Not Tonight

Ur c’hoari diorroet gant PanicBarn hag embannet gant No More Robots eo Not Tonight. Deuet ‘oa er gouloù d’ar 17 a viz Eost 2018 war PC. Kavet e vez ivez war Switch.
C’hoari am eus d’ar stumm Switch.
Heñvel eo ar c’hoari ouzh Papers, Please. E 2018 e bro Saoz emañ Albion kentañ e penn ar vro, ur politikerezh start-kenañ a zo a-enep da forzh peseurt annezad en defe un hendad bennak bet ganet e lec’h all. Ar g/c’heodad-ez 112 omp, gant un hendad bennak eus ur vro european all. Dav bevañ en ur savadur miret evit an dud all eveldomp, en ur c’hortoz bezañ skarzhet kuit…
Labourat a reomp e servijoù surentez toulloù-noz. Da gentañ eo ret sellet ouzh oad an dud hepken (arabat laoskel minored da vont barzh), goude-se e vo tikidi, listennadoù tud pedet, VIP gant gerioù kuzh o tremen dirak an holl, tud resis n’hallfont ket dont e-barzh (eus broioù resis), ur skanner evit sellet ma n’eus ket kontilli gant an dud, paperoù faos, ur visa evit mont-tre pe c’hoazh ur c’hementad arc’hant pe «skor sokial» evit gallout mont ‘barzh. Tamm-ha-tamm ec’h erru an elfennoù-se evit bezañ luzietoc’h luzietañ, pezh a zo mat. En tu hont d’al labour e vo ivez da verañ ar yec’hed (skuizhder, naon, yenijenn) hag ar fakturennoù da baeañ. Is-tudennoù a vo gwelet reoliek ivez hag ur strollad emsaverien da sikour, gant traoùigoù da gas da benn. N’eo ket displijus Not Tonight peogwir e ra gant elfennoù diazez Papers, Please. Met re hir eo ha re heñvel an nozvezhioù, goude ur mare ne oa ket kalz plijadur ken, just «dav din mont da labourat aze evit kaout an objed evit mont war-raok». Start ‘m eus kavet ivez al lodenn «n’eo ket memes skeudenn war ar paperoù!» gant tudennoù e pixel art diouzh an noz, ur plac’h gant blev melen a zo ur plac’h gant blev melen, seurt elfenn zo start da gemer e kont gant un design evel-se. Ne oa ket bepred aes mont ha dont gant ar Switch ivez, meur a wech ‘m eus nac’het tud e plas laoskel anezho da vont barzh pe kollet amzer o tigeriñ en-dro ar «renkell» labour pe er ger etre ar gartenn, an arloadoù pellgomz hag all. Moarvat e oa plijusoc’h c’hoari war PC. C’hwitet ‘m eus war traoù fentus zo eus ar c’hoari moarvat (is-tudennoù da laoskel da vont e-barzh hag all) met start oa kompren e gwirionez peseurt efed o defe (un efed o deus) ha n’on ket sur e vefen prest da c’hoari en-dro evel am boa graet gant Papers, Please evit klask an holl «hentoù» posupl.
En tu-hont da se, an istor a zo groz un tamm memestra met ar sonerezhioù hag aergelc’hioù disheñvel hervez al lec’hioù labour a oa plijus. Ur bern mennozhioù mat a zo er c’hoari met n’eo ket dre ret kempouezet mat evit reiñ plijadur war hir dermen.

C’hoari diorroet gant PanicBarn. Embannet gant No More Robots. Da c”hoari war Windows (17 a viz Eost 2018) ha Nintendo Switch (31 a viz Genver 2020).

Mon amour à tout jamais

Ur yaoi all am eus lennet met n’en deus ket plijet kalz din kennebeut. Ar wech-mañ eüruzamant n’eus ket istorioù gwall pe feulster pe tra-pe-dra, istorioù karantez hepken, gwarizi hag ivez penaos e vez degemeret bezañ heñvelreviad er metou micherel e bro Japan. Un tamm dedennusoc’h e keñver kevredigezh neuze. Start am eus kavet heuliañ piv a gomz pegoulz avat, setu ne gomprenen ket mat red soñjoù ha komzoù an tudennoù ha peseurt santadoù o doa. Hegaset on bet ivez gant unan eus an daou baotr o tamall d’egile bezañ arallreviad padal emaint en un darempred abaoe meur a viz.
Ma. N’eo ket fallañ manga ar bed pell ac’hann met n’eo ket dispar kennebeut. Marteze n’on ket plac’h seurt istorioù e gwirionez.

Istor ha tresadennoù gant YONEDA Kô. Embannet e galleg gant Taifu comics, d’ar 24 a viz Gwengolo 2014.

Onward

Anzav a ran e oan leun a rakvarnioù diwar-benn Onward. Neuz “Dreamworks” an tudennoù da skouer a lakae ac’hanon da soñjal e vefe ur Pixar a galite etre. Ha sur on e vo tud o lavar ez eo.
Gwechall gozh e oa hudouriezh er bed, met dilezet eo bet peogwir e oa start da vestroniañ. An elfed, trolled, boudiged ha me oar me a vev tamm-pe-damm eveldomp neuze. 16 vloaz eo Ian. Ur c’hrennard lentik eo ha mezh en deus eus e vreur bras en deus dilezet e studioù hag a dremen e amzer o c’hoari da c’hoarioù-rol.
O mamm a ro dezho ur vazh bet lezet gant o zad evito, a-raok na varvfe, pa oant bihan c’hoazh. Ur sord en deus ijinet an tad evit gallout gwelet anezho e-pad un devezh. Pezh a zo e vank peadra dezho da ober ar sord-se ha kregiñ a reont neuze ur c’hest evit dont a-benn da welet o zad.
Ur film a ra dave d’ar c’hoarioù-rol, d’an istorioù moliac’h ha faltazi, da Lord of the Rings evel-just, eo Onward. Ober a ra gant ur “beaj an haroz” klasel met n’eo ket pounner an daveoù. Dudius-kenañ eo ha kaset mat ha fromus-tre. Un tamm eeun ar santimantoù a lâro tud zo, gant gwir abeg, met tizhet on bet da vat gant an istor-se etre daou vreur o deus kollet o zad re abred. Ur souezhadenn vrav eo bet evidon neuze!

Film sevenet gant Dan Scanlon. Stadoù-Unanet Amerika, 2020, 1e42.

The Boys – bloavezh 1

The Boys a ginnig deomp ur bed e lec’h ma ‘z eus gourharozed. Met meret int gant ur gevredigezh divent, evel aktourien sinema, sportourien pe youtuberien. Hughie a oa o vont da zebriñ gant e vignonez p’eo bet he lazhet gant A-Train, ur gourharoz e-touez ar “seven”, ar seizh gourharoz pouezusañ. Adalek ar mare-se e fello dezhañ kompren perak. Un den souezhus, Billy Butcher, a deuio da glask war e lerc’h ha da ginnig dezhañ dial, sur ez eus traoù lous ha kuzh e bed ar gourharozed.
Feuls ha gwadek eo The Boys. Tamm-ha-tamm e vo dizoloet petra eo sekredoù Vought (an embregerezh e penn pep tra) hag ar gourharozed met ivez perak ne vez ket enklaskoù gant servijoù difenn ar gouarnamant evit tallañ ouzh an traoù dre zindan graet ganto. Ur mennozh mat eo ha liesseurt eo an tudennoù, gant abegoù disheñvel d’ober an traoù ha savoù-poent disheñvel. Plijadur ‘m eus bet o sellet ouzh ar bloavezh kentañ ha kenderc’hel a rin gant plijadur moarvat. N’am eus ket bet tro da lenn ar c’homic book avat setu n’hallan ket keñveriañ an div oberenn.

Stirad krouet gant Eric Kripke, diwar comic book Garth Ennis ha Darick Robertson. Stadoù-Unanet Amerika, 2019 (8 rann 50 munut). Dasparzhet gant Amazon Prime.

The first love melt in ultramarine

N’on ket plac’h ar yaoi pe boy’s love kement-se. Dre zegouezh on kouezhet war hemañ ha soñjet perak ket?
Bez ez eus e klasad Kengo ur paotr na zeu ket d’ar c’hentelioù. Koshoc’h eo eget ar reoù all. Un deiz e wel ar paotr-se gant e eontr, kelenner sonerezh el lise. Tamm-ha-tamm e tiwan mignoniezh etre an daou baotr ha Yoshioka a zispleg perak ne teu ket d’ar c’hentelioù ha petra ‘zo c’hoarvezet gantañ.
Ur manga start eo peogwir ez eus kaoz eus feulster, harellerezh, gwall zoken. Spi a zo eüruzamant met start eo heuliañ an holl darvoudoù a-wechoù (pe kompren piv eo an tudennoù) hag an tresadennoù ‘m eus kavet a live etre. Ur manga etre daou.

Istor ha tresadennoù gant Yuki Ringo. Embannet e galleg gant Taifu Comics, d’an 13 a viz Gouere 2017.

Revenir

Distreiñ a ra Thomas d’ar gêr peogwir eo klañv e vamm. Ouzhpenn daouzek vloaz zo eo aet kuit. Ne oa ket deuet da vare marv e vreur bihan zoken. Ober a ra anaoudegezh gant intañvez e vreur hag e niz neuze.
E steud fall emañ atant ar familh. Dle spontus a zo ganto. Fachet eo bepred e zad gantañ. Tamm-ha-tamm, a zeiz da zeiz, e sikour d’ober war-dro ar paotrig, e klask profitañ eus an nebeut amzer en deus c’hoazh gant e vamm ha komz gant e dad marteze…
Ur film berr-tre eo Revenir, koulskoude e teu a-benn da ziskouez en un doare soutil pegen digenvez e c’hall al labour-douar bezañ. Un endro familh kriz ha tavedek. Prantadoù brav a zo er familh, a-drugarez da Alex dreist-holl. Ur sapre souezhadenn eo bet evidon. Plijet on bet ivez gant labour Niels Schneider hag Adèle Exarchopoulos a lako ac’hanon da zisoñjal La vie d’Adèle tamm-ha-tamm.

Film sevenet gant Jessica Palud. Frañs, 2019, 1e17.

La fille au bracelet

Emañ Lise o vevañ bac’het en he zi. 18 vloaz eo met o c’hortoz he frosez emañ rak tamallet e vez dezhi bezañ bet muntret ur vignonez dezhi daou vloaz oa. Tremen a ra an darvoudoù e bro Naoned, heuliet e vo prosez Lise hag un tammig buhez he familh e-pad padelezh ar prosez.
Prantadoù kemer ar gaoz kreñv a-walc’h a zo er film. Koulskoude em eus kavet e oa un tamm dipitus an disoc’h. Mennozhioù mat a zo, en o-zouez filmañ e palez justis Naoned gant ar mogerioù ruz. Ur prosez start eo diwar-benn darvoudoù ken start all. Meneget e vez revelezh krennarded, traoù filmet ha diskouezet war ar rouedad, ur bed a seblant dianav d’an dud vras. Kriz eo dud gant Lise peogwir ne diskouez ket he from. Ral eo e vefe filmoù o tiskouez ar prosez hepken, hep klask displegañ nag an darvoudoù, nag an enklask, ar mennozh amañ a zo kentoc’h diskouez penaos eo bet cheñchet buhez ur familh abalamour d’an darvoudoù-se. Ur mennozh diazez a-feson met mankout a ra un draig bennak evidon-me.

Film sevenet gant Stéphane Demoustier. Frañs, 2019, 1e36.

En apnée

Ur romant skrivet e gwerzennoù eo En apnée. Kontet eo gant Maxime, skolajiadez. Plijout a ra ur bern traoù da vMaxime, lenn diwar-benn ar pesked da skouer, met ivez pa sell Chloé outi.
En em glevout a ra mat gant he mamm met aon he deus rak he santimantoù ha ne gred ket goulenn sikour digant he mamm. Mont a raio ar plac’hig da glask respontoù e lec’h all.
Simpl-tre eo En apnée da lenn, keuz ‘m eus pas bezañ bet lennet e yezh orin. Fentus ‘m eus kavet deskrivadennoù Chloé a lakae ac’hanon da soñjal e Chloe Price (Life is Strange), hag an harozez Maxime gant kazi memes anv hag hini ar c’hoari-video ha heñvel a-walc’h war tresadenn ar golo…
Ma, ul levr simpl eo neuze met leun a fromoù. Diwar-benn an darempredoù etre kerent ha bugel, pegen kollet e c’hall ur grennardez bezañ. Tudennoù an dud vras a zo dreist, ne seblantont ket disi, gwirheñvel int. Fromet-tre on bet gant al levr-mañ. Me gav e vefe brav e gaout e brezhoneg. Piv ‘oar un deiz bennak?

Romant skrivet gant Meg Grehan. Embannet e galleg gant Talents hauts, d’ar 15 a viz Genver 2020.

Zombi Child

Er bloavezhioù 60, e Haiti e vez douaret Clairvius Narcisse. Goude e interamant e vo tennet eus an douar gant ur strollad tud a implij a re beuzvarv evel sklaved.
Mélissa a vev e Pariz, en ul lise parizian evit bugale ar re o deus bet al lejion d’honneur emañ. Merc’h vihan Clairvius eo. Fanny, ur plac’h eus he c’hlasad a ginnig dezhi dont en he strollad mignonezed. Fanny a dremen hec’h amzer o soñjal e Pablo, hec’h amourouz.
Gorrek spontus eo Zombi Child ha hir ‘m eus kavet ma amzer e gwirionez. Ne oan ket o c’hortoz seurt film e gwirionez. E fin ar film e seblant Fanny dedennet gant ar vodou evit klask ur remed d’he c’halonad ha displeget e vo petra zo c’hoarvezet da gClairvius. Chom a ra a-sav ar film aze avat, evel un digoradur torr-penn a baouezfe rik pa grog an darvoudoù da vezañ dedennus.

Film sevenet gant Bertrand Bonello. Frañs, 2019, 1e43.

Le serment des lampions

Le serment des lampions a felle din lenn abaoe pell. Brav spontus e seblante bezañ gant un aergelc’h barzhoniel a-feson.
Istor ur strollad mignoned a dou e heulfont al lampigoù bet enaouet da vare an diskar-amzer eo. War varc’h-houarn e heuliont ar rinier met tamm-ha-tamm e teu da vezañ start evito. Ben a gendalc’h ha Nathaniel, ur paotrig lakaet a-gostez gant ar re all a zeu gantañ. Asambles e c’hoarvezo ur bern traoù dezho.
Un aergelc’h film troioù-kaer evit ar vugale a zo gant Le serment des lampions, gant tudennoù ha darvoudoù souezhus ha meurdezus war hent an daou baotr. Brav-kaer eo an tresadennoù ouzhpenn. Un doare The NeverEnding Story pe Hilda a zo d’an hollad me gav. Un tamm hir eo marteze, gant nebeut a draoù diwar-benn Ben (an haroz), kalz dedennusoc’h eo Nathaniel.
Ul levr brav-tre eo bepred ha dudius, ar fin a zo kaer-kenañ.

Istor ha tresadennoù gant Ryan Andrews. Embannet e galleg e ti Delcourt, d’ar 27 a viz Mae 2020.