Dielloù evit familh

Alida war an treuzoù

Posted in Levrioù with tags , , , , , , on Meurzh 1, 2018 by geekezig

Nigel a zo ur c’hrennard gant berr-alan, o vevañ e Brest. Rankout a ra tremen dre vered Sant Varzhin evit mont d’al lise. Du-hont e ra anaoudegezh gant Alida, ur plac’h yaouank kevrinus…
Sorc’hennet eo ar paotr yaouank, dilezel a ra e vignoned, ar skol ha hi a seblant kaout galloudoù hud peogwir e sikour anezhañ da sioulaat e boan.
Kontet eo Alida gant Nigel ur wech erru kozh. Kontañ a ra deomp brasañ karantez e vuhez, pa oa 15 vloaz. Un istor leun a faltazi eo hag a ziskouez mat pegen sorc’hennet e c’hall unan bennak bezañ d’an oad-se, diseblant d’an dañjer ha d’ar reolennoù.
Ul levr plijus eo da lenn ha moarvat en defe plijet kalz din pa oan krennardez abalamour d’e demoù! Laouen on e vefe seurt levrioù evit ar grennarded e brezhoneg bremañ 😉

Romant skrivet gant Maguy Kerisit, skeudennaouet gant Gaël Cuin. Embannet gant TES en dastumad Koad glas, d’an 20 a viz Genver 2016.

Advertisements

Babycall

Posted in Filmoù with tags , , on C'hwevrer 25, 2018 by geekezig

Un neuz Dark Water a oa gant Babycall. Anna a dec’h kuit rak he gwaz feuls gant he mab en ul lojeiz sokial. Heuliet eo gant ar servijoù sokial. Nec’het bras evit he mab e pren peadra da glevout anezhañ o kousket en e gambr. Met klevout a ra ur bugel all dre skinoù ar “baby phone”…
Babycall n’eo ket ur film spont kement-se. N’eus jump scare ebet da skouer. Elfennoù faltazi a zo evel-just met kollet e oan kentoc’h eget kurius, siwazh. An displegadenn am eus kavet re aes ivez ha start da zegemer, istudennoù zo a zifoup kuit ken buan ha tra. Marteze e oa re a demoù disheñvel evit ur film a seurt-se (bugale gwallgaset, merc’hed gwallgaset, servijoù sokial hag all).
Iskis eo ivez peogwir e seblant re zigempouez a-spered Anna evit ma vefe nec’hus a-walc’h distro an tad feuls, rak Anders a seblant ivez bezañ gwallgaset gant e vamm abalamour d’he doareoù d’ober. Moarvat ne oa ket pal ar film koulskoude?
Dipitet on bet gant Babycall anat deoc’h. Dark Water a sellfen a-walc’h en-dro avat…

Film sevenet gant Pål Sletaune. Norge, Alamagn & Sweden, 2011, 1e36.

Ruby Sparks

Posted in Filmoù with tags , , , , , on C'hwevrer 12, 2018 by geekezig

Calvin a zo ur skrivagner. Brudet eo abalamour d’e romant kentañ bet skrivet da 19 vloaz. 10 vloaz zo bremañ n’en deus ket skrivet kalz traoù all ha ren a ra ur vuhez digenvez en e di. Hunvreal a ra ouzh ur plac’h yaouank hag adkavout a ra e awen, o skrivañ diwar he fenn. Un deiz bennak avat e tizolo en deus krouet ar plac’h-se e gwirionez, bez ez eus outi, hag o chom en e di emañ hi…
N’eus netra souezhus e Ruby Sparks, ur film diwar-benn ur c’hrouer a fell dezhañ krouiñ ur plac’h hervez e c’hoant. Prantadoù fentus a zo er film met kalz prantadoù direnkus a zo ivez pa grog Calvin da glask cheñch Ruby en-dro (paouezet en doa da skrivañ diwar he fenn ur wech komprenet ar galloud en doa warni) pa n’a ket mat an traoù etrezo. Ur prantad start kenañ a vo er fin ivez, tro-dro da se. Iskis eo peogwir e seblant diskouez tuoù droch ar “Manic Pixie Dream Girl” (kaset betek penn ouzhpenn, o vezañ krouet gant an haroz e unan!) met war a seblant ne oa ket c’hoant Zoe Kazan, he deus skrivet ar senario hag a c’hoari perzh Ruby…
D’ur mare zo e vez lâret da g/Calvin pegen emgar eo met ne seblant ket klask eñ cheñch evit gwellaat e darempred gant Ruby ha klask kompren anezhi ha piv eo. Abalamour da se on bet lakaet diaes en ur sellet ouzh ar film a zo skañv ha fentus memestra ma na glasker ket prederiañ re.

Film sevenet gant Jonathan Dayton & Valerie Faris. Stadoù-Unanet Amerika, 2012, 1e44.

Juste la fin du monde

Posted in Filmoù with tags , , , , on C'hwevrer 6, 2018 by geekezig

Ar wech kentañ oa din sellet ouzh ur film savet gant Xavier Dolan. Juste la fin du monde a zo diazezet war ur pezh c’hoari hag anat a-walc’h eo en ur sellet ouzh ar film.
Louis, ul leurenner brudet a zistro da welet e familh. 12 vloaz zo n’en deus ket gwelet anezho. Hirie e rank lavar dezho emañ o vervel. Huchal a ra kalz izili familh Louis, a chom sioul. Dont a raio a-benn da gaout prantadoù e-unan gant pep hini ivez, evel kement senenn ur pezh-c’hoari.
Prantadoù brav-kenañ a zo er film (ar re didrouz, dre vras, goude an holl huchadennoù!) hag ar prantadoù o deus plijet ar muiañ din a vefe start gwelet war ul leurenn peogwir e oa an talennoù a-dost. Souezhet on bet gant Marion Cotillard, am eus kavet bamus e perzh c’hoar-gaer Louis. Diskouez a ra mat ivez an darempredoù start ha skoemp a c’hall bezañ en ur familh, hervez plas pep hini. Laouen e vin o tizoloiñ filmoù all Xavier Dolan bremañ.

Film sevenet gant Xavier Dolan, diwar pezh-c’hoari Jean-Luc Lagarce. Kanada & Frañs, 2016, 1e39.

Woman In Gold

Posted in Filmoù with tags , , , , , , , , , , on Genver 31, 2018 by geekezig

Ne ouien ket tamm ebet diwar-benn petra oa kaoz e Woman in Gold. Kontañ a ra istor ar prosez a zo bet etre Maria Altmann ha kêr Vienna tro-dro da daolennoù livet gant Klimt bet laeret d’he familh gant an nazied. Un istor digredus a-walc’h peogwir e oa peadra da baouez gant ar prosez buan ken digalonekaus ma oa. Ar film a ziskouez an darempred etre Maria hag un alvokad yaouank, mab bihan d’ar sonaozour Arnold Schoenberg, en deus roet nerzh dezho da vont betek ar penn.
E-pad ar film e vo gwelet ivez eñvorennoù yaouankiz Maria, a-raok an eil brezel bed, ur wech aloubet kêr Vienna gant an nazied ha pa deus ranket tec’hout.
Kalz plijadur ‘m eus bet o sellet ouzh ar film, a-drugarez d’an aktourien dreist-holl. Un doare teneridigezh a zo evit an tudennoù, sur.
Start eo avat kompren perak n’en deus ket fellet da virdi ar Belvedere kaout emglev (ken sur e oant da c’hounit?) e plas laoskel an taolennoù da vont. Na trist eo soñjal e ranker bremañ mont da New York da welet poltred Adele Bloch-Bauer, heverkañ skouer eus arz Klimt. War memes tro, daoust hag eñ n’eus ket galloudusoc’h arouez evit diskouez ar ranngalon eo bet evit ar Yuzevien o deus ranket tec’hout o bro a-benn chom bev (evit ar re o deus gallet chom bev)…
Setu neuze ar pezh a zo er film-se, kontet en un doare efedus me gav.

Film sevenet gant Simon Curtis. Rouantelezh-Unanet, Stadoù-Unanet Amerika, Alamagn & Aostria, 2015, 1e49.

Je m’appelle Lucy Barton

Posted in Levrioù with tags , , , , , , , on Genver 30, 2018 by geekezig

Ul levr all e oan o lenn met poan am boa un tamm setu ‘m eus soñjet lenn ul levr all, simploc’h marteze evit klask adlañsañ an traoù. Re a levrioù am boa kroget ha dilezet e fin ar bloaz tremen.
Dibabet ‘m eus Je m’appelle Lucy Barton e-touez al levrioù da lenn evit strollad lenn al levraoueg. Dibabet ivez peogwir e oa skrivet gant Elizabeth Strout hag un eñvorenn dispar am eus bepred eus Olive Kitteridge.
Ur skrivagnerez eo Lucy Barton, o vevañ e New York. Pa oa bihan he merc’hed e voe  en ospital e-pad ouzhpenn 2 viz. Dont a reas he mamm da welet anezhi, padal e oa nebeut a darempred etre an div. Ur prantad start ha fromus evito met un degouezh ivez evit Lucy da brederiañ diwar-benn he bugaleaj paour-razh en Illinois.
Tro vo da welet an darempred gant he mamm evel-just, met ivez gant peurrest he familh, ar c’hoant kuitaat ar bed-se, ken start, ar garantez pe an hoal evit tud diavaez he c’houblad da c’houde… A bep seurt traoù a vo meneget e buhez Lucy Barton, hep mont don (traoù zo a vo divinet pe treuzdivinet zoken).
Dipitet on bet un tamm gant trede lodenn al levr, goude vefe aet kuit Lucy eus an ospital, ne seblant ket kaout memes nerzh ken hag ar chabistroù zo berroc’h, hep liamm kement-se hag o vont re vuan e buhez Lucy. D’am meno e vefe bet ret pe echuiñ al levr ur wech kuitaet an ospital, hep gouzout petra oa c’hoarvezet goude, pe kaout ul lodenn a-bezh, kalz hiroc’h, o tremen warlerc’h. Ma, un digempouez a zo sur evidon el levr ha domaj eo rak ne oa ket fall tamm ebet an div drederenn gentañ ha plijadur ‘m eus bet o lenn al levr memestra. Siwazh e choman marteze levezonet re gant ar pezh en doa plijet din kement e Olive Kitteridge hag am eus poan oc’h adkavout abaoe e skridoù Elizabeth Strout a-benn ar fin.

Romant skrivet gant Elizabeth Strout. Embannet e galleg gant Fayard (dastumad “littérature étrangère), d’an 23 a viz Eost 2017.

Chronicle

Posted in Filmoù with tags , , , , , on Genver 28, 2018 by geekezig

Ur film “found footage” diwar-benn tri lisead ordinal gant galloudoù eo Chronicle. Kostez Seattle emaint o chom.
Tudennoù klasel kenañ int : ar sportour a ra berzh, ar paotr iskis-lent-digenvez hag e genderv sympa. Heuliet e vez neuze penaos e teskont mestroniañ hag ober gant o galloudoù.
Plijet en deus ar film din peogwir e tiskouez penaos e c’hallfe tud ordinal ober gant galloudoù dreistordinal d’un deiz d’egile : ober farsadennoù met ivez ober drouk, a-ratozh pe get.
Ur film berr-tre eo, n’eus ket amzer da gavout hir (h)e amzer! Ur film “bihan” a c’hoari en un doare fin gant e du “found footage”, kentelius un tamm marteze (pezh n’en doa ket ezhomm da vezañ) met dedennus da welet e-touez an diniver a filmoù harozed ha gourharozed a vez abaoe un toullad bloavezhioù.

Film sevenet gant Josh Trank. Stadoù-Unanet Amerika, 2012, 1e23.

%d bloggers like this: