Dielloù evit Ebrel, 2017

Beauty & The Beast

Posted in Filmoù with tags , , on Ebrel 28, 2017 by geekezig

Ur genseurtez/mignonez he doa bet kement a blijadur gant Beauty & The Beast e felle dezhi e welet en-dro ha bet on ganti.
Ret eo gouzout emañ Beauty & The Beast e-touez ar filmoù bevaat Disney a blij ar muiañ din.
Kregiñ a ra ar film nevez hep gwerennoù livet ar film bevaat, ma, n’eo ket gwall dra (zoken ma plije din è_é). Tamm-ha-tamm avat e kav din sellet ouzh un eilenn divlaz. Mankout a ra ar pezh a blij din er film bevaat ha n’eus ket kalz a draoù disheñvel hag a vefe dedennus. Ar cheñchamant brasañ a zo tudenn Gaston. Luke Evans a zo bamus a-walc’h er roll-se met deuet eo da vezañ kazi plijus pe d’an nebeutañ en deus doujañs evit Belle hag he fersonelezh, ne ra ket goap outi gant he levrioù da skouer, ar pezh a zo iskis un tamm (met n’eo ket ken simpl hag a oa er film bevaat, pezh n’eo ket fall kennebeut). An daouad gant Le Fou am eus kavet fentus.
Er c’hastell avat… Tudennoù ar “skipailh” a ra kazi aon gant an efedoù ispisial. Memes efed ha penn-kentañ The Jungle Book hep na paouezfe ar santad james. Ul lodenn evel kanaouenn “Be My Guest” en deus lakaet ac’hanon un tamm diaes da skouer. Taol-mouezh gall Ewan Mc Gregor n’eo ket deuet brav kennebeut…
Eus e du, ar priñs a zo “fentus” met perak ‘ta e ra goap eus al levrioù a blij da v/Belle? Traoù nevez a zo bet ouzhpennet d’an istor diwar-benn bugaleaj Belle hag hini ar priñs am eus kavet dister (ha kanaouennoù nevez savet = PERAK? Pell int eus live ar re orin ha n’am eus ket komprenet c’hoazh da betra e servijent). Un dra dedennus a zo bet ouzhpennet memestra : liamm ar c’hastell gant ar gêriadenn, o tiskouez splann en doa ar mallozh un efed war an dud all e diavaez ar c’hastell, se oa kavet mat me gav.
N’on ket bet heuget dirak ar film, plijadur ‘m eus bet zoken met ur c’hwitadenn eo evidon e-keñver ar film diazez.
Kresket eo c’hoazh ma c’harantez evit ar film bevaat neuze ha dreist-holl evit an dibaboù kamera dedennus a oa (Belle war skeul ar stal levrioù, robenn Belle o tremen dirak ar c’hamera e-pad dañs “Tale As Old As Time”).
Ur c’hevrin : perak eo gwisket ar baotred gant chupennoù a lak da soñjal e reoù Eliant er fin? 😀

Film sevenet gant Bill Condon. Stadoù-Unanet Amerika, (e sinemaoù Frañs abaoe an 22 a viz Meurzh) 2017, 2e09.

Advertisements

Wild

Posted in Filmoù with tags , , , on Ebrel 26, 2017 by geekezig

Diazezet eo Wild war levr Cheryl Strayed, ur plac’h bet graet ganti ar PCT (Pacific Crest Trail) er bloavezhioù 90. Bet eo hec’h unan war an hentoù e-pad 3 miz. Koulskoude ne oa ket ur plac’h da gerzhet kement-se met ezhomm he doa d’ober un tamm kempenn en he buhez. Goude marv he mamm eo aet an traoù da hesk eviti, dramm ha rev e doareoù dañjerus.
Frammet eo mat ar film evit diskouez penaos e servij ar valeadenn-mañ da veaj e spered Cheryl, he darempredoù, he eñvorennoù, ar pezh he deus keuz bezañ bet graet, hag all. Un istor bamus a-walc’h (start eo ar valeadenn, ha n’eo ket marteze!), gant dañjerioù an hentoù (en o-zouez evit merc’hed o unan), bevañ bepred en diavaez, debriñ ha kousket dindan an holl koulzioù amzer, sec’hed, naon ha skuizhder, an digenvezded met ivez plijadurioù ar prantadoù diskuizh gant ar gerzherien all, resev pakadennoù gant dilhad prop e-pad an ehanoù e kêriadennoù…
Kalz sonerezh a zo er film ivez, kanaouennoù kanet gant Cheryl war an hent, kanet gant he mamm, gant tud all… Ur prantad brav ‘m eus tremenet ganti war an hentoù ha reiñ a ra c’hoant ober seurt beaj speredel un deiz bennak, ma ‘z eus ezhomm… Ne vez ket gwelet Reese Whiterspoon, alies war ar skrammoù a-benn ar fin ha deuet eo brav ganti perzh Cheryl, leun a nerzh ha bresk war un dro.
Plijadur ‘m eus bet gant ar film-mañ!

Film sevenet gant Jean-Marc Vallée. Diazezet war levr Cheryl Strayed Wild: From Lost to Found on the Pacific Crest Trail. Stadoù-Unanet Amerika, 2014, 1e55.

À nous deux, Paris!

Posted in Levrioù bannoù-treset with tags , , , on Ebrel 18, 2017 by geekezig

N’on ket bet dedennet james gant levrioù JP Nishi, ur Japanad o reiñ e sell war b/Pariz. Met dre m’eo bet kinniget deomp gant embanner e levr diwezhañ degemer anezhañ el levraoueg e seblante sirius lenn un tamm ar pezh en doa graet, memestra.
Kroget on en urzh neuze gant À nous deux, Paris! a zispleg penaos eo erruet e Pariz, hep gouzout galleg, evit dont da labourat gant tresourien bannoù-treset (met buan e komprenas ne ya ket en-dro an traoù evel e Japan).
Kontañ a ra neuze gant fent hag en un doare skañv-tre an traoù a gav souezhus e Pariz, doareoù da vezañ hag all. Un tamm pounner eo a-wechoù abalamour d’e dudenn lu ha kliched met moarvat gwir-tre evit Japaniz a zeu da veajiñ ha/pe da vevañ e Frañs.
Istor ha tresadennoù gan Jean-Paul Nishi. Embannet e galleg gant Philippe Picquier, d’ar 4 a viz Mae 2012.

Girls bloavezh 5

Posted in Stiradoù, webstiradoù ha skinwel with tags , , , , , , , , , , on Ebrel 13, 2017 by geekezig

Resevet eo bet pempvet bloavezh Girls el levraoueg ha soñjet ‘m eus “sell ‘ta! Petra ‘zo c’hoarvezet gant an tudennoù-se?!”
Plijadur ‘m eus bet gant lodenn gentañ ar bloavezh, dreist-holl gant ar pezh a c’hoarveze gant Shoshanna, e bro Japan.
Ur rann a-bezh a zo tro-dro da Varnie, a zo un dudenn a zisplij d’ur bern tud ha koulskoude e kavan eo an hini gwirheñvelañ (pe ez eus traoù a gavan ouzhin enni?) : “Panic at Central Park” a zo deuet brav-tre. Goude-se avat n’on ket bet plijet kement gant fin ar bloavezh, abalamour marteze da zarempred Jessa hag Adam pe d’an nebeut a Shoshanna a vez gwelet. Piv ‘oar!
Nebeutoc’h a draoù dedennus a zo dre vras er bloavezh avat (n’eus ket kaoz ken eus politikerezh gant tudenn Ray na kement-se eus krouiñ ha skrivañ, gant Hannah ha Marnie). An holl a zo o labourat pe gant studioù, darempredoù stabil tamm-pe-damm, n’eus ket kalz tra nevez… Estreget Shoshanna hag ar pezh a vev pell vro hag an doare m’eo rannet etre ar c’hoant da zistreiñ hag an ezhomm da dec’hout ‘m eus kavet kreñv-tre. Ar peurrest ne oa ken met adlavarout traoù a oa bet lavaret dija, siwazh. Ma, ne chom ket kalz a rannoù ken, tost echu ar stirad a-bezh neuze e klaskin mont betek ar penn memestra. Diwezhatoc’h!
Ur wech ouzhpenn e oa plijus sellet ouzh ar “featurette” evit pep rann a zo war an DVD hag un toullad tammoù bet tennet.

Stirad bet krouet gant Lena Dunham. Bloavezh gant 10 rann tro 26 munut, bet skignet evit ar wech kentañ war HBO etre an 21 a viz C’hwevrer hag ar 17 a viz Ebrel 2016.

Dédale 1

Posted in Levrioù bannoù-treset with tags , , on Ebrel 3, 2017 by geekezig

Div harozez Dédale a genloj asambles peogwir e labouront evit un embregerezh c’hoarioù video. En em adkavout a reont en ul lec’h souezhus, ur savadur heñvel ouzh hini o labour met a seblant mont en-dro evel ma c’hallfe ur c’hoari ober. Dañjerioù a zo met ivez traoù a ya en-dro en un doare resis. Mont a reont war-raok en endro iskis-mañ en ur glask a bep seurt traoù ha kompren reolennoù al lec’h…
Ur meskaj etre ar c’hoari Portal hag ar film Cube eo Dédale kazi. Un daouad fentus eo (an div dudenn), unan a glask pep tra evit gwelet penaos e ya en-dro ar “c’hoari” eben a zo kentoc’h dedennet gant an istor, petra eo sekred al lec’h… Un daolenn eus an doareoù c’hoarierien ha c’hoarierezed a zo 😉
Un tamm souezhus eo avat gwelet ur “c’hoari video” war baper evelse, traoù zo n’int ket anat da gompren, ne seblantont ket dre ret mont en-dro. Fentus eo ar mennozh avat ha kevrinus ar bed ha perak emañ ar merc’hed aze. E-pad pegeit e chomo ken dudius ? Un afer all eo !

Istor ha tresadennoù gant Takamichi. Embannet e galleg gant Doki doki, d’ar 6 a viz Gouere 2016.

%d bloggers like this: