Dielloù evit XXvet kantved

Experimenter

Posted in Filmoù with tags , , , , , , on Gwengolo 2, 2017 by geekezig

Pell zo am boa sellet un teulfilm ar-benn taol-arnod Milgram : Le jeu de la mort (bet produet gant France télévisions)
Pa ‘m boa gwelet e oa ur film diwar-benn an dodenn-se (gant Winona Ryder ouzhpenn!) e fell din e welet.
Ur biopic eo aze un tamm, diwar-benn Stanley Milgram. An amerikan a orin yuzev en doa gret un taol-arnod er bloavezhioù 60 evit gwelet perak e c’hall an dud heuliañ urzhioù (spontus). Kalz a draoù a zo tro-dro d’an taol-arnod-se er film neuze ha penaos e oa bet diskaret e doare da ober. Gwelet e vez ivez e vuhez prevez hag e labourioù all.
Ur stumm ispisial a-walc’h a zo d’ar film, gant lodennoù heñvel ouzh ur pezh c’hoari da vareoù zo (gant skeudennoù evel foñs, hep klask kuzhat an efed-se, er c’hontrol). Dic’hortoz e ra neuze, na vezer ket boaz kement-se. Dedennus ‘m eus kavet ar film mod all ha plijus gwelet Peter Sarsgaard ha Winona Ryder (hag Anton Yelchin, 😥 ).

Film sevenet gant Michael Almereyda. Stadoù-Unanet Amerika, 2015, 1e38.

Advertisements

Le dahlia noir

Posted in Levrioù bannoù-treset with tags , , , , , , on Eost 24, 2017 by geekezig

N’eo ket sklaer ma eñvorennoù eus levr Ellroy bet lennet ganin pa oan el lise. Film Brian de Palma n’am eus ket bet tro da welet. Setu neuze ul levr bannoù-treset a c’hall lakaat da ijinañ petra vefe bet film David Fincher war an dodenn-se ma vefe deuet a-benn da gas e raktres da benn.
Dre ret, peogwir e oan bet plijet gant ar romant, em eus kavet e oa lusket mat ha dedennus an istor. Ur sapre levr bannoù-treset eo! Ma c’hudenn a oa kentoc’h gant an tresadennoù. N’int ket vil, an aergelc’h a glot mat gant hini Los Angeles ar bloavezhioù 40 (L.A Noire style :D), al livioù a zo brav met un tamm re lipet e oant marteze? Pe un tamm “difiñv”? N’oufen ket lârat petra resis a zisplije din met ne chomen ket da sellet outo, tapet ma oan gant ar skrid ha dipitet gant an nebeut a from a gaven en tresadennoù.
An embannadur “deluxe” am eus lennet ha kalz danvez zo er fin evit gouzout penaos eo bet labouret al levr bannoù-treset-mañ, dedennus e oa bepred.
Un azasadenn a gavan me etre neuze hag a ro keuz din ne vefe ket aet da benn raktres Fincher dreist-holl!Istor gant Matz ha David Fincher diwar James Ellroy, tresadennoù gant Miles Hyman. Embannet e galleg gant Casterman, d’an 13 a viz Du 2013.

Chinoises

Posted in Levrioù with tags , , , , , , on Eost 16, 2017 by geekezig

Chinoises a zo un dastumad testenioù bet dastumet gant Xinran pa oa kelaouennerez e Sina. A bep seurt istorioù a zo da lenn neuze. Merc’hed bet dimezet dre heg pe evit abegoù politikel, c’hoarezed gwallet, paourentez, digenvez, buhezioù cheñchet trumm abalamour d’an dispac’h sevenadurel… Ur bern testenioù start-kenañ neuze. Meur a hini am eus kavet fromus-kenañ (ranket chom a-sav a wechoù ken tizhet e oan) ha kompren a ran a-walc’h e vefe bet start da Xinran skrivañ al levr-mañ goude bezañ bet klevet pep plac’h o komz. Koulskoude eo pouezus-tre. Santet e vez mat un doare dismegañs (ha n’eo ket heverk eus Sina moarvat) evit sell ar merc’hed war ar bed hag an darvoudoù. Merc’hed a bep seurt oad, a bep seurt live sokial, gant micherioù ha tonkadoù disheñvel (studierezed, gisti, peizantezed, renerezed embregerezh, ijinourezed, merc’hedigoù…). Kompren a ran e vefe bet graet berzh gant abadenn Xinran pa veze skignet er radio, marteze en deus se sikouret an dud da bareañ un tammig goude bezañ bet bevet traoù euzhus. Ul levr a-bouez kenañ eo me gav daoust da begen start eo, leun a feulster, digredus eo c’hoazh ijinañ pezh en deus gallet Sinaiz gouzañv hag ober e-pad an dispac’h sevenadurel…
Ma fell deoc’h gouzout hiroc’h diwar-benn saviadoù merc’hed Sina ha ma n’em santit prest da lenn traoù start-kenañ, e kuzulian al levr-mañ deoc’h.

Levr bet skrivet gant Xinran. Embannet e galleg gant Philippe Picquier d’an 21 a viz Genver 2003.

Les trois fantômes de Tesla 1

Posted in Levrioù bannoù-treset with tags , , , , on C'hwevrer 28, 2017 by geekezig

trois-fantomes-teslaGolo Les trois fantômes de Tesla en doa plijet din. A-wechoù, n’eus ezhomm mann all ebet evit kaout c’hoant da lenn un oberenn, neketa ?
E fin 1941, e New York, e tremen darvoudoù an istor. Ur paotrig hag e vamm, nevez erruet, a vo heuliet. Ar Stadoù-Unanet ne gemeront ket perzh c’hoazh en eil brezel bed met stignet eo an traoù evel-just. Un doare ukroniezh eo an istor neuze, savet war kevezerezh Tesla hag Edison. N’eo ket klok an istor evel-just met peadra a zo da ijinañ e vo savet armoù, robotoù ha me oar ivez eus tu Japan.
Brav ‘m eus kavet an tresadennoù met un tamm iskis al lusk, ne oan ket tapet kement-se en istor. Un diouer a bersonelezh gant an haroz marteze ? Santet e vez un tamm levezon Alex Alice (a zo trugarekaet gant an oberourien) met hep an nerzh… Da welet penaos e troio an istor!fantomesteslaIstor ha livioù gant Marazano, tresadennoù gant Guilhem. Embannet gant Le Lombard, d’ar 26 a viz Eost 2016.

Un million d’éléphants

Posted in Levrioù bannoù-treset with tags , , , , , , on C'hwevrer 18, 2017 by geekezig

un-million-delephantUn million d’éléphants a ginnig ur sell war istor al Laos e-kerzh an XXvet kantved. Awenet gant istor familh Vanyda, met ivez testenioù bet dastumet e-pad ur veaj du-hont, e vo tro da welet a-hed ar pajennoù istorioù buhez liesseurt. Brezelioù (Indosina, Vietnam), diktatouriezh komunour, divroañ… N’eo ket skañv an darvoudoù kontet.
Desket ‘m eus ur bern traoù diwar-benn istor al Laos met start ‘m eus kavet pas kaout ur gartenn (hag a zo er fin e gwirionez, pebezh drochez!) evit kompren pelec’h e tremene an traoù pe d’an nebeutañ pegen pell e oa ar c’hêrioù an eil re eus ar re all pe e-kichen peseurt harzoù. Ma, ma vefen fin ne vefe ket bet ken poanius. Memes kudenn ‘m eus bet gant an tudennoù, ur BERN a zo, rummadoù disheñvel eus memes familh ha peadra da vezañ kollet mik. Evidon-me e vefe bet boued evit div levrenn pe neuze e vefe bet ret chom hep kontañ traoù zo (marteze ne oa ket ezhomm komz diwar-benn al ladyboy da skouer?)…
Ma, ul levr dedennus eo memestra gant tresadennoù ha livioù a-feson. Santet e vez e oa pouezus evit Vanyda komz diwar-benn istor he familh ha bro hec’h orinoù. Marteze e vefe bet gwelloc’h dezhi sevel an istor hec’h unan?millionelephantsIstor gant Jean-Luc Cornette, tresadennoù gant Vanyda. Embannet gant Futuropolis, d’an 3 a viz Genver 2017.

Jimmy’s Hall

Posted in Filmoù with tags , , , , on Genver 31, 2017 by geekezig

jimmy-s-hallNe gav ket den e vefe gwall anavezet ar film-mañ gant Ken Loach. Ur film o tremen e Iwerzhon e 1932 eo. Kontañ a ra istor Jimmy Gralton, en doa ranket tec’hout d’ar Stadoù-Unanet 10 vloaz a-raok. Distreiñ a ra d’e gêriadenn e kontelezh Leitrim ha goude atiz reoù yaouank ar vro e tiviz digeriñ en-dro ur sal foran evit eskemm, deskiñ traoù ha dañsal. N’eo ket gwelet mat gant an Iliz (a ra war-dro an deskadurezh) ar raktres-se hag an holl a gemer perzh er c’hentelioù pe en dañsoù a zo gwelet evel komunour hag enep Iwerzhonat.
Dedennus ‘m eus kavet gwelet pegen skoemp e c’halle bezañ an traoù da vare stad frank Iwerzhon (betek 1937 neuze) ha levezon bras an Iliz katolik war ar vuhez politikel.
Klasel-kenañ eo ar film mod all hag un diouer a from a zo marteze gant an hollad. Ur film bihan gant Ken Loach met dedennus bepred!

Film sevenet gant Ken Loach. Rouantelezh-Unanet, Iwerzhon ha Frañs, 2014, 1e46.

The Catcher in the Rye

Posted in Levrioù with tags , , on Genver 25, 2017 by geekezig

the-catcher-in-the-ryeSetu echu ganin ma levr kentañ eus ar bloaz. Divizet am boa lenn The Catcher in the Rye, ul levr klasel! Holden Caulfield, 16 vloaz, a vo heuliet e korf daou pe dri devezh, en e skol da gentañ hag e New York da c’houde, un tamm a-raok vakañsoù Nedeleg.
Holden a zo ur paotr fin met koulskoude ne teu ket a-benn da gaout ul live dereat er skol. Ur wech ouzhpenn eo bet skarzhet eus e skol. Gant un tamm arc’hant e pourmeno e New York (a anavez mat peogwir emañ e dud o chom eno). Fent a zo gant ton ha geriaoueg Holden. Un tamm displijus eo ar paotr avat. Ne gavan ket dre ret e vefe heverk eus ur c’hrennard c’hwezek vloaz ordinal. Ar pezh am eus kavet kreñv-tre kentoc’h a oa pegen digenvez eo Holden. Klask a ra tud da abuziñ o amzer gantañ, mignoned ha mignonezed pe tud dianav mik.
N’on ket sur da gompren da vat perak eo ken klasel al levr-se. Re gozh on? Pe ne lennan ket d’ar mare mat? N’eo ket souezhus ken lenn ul levr kontet gant ur c’hrennard. An doare “trumm” da zezrevellañ, o heuliañ penn-da-benn red soñjoù Holden an hini a chom kreñv c’hoazh hirie an deiz moarvat.
Ma, laouen on da vezañ lennet The Catcher in the Rye daoust din chom hep kompren da vat perak eo ken brudet. Kompren a ran avat pegen dic’hortoz e oa d’ar mare m’eo bet embannet. C’hoarzhadennoù ha prantadoù melkonius a chomo din eus ma lennadenn, sur.

Romant skrivet gant J.D. Salinger. Embannet gant Little, Brown and Company d’ar 16 a viz Gouere 1951.

%d bloggers like this: