Dielloù evit kevredigezh

Our Summer Holiday

Posted in Levrioù bannoù-treset with tags , , , , , , on Even 14, 2020 by geekezig

Ur manga fromus eo Our Summer Holiday, leun a varzhoniezh hag a velkoni. An haroz a vev gant e vamm. Plijout a ra kalz ar velldroad dezhañ met ar gourdoner nevez a zo re start ha koll a ra tamm-ha-tamm ar blijadur da c’hoari. P’eo dav dezhañ mont d’ur staj e-pad ar vakañsoù e ra van mont met e gwirionez e tremeno ar sizhun gant ur vignonez eus e glasad a vev hec’h unan gant he breur bihan. Pesketaer eo he zad ha ne vez ket aze alies. Ur vuhez den deuet a zo ganti dija, ret eo dezhi ober prenadennoù ha diwall mat rak an dispignoù. Ur prantad brav a dremenfont asambles o zri.
Ur sell kriz eo war ar gevredigezh e bro Japan, tud en ur saviad sokial dister. E gwirionez am eus soñjet e film KORE-EDA Hirokazu Une affaire de famille meur a wech en ur lenn ar manga. An div oberenn a guzulian deoc’h lenn ha gwelet.Istor ha tresadennoù gant OZAKI Kaori. Embannet e galleg e ti Delcourt/Tonkam, d’ar 7 a viz Even 2017.

Green Book

Posted in Filmoù with tags , , , , , , , on Even 1, 2020 by geekezig

Green Book a zo savet diwar ur gwir istor. Film kentañ Peter Farrelly e unan eo, hep e vreur Bobby.
Ur film dudius eo, a dremen evel un tenn.
E New York e 1962, emañ Frank Vallelonga o klask labour evit un daou viz bennak, peogwir e vo serret ar voest noz e lec’h ma labour da gustum. Kinniget ‘vez dezhañ bezañ blenier un arzour e-pad e droiad : Don Shirley. Ur soner piano meur eo, un den du eo ivez, neuze ez eus lec’hioù difennet dezhañ e stadoù Su ar Stadoù-Unanet. Dav ‘vo da Frank lenn ar “green book” (un doare levr hentañ a lâre peseurt lec’hioù a oa aotreet d’an dud du) evit gouzout pelec’h kas ar soner.
A-hed an hentoù e komzo an daou zen asambles, disheñvel-mik int. Ur rekipe klasel neuze, peogwir e levezono an daou zen an eil egile, hag e vo nebeutoc’h a rakvarnioù ganto e fin ar gont.
Souezhet on bet e yafe oscar ar gwellañ film gant Green Book peogwir n’eo ket ur meurdez kennebeut met plijadur ‘m eus bet o sellet ouzh ar film ha kuzuliañ a ran anezhañ a galon laouen.

Film sevenet gant Peter Farrelly. Stadoù-Unanet Amerika, 2018, 2e10.

I, Tonya

Posted in Filmoù with tags , , , , , on Meurzh 23, 2020 by geekezig

Fellout a rae din gwelet I, Tonya peogwir e plij din a-walc’h bed ar ruzikat (pezh am boa diskleriet deoc’h dija diwar-benn Spinning) hag em boa klevet kalz tud o lavar pegen mat e oa labour Margot Robbie er film. Anzav ran ne anavezen netra diwar-benn Tonya Harding, re yaouank e oan moarvat (koulskoude ‘m eus soñj bezañ bet sellet ouzh Surya Bonaly e-pad ar c’hoarioù olimpek pa oan bugel…).
Moarvat e oa kalz tud o komz diwar-benn Tonya Harding da vare ar c’hoarioù olimpek er Stadoù-Unanet met n’on ket sur e vefe bet brudet er bed a-bezh evel ma lavar ar film a-hed an amzer, an dra-se ‘m eus kavet torr-penn, da gregiñ ganti. Ur film souezhus eo peogwir e chom ur biopic met gant kalz fent, an tudennoù a gomz d’an arvesterien da skouer ha meur a sklaer eo e diazezet an traoù war gaou. Un doare na zisplij ket din dre ret met n’am eus ket komprenet mat petra oa pal ar film. Hir ‘m eus kavet ma amzer. Start e oa din krediñ e oa pemzek vloaz Tonya pa ra anaoudegezh gant Jeff, na 23 da vare tagadenn Nancy Kerrigan kennebeut…  Koulskoude eo gwir e c’hoari mat Margot Robbie, anat, met jenet on bet gant ar film dre vras, re amsklaer an ton evidon.

Film sevenet gant Craig Gillespie. Stadoù-Unanet Amerika, 2017, 1e59.

Welcome to Marwen

Posted in Filmoù with tags , , , , , , , , , , , on Here 6, 2019 by geekezig

Film nevez Robert Zemeckis eo. Ur meskaj film ha film bevaat eo ivez. Heuliet e vez un den bet skoet gantañ, kazi marv, dic’houest da dresañ evel ma rae gwechall. Kroget eo da zastum poupinelloù da sevel istorioù ha skeudenniñ anezho.
Ar prantadoù bevaat a zo neuze an istorioù ijinet gantañ, awenet gant an dud tro-dro dezhañ, hag a servij dezhañ da dapout e skeudennoù, da genderc’hel e vuhez arzour.
Ur film skañv eo ha koulskoude e komz eus kalz dodennoù start, koll eñvorennoù, bezañ digenvez, suj d’al louzoù met ivez fetichegezh an treid/botoù ha penaos e c’hall tud bezañ taget abalamour da se (anzavet en doa e lake botoù gant seulioù uhel d’ur bagad paotred en un davarn). E bed hunvreet Mark, ar merc’hed a zalc’h an traoù, a dal ouzh an enebourien. Ar merc’hed a lak ar bed da dreiñ, ar baotred a zo feulz, nazied hepken. Ur sorserez a zo ivez, n’eo ket disi ar merc’hed met santet e vez pegen stroñset eo bet Mark gant e wallzarvoud ha klask a ra tec’hout ouzh ar baotred dre vras.
Ur film plijus eo a ro c’hoant mont da skeudenniñ c’hoarielloù, da ijinañ bedoù. Laouen on e vefe chomet an traoù gwirheñvel avat, dreist-holl ouzh pezh a sell darempred Mark ha Nicol. N’eo ket gwellañ film Zemeckis met ur film plijus eo ha fromus en un doare skañv, sioul.

Film sevenet gant Robert Zemeckis. Stadoù-Unanet Amerika, 2018, 1e56.

Le syndrome du varan

Posted in Levrioù with tags , , , , on Gwengolo 23, 2019 by geekezig

Ur romant start-kenañ eo Le syndrome du varan. Testeni ur plac’h bet distrujet gant he zud hag ar gevredigezh diseblant.
Feulz eo neuze. Feulz eo ar gerioù, leun a gounnar. Komprenus eo.
Start eo Le syndrome du varan peogwir e tiskouez traoù na fell da zen gouzout, gwelout, klevout. Pegen ordinal e seblant ur vugaleaj leun a wallgas bezañ.

Romant skrivet gant Justine Niogret. Embannet gant Seuil d’an 3 a viz Mae 2018.

Le bruit du dégel

Posted in Levrioù with tags , , , , , , , , , on Gwengolo 16, 2019 by geekezig

Kate a zo ur studierez yaouank, kollet un tamm. Evañ a ra kalz. Re. Ober a ra anaoudegezh gant ur plac’h kozh, un amezegez dezhi, Jean. Goulenn a ra ar plac’h kozh diganti paouez da evañ. Evel ur sort Cheherazad e konto Jean istorioù da g/Kate evit sikour anezhi da chom hep evañ. Istorioù he buhez, karantezioù, istorioù familh… Ar vuhez he deus bevet Jean pe an dud tro-dro dezhi. A bep seurt a vo gwelet : muntroù, gwallzarvoudoù, karantez heñvelreizh (difennet neuze) hag ivez stourmoù politikel, enep brezel Vietnam da skouer.
Brav eo Le bruit du dégel. Fromus. Start eo ivez. Ur romant don, stank, n’on ket souezhet e vefe bet start din mont war-raok, ken pinvidik eo ha gwirheñvel e sioù ordinal an tudennoù, e doareoù pep hini da vont war-raok goude marv unan bennak…
Kuzuliañ a ran digudenn romant John Burnside, un dizoloadenn a-feson eo bet evidon.

Romant skrivet gant John Burnside, embannet e galleg gant Le Métailié, d’an 23 a viz Eost 2018.

Le chemisier

Posted in Levrioù bannoù-treset with tags , , , on Gwengolo 13, 2019 by geekezig

Chomet e oa eñvorenn Une sœur ganin hag ijinañ a raen Le chemisier ken tener ha brav.
Séverine, plac’h ordinal ma ‘z eus unan, a rank lakaat ur roched e seiz goude ur gwallzarvoudig er familh e lec’h ma labour evit diwall ar vugale ingal. Pa wisk an tamm dilhad-se he deus fiziañs enni ha war a seblant e cheñch ivez sell ar baotred tro-dro dezhi (estreget he mignon, a chom diseblant evel boaz). Klask a ra neuze ober ur bern traoù, traoù n’he deus ket kredet ober james.
Treset brav eo Le chemisier evel-just met dipitet on bet gant an istor am eus kavet re aes ha simpl. Un heuliad stultennoù, plac’h yaouank hegredik a fellfe dezhi a-greiz tout lakaat un tamm birvilh en he buhez re sioul. Didalvoud pe dost, d’am meno.Istor ha tresadennoù gant Bastien Vivès. Embannet gant Casterman, d’an 12 a viz Gwengolo 2018.

BODIED

Posted in Filmoù with tags , , , on Gwengolo 4, 2019 by geekezig

Gortoz a raen Bodied evel ur sodez. Detention o vezañ unan eus ma filmoù karetañ e felle din groñs gwelet film nevez Joseph Kahn. War Youtube Premium emañ nemetken setu ‘m eus implijet ar miz digoust evit gallout gwelet ar film. Ha keloù mat, daoust din bezañ lâret ar c’hontrol e #2 abadenn Petra c’hoari ganit e vo kavet ar film e DVD ha Blu-Ray a-benn nebeut. Na brav ar vuhez!
Adam a zo ur studier sirius. Fellout a ra dezhañ skrivañ diwar-benn ar rap, ar “battle” zoken. En ur vont da glask danvez evit e labour en em adkav o rapiñ en desped dezhañ.
Lusket mat kenañ eo Bodied, aesoc’h da heuliañ eget Detention moarvat. Ur film rap battle da vat eo, n’eus ket kalz a draoù all. Ur film diwar-benn perc’hennidigezh sevenadurel (cultural appropriation), dereadegezh politikel (PC : political correctness) eo met a ra pep tra en un doare fin a-walc’h pe emskiant pa lârin mat (tudenn Maya da skouer, a gaven dipitus er penn-kentañ hag he deus un emdroadur dedennus a-benn ar fin). E gwirionez ez eo Bodied ur film a ra goap ouzh an holl, hep klask reiñ kentelioù. An holl a vo roet o fegement dezho. Ur film heverk eus e vare (daoust ha koshaat a raio mat ?) d’am meno hag efedus kenañ ouzhpenn bezañ ur film battle rap a galite.

Film sevenet gant Joseph Kahn. Stadoù-Unanet Amerika, 2017, 2e.

Idiocracy

Posted in Filmoù with tags , , , , on Eost 15, 2019 by geekezig

Filmoù skañv a fell din sellet er mare-mañ war a seblant. Abaoe pell em boa klevet komz diwar-benn Idiocracy. Istor un den keitat, diellour en arme, a vez dibabet evit un taol-arnod. Kousket eo a-benn bezañ dihunet en dazont. Evel-se e vo posupl lakaat soudarded varrek “da gousket” ha bezañ dihunet pa vo ur brezel.
Tremen a ra fall an traoù ha dilezet e vez an taol-arnod. Dihuniñ a ra Joe e 2550 : ar blanedenn zo en ur stad reuzeudik, an holl a zo droch-pout setu e teu da vezañ den speredekañ ar bed ha goulennet e vez digantañ diskoulmañ tout kudennoù ar vro.
Droch-kenañ eo ar film, mont a ra pell ganti met kalz dudi ‘m eus bet o sellet outañ.

Film sevenet gant Mike Judge. Stadoù-Unanet Amerika, 2006, 1e24.

Fuki-no-tô

Posted in Levrioù with tags , , , , , , on Ebrel 29, 2019 by geekezig

Er romant-mañ, e vo heuliet Akiko, gwreg Mitsuo (haroz Azami). Staliet emaint e kêriadennig familh Akiko, a ra war-dro un ti-feurm bio bremañ. Ezhomm he deus sikour evit merañ lodenn kontouriezh hec’h atant. Ur vignonez a-gozh dezhi a lak hec’h anv evit ar post.
Fuki-no-tô a lak ar gaoz war temoù bet gwelet dija e romantoù Aki Shimazaki : an dibaboù bet graet evit plijout d’ar familh (a-enep d’ar c’hoantoù), an avoultriezh met tro e vo ivez da gomz diwar-benn an heñvel-garantez, hag etre merc’hed ar wech-mañ.
Evel boaz eo leun a from, bepred skrivet ken brav ha simpl. Un drugar da lenn, ur wech ouzhpenn. Leun a hiraez ‘m eus kavet ar c’hlozadur… Hast ‘m eus gouzout peseurt tudenn a vo heuliet er romant a-zeu (un ezel eus familh Fukiko marteze?).

Romant skrivet gant SHIMAZAKI Aki. Embannet gant Actes Sud ha Leméac, d’ar 4 a viz Ebrel 2018.

%d bloggers like this: