.
Kregiñ a ra ar film nevez hep gwerennoù livet ar film bevaat, ma, n’eo ket gwall dra (zoken ma plije din è_é). Tamm-ha-tamm avat e kav din sellet ouzh un eilenn divlaz. Mankout a ra ar pezh a blij din er film bevaat ha n’eus ket kalz a draoù disheñvel hag a vefe dedennus. Ar cheñchamant brasañ a zo tudenn Gaston. Luke Evans a zo bamus a-walc’h er roll-se met deuet eo da vezañ kazi plijus pe d’an nebeutañ en deus doujañs evit Belle hag he fersonelezh, ne ra ket goap outi gant he levrioù da skouer, ar pezh a zo iskis un tamm (met n’eo ket ken simpl hag a oa er film bevaat, pezh n’eo ket fall kennebeut). An daouad gant Le Fou am eus kavet fentus.
Er c’hastell avat… Tudennoù ar “skipailh” a ra kazi aon gant an efedoù ispisial. Memes efed ha penn-kentañ The Jungle Book hep na paouezfe ar santad james. Ul lodenn evel kanaouenn “Be My Guest” en deus lakaet ac’hanon un tamm diaes da skouer. Taol-mouezh gall Ewan Mc Gregor n’eo ket deuet brav kennebeut…
Eus e du, ar priñs a zo “fentus” met perak ‘ta e ra goap eus al levrioù a blij da v/Belle? Traoù nevez a zo bet ouzhpennet d’an istor diwar-benn bugaleaj Belle hag hini ar priñs am eus kavet dister (ha kanaouennoù nevez savet = PERAK? Pell int eus live ar re orin ha n’am eus ket komprenet c’hoazh da betra e servijent). Un dra dedennus a zo bet ouzhpennet memestra : liamm ar c’hastell gant ar gêriadenn, o tiskouez splann en doa ar mallozh un efed war an dud all e diavaez ar c’hastell, se oa kavet mat me gav.
N’on ket bet heuget dirak ar film, plijadur ‘m eus bet zoken met ur c’hwitadenn eo evidon e-keñver ar film diazez.
Kresket eo c’hoazh ma c’harantez evit ar film bevaat neuze ha dreist-holl evit an dibaboù kamera dedennus a oa (Belle war skeul ar stal levrioù, robenn Belle o tremen dirak ar c’hamera e-pad dañs “Tale As Old As Time”).
Ur c’hevrin : perak eo gwisket ar baotred gant chupennoù a lak da soñjal e reoù Eliant er fin? 😀

Film sevenet gant Bill Condon. Stadoù-Unanet Amerika, (e sinemaoù Frañs abaoe an 22 a viz Meurzh) 2017, 2e09.

Dédale 1

Posted in Levrioù bannoù-treset with tags , , on Ebrel 3, 2017 by geekezig

Div harozez Dédale a genloj asambles peogwir e labouront evit un embregerezh c’hoarioù video. En em adkavout a reont en ul lec’h souezhus, ur savadur heñvel ouzh hini o labour met a seblant mont en-dro evel ma c’hallfe ur c’hoari ober. Dañjerioù a zo met ivez traoù a ya en-dro en un doare resis. Mont a reont war-raok en endro iskis-mañ en ur glask a bep seurt traoù ha kompren reolennoù al lec’h…
Ur meskaj etre ar c’hoari Portal hag ar film Cube eo Dédale kazi. Un daouad fentus eo (an div dudenn), unan a glask pep tra evit gwelet penaos e ya en-dro ar “c’hoari” eben a zo kentoc’h dedennet gant an istor, petra eo sekred al lec’h… Un daolenn eus an doareoù c’hoarierien ha c’hoarierezed a zo 😉
Un tamm souezhus eo avat gwelet ur “c’hoari video” war baper evelse, traoù zo n’int ket anat da gompren, ne seblantont ket dre ret mont en-dro. Fentus eo ar mennozh avat ha kevrinus ar bed ha perak emañ ar merc’hed aze. E-pad pegeit e chomo ken dudius ? Un afer all eo !

Istor ha tresadennoù gant Takamichi. Embannet e galleg gant Doki doki, d’ar 6 a viz Gouere 2016.

Sin City : A Dame To Kill For

Posted in Filmoù with tags , , , on Meurzh 28, 2017 by geekezig

Sin City, ar film, a blij kalz kalz din. E Japan e oan pa oa deuet er maez Sin City : A Dame to Kill For e sinemaoù Frañs ha c’hwitet warnañ war ar skramm bras neuze.
‘M eus aon n’eo ket bet ur c’hwitadenn (eus ma ferzh) kement-se peogwir n’on ket bet entanet gant an heuliad-mañ. Digempouez eo an istorioù, gant un istor kalz pouezusoc’h eget ar re all. Ha torr-penn ‘m eus kavet peogwir e oa tro-dro d’un “intañvez zu” (Eva Green) (ma kavit ur ger pe un dro lavar propoc’h lârit din marplij!). Splann eo aze eo ar merc’hed evel kirri pe traoù estreget pa int drouk hag ec’h implijont o c’horf evit kaout arc’hant. Ec’h.
An istorioù all n’int ket tennet eus ar rummad levrioù BT war-eeun met ijinet gant Frank Miller a-ratozh evit ar film ha kentoc’h dedennus met re verr siwazh.
Distabilaet on bet ivez gant ar cheñchamantoù aktourien, dreist-holl ar plac’h a c’hoari deadly little Miho. An dibaboù liv ne seblantont ket ken “arouezel” hag a oant e Sin City ha kavet ‘m eus ivez e oa kazi viloc’h an disoc’h gant teknologiezhioù 2014 eget gant reoù kreiz ar bloavezhioù 2000…
N’on ket gouest da lârat e oa null met anat n’eo ket a live gant ar film kentañ, pell alese.

Film sevenet gant Robert Rodriguez ha Frank Miller. Diazezet war levrioù bannoù-treset Frank Miller. Stadoù-Unanet, 2014, 1e42.

Sangre 1 – Sangre la survivante

Posted in Levrioù bannoù-treset with tags , , , , , , on Genver 30, 2017 by geekezig

sangreSetu stirad bannoù-treset nevez Arleston, un istor galloudoù hud HA bedoù kenstur! Na petra ta! 😀
Sangre a zo ur plac’hig test eus drouklazh he c’humuniezh gwiniegourien pa oant o veajiñ davet ar gêr vras. Dont a raio da vezañ besteod ha ne chomo nemet ur spi ganti : adkavout he mamm (m’eo bev c’hoazh) ha lazhañ muntrerien he familh. Ur vuhez digenvez ha diazezet war al laeroñsi e vevo goude bezañ bet skarzhet eus ar skol e lec’h ma oa bet degemeret.
Klasel eo diazezoù an istor (bugel emzivad, dial, itrikoù evit kaout galloud gant lodennoù uhelañ ar gevredigezh…) met dedennus eo ar bed, efedus an tresadennoù hag an doare da gas an istor war-raok. Hast ‘m eus gouzout hiroc’h!sangredIstor gant Arleston, tresadennoù gant Floch. Embannet gant Soleil d’an 19 a viz Here 2016.

Lullaby

Posted in Levrioù with tags , , , on Kerzu 5, 2016 by geekezig

lullabyO komz e oan gant ur genseurtez diwar-benn Fight Club 2 hag anzavet n’em boa ket bet lennet ul levr gant Chuck Palahniuk james! Kuzuliet he deus Lullaby din.
Ul levr a zere d’al levraouegerien ha levraouegerezed eo… Haroz ar romant a zo kelaouenner, o klask sevel ur pennad diwar-benn ar babiged a varv “diabeg” emañ. E-pad e enklask e kav ul levr e pep ti, un dastumad luskellerezioù eus ar bed. Unan anezho a zo ur ganaouenn evit sikour brezelourien gloazet da vervel sioul.
Carl a gompren buan ar galloud a zo gantañ bremañ hag an dever ivez : distruj pep skouerenn eus al levr a chom. Kavout a ra war e hent Helen, a werzh tiez satanazet a-benn adprenañ anezho. Gouzout a ra hi ivez ur bern traoù diwar-benn al luskellerez-se…
Kregiñ a ra ar romant gant deskrivadur an div dudenn-se, ha penaos e kompren Carl ar pezh a rank ober. Da c’houde e vo kentoc’h ur veaj war hentoù ar Stadoù-Unanet. Pevar den a veajo asambles, pep hini o kaout alioù disheñvel, selloù disheñvel war ar bed hag an traoù evel m’emaint. Dedennus neuze gwelet ali pep hini war o dever, hervez o roll er gevredigezh, pe an arouez roet dezho el levr. Leun a faltazi eo ar romant evel-just ha flemmus. Ur blijadur eo bet e lenn. Un tamm gwanoc’h ‘m eus kavet ar fin avat, dipitet marteze gant an divizoù bet kemeret gant an tudennoù. Laouen on bet da vezañ lennet ul levr gant Chuck Palahniuk a-benn ar fin! Marteze e klaskin en-dro, piv oar?

Romant bet skrivet gant Chuck Palahniuk. Embannet gant Doubleday, d’ar 17 a viz Gwengolo 2002.

%d bloggers like this: