Soubenn ar geek

JCVD

geekezig — Tue, 24 Jan 2012 09:58:11 +0000

Ne ya ket mat an traoù gant Jean-Claude Van Damme. Laeret eo bet e rol gant Steven Seagal, tremenet eo fall an torr-dimeziñ gant e wreg… Distreiñ a ra da Velgia. En ur glask arc’hant evit e alvokad e vo tapet e tagadenn an ti-post.
Domaj eo e vefe bet savet ar film evit reiñ titouroù tamm-ha-tamm (da skouer e-pad ar c’hard eur kentañ e c’haller krediñ eo bet taget an ti-post gant Van Damme e-unan), krouiñ a ra-se ul lusk gorrek, gwelet e vez en-dro memes tammoù meur a wech gant selloù disheñvel. Ar skeudenn a zo teñval-tre, gris, gwer, n’eo ket plijus spontus.
Ret eo anzav avat eo dic’hortoz awalc’h e vefe un aktour o c’hoari e rol en un doare ken tost outañ e-unan. N’eo ket ur film fentus, nag ur film goapaus. Poltred un den a zo bet diskaret gant Hollywood eo, treuzkomprenet gant an darn vrasañ hag en deus graet fazioù eveljust. Brav-tre eo an unangomz a zo d’ur mare-se zo, bamus ha fromus eo. Domaj eo ne vefe ket ken kreñv ar senario a-hed ar film, rak peadra ‘oa d’ober ur film mat-tre d’am soñj.

La saga d’Atlas & Axis 1

geekezig — Tue, 24 Jan 2012 08:54:51 +0000

Atlas hag Axis a zo daou gi, o vevañ en ur gêriadenn anvet Kanina. Goude ur veaj bennak e tizoloont eo bet taget Kanina gant ur strollad vikied (vichas?) (viking ar chas koa). Distrujet eo pep tra. Deviñ a reont korfoù marv o mignoned ha merzout e vank div barez, en o-zouez c’hoar Atlas. Mont a reont davet an anternoz neuze…
Un istor klasel kenañ eo hini Atlas hag Axis. A bep seurt tud e kavfont war o hent, mignoned pe enebourien ha hir e vo ar veaj. Arabat gortoz un istor strakus. Ma fell deoc’h lenn un istor efedus gant fent ha tresadennoù plijus, aze e kloto mat.

Scalped 4

geekezig — Sun, 22 Jan 2012 16:37:32 +0000

Un draig a zo bet en deus jenet ac’hanon nebeutoc’h eget da gustum e-barzh Scalped. N’eo ket ar chabistroù kentañ, treset gant unan bennak all. An hollad a zo ken vil eget boaz. D’am meno eo kentoc’h ar fed ne vefe ket heuliet Bad Horse kement-se (ha pa vez ez eus peadra da soñjal e troio fall buan awalc’h…). Heuliet e vo kalzig Dino, ar paotr yaouank, a zaio davet tud fall evit kaout un tamm arc’hant, ha Red Crow, rediet da brederiañ war an den a fell dezhañ bezañ, abalamour e vez roet dezhañ ar sac’hig e-lec’h m’emañ ene Gina evit ur bloaz. Ma vez mat e emzalc’h e c’hallo ene Gina mont kuit, mod all e chomo war an Douar, kollet.
Ouzhpenn komz eus tamm eus kredennoù indian e vo kalz kaoz eus dibaboù ha peseurt emzalc’h kaout evit kuitaat/gwelaat ar mirlec’h. Dedennus ha teñval bepred.

Crime School 1 : La rentrée des crasses

geekezig — Sun, 22 Jan 2012 10:42:02 +0000

C’hoant em eus bet da lenn un toullad levrioù bannoù-treset “evit ar vugale” nevez erru el levraoueg. En o-zouez em eus dibabet Crime School.
Tomoki a zo ur paotrig sirius-tre, labourat a ra mat er skol, donezonet eo evit ar matematikoù dreist-holl ha sikour a ra e vamm a sav anezhañ hec’h unan. Enskrivet eo bet en ur skol brevez arbennig war ar matematikoù ha ret e vo dezhañ kuitaat o enezenn sioul. Ur wech war ar vag e kompren buan n’emañ ket o vont d’ar skol vat…
Ar skolidi all a zo feulz, drouk, laeron ha me oar me. Ouzhpenn-se e vezont gourc’hemennet evit o emzalc’h fall!!
Un den iskis a zeuio da welet Tomoki evit displegañ dezhañ ez eus tu da gavout ene ar brasañ torfedourien (crimesouls) goude m’en defe Tomoki kavet unan. Ret e vo dezhañ kavet an holl anezho araok ur strollad tud a fell dezho oc’h implik evit sevel an torfedour dibar !
Plijet kalz on bet gant an istor a vez lañset en un doare efedus hag a ro c’hoant mont pelloc’h. Skañv awalc’h eo ar geusteurenn avat, tu ‘zo da lenn al levrenn dindan dek munut digudenn.
An tresadennoù doare manga n’int ket fall, un tamm goulo an endroioù a-wechoù met logik eo an aergelc’h ha prim al lusk.

Last Night

geekezig — Sun, 22 Jan 2012 10:28:46 +0000

Ur c’houblad yaouank ha cheuc’h o vevañ e New York a dremen un nozvezh gant kenseurted ar paotr, Michael. Joanna (ar plac’h) a zo gwelet mat er metou-se ha kalzig mignoned he deus. Nec’het eo o welet pegen koant eo kenseurtez Michael avat. Un tamm sach-blev a zo etrezo ur wech deuet en-dro en o ranndi.
An deiz warlerc’h e ya kuit Michael e-pad daou pe dri devezh evit e labour. Hegaset gant ar pezh a zo lavaret gant Joanna, e vo dre ret desachet gant e genseurtez… Eus he zu, Joanna a gav ur mignon a-gozh dezhi, Alex. Pediñ a ra anezhi da zont da zebriñ gantañ…
Un tamm jenet on bet gant munutennoù kentañ ar film, e-lec’h ma ne vez ket gwelet ar c’houblad e memes framm james, na sellet ket davet memes tu pe davet an eil eben na mann ebet. Eveljust eo graet a-ratozh met kavet em eus-se feulz un tamm evel doare da gregiñ. Un tamm re a gaoz a zo er film ha gorrek eo al lusk met ne zegas ket re fall an temoù liesseurt a ginnig : dimeziñ re abred, an temptadur, ar gaou hag all. N’eus kentel ebet ouzhpenn, pep hini a c’hall santout an traoù evel en deus c’hoant/ma soñj (hag all). Plijus eo ar c’hlozadur frank a c’hall bezañ komprenet e meur a stumm.

Red Riding Hood

geekezig — Sat, 21 Jan 2012 18:28:21 +0000

Soñjal a rae din gwelet ur film dres e doare Twilight, gant istorioù karantez forzh pegement en ur sellet ouzh Red Riding Hood. Ha kregiñ a ra evelse. Valerie a gar Peter met divizet eo bet gant he zud dimeziñ anezhi da Henry, a zo pinvidikoc’h. Buan-tre e varv c’hoar Valerie, lazhet gant ar bleiz a zo tro-dro d’ar gêriadenn. Bep miz e vez profet loened dezhañ ha den na gompren perak int taget gantañ.
Mont a ra ar baotred da chaseal anezhañ met lazhañ a reont ur bleiz boutin ha n’eo ket ar bleiz bras. Ur wech erru Solomon, un den a iliz e penn ur strollad marc’heien a vez o lazhañ al loened ha boudoù diaoulek dre vras e tro an traoù. Dont a ra ar film da vezañ un enklask en ur gumuniezh vihan evit gouzout piv eo an den-bleiz en o-zouez. Ur bern traoù iskis a vo, peadra da soñjal “ah! anat eo hemañ pe hounnezh”. Heuliet vez gant plijadur neuze, ha ma ouzhpennomp endroioù brav ha nebeut-tre a efedoù ispisial ez eo kentoc’h dereat an disoc’h. Na gomprenan ket tamm ebet perak eo bet graet van adkemer mojenn kabellig ruz. Un toullad traoù a zo heñvel evejust (mamm-gozh Valerie pell er c’hoad hag all) met n’eo ket pouezus tamm ebet ha seblantout a ra (dre vras) lakaet a-ratozh evit klotañ gant ar gontadenn. Setu ur filmig dudius, kuzhet a-dreñv d’ur raktres ha d’ur bruderezh na glotont ket tamm ebet.

Fables 8 : Les Mille et une Nuits (et jours)

geekezig — Sat, 21 Jan 2012 12:09:18 +0000

Kregiñ a ra eizhvet levrenn Fables gant un istorig a zo bet c’hoarvezet gant Jack. Aet kuit eus Fableville gant Jill (Poucelina?) hag ur c’harr-samm leun a vravigoù hag arc’hant, e ya betek Hollywood. Du-hont e tiviz sevel ur studio sinema a-benn sevel filmoù diazezet war e avañturioù. Savet eo an istorig-se gant selloù tud o deus kejet ha labouret gantañ d’ar mare-se, evel ur film polis un tamm. Er fin e vo treitouret gant Jill ha diskuliet d’ar sherif, a laosko anezhañ da vont en eskemm eus lodenn vrasañ e arc’hant.
Goude-se e tistro an traoù da Fableville… Dizoloet e vez e oa bet karget Mowgli da gaout emglev gant mojennoù ar c’hontadennoù arab. Erruout a ra neuze Sinbad hag ur strollad bras awalc’h betek Fableville. Ne dremen ket mat-tre an traoù… Da zigentañ ‘neus den a vefe gouest da gomz Arabeg, neuze o deus kalz poan o komz an eil re gant ar re all, ha goulennet e vez raktal dezho paouez da gaout sklaved. Kuzulier Sinbad a zo feuket bras hag a ziviz kregiñ diouzhtu gant ar brezel a oa raktreset ganto en ur implijout an djinn degaset ganto. Un tamm jeu e vo neuze met un emglev a vo kavet a-benn ar fin.

Le coeur régulier

geekezig — Sat, 21 Jan 2012 11:54:26 +0000

N’em boa ket bet tro da lenn levrioù Olivier Adam biskoazh. Dedennet e oan met pas trawalc’h evit mont betek ar penn ha kregiñ e-barzh unan. N’ouzon ket perak avat em eus bet c’hoant prenañ Le cœur régulier diouzhtu p’eo deuet er-maez e stumm godell (peogwir e oa chekennoù lenn da zispign ganin a lâro teodoù fall). A bep seurt em boa klevet diwar-benn al levr-se, penaos e oa awenet gant un istor wir hag e oa e gwirionez eus al lec’h deskrivet e Japan. N’ouzon ket re hag a-benn ar fin ne fell ket din gouzout.
Perak on kroget da lenn al levr-se dres d’ar mare m’eo marvet tud tro-dro din ivez? Le cœur régulier a zo kontet gant ur plac’h, skuizh gant he buhez pemdez propig. E-kerzh ur stal-labour gant he c’henseurted e vo pellgomzet dezhi gant he c’hoar vihan evit lârat eo marv o breur. Nathan, kazi ur breur gevell eviti. A bep eil e vo heuliet an harozez war roudoù he breur, e Japan, hag ivez ar prantad kañv start he deus bevet araok (koll he labour, kontañ gaou d’he familh, dizoloiñ e oa he breur o c’hortoz ur bugel gant ur plac’h anvet Louise, en doa echuet ar romant a felle dezhañ skrivañ abaoe bloavezhioù hag all).
Gorrek awalc’h eo lusk ar romant, ha da vareoù zo e tistage un tamm ma evezh evit mont da gentren e lec’h all. Da vareoù all em eus kavet ken brav ha gwir ar frazennoù ken on aet da skrivañ anezho en ur c’harned…
Un tamm etre daou e choman aze, plijadur em eus bet o lenn al levr, fromus ha gwirheñvel ‘m eus kavet an istor hag an tudennoù met un draig a zo a vir ac’hanon da vezañ bet bamet. Marteze eo stil ar skrivagner, n’ouzon ket. Evit klozañ e lârin eo un istor familh brav, a ziskriv mat ar skekredoù, an tamalloù mut, an eñvorennoù distumet. Brav eo ivez prantad Sarah e Bro Japan, gant a bep seurt tudennoù (met n’eo ket anat mestroniañ o anv avat), un tamm re a ziskrivadennoù endro a zo marteze, pe ordin un tamm ar memes re (ar gwez kaki, an templ…).

Tomboy

geekezig — Wed, 18 Jan 2012 13:48:13 +0000

Un tammig hir em eus kavet penn-kentañ ar film Tomboy. Ur santad “oh na pegen arabadus e vo” a savas ennon. Ne badas ket pell avat. Laure a zo o paouez erruout en ur c’harter nevez, ur vanlev vihan gant ur c’hoad hag ul lenn nepell. Kejañ a ra gant Lisa, ur plac’hig he oad, a gred eo ur paotr. Adalek ar mare-se e lakao an holl da grediñ eo Michael (h)e anv… Iskis eo ar film peogwir e ouier mat e vo diskuliet da vare an distro-skol, dre ret. N’eus ket re a suspens neuze.
Tomboy a zo ur film gorrek awalc’h a ziskouez mat bed ar vugale, deizioù hir an hañv a ranker leuniañ gant c’hoarioù a bep seurt. Bed ar baotred vihan, a rank bezañ kreñv. Hag ivez ar c’hoant c’hoari da vezañ unan bennak all, c’hoari gant ur c’horf na gourel na gwregel met bugel evit ur pennadig c’hoazh, c’hoant tec’hout ar gazenn “plac’hig” e-lec’h ma rankfe Laure bezañ…
Ur bern mennozhioù dedennus diwar-benn an doare da sevel personelezh an nen a zo er film. Hag ur bern prantadoù brav, goulou an hañv, delioù ar gwez, prantadoù c’hoari simpl ha brav (an div c’hoar er gibell da skouer, Lisa ha Michael o tañsal er gambr…), gwirheñvel. Echuiñ a ran en un doare fin ouzhpenn. Ur film simpl awalc’h eo a-benn ar fin, hep efed bras na netra met speredek ha plijus eo ha diskrivañ a ra mat bed ar vugale.

The Girl With The Dragon Tattoo

geekezig — Tue, 17 Jan 2012 12:35:35 +0000

Anzav a ran diouzhtu. Ma na vefe ket bet sevenet The Girl With The Dragon Tattoo gant David Fincher moarvat em befe soñjet “pfff, n’eo ket gouest an amerikaned da sellet ouzh ur film e YO setu o deus ezhomm ur wech ouzhpenn da sevel o film dezho”. Ha n’eo ket faos penn-da-benn, zoken gant film Fincher. Mat e oa ar filmoù svedat (dreist-holl an hini kentañ) ha n’eo ket kozh-noe memestra!
Ma. Levezonet on bet gant ar filmig-brudañ ivez. Gant ar ganaouenn Immigrant Song adkempennet gant Karen O, Trent Reznor hag Atticus Ross, gant ar frazenn “The feel bad movie of Christmas” (d’am soñj ez eus tu da welet ar film-brudañ-se amañ).
Setu, bet on welet ar film kinniget a-raok ma teufe er-maez e Gaumont Roazhon. Araok kregiñ da gomz diwar-benn ar film e lârin em eus skrivet ur postel d’ar sinema evit lârat pegen dipitet on bet : ne oa son ebet e penn-kentañ ar film, setu on eus bet an digoradur ha penn-kentañ ar roll-digeriñ dison (lakaomp teir munutenn etre tout) ha kroget ar son a-greizh holl, hep adlakaat an teir munutenn hon oa gwelet hep klevet… Me ‘zo sur eo start lakaat ur film e stumm niverel da gregiñ en-dro (…) hag un tamm doujañs evit un oberenn n’eo ket gwall dra memestra.
Neuze! Da gentañ tout e lârin n’on ket deuet a-benn da welet The Girl With The Dragon Tattoo en un doare distag penn-da-benn eus an azasadenn svedat hag eus al levr. Dre ret em eus keñveriet.
Souezhet on bet gant an diforc’h dibaboù a zo bet graet etre an daou film (ar stumm amerikan a ginnig muioc’h “aergelc’h” ar gelaouenn, darempred Blomkvist gant Erika, ar vuhez araok an englask (Blomkvist gant e familh ha dreist-holl e verc’h), a gav din. Gwelet e vez ivez Lisbeth gant he “gward” plijus araok an hini nevez…). Kavet em eus a-benn ar fin e chome tostoc’h ar stumm amerikan d’al levr, en un doare un tamm torr-penn : santet em eus re levezon ar skrid ha ne seblant ket din adlabouret evit klotañ gant stumm ur film kement-se.
Da c’houde ez eus traoù “nevez” (er fin dreist-holl) a c’hall seblantout iskis met n’int ket fall. Un dra en deus plijet din avat a oa an tudennoù. Disheñvel mat int eus reoù ar film svedat ha me gav e klotont gwelloc’h gant reoù al levr. Seblantout a ra Lisbeth gwanoc’h marteze met chom a ra memestra mestr an enklask, mestr ar binvioù, un tu tener, ”torret” a zo ganti muioc’h, n’eo ket ken koant, ar pezh a lak ac’hanon da gavout e glot gwelloc’h gant ar skeudenn em boa outi en ur lenn. (Kavout a raen dispar Noomi Rapace er perzh er stumm svedat, hañ! Met aze e tegas ur sell all war an dudenn) Blomkvist a zo treuzwelus un tamm n’he c’hichen eveljust met pas kement eget er film svedat a gav din, fentusoc’h eo, n’ouzon ket. E gwirionez e kavan dreist awalc’h ar c’hasting dre vras, estreget marteze perzh Martin a seblant iskis adalek ar penn-kentañ (padal e vezer sañset da gavout anezhañ plijus).
Brav-tre eo ar skeudennoù ha plijus eo gwelet eo bet filmet an darn vrasañ e Sveden. Ar pezh a lak ac’hanon da dizhout un draig all em eus kavet iskis : ar gevredigezh svedat a gomz saozneg. Ar film a-bezh a zo e saozneg, pep tra a dremen e saozneg. E saozneg gant un taol-mouezh marplij! N’eo ket displijus penn-da-benn, fentus eo klevet an aktourien gant un taol-mouezh ispisial met ur santad “bed keñver/kenstur” em eus bet a-hed ar film a-benn ar fin. Ne ra ket gwir koa.
Frammet eo en un doare efedus awalc’h, gant lodennoù verr ha splann Blomkvist/Lisbeth, Blomkvist/Lisbeth dre vras ha lak ac’hanon da soñjal eo chomet ivez an doare-se tostoc’h eus framm al levr (ne oa ket disheñvel mik ar framm er film svedat hañ, met ne seblante ket din ken rust). Ne seblant ket hir ar film tamm ebet, zoken evit ar re a anavez mat an istor bremañ… Un tamm pounner ‘m eus kavet ar sonerezh a-wechoù, pouezañ a rae re war traoù anat en deus seblantet din. Gwelloc’h eo bet din labour Trent Reznor war film The Social Network da skouer…
Ur film mat eo The Girl With The Dragon Tattoo, anat. Dibaboù dedennus a zo, ha dudius eo. Ouzhpenn-se e vez dizoloet Rooney Mara, a oa bet merzet e film diwezhañ Fincher nemetken. (Ma gourc’hemennoù d’ar skipailhoù fardañ/kempenn ar blev/gwiskañ ivez!) Siwazh eo re fresk eñvor ar film svedat evit bezañ souezhet mik gant ar film amerikan ha lâromp sklaer n’eo ket tamm ebet film gwellañ David Fincher, a oa deuet a-benn gwelloc’h da gavout ur bersonelezh d’e azasadenn eus Fight Club da skouer. Kuzuliañ a ran ar film-se deoc’h memestra met sioù en deus.