Archive for the Filmoù Category

Paterson

Posted in Filmoù with tags , , , , on Gouere 10, 2018 by geekezig

Paterson a zo blenier karr-boutin e kêr Paterson, New Jersey. Emañ o vevañ gant Laura, e vignonez ha Marvin, ur c’hi bihan. Ar film a ziskouez ur sizhun a-bezh gant boazioù ar c’houblad, an dud a wel Paterson bemdez hag all. Plijet on bet gant ar c’haozeadennoù klevet gantañ er c’harr-boutin, an eil-tudennoù en davarn, evel ur stirad heuliet e gwir. Ar pep gwellañ evidon a oa div lodenn resis : pa gomz Paterson gant ur plac’hig a skriv barzhonegoù ha pa teu ur japanat da gomz gantañ er fin. Ur film diwar-benn barzhoniezh eo Paterson, Paterson a skriv barzhonegoù a-raok e labour, e-pad e ehan hag all. E gwirionez ez eus kalz traoù o deus plijet din er film-se met hegaset on bet spontus gant tudenn Laura hag an darempred a zo etrezi ha Paterson. Lakaet e oan diaes gant kinkladur an ti (aozet gant Laura). Kompren a ran neuze e c’hallfe plijout ha displijout da dud all, me zo bet re jenet gant traoù zo evit profitañ e gwirionez eus al lodennoù o deus plijet din spontus. Marteze ur film berroc’h a vefe bet gwelloc’h? Pe ur film berr zoken gant ar gaozeadenn etre Paterson hag ar japanat hepken? Piv ‘oar!

Film sevenet gant Jim Jarmusch. Stadoù-Unanet Amerika, Alamagn ha Frañs, 2016, 1e58.

Advertisements

Joy

Posted in Filmoù with tags , , , , on Gouere 4, 2018 by geekezig

Ur film diwar-benn ur plac’h he deus laosket he hunvreoù a gostez eo Joy. Bac’het eo en ur saviad start gant he zud o c’houlenn sikour, he gwaz-bet c’hoazh o chom en ti, he bugale… N’hall ket tapout pep lec’h. Pa oa bugel e plije dezhi ijinañ a bep seurt traoù ha keuz he deus eus penaos eo troet an traoù eviti. En desped d’an holl tro-dro dezhi ec’h ijino ur valaenn-torch a raio kalz berzh. Heuliet e vez hec’h “emgann” evit bezañ doujet gant he c’henlabourerien, ober bruderezh evit hec’h ijinadenn hag all. Ur film a ro startijenn eo, gwelout ur plac’h ken mennet a zo awenus met un tamm hir eo avat ha start eo bepred krediñ e Jennifer Lawrence evel mamm a diegezh, d’am meno.

Film sevenet gant David O. Russell. Stadoù-Unanet Amerika, 2015, 2e04.

Iron Man 3

Posted in Filmoù with tags , , on Even 25, 2018 by geekezig

Ne oan ket bet o welet Iron Man 3 er sinema, kavout a ran un tamm randonus filmoù Marvel goude ur mare (pe da vareoù zo ^^).
Tony Stark n’a ket mat abaoe darvoudoù New York e barzh The Avengers. Ur sponter anvet “The Mandarin” a ra reuz ha mignon Stark, Happy, a zo gloazet en un darzhadenn. Ar pezh a zo, n’eus roud eus bombezenn ebet. Buan e vo dizoloet ez eus tud, liammet gant an arme, a vez graet taolioù-arnod genetek warno, hag a dro fall a-wechoù.
Dudius ‘m eus kavet ar film, ha plijet a-walc’h on bet gant emdroadur “The Mandarin” (pe ar souezhadenn), an emgann fin a zo bamus a-walc’h, santet e vez mat ar blijadur eo bet ijinañ un emgann a seurt-se. Domaj eo e vefe ken skañv roll Pepper bepred er rummad filmoù-mañ met ur film dudius eo.

Film sevenet gant Shane Black. Stadoù-Unanet Amerika, 2013, 2e11.

Little Evil

Posted in Filmoù with tags , , , , on Even 14, 2018 by geekezig

Fellout a rae din sellet ouzh ur film war netflix ha divizet sellet ouzh Little Evil, diabeg pe dost (seblantout a rae skañv).
Gary a zo o paouez dimeziñ gant Samantha. Tremen a ra mat pep tra met poan en deus gant mab Samantha, Lucas, ur paotrig tavedek. Tamm-ha-tamm e kred dezhañ eo Lucas an diaoul.
Lodenn gentañ ar film n’eo ket dispar : un heuliad farsadennoù a c’haller ijinañ evit ober goap eus ar filmoù spont gant bugale a ra aon eo. N’eo ket dedennus-tre. Adalek deiz-ha-bloaz ar paotrig avat (d’ar 6 a viz Even, evel-just) e teu da vezañ fentusoc’h me gav hag an drederenn ziwezhañ en deus plijet din muioc’h, dudius hag un tammig dic’hortoz.
N’hallan ket kuzuliañ ar film-se kement-se peogwir n’eo ket gwall soutil, na  fentus e gwirionez fentus met ma fell deoc’h sellet ouzh ur film droch ha skañv, perak ket?

Film sevenet gant Eli Craig. Stadoù-Unanet Amerika, 2017, 1e35.

LIFE

Posted in Filmoù with tags , on Mae 14, 2018 by geekezig

LIFE a zo ur film-skiant faltazi. N’eo ket ur film fall evidon-me, met ur film hep kalz a ijin, tremenet war-lerc’h ur bern filmoù all a galite gant memes rekipe. Start e vo derc’hel soñj eus LIFE neuze ken klasel eo.
Ur strollad tud a zo er savlec’h egor etrebroadel (ISS), o labour a zo studial un tamm douar eus Meurzh. Ur c’hellig a zo e-barzh an tamm douar-se. Posupl eo neuze e vefe boudoù bev war pladenn v/Meurzh! Kavout a reont penaos e kresk ar boud-se, met kreskiñ a ra buan ha speredek spontus eo. Ar skipailh eo a zo en arvar bremañ.
Ur film “egor” klasel neuze war vourzh ul lestr gant ur strollad tonket. A bep seurt tudennoù a zo hag elfennoùigoù evit reiñ un tamm istor dezhe, kompren peseurt sell o deus war an traoù ha perak e tibabont ober tra-mañ-tra. Efedus ‘m eus kavet an dibab-se peogwir ne gemer ket kalz plas war red an darvoudoù ha lusk ar film a ya kentoc’h buan. Ur film dudius met re heñvel eus filmoù all bet gwelet dija, siwazh!

Film sevenet gant Daniel Espinosa. Stadoù-Unanet Amerika, 2017, 1e44.

Schindler’s List

Posted in Filmoù with tags , , , on Mae 2, 2018 by geekezig

Penaos ‘ta e oan chomet keit all hep bezañ bet gwelet Schindler’s List ? N’ouzon ket. Unan eus perzhioù mat Netflix a zo ivez kinnig filmoù klasel a c’haller gwelet en-dro pe dizoloiñ. A-raok na vefe tennet eus roll filmoù ar servij e oa ret din e sellet neuze!
Oskar Schindler a oa ur rener embregerezh alaman, ezel eus ar strollad nazi. Er film eo gwelet evel un den a oar ober brav d’ar re all, profañ traoù, kaout plijadur, bezañ gwelet mat ha kaout a bep seurt darempredoù mat gant tud al live uhel evit lakaat e embregerezhioù da vont. Ne seblant ket bezañ donezonet evit kontañ pe merañ kement se. Evit espern arc’hant eo e tiviz implij yuzevien hepken en e labouradeg e Polonia, micherourien a goust marc’hadmatoc’h int. Tamm-ha-tamm avat e vez gwelet o klask implij an holl reolennoù a c’hall evit reiñ labour da dud reuzeudik o stad, gwashaat ha startaat a raio divizoù an 3de reich avat ha disfiz a vo outañ hag e doare, tamm-ha-tamm.
Ur film e gwenn-ha-du eo Schindler’s List. Ur film brav eston, kalet kenañ, fromus, pouezus. Komprenus eo en defe Steven Spielberg bet c’hoant enoriñ an “haroz ordinal”-mañ ha graet en deus en un doare efedus.
Hir eo ar film avat hag ar fin tout (gant an aktourien hag an dud wirion o vont war bez Oskar Schindler) a zo a re marteze, evit red an istor ha nerzh ar film. N’eo ket ur gwall rebech, an hini nemetañ am eus d’ober e gwirionez, ken bamus eo ar film mod all.

Film sevenet gant Steven Spielberg, diazezet war levr Thomas Keneally : Schindler’s Ark. Stadoù-Unanet Amerika, 1993, 3e35.

Pan

Posted in Filmoù with tags , , on Ebrel 15, 2018 by geekezig

Ur film ouzhpenn tro-dro da b/Peter Pan. N’eo ket an dra-se en deus roet din c’hoant da sellet ouzh Pan kement-se met kentoc’h e sevener, Joe Wright.
Pan a ginnig gouzout penaos o deus Peter ha James (Hook) talet asambles ouzh ur morlaer spontus a zistruje Neverland : Blackbeard. Un doare “origin story” diouzh ar c’hiz neuze.
N’on ket bet tapet en istor kement-se ha jenet on bet spontus gant ar skeudennoù hag an efedoù ispisial : vil euzhus. Ur spont pa soñjer pegen brav en deus gallet filmoù all savet gant Joe Wright bezañ (Atonement da skouer pe c’hoazh Anna Karenina…).
Prest e oan da baouez an DVD pe dost d’ur mare zo, ken hir e kaven ma amzer. Didalvoud a seblant an istor. Ne oan ket displijet spontus met ne welen ket pal ar film. Digempouez e seblant bezañ, lodennoù zo a zo sañset “fentus” (evit ar vugale) met degaset int iskis (start eo bezañ Steven Spielberg!), daveoù modern a zo gant ar sonerezh met n’ouzer ket mat perak… Souezhus e gwirionez. N’on ket evit kompren !
Evel-just e vo start chom hep menegiñ tudenn Tiger Lily, priñsez ar boblañs henvroat ha plac’h wenn nemeti ar meuriad… Plijout a ra din kalz Rooney Mara met un tamm groz e oa memestra.
Dipitus e meur a geñver neuze.

Film sevenet gant Joe Wright. Awenet gant oberenn J.M. Barrie. Stadoù-Unanet Amerika, 2015, 1e51.

%d bloggers like this: