Dielloù evit skrivañ

Paterson

Posted in Filmoù with tags , , , , on Gouere 10, 2018 by geekezig

Paterson a zo blenier karr-boutin e kêr Paterson, New Jersey. Emañ o vevañ gant Laura, e vignonez ha Marvin, ur c’hi bihan. Ar film a ziskouez ur sizhun a-bezh gant boazioù ar c’houblad, an dud a wel Paterson bemdez hag all. Plijet on bet gant ar c’haozeadennoù klevet gantañ er c’harr-boutin, an eil-tudennoù en davarn, evel ur stirad heuliet e gwir. Ar pep gwellañ evidon a oa div lodenn resis : pa gomz Paterson gant ur plac’hig a skriv barzhonegoù ha pa teu ur japanat da gomz gantañ er fin. Ur film diwar-benn barzhoniezh eo Paterson, Paterson a skriv barzhonegoù a-raok e labour, e-pad e ehan hag all. E gwirionez ez eus kalz traoù o deus plijet din er film-se met hegaset on bet spontus gant tudenn Laura hag an darempred a zo etre hi ha Paterson. Lakaet e oan diaes gant kinkladur an ti (aozet gant Laura). Kompren a ran neuze e c’hallfe plijout ha displijout da dud all, me zo bet re jenet gant traoù zo evit profitañ e gwirionez eus al lodennoù o deus plijet din spontus. Marteze ur film berroc’h a vefe bet gwelloc’h? Pe ur film berr zoken gant ar gaozeadenn etre Paterson hag ar japanat hepken? Piv ‘oar!

Film sevenet gant Jim Jarmusch. Stadoù-Unanet Amerika, Alamagn ha Frañs, 2016, 1e58.

Advertisements

Ruby Sparks

Posted in Filmoù with tags , , , , , on C'hwevrer 12, 2018 by geekezig

Calvin a zo ur skrivagner. Brudet eo abalamour d’e romant kentañ bet skrivet da 19 vloaz. 10 vloaz zo bremañ n’en deus ket skrivet kalz traoù all ha ren a ra ur vuhez digenvez en e di. Hunvreal a ra ouzh ur plac’h yaouank hag adkavout a ra e awen, o skrivañ diwar he fenn. Un deiz bennak avat e tizolo en deus krouet ar plac’h-se e gwirionez, bez ez eus outi, hag o chom en e di emañ hi…
N’eus netra souezhus e Ruby Sparks, ur film diwar-benn ur c’hrouer a fell dezhañ krouiñ ur plac’h hervez e c’hoant. Prantadoù fentus a zo er film met kalz prantadoù direnkus a zo ivez pa grog Calvin da glask cheñch Ruby en-dro (paouezet en doa da skrivañ diwar he fenn ur wech komprenet ar galloud en doa warni) pa n’a ket mat an traoù etrezo. Ur prantad start kenañ a vo er fin ivez, tro-dro da se. Iskis eo peogwir e seblant diskouez tuoù droch ar “Manic Pixie Dream Girl” (kaset betek penn ouzhpenn, o vezañ krouet gant an haroz e unan!) met war a seblant ne oa ket c’hoant Zoe Kazan, he deus skrivet ar senario hag a c’hoari perzh Ruby…
D’ur mare zo e vez lâret da g/Calvin pegen emgar eo met ne seblant ket klask eñ cheñch evit gwellaat e darempred gant Ruby ha klask kompren anezhi ha piv eo. Abalamour da se on bet lakaet diaes en ur sellet ouzh ar film a zo skañv ha fentus memestra ma na glasker ket prederiañ re.

Film sevenet gant Jonathan Dayton & Valerie Faris. Stadoù-Unanet Amerika, 2012, 1e44.

Juste la fin du monde

Posted in Filmoù with tags , , , , on C'hwevrer 6, 2018 by geekezig

Ar wech kentañ oa din sellet ouzh ur film savet gant Xavier Dolan. Juste la fin du monde a zo diazezet war ur pezh c’hoari hag anat a-walc’h eo en ur sellet ouzh ar film.
Louis, ul leurenner brudet a zistro da welet e familh. 12 vloaz zo n’en deus ket gwelet anezho. Hirie e rank lavar dezho emañ o vervel. Huchal a ra kalz izili familh Louis, a chom sioul. Dont a raio a-benn da gaout prantadoù e-unan gant pep hini ivez, evel kement senenn ur pezh-c’hoari.
Prantadoù brav-kenañ a zo er film (ar re didrouz, dre vras, goude an holl huchadennoù!) hag ar prantadoù o deus plijet ar muiañ din a vefe start gwelet war ul leurenn peogwir e oa an talennoù a-dost. Souezhet on bet gant Marion Cotillard, am eus kavet bamus e perzh c’hoar-gaer Louis. Diskouez a ra mat ivez an darempredoù start ha skoemp a c’hall bezañ en ur familh, hervez plas pep hini. Laouen e vin o tizoloiñ filmoù all Xavier Dolan bremañ.

Film sevenet gant Xavier Dolan, diwar pezh-c’hoari Jean-Luc Lagarce. Kanada & Frañs, 2016, 1e39.

Je m’appelle Lucy Barton

Posted in Levrioù with tags , , , , , , , on Genver 30, 2018 by geekezig

Ul levr all e oan o lenn met poan am boa un tamm setu ‘m eus soñjet lenn ul levr all, simploc’h marteze evit klask adlañsañ an traoù. Re a levrioù am boa kroget ha dilezet e fin ar bloaz tremen.
Dibabet ‘m eus Je m’appelle Lucy Barton e-touez al levrioù da lenn evit strollad lenn al levraoueg. Dibabet ivez peogwir e oa skrivet gant Elizabeth Strout hag un eñvorenn dispar am eus bepred eus Olive Kitteridge.
Ur skrivagnerez eo Lucy Barton, o vevañ e New York. Pa oa bihan he merc’hed e voe  en ospital e-pad ouzhpenn 2 viz. Dont a reas he mamm da welet anezhi, padal e oa nebeut a darempred etre an div. Ur prantad start ha fromus evito met un degouezh ivez evit Lucy da brederiañ diwar-benn he bugaleaj paour-razh en Illinois.
Tro vo da welet an darempred gant he mamm evel-just, met ivez gant peurrest he familh, ar c’hoant kuitaat ar bed-se, ken start, ar garantez pe an hoal evit tud diavaez he c’houblad da c’houde… A bep seurt traoù a vo meneget e buhez Lucy Barton, hep mont don (traoù zo a vo divinet pe treuzdivinet zoken).
Dipitet on bet un tamm gant trede lodenn al levr, goude vefe aet kuit Lucy eus an ospital, ne seblant ket kaout memes nerzh ken hag ar chabistroù zo berroc’h, hep liamm kement-se hag o vont re vuan e buhez Lucy. D’am meno e vefe bet ret pe echuiñ al levr ur wech kuitaet an ospital, hep gouzout petra oa c’hoarvezet goude, pe kaout ul lodenn a-bezh, kalz hiroc’h, o tremen warlerc’h. Ma, un digempouez a zo sur evidon el levr ha domaj eo rak ne oa ket fall tamm ebet an div drederenn gentañ ha plijadur ‘m eus bet o lenn al levr memestra. Siwazh e choman marteze levezonet re gant ar pezh en doa plijet din kement e Olive Kitteridge hag am eus poan oc’h adkavout abaoe e skridoù Elizabeth Strout a-benn ar fin.

Romant skrivet gant Elizabeth Strout. Embannet e galleg gant Fayard (dastumad “littérature étrangère), d’an 23 a viz Eost 2017.

C’est un oiseau…

Posted in Levrioù bannoù-treset with tags , , , , on Even 7, 2017 by geekezig

Ur sell ispisial kenañ war Superman eo C’est un oiseau… En ur gontañ prederiadennoù ur skrivagner bannoù-treset na fell ket dezhañ skrivañ un istor evit Superman e kinnig Steven T. Seagle dizoloiñ kleñved Hugtinton met ivez komz diwar-benn petra eo arouezioù Superman : ar justis, ar galloud hag all. Ul levr bannoù-treset fromus ha leun a brederouriezh. Tuioù hegasus an dudenn a zo meneget kement hag ar spi a ro. Un istor eo ivez diwar-benn ar skrivagner, e ezhomm da vezañ e unan, an diouer a awen ma chomer e unan ha seurt traoù.
Pinvidik-mor neuze! Un tamm displijus eo tudenn ar skrivagner avat ha n’eo ket aes bepred ivez heuliañ pep tra abalamour d’ar cheñchamantoù stil grafek (ul labour ramzel kaset da benn gant Teddy Kristiansen). Pajennoù kreñv-kenañ a zo avat (p.64-65) ha skeudennoù, livioù, a chomo don ennon d’am soñj. Lakaet en deus a ac’hanon da soñjal er c’hoari The Novelist n’ouzon ket mat perak.
Ul levr dic’hortoz ha brav, dreist-holl evit an dud, eveldon, n’int ket sot gant Superman.Istor gant Steven T. Seagle, tresadennoù gant Teddy Kristiansen. Embannet e galleg gant Urban comics (dastumad graphic) d’ar 26 a viz C’hwevrer 2016 (embannet e oa bet e 2010 e ti Panini dija).

Kenavo bloaz kozh…

Posted in Stlabez with tags , on Genver 2, 2017 by geekezig

Setu echu 2016 ha c’hoant ganin da gomz diwar-benn Soubenn ar Geek. Ouzhpenn c’hwec’h vloaz eo ar blog-mañ bremañ. Daoust din bezañ bevet ur bloavezh sioul pe dost (beaj bras ebet, ezhomm ebet da glask labour pe cheñchamant bras ebet e keñver labour ha lec’h bevañ, estreget un dilojadeg) eo bet ar bloaz rouesañ e keñver skrivañ pennadoù. Koulskoude ‘m eus bet lennet, sellet, c’hoariet kement hag ar bloavezhioù all.

Anzav a ran on bet diskaret ha n’eo ket marteze gant ur postel dizanv am boa resevet e miz Ebrel. Me oar a-walc’h eo arabat reiñ re a bouez da seurt traoù. Pezh a zo, n’eus ket kalz traoù all a lak ac’hanon da soñjal e servij ma blog d’un dra bennak, setu on techet da grediñ er pezh a oa bet lâret er postel-se, evit lodennoù zo. Sur on n’eo ket mat ma live brezhoneg (met se a ouien a-walc’h dija ha kendrec’het on e c’hall pep hini mont da lec’h all ma kav ken spontus-se ma yezh, pe kas evezhiadennoù/posteloù madelezhus evit sikour ac’hanon da wellaat). Techoù fall a zo ganin, ur bern, levezonet on dre ret gant ar galleg pe ar saozneg, pep lec’h tro deomp. Piv n’eo ket? Deskiñ a ran ha klask a ran chom hep ober ar fazioù bet lâret din jentil en dro met plegoù fall a chom bepred ha n’on ket en un endro brezhoneger em buhez pemdez ken. Pe ket e memes stumm da vihanañ. Sur on e cheñch an dra-se un dra bennak.

Ma. N’on ket paouezet da lenn, da sellet ha da c’hoari neuze met an niver a vrouilhedoù pennadoù em blog a zo kresket ha kresket hep na gavfen kalz youl evit sevel anezho e gwirionez. Klasket ‘m eus mirout un nozvezh ar sizhun evit skrivañ pennadoù pe c’hoazh skrivañ ma fennadoù DIOUZHTU (an diskoulm kazi gwellañ evidon-me) met skuishoc’h-skuishañ e oan bepred hag an dale bet tapet na deuen ket a-benn da adtapout james.
Un deiz bennak e lâris da Dornoz «c’hoant ‘m eus da c’hoari da d/Tomb Raider met ret eo din skrivañ pennadoù evit SaG» hag e respontas din «ma vir ar blog ac’hanout da ober ar pezh a fell dit ober n’eo ket mat» (tamm-pe-damm). Ur sapre flac’had e voe evidon rak re wir e oa. ‘M eus aon eo kollet ganin ar blijadur da skrivañ evit SaG. Ul lodenn eus ar blijadur hepken rak da vareoù zo e fell din ober memestra hag e ran, laouen. Met daoust ha ret eo din skrivañ diwar-benn pep tra? N’eo ket. Klask a ran aozañ gwelloc’h ma amzer met n’on ket deuet a-benn evit c’hoazh. Klask a ran ivez mont war-raok gant raktresoù krouiñ all am eus war ar stern abaoe pell, ur romant hag ur c’hoari video (testenn hañ). N’an ket kalz war-raok kennebeut.

Un dra all a zo, un emdroadur a vez kavet er bed a-bezh, emdroadur ar rouedad dre vras : sklaer eo n’a ket an dud kement da lenn blogoù ken met ne fell ket din sevel ur chadenn Youtube evit reiñ ma alioù. Seblantout a ra din bezañ ul labour kalz startoc’h (ouzhpenn skrivañ e vo ret filmañ ha frammañ!) ha ne fell ket din en ober. Ne fell ket din prenañ dafar, n’eo ket ma fal. Ne fell ket din diskouez ma fenn, klask sonerezh ha pep tra a c’hall bezañ gortozet eus ur chadenn YouTube kronikennoù sevenadurel. Ma fal a oa skrivañ reoliek diwar-benn ar produoù sevenadurel a vevezan.

An diouer a evezhiadennoù a zo digalonekaus ivez, un tammig. Lakaat a ra da soñjal n’eus den ebet o lenn. N’eo ket dre ret ur gudenn, me kennebeut ne laoskan ket evezhiadennoù goude pep pennad a lennan war blogoù all. Pezh a zo e kavan start gwelet ‘m eus muioc’h a spam eget a evezhiadennoù ha dreist-holl gwelet kemennoù pozitivel, kalonekaus (blaz «motivational» ganto) er spam-se. Gouelet ‘m eus dourek abalamour d’ur brezhoneger, ur gwir den en doa kollet kalz amzer da lârat din pebezh den euzhus e oan, soñjal a ran bemdez pe dost er gerioù-se, o soñjal devezhioù zo ne servij da vann ebet skrivañ e brezhoneg diwar-benn produoù sevenadurel, n’eo nemet ur c’holl amzer peogwir n’eus brezhoneger all ebet dedennet gant seurt traoù met mousc’hoarzhin a ran reoliek peogwir on entanet gant frazennoù madelezhus robotoù rusian pe amerikan… Trugarez robotoù ar bed da reiñ kalon din, ar vrezhonegerien ha gwir lennerien ne reont ket avat. Daoust ha skrivañ a ran evit robotoù na gomzont ket brezhoneg? Ne gav ket din… 😦

Ma fal nevez a zo kenderc’hel da skrivañ reoliek met hep n’em santout ken kablus ma ne ran ket. Gant ar spi e vo tud c’hoazh evit ma lenn ur wech an amzer, hag evit reiñ o ali da vareoù all, kuit din da soñjal e komzan ma unan evel ar c’hozh follez ma ‘z on, moarvat.

Ra vo seder ha brav 2017 evidoc’h ha leun a levrioù, filmoù, levrioù bannoù-treset, c’hoarioù video, stiradoù da zizoloiñ!

Komzomp e brezhoneg diwar-benn an danvezioù a garomp, daoust da bep tra!

The Squid and the Whale

Posted in Filmoù with tags , , , , , on Here 25, 2016 by geekezig

squidandthewhalejpgThe Squid and the Whale a oa bet kuzuliet din pa oan o komz diwar-benn filmoù Noah Baumbach gant ur c’henseurt. Ur film diwar-benn disparti ur c’houblad ha dreist-holl efedoù an disparti-se war an daou vab hag ar familh dre-vras eo. E 1986 e tremen an traoù, e Brooklyn. Walt a zo 16 vloaz ha bamet rak e dad. Evitañ ez eo kablus e vamm eus an disparti, tra ken. Frank, 12 vloaz, n’eo ket ken taer. An daou a glask kaout evezh o zud en un doare bennak avat, oc’h ober traoù diboell, o klask jeu, o kontañ gaou…
N’eo ket ur film souezhus. Ur film diwar-benn ur metoù arzourien e New York… C’hwi oar a-walc’h peseurt doare meuz e c’hall bezañ neuze. Ar pezh en deus plijet din e oa poltredoù tud, gant sioù, displijus, kollet en o buhez nevez. N’eo ket dic’hortoz an disparti met un efed en deus war pep hini. Gwirheñvel en deus seblantet din neuze ha kreñv-tre ‘m eus kavet ar fin ouzhpenn. Ur film dedennus bepred, a gav din!

Film sevenet gant Noah Baumbach. Stadoù-Unanet Amerika, 2005, 1e21.

%d bloggers like this: